«Jürütkaa nünainmüin Maleiwa, nürütkaajeechika jünainmüin» (Santiago 4:8).

¿Naapajüinche Maleiwa pünüiki puʼuraajapa?

¿Asakirüitche pia paaʼin naapajüle Maleiwa pünüiki puʼuraajapa? Nnojoishi neʼe piain pümüiwaʼa jülüjakai aaʼin tia. Wainma na wayuu achuntakana kaalinwaa nümüin Maleiwa sülatapa kasa mojusü namüin, nnojotpejeʼe shia anoutayaain. ¿Shiache sutuma nnojoluin naapajüin Maleiwa nanüiki noʼuraajapa? Nnojottaa. Süküjain tü Bibliakat naapajüin Maleiwa wanüiki wachuntule nümüin wanaapünaa sümaa tü nüchekakat wapüleerua. Wekiraja sünain tü sümakat tü Bibliakat.

NAAPAJÜIN WANÜIKI MALEIWA

«Piakai chi Aapajakai sünüiki wayuu suʼuraajapa, anteerü pünainmüin wayuu eekai eein» (Salmo 65:2).

Noʼutku na wayuukana oʼuraajüshii süka anain naaʼin sutuma, mayaainjeʼe jülüjain naaʼin nnojoluin naapajüin Maleiwa nanüiki. Nnojoishii neʼe oʼuraajüinjanain waya süpüla anainjatüin neʼe waaʼin. Anuu tü sümakat tü Bibliakat: «Pejeshi Jehováa nanain napüshuaʼa na achajaakana nüchiki, na achuntakana kaalinwaa nümüin [...]. Naapeerü nanüiki nachuntapa kaalinwaa nümüin» (Salmo 145:18, 19).

Watüjaa aaʼu naapajüin Jehová nanüiki na wayuu aʼyataakana nümüin. Anuu tü nümakat wamüin: «Jeenajeechi taya, shiimainshaana juʼuraajeenain tamüin, tasouteechikalaka jiʼipajee» (Jeremías 29:12).

NÜCHEKÜIN MALEIWA PUʼURAAJÜIN NÜMÜIN

Wanee wayuu joyotushi otta tü nüchonkat ashaitüsü sümaa shimiʼira.

«Nnojo juuʼulaain suulia oʼuraajaa» (Roma 12:12).

Sütütüleʼerüin waaʼin tü Bibliakat süpüla woʼuraajüinjanain waneepia nümüin Jehová. Sutuma tia wayaawata aaʼu nücheküin Jehová woʼuraajüin nümüin (Mateo 26:41; Éfeso 6:18).

¿Jamüsü nüchekaka Maleiwa puʼuraajüin nümüin? Jülüjataa paaʼin tüü: Talatüsü naaʼin wanee wayuu nuchuntule kaalinwaa nüchon nümüin. Süka nüchoin nia, eesüjaʼa nütüjaaitpale saaʼu tü kasa choʼujaakat nümüin jee jamüin naaʼin. Wanaa sümaa nüküjain chi nüchonkai tü kasa choʼujaakat nümüin niyaawata aaʼu chi nüshikai alin maʼin nia nüpüla chi nüchonkai jee nütüjaain saaʼu nükaalinjüneechin nutuma. Müsia neʼe wakuwaʼipa woʼuraajapa nümüin Jehová, jayasü waaʼu weʼitaain waaʼin nünain jee keeʼireein waaʼin warütkaain nünainmüin (Proverbios 15:8; Santiago 4:8).

JÜLÜJASHI PIA NAAʼIN MALEIWA

Wanee wayuu joyotushi saaʼu wanee escalera sümaa mojuin naaʼin otta eesü wanee kaaja nüʼütpaʼa kaluʼuka tü kasa nüchisekat.

«Jüpüta najapuluʼu Maleiwa süpüshuaʼa tü kasa shapaakalü atuma jaaʼin, jama jülüjain maʼin jia naaʼin» (1 Pedro 5:7).

Nücheküin Maleiwa puʼuraajüin nümüin süka alin pia nüpüla jee jülüjain pia naaʼin. Nütüjaa aaʼu tü kasa müliakalü atuma paaʼin jee nükaalinjeein pia.

Chi aluwataashikai David achuntushi kaalinwaa nümüin Jehová jee nüküjain nümüin tü suluʼukat naaʼin jee jamüin naaʼin (Salmo 23:1-6). Aishi David nüpüla Jehová müsüjeseʼe naapajüin nünüiki nuʼuraajapa nümüin (Aluwataaushikana 13:22). Müsia wakuwaʼipa, naapajüin Maleiwa wanüiki süka jülüjain waya naaʼin.

«AISHI MAʼIN TAPÜLA JEHOVÁ SÜKA NAAPAJÜIN TANÜIKI»

Tia pütchikat nüshajala wanee wayuu ashajakai waneirua salmo suluʼu tü Bibliakat. Niyaawatüin saaʼu naapajüin Jehová nünüiki nuʼuraajapa nümüin jee anasü naaʼin sutuma tia. Aleewashi maʼin nia nümaa Maleiwa jee nüchecherüin naaʼin wanaa sümaa sülatüin kasa kapüleesü nümüin (Salmo 116:1-9).

Watüjaale saaʼu naapajüin Maleiwa wanüiki, nnojoleena waya ooʼulaain suulia oʼuraajaa. Jülüjaa waaʼin tü alatakat nümüin wanee wayuu kanüliakai Pedro, kepiashi nia España, wanaa sümaa 19 nuuyase chi nüchonkai pasiruwaashi nia jee outaka nia. Mojushaatasü naaʼin sutuma tia jee nuchuntaka nümüin Maleiwa nümülialüin naaʼin jee nükaalinjain nia. Anuu tü nümakat Pedro: «Tatüjaa aaʼu naapajüin Jehová tanüiki, nükaalinjain taya jee nümülialüin taya sümaa tü taʼwayuusekat nakajee na wawalayuukana».

Wanee wayuu mojukai aaʼin najapuluʼusü wanee ayaakua otta na naʼaleewainyuukana namülialüin naaʼin. — Woʼuraajüle nümüin Jehová eeshiijaʼa nükaalinjeenale waya nakajee na waʼaleewainyuukana.

Mayaainjeʼe nnojolin süsoʼiraain naaʼin chi nüchonkai sutuma nuʼuraajüin, anasü naaʼin Pedro sümaa nüpüshi. Anuu tü sümakat María del Carmen, tü nuʼwayuusekat: «Sutuma toʼuraajüin nümüin Jehová tachecherüin taaʼin soʼunnaa tia, tayaawata aaʼu jülüjain taya naaʼin Jehová süka jimatüin taaʼin nutuma».

Sutuma tü sümakat tü Bibliakat jee tü namakat waneinnua wayuu wayaawata aaʼu naapajüin wanüiki Maleiwa woʼuraajapa. Eepejeʼe nnojorüle naapajüin Maleiwa nanüiki waneinnua wayuu noʼuraajapa. ¿Naapüinche Maleiwa sünüiki wayuu süpüshuaʼa suʼuraajapa?

a Jehová nünülia Maleiwa saashin tü Bibliakat (Salmo 83:18).