Watüjaka nüchiki Jehová sünainjee tü Bibliakat

1. ¿Jamüsü kojutuka pümüin naapüin pümüin Jehová tü Bibliakat?

ANATAʼALEESHIIJAʼA waya nutuma Jehová süka naapüin wamüin tü Bibliakat. Nüküjain wamüin suluʼu tü waaʼinrajatkat sülatüle kasa mojusü wamüin otta tü naaʼinrajatkat wapüleerua mapeena. Sükajee tü Bibliakat eesü süpüla weʼraajüin nukuwaʼipa Jehová. Wasakireʼerüle waaʼin sünain tü nukuwaʼipakat, keeʼireejeerü waaʼin aleewain waya nümaa (Sal. 25:14).

2. ¿Kasa naaʼinraka Jehová süpüla weʼraajüin nukuwaʼipa?

² Nücheküin Jehová shiʼraajüinjatüin wayuu tü nukuwaʼipakat. Süpüla tia naaʼinrüin waneirua kasa sümaiwa paala. Süpüla nüküjain süchiki tü nukuwaʼipakat nüʼlapüjeʼerüin waneinnua wayuu, niiʼiyatüin kasa namüin otta nuluwataain na aapiee nümaʼanajeejanakana (Núm. 12:6; Aluw. 10:3, 4). Nnojorüleje süshajünüin süchiki tia alatakat, nnojotsüje süpüla wekirajaain nüchiki Maleiwa. Nüshajirüinjeseʼe Jehová waneinnua wayuu suluʼu karaloʼuta tü kasa nüküjeekat wamüin (Jer. 30:2). Watüjaa aaʼulu anain maʼin tü naaʼinrakat Jehová süpüla nüshajirüin tia pütchi jalouikat maʼin wamüin, jama lotuin maʼin nukuwaʼipa (Sal. 18:30).

3. ¿Kasa naaʼinraka Jehová süpüla eeinjatüin tü Bibliakat wakalioʼu? (Isaías 40:8).

³ (Paashajeʼera Isaías 40:8). Ashajünüsü tü Bibliakat sümaiwa sünain kasa jooka süpüla mojaa otta nnojotsü eein tia wamaʼana maaʼulu. Mayaainjeʼe müin tia, kakaliairü nuʼunirüin Jehová nakuwaʼipa na aʼyataakana nümüin sükajee tü Bibliakat. ¿Jamüsü süpüla nuuntuin tia? Nüshajirüin Jehová sukoopiain tü Bibliakat. Mayaainjeʼe wayuuin neʼe na ashajakana sukoopiase tü Bibliakat, jülüjasü maʼin naaʼin suulia nashaʼaleʼerüin jee suulia nakooʼomüinrüin tü pütchi suluʼukat. Anuu nünüiki wanee ekirajaakai süchiirua sukuwaʼipa tü Bibliakat: «Nnojotsü eein wanee pütchi ashajuushi sümaiwa pansaaka maʼin maʼaka saaʼin tü Pütchi Ashajuushikat suluʼu Hebreo». Mayaainjeʼe kakaliairü maʼin süshajünüin sutuma wayuu jee süshajünüin sünain kasa jooka süpüla mojaa, watüjaa aaʼulu nünüikin Jehová tü pütchi ashajünakat suluʼu.

4. ¿Kasa wekirajaajeetka anain sünain ekirajaayakat tüü?

⁴ Nümaʼanajeejatü Jehová süpüshuaʼa tü kasa anasü naapakat wamüin. Wanee kasa anashaatasü naapaka wamüin shia tü Bibliakat (Sant. 1:17). Wayaawata aaʼulu nukuwaʼipa wanee wayuu sünainjee tü kasa nüsülajakat wamüin. Wayaawata aaʼulu niʼraajüle maʼin waya otta nütüjaale saaʼu tü kasa choʼujaakat wamüin. Müsia neʼe tü watüjakat nüchiki Jehová suluʼujee tü Bibliakat. Wekirajaapa sünain tü Bibliakat wayaawata aaʼu wainma kasa nüchiki, wayaawata aaʼu niʼraajüin maʼin waya otta nütüjaain saaʼu kasain choʼujaain wamüin. Sünain ekirajaayakat tüü, wekirajaajeerü anain apünüinsü kasa suluʼujee tü Bibliakat wayaawateetka atuma tü nukuwaʼipakat Jehová: kekiin nia, lotuin nukuwaʼipa otta aipüralin nia wayuu. Wekirajaa sünain tü palajatkat.

JAʼYASÜ NAAʼU JEHOVÁ KEKIIN NIA SÜNAINJEE TÜ SÜMAKAT TÜ BIBLIAKAT

5. ¿Jamüsü watüjaaka saaʼu kekiin maʼin Jehová sünainjee tü sümakat tü Bibliakat?

⁵ Nütüjaa aaʼu Jehová choʼujaain nüküjain wamüin tü anakat süpüla waaʼinrüin. Müsüjeseʼe naapüin wamüin tü Bibliakat süpüla nüküjain wamüin tü kekiwaa nümaʼanajeejatkat. Anasü nakuwaʼipa na wayuukana sutuma tü pütchi nümakat. Wanaa sümaa nüshajüin Moisés tü palajatkat shiʼipa tü Bibliakat, müshi nia namüin na israelitakana: «Nnojotsü mojutuinjatüin tia pütchikat jümüin süka kateerüin joʼu sutuma» (Deut. 32:47). Na oonookana sümaa tü Pütchi Ashajuushikat, talatüsü naaʼin jee anasü nakuwaʼipa (Sal. 1:2, 3). Mayaainjeʼe kakaliairüin süshajünüin tü Bibliakat, ayatüsia sunouteʼerüin sukuwaʼipa wayuu maaʼulu. Jamüsüjaʼa suluʼu jw.org, ojuʼitawaisü tü pütchikat «Sunouteʼerüin nakuwaʼipa tü Bibliakat». Puusüteerü anain yala nachikimaajatü na wayuu anoutaakana akuwaʼipa sutuma naaʼinrüin tü sümakat tü Bibliakat (1 Tes. 2:13).

6. ¿Jamüsü watüjaaka saaʼu nnojoluin eein wanee karaloʼuta makalü aka saaʼin tü Bibliakat?

⁶ Nnojotsü eein wanee karaloʼuta makalü aka saaʼin tü Bibliakat, süka jamüin, niain kashajiralain shia wanee Maleiwa pülashi, matüjainkai outaa otta kekiikai maʼin. Wainma karaloʼuta ayatayütkalia aashajeʼennüin mayaainjeʼe outuin chi ashajakai shia, eesüjaʼa süpüla nnojoluitpain jaloulin sümüin wayuu maaʼulu tü pütchi nüshajakat. Eekajasaʼa tü pütchi suluʼukat tü Bibliakat, jalouisü sümüin wayuu maaʼulu maʼaka jalouipuʼuin shia sümüin wayuu sümaiwa. Waashajeʼerapa tü Bibliakat sümaa wasakireʼerüin waaʼin sünain tü sümakat, nükaalinjeena waya Jehová sükajee tü nüpülainkat süpüla waaʼinrüin tü sümakat (Sal. 119:27; Mal. 3:16; Heb. 4:12). Nükaalinjeein maʼin pia Jehová sükajee tü sümakat tü Bibliakat. ¿Aashin sütütüleʼerüin paaʼin tia süpüla paashajeʼerüin tü Bibliakat weinshi?

7. ¿Jamüshii paaʼinwaka na aʼyataapuʼukana nümüin Jehová sünainjee tü sümakat tü Bibliakat?

⁷ ¿Jarat tü wane kasa wayaawatakalü akajee eein tü kekiwaa nümaʼanajeejatkat Jehová suluʼu tü Bibliakat? Shia süka paaʼinwajiraain na aʼyataakana nümüin Maleiwa sünainjee tü sümakat. Jamüshiijaʼa nantapa na israelitakana suluʼumüin tü Mma Aapünakat namüin, aʼwalakajaayaa müshii naya suluʼupünaa tia mmakat. Eeshii na ejimejüliikana, na arüleejüliikana anneerü jee paaʼa otta na apünajüliikana. Sutuma müin nakuwaʼipa na israelitakana, eeshiijaʼa süpüla motuin naaʼin na wane israelita wattakana epia noulia. Süpüla paaʼinwajiraain naya nutuma Jehová, nuutkajeʼerawaliin naya süpüla naapajüin nünüiki jee nekirajaain nüchiki (Deut. 31:10-13; Neh. 8:2, 8, 18). Jülüjataa waaʼin jamüin naaʼin wanee israelita oonookai sümaa tia nümakat Jehová. Nüntapa Jerusalénmüin sünain aʼwaajaa Jehová, antiraashi nia namaa na wane israelita kepiakana wane saʼata tü mmakat. Sutuma tia paaʼinwajiraashii naya. Soʼu nükalia Jesús eejana anoujashii tooloyuu otta jieyuu naatawaikana eʼiruku, maʼletsekana, washinnuukana jee naatawaikana anüikii. Süka kojutuin namüin tü sümakat tü Pütchi Ashajuushikat, paaʼinwashii naya sünain aʼyatawaa nümüin Jehová. Na wayuu ekeronuwaakana sünain tü anoujaakat wanaa namaa, nayaawata aaʼu tü Nünüikikat Maleiwa süka nekirajüin naya na wane anoujashiikana otta süka noutkajaain namaa (Aluw. 2:42; 8:30, 31).

8. ¿Kasa naaʼinraka Jehová süpüla paaʼinwain na aʼwaajakana nia maaʼulu?

⁸ Maaʼulu yaa ayatüshiʼiya paaʼinwain nutuma Jehová na aʼyataakana nümüin sünainjee tü sümakat tü Bibliakat. Süpüshuaʼa tü ekirajünakalü anain waya suluʼujeejatü shia tü Bibliakat. Outkajaʼawaishii waya semaanawai otta oʼunawaishii waya sünain outkajawaa miyoʼu süpüla waashajeʼerüin tü Bibliakat sümaa wekirajaain sünain tü sümakat. Wayaawatakalaka saaʼu nikeraajüin Jehová nünüiki süchiki paaʼinwainjanain nutuma na aʼyataakana nümüin (Sof. 3:9).

9. ¿Jamüinjatü wakuwaʼipa süpüla wayaawatüin saaʼu tü sümakat tü Bibliakat? (Lucas 10:21).

⁹ Wekirajaa süchiki wane kasa wayaawataka atuma kekiin maʼin Jehová. Nüshajirüin Jehová waneirua pütchi suluʼu tü Bibliakat süpüla nayain neʼe ayaawatüin saaʼu na wayuu nnojoliikana yaletüin aaʼin (paashajeʼera Lucas 10:21, TNM). Saashajeʼerüin tü Bibliakat wayuu maʼleekalia. Anuu tü nümakat wanee wayuu ekirajaakai süchiirua sukuwaʼipa tü Bibliakat: «Shia aashajeʼennaka maʼin tü Bibliakat sutuma wayuu suulialeʼeya wanee karaloʼuta otta jülüjasü maʼin naaʼin tü sümakat naashajeʼerapa shia». Nayapejeʼe neʼe na nnojoliikana yaletüin aaʼin ayaawataka saaʼu tü sümakat sümaa naaʼinrüin shia (2 Cor. 3:15, 16).

10. ¿Jamüsü wayaawataka saaʼu kekiin maʼin Jehová sükajee sukuwaʼipa süshajia tü Bibliakat?

¹⁰ Sükajee sukuwaʼipa süshajia tü Bibliakat, ayaawatüna aaʼuchi kekiin Jehová. Nnojoishii neʼe nikirajüin waya Jehová kottapa wapüshuaʼa sükajee tü Nünüikikat, nikirajüinña waya waneʼewai wakua sümaa nütütüleʼerüin waaʼin. Waashajeʼerapa tü Bibliakat wayaawata aaʼu jülüjain waya naaʼin waneʼewai wakua (Is. 30:21). Wanaa sümaa sülatüin wamüin kasa mojusü, ¿eesüche waashajeʼerüin wanee pütchi suluʼujee tü Bibliakat jalouika maʼin wamüin? Jamüsaʼa shia, wainmatuairü alatüin tia. Mayaainjeʼe süshajünüin tü Bibliakat sümüin wayuu maʼleekalia, ¿jamakaʼa jalouika tü sümakat wamüin waneʼewai wakua? Shia süka nüshajiralain shia wanee Maleiwa kekiikai maʼin (2 Tim. 3:16, 17, TNM).

SÜKAJEE TÜ BIBLIAKAT WAYAAWATA AAʼU LOTUIN NUKUWAʼIPA JEHOVÁ

11. ¿Jamüsü wayaawataka saaʼu nnojoluin koʼuin nukuwaʼipa Jehová sümüin wayuu wanaa sümaa süshajünüin tü Bibliakat?

¹¹ Loto akuwaʼipachi Jehová (Deut. 32:4). Süka müin nukuwaʼipa Jehová, nnojotsü koʼuin nukuwaʼipa sümüin wayuu (Aluw. 10:34, 35, TNM; Roma 2:11). Jaʼyasü saaʼu müin nukuwaʼipa sünainjee tü anüikii nüneekakat süpüla nüshajirüin tü Bibliakat. Tü palajatkat karaloʼutairua süshajünaka aluʼu tü Bibliakat, ashajünüsü suluʼu hebreo, 39 süpüshuaʼa tia karaloʼutakalüirua. Ashajünüsü suluʼu wanee anüikii nayaawataka maʼin aaʼu na aʼyataakana nümüin Maleiwa soʼu tia. Soʼu nükalia Cristo wainma na wayuu aashajaakana suluʼu griego. Müsüjeseʼe süshajünüin suluʼu griego tü karaloʼutakat Mateo sünainmüinreʼeya tü karaloʼutakat Alateetkat Mapeena. Anasü nümüin Jehová nnojoluin süshajünüin tü Bibliakat suluʼu waneesia anüikii. Maaʼulu yaa, eeshii maʼaka 8 miit miyoone wayuu sainküin mmakat otta naatawai tü anüikii naashajaakalü aka. ¿Kasa aainjünaka süpüla shiʼraajüin Jehová wayuu maʼleekalia?

12. ¿Jamüsü shikeraajia Daniel 12:4 wakalioʼu?

¹² Atüjaaneerü maʼin aaʼu tü Nüchikimaajatkat Maleiwa sülüʼütpa sükalia sajaʼttüin tü kasa mojusükat. Nüküjatüjülia tia Jehová nükajee Daniel. Tü nüküjeekalü achiki shia nayaawateerüin maʼin aaʼu na wayuukana tü sümakat tü Bibliakat (paashajeʼera Daniel 12:4). Ekeraajüsü tia sükajee süshajünüin tü Bibliakat suluʼu wainma anüikii, wainma sükoopiain eʼinpürimiijünaka, eitajünüsü shia sümüin wayuu jee wainma karaloʼuta ashajünaka sünainjee. Nnojotsü eein wanee karaloʼuta müin aka saaʼin tü Bibliakat. Eesü Biblia akumajünaka kojutuka maʼin. Na aʼyataashiikana nümüin Jehová nakumajüin suluʼu 240 anüikii tü karaloʼuta suluʼukat tü Bibliakat jee shiale süpüshi neʼe otta aapünüsü shia sümüin wayuu sümaa machekajuuin shia. ¿Kasa eeka sünainjee tia? Wainma na wayuu aapaakana sümaa tü pütchi anakat süpülapünaa sajaʼttüin tü kasa mojusükat (Mat. 24:14, TNM). Süka nnojoluin koʼuin nukuwaʼipa Jehová sümüin wayuu, keeʼireesü naaʼin neʼraajüin nia na wayuukana sükajee naashajeʼerüin tü Nünüikikat. Naaʼinrüin maʼin tia süka alin waya nüpüla.

SÜKAJEE TÜ BIBLIAKAT AYAAWATÜNA AAʼUCHI AIPÜRALIN WAYUU MALEIWA

13. ¿Jamüsü wayaawataka saaʼu alin wayuu nüpüla Maleiwa sükajee tü sümakat tü Bibliakat? (Juan 21:25).

¹³ Watüjaa aaʼuchi aipüralin wayuu Maleiwa sükajee tü sümakat tü Bibliakat (1 Juan 4:8, TNM). Jülüjataa waaʼin tü pütchi nüshajitkat Jehová suluʼu tü Bibliakat jee tü pütchi nnojotkat nüshajirüin. Shia nüshajitka maʼin suluʼu tü waaʼinrajatkat süpüla aleewain waya nümaa, talatüin waaʼin otta katüin woʼu süpüla kaʼikat süpüshuaʼa. Süka alin waya nüpüla Jehová, nnojotsü nüküjain wamüin waneirua kasa nnojotka maʼin choʼujaain wamüin (paashajeʼera Juan 21:25, TNM).

14. ¿Jarat tü wane kasa wayaawataka akajee alin waya nüpüla Maleiwa?

¹⁴ Wane kasa wayaawataka akajee alin waya nüpüla Jehová shia sünainjee anain sukuwaʼipa nünüiki wamüin. Nnojotsü nüshajirüin suluʼu tü Bibliakat süpüshuaʼa tü anakat jee tü mojukat süpüla waaʼinrüin. Shia nüshajiraka wamüin süchiki nakuwaʼipa wayuu namaiwajana, pütchi ekeraajüinjatka otta pütchi jalouika wamüin süpüla anainjatüin tü kasa waneekakat. Sutuma tü sümakat tü Bibliakat, aijeechi maʼin wapüla Maleiwa otta oonoojeena waya sümaa tü nümakat süka süpüshuaʼa waaʼin.

15. (1) ¿Jamüsü wayaawataka saaʼu kojutuin waya nümüin Jehová sükajee sukuwaʼipa süshajia tü Bibliakat? (2) Maʼaka weʼrüin suluʼu tü ayaakuaakat, ¿jaralii na wayuu saashajaakana achiki tü Bibliakat süsakireetka anain saaʼin tü jintutkat, chi wawalakai otta tü wawala jaʼapüitkat? (Gén. 39:1, 10-12; 2 Rey. 5:1-3; Luc. 2:25-38).

¹⁵ Sükajee sukuwaʼipa süshajia tü Bibliakat, wayaawata aaʼu kojutuin waya nümüin Jehová. Keeʼireesü maʼin naaʼin wayaawatüin saaʼu tü nikirajeekalü anain waya suluʼujee tü Bibliakat. Müsüjeseʼe süshajünüin suluʼu süchiki nakuwaʼipa wayuu makana aka waaʼin wayakana (Sant. 5:17). Wekirajaapa süchiki jamapuʼuin nukuwaʼipa Jehová namaa na wayuu makana aka waaʼin wayakana, wayaawata aaʼuchi kamaneein maʼin nia jee nümüliajülin wayuu (Sant. 5:11).

16. ¿Kasa watüjaka nüchiki Jehová sünainjee tü sümakat tü Bibliakat nachiki na kaainjalakana? (Isaías 55:7).

¹⁶ Watüjaa aaʼu sükajee tü Bibliakat wane kasa naaʼinraka Jehová süka alin waya nüpüla. Aküjüna achikit suluʼu tü Bibliakat nnojolin niyüülajüin waya Maleiwa kaainjarale waya. Wainmatua kaainjalain na israelitakana nuulia Jehová, nülatitpejeʼe noulia tü naainjalakat nayaawajaale suulia (paashajeʼera Isaías 55:7). Na anoujashii eejanakana nükalioʼu Jesús, nayaawata aaʼu alin maʼin naya nüpüla Jehová. Nütütüleʼerüin Jehová naaʼin nükajee chi aluwataaushikai Pablo süpüla motuin naaʼin naainjala wanee anoujashi ayaawajaakai suulia naainjala jee süpüla namüliajüin nia (1 Cor. 5:1-5, TNM; 2 Cor. 2:6, 7, TNM). Ponusü maʼin waaʼin nnojolin niyüülajüin Jehová chi eekai kaainjalain. Nükaalinjain nia süpüla nunouteʼerüin nukuwaʼipa otta süpüla nürütkaain nünainmüin. Müsia neʼe wakuwaʼipa nutuma maaʼulu yaa, wayaawajaale suulia waainjala moteerü shia naaʼin (Sant. 4:8-10).

KOJUTUSÜ MAʼIN WAMÜIN TÜ BIBLIAKAT

17. ¿Jamüsü anaka maʼin tü Bibliakat?

¹⁷ Anasü maʼin tü nüsülajakat wamüin Jehová. ¿Jamüsü anaka maʼin tü Nünüikikat Maleiwa? Shia süka shikirajüin waya sünain lotuin nukuwaʼipa Maleiwa, kekiin nia otta alin waya nüpüla. Sükajee tü Bibliakat wayaawata aaʼu keeʼireein naaʼin Jehová weʼraajüin nia otta aleewain waya nümaa.

18. ¿Kasa waaʼinrajatka süpüla sütüjaanüin aaʼu kojutuin wamüin tü sümakat tü Bibliakat?

¹⁸ Nnojo mojutuin wamüin tü Nünüikikat Maleiwa. Tü Bibliakat shia wanee kasa anasü maʼin nüsülajaka wamüin Jehová (Sant. 1:17). Kojutule wamüin shia, oʼuraajeena waya süpülapünaa waashajeʼerüin shia sümaa wasakireʼerüin waaʼin sünain. Waaʼinrüle tia, eʼreena waya kasa anasü nutuma Jehová otta watüjaajeerü aaʼu tü nütüjaakalü aaʼu (Prov. 2:5).