1921 Sien juya süchikijee

EEJATÜ wanee pütchi ashajünaka namüin na ekirajaaliikana sünain tü Bibliakat suluʼu Aapiria Wayuu ojuʼitaka suluʼu inglés eneeroʼu 1 soʼu 1921. Müsü tia pütchikat: «¿Jarat tü aʼyatawaa waaʼinmaainjatkat soʼu juyakat tüü?». Süpüla naaʼinmaainjatüin tü aküjaakat pütchi, aküjünüsü suluʼu tia rewiisütakat tü sümakat Isaías 61: 1, 2, tü makat: «Süka taneekünüin nutuma Jeʼwaa süpüla taküjainjatüin süchiki anaa sümüin wayuu eekai anamiain [...,] süchiki tü juya eeinjatkalü oʼu anaa nutuma Jeʼwaa jee süchiki tü kaʼi süsalainjatkalü oʼu saainjala wayuu nutuma».

AKÜJASHII NAYA PÜTCHI SÜMAA YALAYALAIN NAAʼIN

Yalayalainjatü naaʼin na ekirajaaliikana sünain tü Bibliakat süpüla nekeraajüin tü aküjaakat pütchi. Naküjainjatü «süchiki anaa sümüin wayuu eekai anamiain» jee «süchiki tü kaʼi süsalainjatkalü oʼu saainjala wayuu».

Eejachi wanee wawala yalayala aaʼinchi sünain aküjaa pütchi mayaainjeʼe shiʼrülüin wayumüin wayuu nümüin, John Hoskin nünülia, kepiapuʼushi nia chaa Canadá. Soʼu 1921 aküjashi nia pütchi nümüin wanee pasütoot, anuu nünüiki nümüin: «Anashii yootule waya süchiki tü sümakat tü Bibliakat süka anakalü akuwaʼipa, eerejeʼe wanee pütchi nnojotka wanaawain waaʼin sümaa, oʼuneechi taya süka anakalü akuwaʼipa suulia waʼülüjaajiraain». Anuu nünüiki chi wawalakai John süchiki tü alatakat mapa: «Eepa maʼaka jeʼra minuuto yootuin taya nümaa, naashichijaakalaka sümaa nujunaain süchiki tü puettoʼukat».

Anuu nünüiki chi pasütootkai sümaa nuʼwoorolooin nümüin: «¿Jamüshikai pia? Nayainjana na paashajaakana amaa na manoujainsaliikana». Nüchecheraka naaʼin John suulia jashichin nia. «¿Nnojoishisaʼa taya aashajaain nümaa wanee manoujainsai?», maa müshi nia.

Shiasaʼa waneemüin kaʼi, ayatüshia jashichin chi pasütootkai. Anuu nünüiki namüin na jutkatakana nümaa nüchiki chi wawalakai John: «Jalia jia nuulia chi wayuu aküjaikai naʼalain. Kasataalejeseʼe suʼutunüin saaʼin». Nnojotpejeʼe amalajaain naaʼin John suulia aküjaa pütchi sutuma tia, ayatüshia yootuin nia sümaa wainma wayuu. Anuu sooʼomüin nünüiki: «Talatüsü taaʼin sünain aküjaa pütchi sainküin piichi suluʼu tia pueulokot. ‹Watüjaa aaʼuchi wayuuin nümaajachin pia Maleiwa, choʼujaale pümüin wanee kasa puchunteerü shia wamüin›, müshii waneinnua wayuu tamüin».

EKIRAJAASHII NAMÜIWAʼA SÜNAIN TÜ BIBLIAKAT OTTA SÜMAA NAPÜSHI

Süpüla nakaalinjain wayuu na ekirajaaliikana sünain tü Bibliakat sünain ayaawataa saaʼu tü sümakat tü Bibliakat, nakumajüin waneirua pütchi suluʼu tü rewiisütakat The Golden Age (¡Eeja Waaʼin! münüsü maaʼulu) tü pütchikat «The Juvenile Bible Study» (Ekirajawaa sünain tü Bibliakat napüla na jimaʼaliikana jee na majayünnüükana). Tia süpülajatü nekirajaain na wayuukana sümaa nachonnii. Tü naaʼinrajatkat na kachonshiikana shia «nasakirüinjanain nachonnii jee nakaalinjainjanain naya süpüla nousütüin tü pütchikat suluʼu tü Bibliakat». Eesü waneirua pütchi asakinnaka anain süpüla nayaawatüin saaʼu tü kasa mapüleekat suluʼu tü Bibliakat, maʼaka saaʼin «¿Jeʼra karaloʼuta suluʼuka tü Bibliakat?». Otta eejatü waneirua pütchi asakinnaka anain süpüla yalayalainjatüin naaʼin na jimaʼaliikana jee na majayünnüükana sünain aküjaa pütchi maʼaka saaʼin «¿Müliainjanache napüshuaʼa na anoujashiikana saaliijee naküjain pütchi?».

Otta eejatü waneirua pütchi asakinnaka anain suluʼujee tü Bibliakat napülajatka na kakaliainnakana sünain ekirajawaa shia. Tia pütchikalüirua suluʼujatü tü palajatkat karaloʼuta kanüliakat Estudios de las Escrituras. Watta naalii na atüjakana süpüleerua tü Bibliakat sünainjee tia piamasükat sukuwaʼipa ekirajawaa. Aapinnüshii na aashajeʼerakana tia pütchikat nnojoluinjatüin sujuʼituin piantua, aküjünüsü tia suluʼu Eeja Waaʼin ojuʼitaka tisienpüroʼu 21 soʼu 1921. ¿Jamüsüche suʼwanajaaka tia?

WANEE JEKETÜ KARALOʼUTA

Tü karaloʼutakat *El Arpa de Dios* suluʼu inglés.

Wanee tarüjeeta süpüla nütüjaain saaʼu wanee wayuu jalapünaaichin nia sünain aashajeʼeraa.

Tü tarüjeeta sümaajatkat tü pütchi asakinnakalü anain.

Nayaawata aaʼu na wawalayuu oʼunirakana sukuwaʼipa tü aküjaakat pütchi, choʼujaain nekirajaainjatüin anain na wayuukana waneʼewai sukua tü pütchi shikirajakalü anain tü Bibliakat. Süpüla suuntunüin tia, aküjünüsü nowienpüroʼu soʼu 1921 eeitpain tü karaloʼutakat The Harp of God (ojuʼitusü alijunaikiruʼu soʼu 1925, El arpa de Dios sünülia). Na wayuu achekakana tia karaloʼutakat, ashajünüsü nanülia süpüla nekirajünüin sünain tü Bibliakat, The Harp Bible Study Course münüsü tia ekirajawaakat. Tia süpülajatü natüjaain saaʼu tü naaʼinrajatkat Maleiwa süpüla katüinjatüin soʼu wayuu waneepia nutuma. ¿Jamüsü sukuwaʼipa tia ekirajawaakat?

Na wayuu achekakana tia karaloʼutakat, aapünüsia namüin wanee tarüjeeta eere süshajünüin süpana tü naashajeʼerüinjatkat suluʼujee tia karaloʼutakat. Wanee semaana süchikijee tia, aapünüsia namüin wane tarüjeeta sümaajatka waneirua pütchi asakinnaka anain suluʼujee tü pütchi naashajeʼerakat otta tü naashajeʼerüinjatkat soʼu tü wane semaanakat.

Soʼunnaa 12 semaana, aluwataanüsü semaanawai wanee tarüjeeta nümüin chi ekirajaashikai sünain tü Bibliakat natuma na wawalayuukana. Naluwataʼawalin tia tarüjeetakat na wawalayuu laülaayuukana jee na kapüleekana amüin naküjain pütchi sainküin piichi. Anuu sünüiki wanee wawala chejeʼewat Millvale (Pensilvania, Estados Unidos) Anna Gardner sünülia: «Sutuma masaʼain tü tawalakat Thayle, isasü süchiki süküjain maʼin pütchi. Shiasaʼa sutuma müitpain sukuwaʼipa shikirajia wayuu, eeitpa süpüla süküjain maʼin pütchi süka suluwataain semaanawai tü tarüjeeta sümaajatkat tü pütchi asakinnakalü anain na wayuukana». Kettaapa nutuma wanee wayuu ekirajaakai tü tarüjeeta aluwataanakat nümüin, oʼunushii na wawalayuukana nipialuʼumüin süpüla nakaalinjain nia sünain atüjaa sooʼomüin süchiki tü Bibliakat.

Suluʼusü silla de ruedas Thayle Gardner.

WATTAYÜLIA MAʼIN AʼYATAWAA NAPÜLEERUA

Sajaʼlajaayamüin tü juyakat 1921, aluwataashi wanee karaloʼuta chi wawalakai Joseph Rutherford namüin napüshuaʼa na wawalayuukana. Anuu nünüiki: «Anashaatasü maʼin wakuwaʼipa sünain aküjaa tü pütchi süchikikat nukuwaʼipa Maleiwa sünain aluwatawaa soʼu juyakat tüü otta wainma maʼin na wayuu aapajakana shia. Wainmayülia maʼin aʼyatawaa wapüleerua, jütütüleʼera naaʼin na waneinnua süpüla naküjain maʼin pütchi». Watüjaa aaʼu jüüjüüin na ekirajaaliikana sünain tü Bibliakat sümüin tü nümakat süka yalayalain maʼin naaʼin sünain aküjaa pütchi süchiki Nuluwataaya Maleiwa soʼu juyakat 1922.

Aleewajiraashii jee yalayala aaʼinchii naya

Aijiraashii jee akaalinjiraashii na Ekirajaaliikana sünain tü Bibliakat, shialeekajaʼa soʼunnaa müliaa. Joʼu waashajaai süchiki tia (Prov. 17:17).

Maayoʼu 31 soʼu juyaka 1921, eesü wanee kasachiki alataka chaa Tulsa (Oklahoma, Estados Unidos), Masacre Racial de Tulsa sünülia tia. Alatüsü tia saaliijee nüpüreesajinnüin wanee wayuu mütsiia atachi, aliʼrajünüshi nia saaliijee müliain wanee jierü wule ata nutuma. Alatüshii suulia 1.000 wayuu wulekana ata ashutaka naaʼu jeʼrashii wayuu mütsiiakana ata. Jee müsia chaa Greenwood, eere kepiain na wayuu mütsiiakana ata, alatüsü suulia 1.400 piichi jee oikaalee aʼluwajünaka. 36 wayuu oʼutunaka aaʼin soʼu tia saashin wanee karaloʼuta, eepejeʼe süpüla sülatüin suulia tia.

Anuu tü nümakat Richard Hill, wanee wawala mütsiia atachi kepiakai chayaa Greenwood: «Soʼu tü kaʼi sülatakalü oʼu tü kasachikikat, ayatüshiʼiya waya ekirajaain sünain tü Bibliakat namaa na wawalayuukana maʼakaapuʼu shia. Kettaapa waya sünain tü ekirajawaakat, ayatüsia waapüin tü kousuloʼirakat waneʼereʼeya weisalaapa». Shiasaʼa juunioʼu 1, waneemüin kaʼi süchikijee tia, kapüleʼereesia maʼin tü alatakat. Anuu sooʼomüin nünüiki Richard: «Naapirüin waya waneinnua wayuu süpüla woʼunuinjanain suluʼumüin wanee piichi miyoʼu chajatka Tulsa süpüla waaʼinmajünüinjanain natuma na surulaatkana». Nuʼunaka chamüin chi wawalakai sümaa nuʼwayuuse otta namaa na jaʼraishiikana nachonnii. Suluʼu tia piichikat, eetaashii maʼaka 3.000 wayuu mütsiiakana ata aaʼinmajünaka natuma na surulaatkana.

Soʼu aikat tia, eesü wanee kasa naaʼinraka chi wawalakai Arthur Claus sutuma yalayalain naaʼin. Anuu nünüiki: «Taapapa süchiki suʼluwajünüin jee saʼajünüin piichi chaa Greenwood, oʼunamaatüshi taya sünain akaalinjain chi taʼaleewainkai Richard».

Nüntapa Arthur nipialuʼumüin Richard, antiraashi nia nümaa wanee wayuu wule atachi kaʼapülakai. Naʼaleewain Richard chia wayuukai jee kepiashi nia nüʼütpaʼa. «¿Kasa püchajaaka achiki? ¿Aʼluwajeeshi pia?», müshi nia nümüin Arthur.

Anuu nünüiki Arthur nümüin: «‹Naʼaleewain taya Richard, yaapuʼushi taya nipialuʼu›, müshi taya nümüin. Nnojorüle taküjain tia, nuʼutuinjee aaʼin taya». Arthur nümaa chia wayuukai naaʼinmajüin nipia Richard suulia suʼluwajünüin.

Nikirajüin Arthur Claus 14 tepichi sünain tü Bibliakat sükajee tü karaloʼutakat El Arpa de Dios.

Naapaka süchiki Arthur chajachin Richard sümaa nüpüshi suluʼu tü piichi miyoʼukat eere naaʼinmajünüin sutuma surulaat. Süküjünaka nümüin Arthur nnojoliinjanain süpüla nojuʼituin na wayuu mütsiiakana ata suluʼujee tia piichikat, aluʼujasaʼa eere wanee karaloʼuta nünüliamaajatü chi sülaülakai surulaat, Barrett nünülia. Anuu nünüiki Arthur: «Tachajaain maʼin sukuwaʼipa süpüla taashajaain nümaa chi sülaülakai surulaat. Wanaa sümaa taküjain nümüin tü taaʼinreekat, müshi nia tamüin: ‹¿Paaʼinmajeena naya? ¿Paapeerü tü choʼujaakat namüin?› ‹Aa, jamüsüsaʼa›, tamaka nümüin».

Nuʼunamaataka Arthur suluʼumüin tü piichi eejachire Richard jee naapaka tü karaloʼutakat nümüin wanee surulaat. Anuu nünüiki chi surulaatkai: «¡Atak! Anuu nünülia chi wekiipüʼükai. Anataʼaleeshijaʼa pia süka pümaainjachin wanee wayuu yaajee». Arthur nümaa chi surulaatkai nachajaamaataka achikichi Richard sümaa nüpüshi. Nantapa nanain, oʼunushii naya suluʼu neʼejena Arthur jee chakuwaishii naya nipialuʼumüin Richard.

Nükaalinjain maʼin Arthur chi wawalakai Richard süpüla anainjachin nia sümaa nüpüshi. Sutuma tü naaʼinrakat Arthur, anasü pütchi nachiki na Ekirajaaliikana sünain tü Bibliakat. Anuu nünüiki Arthur: «Chi wayuu aaʼinmajakai nipia Richard niyaawata aaʼu yalayalain waaʼin jee aijiraain waya. Wanaawasü wakuwaʼipa otta nnojotsü alataʼatüin sujutu wayuu wamüin suluʼu nupueulose Maleiwa. Sutuma tia, wainma wayuu aapajeekana tü pütchi süchikikat nukuwaʼipa Maleiwa sünain aluwatawaa».