Eesü süpüla püneeküin tü pukuwaʼipainjatkat watta kaʼi

Eetaairü maʼaka 3.500 juya alatüitpaka süchikijee nüküjain Jeʼwaa namüin na aʼwaajakana nia süchiki tü naaʼinrajatkat süpüla anainjatüin nakuwaʼipa. Anuu nünüiki: «Anuu joo tapansaajüin tanüiki jümüin [...] süpüla jütüjaainjatüin saaʼu jaralüinjatüin jüneeküin, tü kataakalü oʼu shiataapa tü outaakat, tü anainjatkalü atuma jukuwaʼipa shiataapa tü mojuinjatkalü atuma jukuwaʼipa. Shiainjatpejeʼe jüneeküin tü kataakalü oʼuu süpüla katüinjatüin joʼu sümaa jüchonnii» (Deuteronomio 30:19).

Keeʼireere naaʼin naya wayuukana anainjatüin nakuwaʼipa watta kaʼi, naneeküinjatü tü anainjatkalü atuma nakuwaʼipa. Anasü waneeküle tia wayakanaya. Anuu sünüiki tü Bibliakat süchiki tü waaʼinrajatkat süpüla anainjatüin wakuwaʼipa watta kaʼi: «Alinjachi jüpüla Jeʼwaa chi Jümaleiwasekai, oonooinjana jia sümaa nünüiki» (Deuteronomio 30:20).

ALINJACHI JEʼWAA PÜPÜLA OTTA POONOOINJATÜ AMAA NÜNÜIKI

PIKIRAJAA SÜNAIN TÜ BIBLIAKAT. Süpüla alinjachin püpüla Jeʼwaa, piyaawatüinjatü saaʼu tü shikirajakat tü Bibliakat nüchiki. Paaʼinrapa tia, piyaawateerü aaʼu aipüralin nia wayuu otta niʼreein pia suluʼu anain pukuwaʼipa. Keeʼireesü naaʼin puʼuraajüin nümüin süka kapülain naaʼin pukuwaʼipa (1 Pedro 5:7). Püchajaale maʼin sukuwaʼipa süpüla piʼraajüin Jeʼwaa, arütkaajeechi nia pünainmüin maʼaka süküjain tü Bibliakat (Santiago 4:8).

PAAʼINRA TÜ PIKIRAJAAKALÜ ANAIN. Süpüla poonooinjatüin amaa nünüiki Maleiwa, paaʼinra tü nümakat suluʼu tü Bibliakat. Paaʼinrapa tia, meerü pukuwaʼipa maʼaka süküjain Josué 1:8, tü makat: «Aneetkalaka pukuwaʼipa eepünaale puʼunuin ooʼulaka kekiijeechi pia sünain tü paainjainjatkat».