¿Kasa piʼreetka puʼuraajüle nümüin Maleiwa?

Süka ayuulin maʼin Pamela eʼrajeʼetsü shia sümaa suʼuraajüin nümüin Maleiwa süpüla süchecherüin saaʼin soʼunnaa tia. ¿Kasa shiʼraka Pamela sutuma suʼuraajüin nümüin Maleiwa?

Anuu tü sümakat: «Sutuma ayuulin taya sutuma kanset shapaasü maʼin taaʼin. Shiasaʼa toʼuraajapa nümüin Jehová jimatüsü taaʼin jee tachecherüin taaʼin soʼunnaa tia. Aijüsü maʼin teʼiruku, anapejeʼe taaʼin süka toʼuraajüin. Nasakirüle taya na wayuukana anale taya ‹nnojo› müsü taya namüin talatapejeʼe taaʼin».

Nnojotsü choʼujaain sülatajatüin wamüin wanee kasa kapüleesü süpüla woʼuraajüin nümüin Maleiwa. Alatüsü kasa kapüleesü wamüin wapüshuaʼa jee choʼujaasü wamüin wakaalinjünüin. ¿Eejeetche kasa anasü weʼreetka woʼuraajüle nümüin Maleiwa?

Anuu tü sümakat tü Bibliakat: «Püküja nümüin Jehová tü alatakat pümüin jee nükaalinjeechikalaka pia. Nnojoleechi niyüülajüin wanee wayuu eekai lotuin akuwaʼipa» (Salmo 55:22). Sütütüleʼerüin maʼin waaʼin tia pütchikat. Woʼuraajüle wanaapünaa sümaa tü nüchekakat Maleiwa naapeerü tü kasa choʼujaakat wamüin jee wachechereerü waaʼin soʼunnaa tü kasa kapüleesü alatakat wamüin (Paashajeʼera tü pütchikat «Tü kasa anasü eekat sutuma woʼuraajüin nümüin Maleiwa»).

Tü kasa anasü eekat sutuma woʼuraajüin nümüin Maleiwa

Jimata paaʼin

«Aluʼu shiainjaʼa anain juʼuraajüle nümüin Maleiwa sümaa juchuntuin maʼin nümüin nuʼunirajatüin jukuwaʼipa sünain kasa süpüshuaʼa jee jaapa waneepia analuʼut nümüin. Jaainjale tia, jimateerü jaaʼin nutuma Maleiwa jee naaʼinmajeerü tü suluʼukat jaaʼin jee tü suluʼukat jikii nükajee Cristo Jesús» (Filipos 4:6, 7). Waküjale nümüin Maleiwa tü shapaaka atuma waaʼin jimateerü waaʼin jee naaʼinmajeerü tü suluʼukat wekii.

Tü kekiwaakat

«Jaʼakale wanee wayuu eekai mekiin, anashi nuchuntule waneepia nümüin Maleiwa, kekiijeechikalaka nia nutuma, jama nüsülajülin Maleiwa namüin napüshuaʼa na wayuukana otta nnojoishii naya niyoujain saaʼujee tia» (Santiago 1:5). Nnojotsü anain tü waneekakat sülatapa wanee kasa kapüleesü wamüin süka shapaain maʼin waaʼin sutuma, wachuntule kekiwaa nümüin Maleiwa nükaaliijeena waya süpüla sotuin waaʼin waneirua pütchi suluʼukat tü Bibliakat.

Atütüleʼeraa saaʼin otta amülialaasü saaʼin

«Katchinsü taaʼin süpüla taaʼinrüin kasa süpüshuaʼa, jama niain Maleiwa katchin atuma taaʼin» (Filipos 4:13). Süka nia Jehová chi Maleiwa pülashikai nütütüleʼerüin waaʼin süpüla walatüin süchikumüin tü kasa kapüleesü alataka wamüin (Isaías 40:29). Müsü tü Bibliakat nia Jehová «chi amülialakai saaʼin wayuu süka nümülialüin waaʼin [...] weʼrapa müliaa» (2 Corinto 1:3, 4).