Joutsü wayuu nnojotka anain suluʼu shikii
«Jaʼitashi joyoo maaʼalüin neʼe taya sümaa nnojoluin kasain taaʼinrüin, ayatüsia shapaain taaʼin».
«Talatapa maʼin taaʼin, shapaajaasü taaʼin süka jülüjain taaʼin mojeerüin taaʼin süchikijee».
«Tatüjaa aaʼu anain maʼin taaʼinmaale neʼe tü taaʼinrüinjatkat soʼukaiwai. Eepejeʼe kaʼi shapaakalü oʼu maʼin taaʼin süka jülüjain taaʼin waneirua kasa alatüinjatka waneemüin kaʼi».
Tia shia nanüiki waneinnua wayuu nnojoliikana anain suluʼu nekii. ¿Alatüsüche tia pümüin? ¿Piʼraajüinche wanee wayuu makai akuwaʼipa?
Mülejeʼeya pukuwaʼipa, nnojoishi piain neʼe pümüiwaʼa alatüin amüin tia. Watta naalii na wayuu alatakana amüin tia, eeshijaʼa niale wanee napüshi müin akuwaʼipa.
Watüjaa aaʼu kapüleein maʼin tü kasa alatakat maaʼulu jee keemain maʼin shia. Müsüjeseʼe wainmain tü kasa shapaakalü atuma waaʼin jee tü mojukalü atuma waaʼin (2 Timoteo 3:1, TNM). Naashin na ekirajaakana süchiirua sukuwaʼipa wayuu, nanainjee mekiisatshii wayuu eeshi waneeshia naʼakajee nnojoikai anain suluʼu nikii. Soʼu 2020, akooʼomüinraashii maʼin na shapaakana aaʼin jee na mojukana aaʼin sünainjee tü ayuuliikat COVID-19, eetaashii maʼaka 78 miyoone nooʼomüin na wayuu makana akuwaʼipa.
Anasiaajeʼe pütüjaale saaʼu jeʼrain maʼin na wayuu nnojoliikana anain suluʼu nekii. Anaʼleepejeʼe maʼin pütüjaale saaʼu tü paaʼinrajatkat sümaa püpüshi süpüla anainjatüin jaaʼin.
¿Jamüsü nukuwaʼipa wanee wayuu eekai anain suluʼu nikii?
Anasü naaʼin otta naaʼinrawalin kasa süka anakalü akuwaʼipa, nnojotsü shapaain maʼin naaʼin sutuma tü alatawaikat nümüin. Anasü sukuwaʼipa tü niʼyataainkat nutuma otta talatüsü naaʼin sümaa tü nukuwaʼipakat.
¿Jamüsü nukuwaʼipa wanee wayuu eekai nnojolin anain suluʼu nikii?
NNOJOTSÜ MÜIN NUKUWAʼIPA sünainjee mojuin nutuma wanee kasa.
MÜSÜ NUKUWAʼIPA süka nnojolin anain nia suluʼu nikii. Sutuma tia, shapaasü naaʼin, nnojotsü pansaain tü jülüjakat naaʼin, isasü nüchiki nüchecherüin naaʼin soʼunnaa mojuin naaʼin otta eesü naaʼinrüle waneirua kasa nnojotka saaʼinrüin wayuu eekai anain.
Sutuma nnojolin anain nia suluʼu nikii, eesü nnojorüle anain naaʼin namaa na waneinnua otta isale nüchiki tü kasa naaʼinrajatkat soʼukaiwai.
Jaʼitaichi jintülin wanee wayuu jee miyoʼule nia, naatale niʼiruku, kanourale jee manourale nia, koleejiale jee nnojoire koleejiain nia, washirüle jee nnojoire washirüin nia, eeshi süpüla nnojolin anain nia suluʼu nikii.
Piʼrajeʼerapa
Anashi niʼrajeʼerüle wanee wayuu jee niale wanee nüpüshi suʼwanajaʼalaa sümüle nakuwaʼipa, nnojorüle naaʼin sünain ekaa jee shiale nekashaatain maʼin, shapaale naaʼin waneepia jee mojule naaʼin waneepia. Anashii neʼrajeʼerüle süpüla natüjaain saaʼu jamüin maka nakuwaʼipa. Sülatüle pümüin tia, ¿jaralii puchuntajanaka amüin kaalinwaa?
Anuu nünüiki Jesucristo, chi kekiikai maʼin: «Nnojotsü choʼujaain niʼrajeʼerüin wanee wayuu anale nia. Akaajasaʼa ayuuire nia, oʼunushi nümaʼanamüin wanee tottoot» (Mateo 9:12, TNM). Niʼrajeʼerüle wanee wayuu, nütüjaajeerü aaʼu tü nipinaseinjatkat süpüla saawalaain naaʼin, süpüla anain nukuwaʼipa otta süpüla talatüin naaʼin. Piyaawatüle saaʼu nnojoluin müin anakai saaʼin tü pukuwaʼipakat maʼakaapuʼu paala, anashi piʼrajeʼeramaatüle.a
Tü Bibliakat nnojotsü shiain wanee karaloʼuta aashajaaka süchiki tü wunuʼu shipinaseinjatkat wayuu. Anapejeʼe maʼin tü sümakat süpüla anainjatüin saaʼin wayuu. Sünain rewiisütakat tüü, waashajaajeerü achiki waneirua kasa anaka süpüla naaʼinrüin wanee wayuu eekai nnojolin anain suluʼu nikii. Anasü paashajeʼerüle shia.
a Nnojotsü süküjain tü rewiisütakat Aapiria Wayuu süchiki wanee tratamiento anaka püpüla. Piainjachi aneekaka tia süka paaʼin pümüiwaʼa.