¿Naapajüinche Maleiwa sünüiki wayuu süpüshuaʼa suʼuraajapa?

Nücheküin Jehová naapajüin wanüiki woʼuraajapa nümüin, nnojotpejeʼe naapajüin nanüiki na wayuukana napüshuaʼa, ¿jamüsü maʼaka tia? ¿Kasa jülüjaka waaʼin woʼuraajapa nümüin Maleiwa? Jülüja waaʼin tü sümakat tü Bibliakat.

Waneinnua wayuu suluʼu wanee iküleesia oʼuraajüshii sümaa naashajeʼerüin tü nanüikikat suluʼujee wanee karaloʼuta.

«Puʼuraajapa nümüin Maleiwa nnojo piiteʼerakuʼu pümüin pünüiki» (Mateo 6:7).

Nnojotsü nücheküin Jehová weiteʼerakuʼu wamüinjatüin tü wanüikikat maʼaka saaʼin waashajeʼerapa wanee karaloʼuta, shia keeʼireeka naaʼin waküjain nümüin tü suluʼukat waaʼin. Nnojotsü anain paaʼin nümaa wanee paʼaleewain ayatakai akuentajüin pümüin wanee kasa pejeewa. Waʼaleewajaale nümaa wanee wayuu keeʼireesü waaʼin nüküjain wamüin süpüshuaʼa tü alatakat nümüin. Müinjatia wakuwaʼipa nümaa Maleiwa woʼuraajapa nümüin, müinjana yootokai waaʼin nümaa wanee waʼaleewain.

Wanee wayuu eirakaakai iipünaamüin sümaa nipettüin wanee karaloʼuta süshaitaka aka wayuu loteriia.

«Juchuntule nümüin Maleiwa nnojoleerü aapünüin jümüin tü juchuntakat, jama shiain juchuntuin eeʼiree jaaʼinrüin kasa mojusü» (Santiago 4:3).

Wachuntule wanee kasa nnojotkalü anain nümüin Maleiwa, nnojoleerü naapajüin wanüiki. Jülüjataa paaʼin nukuwaʼipa wanee wayuu ashaitakai saaʼu nneerü jee nuchuntuin nümüin Maleiwa nükanajüinjachin, ¿naapajeetche Jehová nünüiki chi wayuu keeʼireekai aaʼin kamaʼanaa wainma kasa? Nnojoleerü naapajüin nünüiki (Isaías 65:11; Lucas 12:15). Süpüla naapajüinjatüin Maleiwa wanüiki woʼuraajapa, choʼujaasü pansaainjatüin shia sümaa tü sümakat tü Bibliakat.

Wanee shikiipüʼü iküleesia oʼuraajakai napüleerua waneinnua surulaat.

«Nnojoire noonooin wanee wayuu sümaa tü nuluwataakalü anain Maleiwa, nnojoleerü naapajüin nünüiki chia wayuukai süka niyoutuin tü naainjakat» (Proverbios 28:9).

Sümaiwa paala nnojotsü naapajüin Maleiwa nanüiki na wayuu nnojoliikana oonooin sümaa tü nuluwataakalü anain. Müsia sukuwaʼipa maaʼulu, keeʼireere waaʼin naapajüin wanüiki Maleiwa woʼuraajapa wachajaa sukuwaʼipa süpüla woonooin sümaa tü nuluwataakalü anain (Isaías 1:15, 16, Malaquías 3:6). ¿Jama eere wanee kasa mojusü waainjaka sümaiwa paala? ¿Nnojoleetche naapajüin Jehová wanüiki woʼuraajapa nümüin? Motusü naaʼin Jehová tü kasa mojusü waainjakat wayaawajaale suulia jee waainjale tü nüchekakat (Aluwataaushikana 3:19).