¿Weʼitaainche waaʼin sünain tü naaʼinrakat Jehová?

1, 2. (1) ¿Jamüsü nnojotka neʼitaain naaʼin waneinnua wayuu nanain na aapünakana amüin laülawaa? (2) ¿Kasa wekirajaajeetka anain sünain ekirajaayakat tüü?

WAINMA wayuu maaʼulu nnojoliikana eʼitaain naaʼin nanain na wayuu aapünakana amüin laülawaa. Alatüsü tia süka nüikaleʼerüin pütchi na sülaülashiikana mma anaka atuma nakuwaʼipa na washinnuukana noulia na maʼletsekana. Saashin tü Bibliakat alaülajaashi «wanee wayuu naaʼu na waneinnua süpüla numojujain nakuwaʼipa» (Ecl. 8:9). Eeshii na nnojoliikana eʼitaain naaʼin nünain Maleiwa sünainjee nakuwaʼipa na shikiipüʼükana tü iküleesiakat. Müshiijeseʼe wakaalinjainjanain na ekirajaashiikana sünain tü Bibliakat süpüla neʼitaainjatüin naaʼin nünain Maleiwa jee nanain na eʼitaanakana nutuma süpüla nuʼunirüin wakuwaʼipa yaa mmapaʼa.

² Nnojoishii nayainjanain neʼe namüiwaʼa na ekirajaakana sünain tü Bibliakat eʼitaainjanakana naaʼin nünain Jehová otta sünain nupueulose. Jaʼitainna kakaliainnale waya sünain anoujaa, ayatüinjatü weʼitaain waaʼin sünain lotuin süpüshuaʼa tü kasa naaʼinrakat Jehová suulia sümalajaain wanoula. Wekirajaa sünain apünüinsü kasa kapüleejeetka atuma weʼitaain waaʼin nünain Jehová. Palajana, waashajeʼerüle wanee aküjalaa suluʼujee tü Bibliakat nnojotka pansaain saaʼin wamüin. Piama, kapüleere wamüin jüüjüüin waya sümüin tü suchuntakat nupueulose Maleiwa. Otta apünüin, sülatüle kasa mojusü wamüin.

WEʼITAA WAAʼIN NÜNAIN JEHOVÁ WAASHAJEʼERAPA TÜ BIBLIAKAT

3. ¿Jamüsü kapüleejeetka wamüin weʼitaain waaʼin nünain Jehová waashajeʼerapa wanee aküjalaa suluʼujee tü Bibliakat?

³ Waashajeʼerapa wanee aküjalaa suluʼujee tü Bibliakat, eesüjaʼa wasakireʼerüle waaʼin jamüin nukuwaʼipa Jehová namaa waneinnua wayuu otta jamüin nüneekaka waneirua kasa. Waashajeʼerüle suluʼu tü karaloʼutakat Números, watüjaweerü aaʼu nuʼutirüin naaʼin Jehová wanee israelita saalinjee nusukuin siki soʼu tü kaʼi neemeraainjatkalü oʼu na israelitakana. Otta waashajeʼerüle süchiki tü alatakat kojuya juya mapa suluʼu tü karaloʼuta chiiruaajatkat Samuel, watüjaweerü aaʼu motuin naaʼin Jehová naainjala David mayaainjeʼe nümaʼüjiraain nukuwaʼipa jee uwomuyuuin nia (Núm. 15:32, 35; 2 Sam. 12:9, 13). Eesüjaʼa süpüla wasakirüin waaʼin sünain tüü: «¿Jamüsü motoko naaʼin Jehová naainjala David eerejeʼe kashüülain tü naaʼinrakat suulia tü naaʼinrakat chi wayuu asukakai siki?». Wekirajaa sünain apünüinsü kasa jülüjainjatka waaʼin waashajeʼerapa tü Bibliakat.

4. ¿Jamüsü weʼitaajeetka waaʼin sünain tü nüneekakat Jehová wapüleerua sünainjee tü sümakat Génesis 18:20, 21 otta Deuteronomio 10:17?

⁴ Nnojotsü süküjain tü Bibliakat süpüshuaʼa tü alatakat. Watüjaa aaʼu shiimain niyaawajaain David suulia naainjala (Sal. 51:2-4). Nnojotpejeʼe süküjain tü Bibliakat süchiki nukuwaʼipa chi wayuu asukakai siki soʼu tü kaʼi neemeraainjatkalü oʼu na israelitakana. ¿Mojusüche maʼin naaʼin saalinjee naainjala? ¿Eʼrüijaashiche wayumüin nümüin Jehová paala? ¿Achiaanüshiche nia paala sümaa ayatüin macheʼein nia? Nnojotsü süküjain tia tü Bibliakat. Watüjaapejeʼe saaʼu matüjain Jehová aainjaa kasa mojusü (Deut. 32:4). Sutuma tü namakat na waneinnua otta sutuma koʼuin wakuwaʼipa sümüin wayuu, eesüjaʼa nnojorüle anain tü jülüjakat waaʼin süchiki wanee kasa. Nnojotpejeʼe müin nukuwaʼipa Jehová, jülüjasü naaʼin süpüshuaʼa tü alatakat sünain wanee kasa (paashajeʼera Génesis 18:20, 21; Deuteronomio 10:17). Weʼraajüle maʼin nukuwaʼipa Jehová jee tü nuluwataakalü anain, weʼitaajeerü maʼin waaʼin sünain anain tü nüneekakat wapüleerua. Eesüjaʼa wainmajüle waaʼin sutuma waashajeʼerüin suluʼujee tü Bibliakat wanee aküjalaa eere nnojoluin süküjünüin maʼin süchiki tü alatakat. Anasü wayaawatüle saaʼu lotuin nukuwaʼipa Jehová «sünain süpüshuaʼa kasa» (Sal. 145:17).

5. ¿Jamüsü anashiijeetka jee mojushiijeetka wamüin wanee kasa sümaa nnojoluin müin shia? (Paashajeʼera tü pütchikat «Eesü anale jee mojule wamüin wanee kasa sümaa nnojoluin müin shia»).

⁵ Eesüjaʼa nnojorüle pansaain wamüin wanee kasa sutuma nnojoluin lotuin maʼin wakuwaʼipa. Süka nukumalain waya Jehová maʼaka saaʼin nukuwaʼipa, mojushiisü wamüin saainjünüle wanee kasa mojusü (Gén. 1:26). Süka nnojoluin lotuin maʼin wakuwaʼipa, eesüjaʼa mojushiire jee anashiire wamüin wanee kasa sümaa nnojoluin müin shia, jaʼitasüjaʼa watüjaain saaʼu süpüshuaʼa tü alatakat saaʼin wamüin. Jülüjataa waaʼin tü alatakat nümüin Jonás. Jashichishi maʼin nia saalinjee nümüliajüin Jehová na ninivitakana (Jon. 3:10–4:1). Anasü tü naaʼinrakat Jehová süka noʼttaain 120.000 ninivita. Wayaawata aaʼu sünainjee tia anain maʼin tü jülüjakat naaʼin Jehová suulia tü jülüjakat naaʼin Jonás.

6. ¿Jamüsü nnojotka choʼujaain maʼin nüküjainjatüin wamüin Jehová jamüin naainjaka wanee kasa?

⁶ Nnojotsü nüküjainjatüin maʼin wamüin Jehová jamüin naainjaka wanee kasa. Sümaiwa paala, eeshii wayuu nüsakiraka Jehová jamüin nanüiki süchiki tü kasa nüneeküinjatkat (Gén. 18:25; Jon. 4:2, 3). Otta eesü nüküjawaire Jehová kasain naainjaka anainjee wanee kasa (Jon. 4:10, 11). Nnojotpejeʼe choʼujaain nüküjainjatüin wamüin jamüin naainjaka wanee kasa. Süka niain Kakumalain waya nnojotsü choʼujaain nüsakirüinjanain waya sünain tü naaʼinrajatkat müleka anale jee mojule shia (Is. 40:13, 14; 55:9).

WEʼITAA WAAʼIN NÜNAIN JEHOVÁ WALUWATAANAPA SÜNAIN AAʼINRAA KASA

7. (1) ¿Jaralii na kapüleekana wamüin weʼitaain anain waaʼin? (2) ¿Kasa kapüleeka atuma tia?

⁷ Watüjaa aaʼu lotuin nukuwaʼipa Jehová sünain süpüshuaʼa tü kasa naaʼinrakat. Eepejeʼe süpüla kapüleein wamüin weʼitaain waaʼin nanain na wayuu nüneekakana süpüla nuʼunirüin wakuwaʼipa. Eesüjaʼa jülüjale waaʼin naaʼinrüin tü nachekakat neʼe namüiwaʼa suulia tü nüchekakat Jehová. Eesüjaʼa süpüla sülatüin tia namüin waneinnua wayuu namaiwajana. Jülüjataa waaʼin tü aküjünakat suluʼu pütchi apünüin. Eesüjaʼa jülüjale naaʼin wanee nüpüshi chi wayuu asukakai siki sükalioʼu eemerawaa müleka nüsakirüle Moisés nümüin Jehová süchiirua tü aainjünüinjatkat. Eesü jülüjale naaʼin wanee naʼaleewain Urías nnojoluin süsalain naainjala David süka niain chi aluwataashikai. Niʼitaain naaʼin Jehová nanain na wayuu nüneekakana süpüla nuʼunirüin sukuwaʼipa nupueulose. Shiasaʼa nnojorüle weʼitaain waaʼin nanain, nnojotsüjaʼamata weʼitaain waaʼin nünain Jehová.

8. ¿Jamüsü wanaawaka suʼuniria nakuwaʼipa na wawalayuukana maaʼulu sümaa tü sümakat Aluwataaushikana 16:4, 5?

⁸ Maaʼulu nuʼunirüin Jehová sukuwaʼipa nupueulose nükajee «chi achepchiee oonookai otta kekiikai maʼin» (Mat. 24:45, TNM). Achepchieekai chii jülüjasü naaʼin tü waʼyataainkat sainküin mmakat süpüshuaʼa otta naküjain namüin na laülaashiikana tü naaʼinrajatkat wapüleerua maʼaka naaʼinrapuʼuin na laülaashii jülüjakana aaʼin na anoujashii namaiwajanakana (paashajeʼera Aluwataaushikana 16:4, 5). Otta na laülaashiikana jülüjainjatü naaʼin saainjünüinjatüin tü aluwataanakalü anain. Jüüjüüle waya sümüin tü suluwataakalü anain waya nupueulose Jehová otta na laülaashiikana, jaʼyeerü waaʼu weʼitaain waaʼin sünain lotuin süpüshuaʼa tü kasa naaʼinrakat Jehová.

9. (1) Püküja wanee kasa kapüleejeetka wamüin jüüjüüin waya namüin na laülaashiikana. (2) ¿Jamüsü kapüleejeetka tia?

⁹ Eesü kapüleʼewaire wamüin jüüjüüin waya sümüin tü naluwataakalü anain waya na laülaashiikana. Jekenainka, süpüla nnojoluin sukumajünüin waneirua Piichi Outkajaalee, süneeküin tü nupueulosekat Jehová nalatinnajanain waneinnua wawalayuu naʼakamüin waneinnua. Naküjain na laülaashiikana namüin waneinnua wawalayuu jalainjanain noutkajaain. Sülatüle wamüin tia, kapüleejeerü wamüin wapütüin wapüshi jee waʼaleewainyuu. ¿Nüküjainche Jehová namüin na laülaashiikana jalainjanain noutkajaain na wawalayuukana waneʼewai nakua? Nnojo, nnojotsü nüküjain tia. Sünainjee tia kapüleejeerü wamüin jüüjüüin waya sümüin tü naluwataakalü anain na laülaashiikana. Niʼitaapejeʼe naaʼin Jehová sünain anain tü kasa naneekakat na laülaashiikana, müinjanaʼaya wayakana.b

10. Sünainjee tü sümakat Hebreokana 13:17, ¿jamüshii jüüjüüinjanaka waya namüin na laülaashiikana?

¹⁰ ¿Jamüshii jüüjüüinjanaka waya sümüin tü naluwataakalü anain waya na laülaashiikana mayaainjeʼe kapüleein shia wamüin? Shia süka paaʼinwajiraajeenain waya namaa na wawalayuukana (Éf. 4:2, 3). Otta müsia aneerü nakuwaʼipa na wawalayuukana nnojorüle yaletüin waaʼin jee jüüjüüle waya sümüin tü naneekakat na laülaashiikana (paashajeʼera Hebreokana 13:17). Tü alanaʼaleekat maʼin sünain anain shia jaʼyeerüin waaʼu weʼitaain waaʼin nünain Jehová, jama nüneeküin na laülaashiikana süpüla naaʼinmajüin waya (Aluw. 20:28).

11. ¿Kasa jüüjüweenaka maʼin atuma waya sümüin tü naluwataakalü anain waya na laülaashiikana?

¹¹ ¿Kasa jüüjüweenaka maʼin atuma waya sümüin tü kasa naluwataakalü anain waya na laülaashiikana? Shia süka watüjaain saaʼu nachuntuin nümüin Jehová tü nüpülainkat süpülapünaa naneeküin wanee kasa wapüleerua, jülüjasü naaʼin tü sümakat tü Bibliakat otta tü suluwataakalü anain nupueulose Maleiwa. Talateesü maʼin naaʼin Jehová natuma otta naaʼinmajeein maʼin waya. Natüjaa aaʼu na laülaashiikana nasouteenain nümüin Jehová saaʼujee tü naʼyataainkat (1 Ped. 5:2, 3). Nnojotsü paaʼinwain wayuu maaʼulu sutuma suʼwaataain wayuu suluʼu shiʼiruku, sutuma tü iküleesiakalüirua jee tü polítikakat. Eekajasaʼa wayakana paaʼinwashii waya sünain aʼyatawaa nümüin Jehová. Wayaawatakalaka saaʼu shiimain nuʼunirüin sukuwaʼipa nupueulose.

12. ¿Kasa naaʼinrajatka na laülaashiikana süpüla natüjaain saaʼu shiimainre niyaawajaain wanee anoujashi suulia naainjala?

¹² Niʼitaain Jehová na laülaashiikana süpüla nakaalinjain na wawalayuukana süpüla wulein nakuwaʼipa. Müleka eere wanee wawala eekai kaainjalain, keeʼireesü naaʼin Jehová naneeküin na laülaashiikana ayatüinjachire chia kaainjalashikai naʼaka na wawalayuukana. Nachajaainjatü sukuwaʼipa shiimainrejeʼeya niyaawajaain suulia naainjala. Jülüjeesü naaʼin pütchikalüirua tüü: mayaainjeʼe nüküjain chia anoujashikai niyaawajaain suulia naainjala, ¿shiimainchejeʼe nülerajüin tü kasa naaʼinrakat? ¿Ayaawatüna aaʼuche nnojoleerüin naaʼinrüin tia piantua? Kaainjarale nia sutuma naʼaleewajaain sümaa wayuu mojulaasü, ¿nnojoleeiche aʼaleewajaain nüchikuaʼa namaa? Oʼuraajüshii na laülaashiikana, jülüjasü naaʼin tü alatakat süpüla nekirajaain sünain tü sümakat tü Bibliakat süchiki tia otta jülüjasü naaʼin jamüin naaʼin chi anoujashikai saalinjee naainjala. Nayaawateetkalaka saaʼu eere süpüla nojuʼitirüin jee nnojoluinjachire nojuʼitirüin nia naʼakajee na wawalayuukana (1 Cor. 5:11-13).

13. ¿Jamüsü wainmajeetka waaʼin nujuʼitinnüle wanee wapüshi jee niale wanee waʼaleewain?

¹³ Müleka nujuʼitinnüle wanee anoujashi nnojoikai waʼaleewain jee wapüshin, eesüjaʼa süpüla anain wamüin tü naaʼinrakat na laülaashiikana. ¿Jama nujuʼitinnüle chi eekai alin maʼin wapüla? Eesüjaʼa süpüla wainmajüin waaʼin süchiki tü naaʼinrakat na laülaashiikana süpüla nojuʼitirüin nia. Eesüjaʼa jülüjale waaʼin naaʼinrüin tü keeʼireekat naaʼin namüiwaʼa, nnojoluin shiain tü jülüjakat naaʼin Jehová. ¿Kasa waaʼinrajatka süpüla anain wamüin tü naaʼinrakat na laülaashiikana?

14. ¿Kasa jülüjainjatka waaʼin naneeküle na laülaashiikana nojuʼitirüin wanee wapüshi jee wanee waʼaleewain naʼakajee na wawalayuukana?

¹⁴ Jülüjainjatü waaʼin niʼitaain Jehová sukuwaʼipa nujuʼitinnüin wanee anoujashi kaainjalakai naʼakajee na wawalayuukana süpüla wulein nakuwaʼipa otta süpüla niyaawajaain suulia naainjala (Gal. 5:9). Nnojoire nujuʼitinnüin wanee anoujashi nnojoikai ayaawajaain suulia naainjala, nnojoleerü niyaawatüin aaʼu mojuin maʼin tü naainjakat, nnojoleerü nunouteʼerüin nukuwaʼipa otta tü jülüjakat naaʼin süpüla aleewain nia nüchikuaʼa nümaa Jehová (Ecl. 8:11). Müsüjeseʼe wayaawatüin saaʼu nnojoluin ashaitaain namüin na laülaashiikana naneeküinjachire nojuʼitirüin wanee kaainjalashi naʼakajee na wawalayuukana. Natüjaa aaʼu naneeküinjatüin wanee kasa nüpüleerua chi kaainjalashikai wanaapünaa sümaa tü nümakat Jehová maʼaka naaʼinrapuʼuin shia na laülaashiikana napüleerua na israelitakana kaainjalapa wanee wayuu (2 Crón. 19:6, 7).

WEʼITAALE WAAʼIN NÜNAIN JEHOVÁ MAAʼULU WEʼITAAJEERIA WAAʼIN NÜNAIN MAPEENA

15. ¿Jamüshii jüüjüüinjanaka waya sümüin tü nuluwataakalü anain waya Jehová maaʼulu?

¹⁵ Alüʼütsü sükalia sajaʼttajatka oʼu kasa süpüshuaʼa, weʼitaainjatsüjeseʼe waaʼin maaʼulu sünain lotuin süpüshuaʼa tü kasa naaʼinrakat Jehová. Choʼujaweerü tia soʼunnaa tü müliaa miyoʼusükat süka eein süpüla waluwataanüin sünain aaʼinraa wanee kasa nnojoleetka müin pansaakai saaʼin wamüin. Nnojoleerü nüküjain wamüin Jehová sirumatuʼujee tü waaʼinrajatkat. Eesüjaʼa süpüla nüküjain wamüin tü waaʼinrajatkat nakajee na wayuu nüneekakana süpüla nuʼunirüin wakuwaʼipa. Nnojotsüjeseʼe anain maʼin wainmajüle waaʼin soʼu tia jee wasakirüle shiimainre nuluwataain tia Jehová otta shiale jülüjain waaʼin naneekajalain tia süka naaʼin namüiwaʼa na oʼunirakana wakuwaʼipa. ¿Weʼitaajeetche waaʼin nünain Jehová jee sünain tü sümakat nupueulose soʼu kaʼikat tia? Jüüjüüle waya maaʼulu sümüin tü suluwataakalü anain waya nupueulose Maleiwa, jüüjüweena waya sümüin tü aluwataaneenakalü anain waya soʼunnaa tü müliaa miyoʼusükat (Luc. 16:10).

16. ¿Jamüsü sütüjaaneetka aaʼu soʼu palit kaʼi shiimainre weʼitaain waaʼin nünain Jehová?

¹⁶ Jülüjainjatü waaʼin jameerüin waaʼin süsalapa saainjala wayuu nutuma Jehová sajaʼlajaayamüin kasakat süpüshuaʼa. Weʼree amüinrü shiʼyataain wayuu jee wapüshi nümüin Jehová süpülapünaa süntüin nükalia. Niapejeʼe Jehová nükajee Jesús aneeküin jaralinjachin oʼttaain soʼu Armagedón (Mat. 25:31-33; 2 Tes. 1:7-9, TNM). Nnojoishii wayainjanain aneeküin nooʼopünaa Jehová jaralinjachin katüin oʼu (Mat. 25:34, 41, 46, TNM). ¿Ayateetche weʼitaain waaʼin nünain Jehová? ¿Ooʼulataajeenapa waya suulia waʼyataain nümüin sünainjee tü nüneekakat? Müsüjeseʼe weʼitaainjatüin waaʼin nünain Jehová maaʼulu süpüla weʼitaain maʼin waaʼin nünain mapeena.

17. ¿Kasa eejeetka sünainjee tü kasa nüneeküinjatkat Jehová sajaʼlajaayamüin kasa süpüshuaʼa?

¹⁷ Jülüja waaʼin talateenain maʼin waya suluʼu tü mma jeketkat weʼrapa tü anasü eejeetkat sutuma lotuin maʼin tü kasa nüneekakat Jehová. Nnojoleerü tü iküleesia ekirajakalü alawaa, tü sukuwaʼipakat oikawaa jee ayaʼlajaa kasa kachiiruaka atuma saaʼin wayuu jee nnojoleerü sukuwaʼipa aluwatawaa müliaka atuma wayuu. Nnojoleena ayuulin, laülaain jee outuin na wapüshikana. Asürünneechi Satanás otta tü yolujaakalüirua soʼu 1.000 juya. Nnojoleerü tü müliaa eekat sutuma niʼrüijaain wayumüin Satanás nümüin Jehová (Alat. Map. 20:2, 3). Talateena maʼin waya süka weʼitaain waaʼin sünain lotuin süpüshuaʼa tü kasa naaʼinrakat Jehová.

18. ¿Kasa watüjaka sünainjee tü alatakat namüin na israelita aküjünakana suluʼu Números 11:4-6 otta 21:5?

¹⁸ ¿Eejeetche kasa suluʼu tü mma jeketkat wainmajeetka atuma waaʼin sünain tü naaʼinrakat Jehová? Jülüjataa waaʼin tü alatakat namüin na israelitakana süchikijee taashin naya nutuma Jehová noulia na egipciokana. Aʼyounalaashii noʼutku naya nümüin Jehová süka nekeein amüin tü nekapuʼukat chaa Egipto otta nayoutuin tü maná naapakat namüin süpüla neküin (paashajeʼera Números 11:4-6; 21:5). ¿Eesüche süpüla müin wakuwaʼipa maʼaka naaʼin nayakana sülatapa tü müliaa miyoʼusükat? Nnojotsü watüjaain saaʼu jeʼrainjatüin juya waʼyataainjanain süpüla wulein watuma tü mmakat jee paʼaraiisüinjatüin shiʼipaʼaya watuma. Eesüjaʼa wainmeerüle waʼyataain suluʼu tü mma jeketkat. ¿Mojuteetche wamüin tü kasa naapeetkat Jehová wamüin? Talatüle waya sümaa tü kasa naapakat Jehová wamüin maaʼulu, talateena waya sümaa tü kasa naapeetkat wamüin mapeena.

19. ¿Kasa wekirajaaitpaka anain sünain ekirajaayakat tüü?

¹⁹ Lotusü süpüshuaʼa tü kasa naaʼinrakat Jehová. Nnojoluinjatü wainmajüin waaʼin sünain tia otta weʼitaainjatü waaʼin nanain na wayuu nüneekakana süpüla nuʼunirüin wakuwaʼipa. Soto waaʼin tü nümakat Jehová nükajee Isaías chi nünüikimaajachikai: «Jüchechereerü jaaʼin müleka nnojorüle shapaain maʼin jaaʼin otta jiʼitaale jaaʼin tanain» (Is. 30:15).