WAKUWAʼIPA SÜNAIN ANOUJAA
«Ayata jülüjain jaaʼin tü kasa anasükat»
¿Kasa anasü jülüjainjatka waaʼin? Saashin Filipos 4:8 jülüjainjatü waaʼin tü shiimüinkat, tü kasa anasü kojutukat sutuma wayuu, tü lotokalü atuma wakuwaʼipa, tü wulekalü atuma waaʼin, tü kasa anasü kamalainkat wamüin otta tü waʼwaataakat saaʼu anain maʼin shia. Tü aküjüneekat yaʼayaa nnojotsü shiain jülüjainjatüin naaʼin waneepia na anoujashiikana tü pütchi aküjünakat suluʼu tü Wiwüliakat. Anapejeʼe jülüjale waaʼin tü kasa anakat nümüin Jeʼwaa suulia jülüjain waaʼin tü kasa ooʼuleʼereenaka waya suulia waneepiain waya nümaa (Sl 19:14).
Eesü kapüleere wamüin wayoutuin tü kasa mojusü antakat suluʼumüin wekii. Eejiraashii waya sümaa tü kasa mojukat watuma otta nümaa Satanaa «chi aluwataakai saʼaka wayuu manoujainsat» (2Co 4:3, 4). Süka niain aluwataain naaʼu na manoujainsaliikana, nia oʼuniraka sukuwaʼipa tü alatakat suluʼu telewisoot, raawia, Internet otta tü karaloʼutakalüirua. Tia mojusü noʼuluʼu Jeʼwaa. Anainjatü watuma süneekia tü wanajakat otta tü waapajakat süka shieerüin jülüjaka waaʼin waneepia jee shieerüin waaʼinreetka tia (Snt 1:14, 15).
SÜCHIKIJEE JÜNAJÜIN TÜ VIDEOKOT WAYOUKTA TÜ NNOJOTKAT WANEEPIAIN ATUMA WAYA NÜMAA JEʼWAA: TÜ MIʼIRAA NNOJOTKALÜ ANAIN, JUSOUTA SHIʼIPAJEE TÜÜ:
¿Kasa nünajawaʼitka chi wawalakai suluʼu nüserulaatse? ¿Jamüsü nukuwaʼipa sutuma?
¿Kasa naainjaka chi wawalakai sutuma naashajeʼerüin tü sümakat Galacia 6:7, 8, TNM otta Salmo 119:37?