WAKUWAʼIPA SÜNAIN ANOUJAA
Nükaalinjain waya Jehová süpüla wachecherüin waaʼin soʼunnaa müliaa
Eʼrüshii waya müliaa wapüshuaʼa süka sülüʼülüin nükalia Maleiwa. Eesüjaʼa jülüjale waaʼin iseerüin wachiki walatüin süchikumüin tia. Ayatüle wachuntuin kaalinwaa nümüin Jehová, wounteerü wachecherüin waaʼin soʼunnaa müliaa jaʼitairü kapüleein maʼin shia (Is 43:2, 4). Eere wanee kasa alataka wamüin maaʼulu, ¿kasa waaʼinrajatka süpüla warütkaain nünainmüin Jehová?
Woʼuraaja. Waküjale nümüin Jehová süpüshuaʼa tü suluʼukat waaʼin, naapeerü wanee anaa wamüin otta katchinjeerü waaʼin nutuma soʼunnaa müliaa (Flp 4:6, 7; 1Te 5:17).
Woutkajaa. Choʼujaasü maʼin wamüin maaʼulu tü pütchi katchinjeetkalü atuma wanoula jee tü natütüleʼerüinjatkalü akajee waaʼin na wawalayuu woutkajaakana amaa (Heb 10:24, 25). Yapale watuma tü wekirajaainjatkalü anain sünain tü outkajawaakat, woʼunule sünain jee wasoutule shiʼipajee tü pütchi asakinnakalü anain, wooʼulaajeechi niain Maleiwa akaalinjain waya sükajee tü nüpülainkat (Alat 2:29, TNM).
Waküja pütchi. Waaʼinmaale tü aküjaakat pütchi, nnojoleerü jülüjakuʼu müin waaʼin tü kasa alatakat wamüin. Waküjapa pütchi, aʼyataajiraashii waya nümaa Jehová otta namaa na wawalayuukana. Suluʼujee tia, aleewajiraashii maʼin waya otta nümaa Jehová (1Co 3:5-10).
SÜCHIKIJEE JÜNAJÜIN TÜ VIDEOKOT NÜMÜLIAJEECHI PIA JEHOVÁ, JUSOUTA SHIʼIPAJEE TÜÜ:
¿Kasa saaʼinraka Malu süpüla ayatüin pejein shia nünain Jehová?
Maʼaka saaʼin Malu, ¿jamüsü sütütüleʼeraka waaʼin tü sümakat Salmo 34:18?
Sünainjee sukuwaʼipa Malu, ¿jamüsü watüjaaka saaʼu naapüin Jehová wamüin tü yalayalaakat weʼrapa müliaa? (2Co 4:7).