Nnojotsü kasain ataʼülüin nakuwaʼipa na kanoulakana

Asirajüshi taya süka nnojoluin tatüjaain saaʼu nunoujain chi taʼaleewainkai. «¿Eesüsa pütüjaain saaʼu tü sümakat tü Bibliakat?», tamaka nümüin. Koʼutapünaaka nia. Nüküjaka tamüin mapa süküjalüin pütchi nüchiki Jehová tü niikat jee shikirajapuʼuin nia sünain tü Bibliakat. «Püküja tamüin sooʼomüin», tamaka nümüin.

Jaʼyuutaaireje waaʼu sünain yootoo soʼu tia. Süküjain tü Bibliakat naashin niain Satanás aluwataain saaʼu wayuu manoujainsat (Juan 14:30). Ponusü maʼin taaʼin tia süka eeʼiwalajatüin tatüjaain saaʼu. Taapapuʼu achikit niain aluwataain saaʼu wayuu wanee Maleiwa anamiakai jee lotokoi akuwaʼipa. Naatapejeʼe tia suulia tü kasa teʼrakat. Mayaainjeʼe 26 neʼe touyase soʼu tia, wainma kasa shapaaka atuma taaʼin.

Suchupeetsepuʼu chi tashikai katünasü süpülajatka atkawaa chaa Estados Unidos. Müsüjeseʼe tatüjaain maʼin saaʼu jintüliiwaʼaya taya eein süpüla eejaʼalaa sümüin wanee guerra nuclear. Yapashii maʼin na surulaatkana süpüla nasoteʼerüin naʼapüla. Süka eejatüin atkawaa chaa Vietnam, mojuwaisü maʼin taaʼin wanaa sümaa tekirajaain suluʼu wanee universidad chajatka California. Oʼunapuʼushi taya sünain protesta namaa na koleejiajiraakana tamaa. Eipiijünüshii waya natuma na pulusiiakana shiiʼiree naʼyaatüin waya, awataashii waya süka woukuuin aaʼin sutuma tü gas lacrimógeno münakat jee nnojotsü kasain weʼrüin sutuma. Soʼu tia, wainma poliitiko oʼutunakana aaʼin, eesü protesta jee atkawaa kaayeruʼupünaa. Wainma sünüiki wayuu süchiki tü kasa alatakat, nnojotsü tatüjaain saaʼu jaralüinjatüin tanoujain anain anüiki.

Soʼu 1970 aʼyataashi taya palaajeeruʼu sünain Alaska, wainma nneerü takanajaka soʼu tia. Süchikijee toʼunaka Londresmüin (Inglaterra). Tayaʼlajaka wanee mooto jee chakuaika taya uuchimüin sünain Londres eepünaweere tantüin. Maʼaka jeʼra kashi süchikijee, antüshi taya Áfricamüin. Wopuluʼupünaa teʼraajüin wayuu achajaakana mma eere jimatuulin suulia atkawaa, shiaʼaya tia taaʼinraka.

Sünainjee tü teʼrakat jee tü taapakalü achiki, tayaawata aaʼu pansaain maʼin tü sümakat tü Bibliakat süchiki eein wanee yolujaa aluwataakai saaʼu wayuu. Tatüjaweepejeʼe saaʼu jamüin nnojoika najaʼlajeʼerüin nia Maleiwa.

Tatüjaa aaʼu tia maʼaka jeʼra kashi süchikijee. Shiasaʼa mapa, teʼraajüin wainma wayuu oonookana waneepia nümaa chi Maleiwa shiimainshikai mayaainjeʼe naatawalin tü alatakat namüin. Aishii tapüla naya wayuukana.

IRLANDA DEL NORTE: «SUUMAIN ATKAWAA»

Taleʼejapa Londresjee yootushi taya sümaa nii chi taʼaleewainkai, süsülajaka tamüin wanee Biblia. Toʼunaka mapa Ámsterdammüin (Países Bajos). Soʼu wanee kaʼi, taashajeʼerüin tü Bibliakat suupünaa wanee luusa kaayeruʼuka. Nujuntapünaaka tanainmüin wanee wawala jee nüküjaka tamüin nikirajeechin taya sooʼomüin süchiki tü Bibliakat. Toʼunaka Dublínmüin (Irlanda). Chapa taya tawaraijaaka saaʼu Weteet. Teʼraajaka chayaa chi wawalakai Arthur Matthews, kakaliaichi nia aʼyataain nümüin Maleiwa. Taküjaka nümüin tekirajaweein sünain tü Bibliakat. «Anakajaʼa tekirajeechi pia» nümaka tamüin.

Kamalainsü tamüin tü tekirajaakalü anain, müsüjeseʼe taashajeʼerüin tü karaloʼuta jee tü rewiisüta namaʼanakat na Aküjaliikana pütchi. Akaataajaʼa tü Bibliakat, taashajeʼerüin maʼin shia. Toʼunawaipa sünain tü outkajawaakat, ponusü maʼin taaʼin natüjaain saaʼu na tepichikana tü nasakitkalü anain na karaloʼutamaajanakana. Natüjaa aaʼu jamakuwaʼipalüin tü mojulawaakat, jaralin chi Maleiwakai jee kasain alatüin sümüin wayuu outapa shia. Naya neʼe taʼaleewajaakana amaa na Aküjaliikana pütchi, jama nayain teʼraajüin namüiwaʼa suluʼu tia mmakat. Nakaalinjain taya süpüla alin tapüla Jehová otta süpüla taaʼinrüin tü keeʼireekat naaʼin.

Woutiisashi taya soʼu 1972. Wanee juya süchikijee, pürekutsootshi taya jee takolojooka Newry (Irlanda del Norte) eere palitchon na wawalayuukana. Talquilajaka wanee piichi aainjuushika süka ipa pasanainjatü sünain uuchi, pejepünaa sünain eejatü wainma paaʼa. Sümaʼinruʼu lankatüin shiairua müsü saapajakai saaʼin tanüiki wanaa sümaa tooʼulaküin tü pütchi tekirajüinjatkat sünain tü outkajawaakat. Mayaainjeʼe nnojoluin nasoutuin tamüin, atüjashi taya nanainjee süpüla teirakaain namüin na aapajakana tanüiki. Pürekutsootshi taya pesiaat soʼu 1974, aʼyataajiraashi taya nümaa Nigel Pitt, ayatayüiya taʼaleewain maʼin.

Soʼu tia eejatü kasachiki chaa Irlanda del Norte. «Suumain atkawaa», münüsü tia mmakat. Eesü waneepia atkawaa, aʼinirawaa jee asoteʼeraa wonpa chayaa natuma na poliitikokana jee nayale na wanjeelikokana namaa na katoolikokana. Natüjaa aaʼu nnojoliin sünainpünaain poliitika na Aküjaliikana pütchi, jutatüsüjeseʼe wakuwaʼipa sünain aküjaa pütchi. Eeshii waapinnawaire süpüla nnojoliinjanain woʼunuin suluʼumüin wanee mma sünain aküjaa pütchi suulia jamajüin waya atumawaa.

Eesü sülatawaire kasa wamüin eeka süpüla jamajüin atuma waya. Soʼu wanee kaʼi oʼunushi taya nümaa Denis Carrigan, wanee pürekutsoot, sünain aküjaa pütchi suluʼumüin wanee pueulo pejeka sünain wepia, nnojoishii eein Aküjalii pütchi chayaa otta uwatua neʼe wakua chejee süpülapünaa tia. Sülirajaka waya wanee jierü sünain surulaalüin chejeʼewalii waya Gran Bretaña, eeshiijaʼa sülirajüle waya saaʼujee nnojoluin müin wanüikipala maʼaka naaʼin na irlandekana. Mmotshaanashii waya, watüjaa aaʼu eein süpüla outuin waya jee shiʼitünüin wasaʼa saaʼujee kamaneein waya namüin na surulaatkana. Yalajana waya aʼatapajüin tü wuusükat, yüütüüisü maʼin otta aisü maʼin jemiai. Weʼraka sürütkaain wanee kemion eejatüle tü jierü alirajakat waya. Weʼraka sujuʼitaain sünain aashajawaa namaa na piamashii wayuu sulujunakana tü kemionkat, shiiʼiyataka waya sümaa jaʼyain saaʼu shapaain saaʼin. Weʼraka noʼunirüin tü kemionkat wanainmüin, nasakiraka waya süchiki jalapüshiwalin sülatüin tü wuusükat. Süntapa tü wuusükat, aashajaashii naya nümaa chi suchupeetsekai, nnojotpejeʼe waapüin kasain naashajaain achiki. Wayaʼala neʼe wamüiwaʼa eejanakana suluʼu, süntajaaka wekiiruʼumüin nayuʼleein waya suluʼujee tü pueulokot süpüla jamajüin waya natuma. Nnojotpejeʼe kasain alatüin wamüin. Tashakatapa suluʼujee tü wuusükat, tasakirüin chi suchupeetsekai: «¿Kasa keeʼireeka naaʼin naya wayuukana?». Nümaka wamüin: «Nnojo mmoluin jia, taküjaipa namüin jaraliin jia, nnojoleena jamajüin jia natuma».

Sünain wanee outkajawaa miyoʼu apünüinka kaʼi eejatka soʼu 1976 chaa Dublín, teʼraajüin Pauline Lomax, wanee pürekutsoot pesiaat chejeʼewatka Inglaterra, awaraijaasü soʼu tia. Tütüsü maʼin shia sünain aʼyatawaa nümüin Maleiwa, nnojotsü yaletüin saaʼin otta kamaneesü maʼin shia. Anoujatüjüt shia nümaa Ray chi suwalakai tepichijaiwaʼaya naya. Wanee juya süchikijee, kasaatshi taya sümaa Pauline. Ayatüshiʼiya waya pürekutsooliin pesiaat chaa Ballymena (Irlanda del Norte).

Eesü takalia sünain alapalawaa naaʼu na wawalayuukana chaa Belfast, Londonderry otta suluʼu waneirua mma keemaka maʼin. Ponusü maʼin waaʼin kanoulain na wawalayuukana. Süpüla naʼyataainjanain nümüin Jehová nooʼulaain tü nanoujapuʼukalü anain, ooʼulaashii naya suulia üttüin naaʼin sünain wayuu jee suulia nalerajüin wayuu. Jaʼyasü naaʼu niiʼiyatüin naʼanasia Jehová namüin otta naaʼinmajüin naya.

Chajachi taya Irlanda soʼunnaa poloo juya. Soʼu 1981, oʼunejaanüshii waya sünain tü Ekirajüleekat Galaad sünain tü ekirajawaakat 72. Kettaapa shia watuma, ajütünüshii waya Sierra Leonamüin (África Occidental).

SIERRA LEONA: KANOULASHII NAYA MAYAAINJEʼE MAʼLETSEIN NAYA

Kepiashii waya namaa 11 misioneero anakana akuwaʼipa. Eejatü wamaʼana wanee kosiina, apünüin chüʼüpülee, piamasü oʼoojulee, wanee teleepono, wanee lavadora otta wanee secadora. Mojusü maʼin tü luusakat, oʼunawaisü shia. Kepiasü kookoocheʼerü saaʼu saajuna tü piichikat otta suluʼu tü kuatta mmapükat, eesü shikerotüle wüi.

Mayaainjeʼe nnojoluin anain maʼin eejanale kepiain waya, talatüsü waaʼin sünain aküjaa pütchi. Kojutusü namüin na wayuukana tü Bibliakat jee naapajüin wanüiki. Wainma na ekirajaakana jee na Aküjaliikana pütchi mapa. «Señor Robert» münüshi taya otta «Señora Robert» münüsü Pauline. Süka shiʼyateʼerüin maʼin taya Weteet mapa, nnojoishi ojuʼitüin maʼin taya sünain aküjaa pütchi. Sünainjee tia «Señora Pauline» sümünaka joo tü taʼwayuusekat otta müshia tayakai, «Señor Pauline» münüshi taya. Sücheküin Pauline müitpain sünüiki wayuu wamüin.

Wainma wawalayuu maʼletsekana, naapapejeʼe Jehová tü kasa choʼujaakat namüin (Mat. 6:33). Sotusü taaʼin tü saaʼinrakat wanee wawala soʼu wanee kaʼi, eejatü neʼe sümaʼana tü nneerü shiyaʼlajüinjatkalü aka neküin na süchonniikana, shiasaʼa saapaka tia nneetkat nümüin wanee wawala kanainjachikai tü ayuulii kanüliakat malaria, nnojotsü nneerü nümaʼana süpüla niyaʼlajüin tü wunuʼu nüsajüinjatkat. Soʼuleʼeya kaʼikat tia süntaka wanee wayuu shipialuʼumüin tia wawalakat jee suwalaajaka sümüin saaʼujee shipeinajüin suʼwala. Kojuyatua teʼrüin nükaalinjain Jehová na wawalayuukana.

NIGERIA: WANEEJATÜ SUKUWAʼIPA WAYUU

Chajana waya Sierra Leona soʼu mekietsat juya. Waluwataanaka mapa Nigeriamüin süpüla waʼyataain suluʼu tü Weteet chajatkat chayaa, müleʼu tia Weteetkat. Ayatüsia taʼyataain anain tü taʼyataapuʼukalü anain chaa Sierra Leona. Eeʼiratapejeʼe shiʼyataain Pauline, kapüleesü sümüin shikiʼralaain sünain. Aküjapuʼusü shia pütchi 130 oora kashiwai otta wainmapuʼu na wayuu shikirajakana sünain tü Bibliakat. Eekajasaʼa jooluʼu ekiralaainjatü shia sünain aʼyapüjaa kuluulu suluʼu wanee kuatta. Shiyaawatapejeʼe saaʼu mapa kojutuin tü shiʼyataainkat namüin na wawalayuukana jee saaʼinmaasü sükatsüinrüin naaʼin na wane weteliitakana.

Waneejatü maʼin nakuwaʼipa na wayuu kepiakana chaa Nigeria, wainma tü kasa wekiralaainjatkalü anain. Sotusü taaʼin nikerotüinka wanee wawala suluʼumüin tü oficina eejachire taʼyataain, nümaajatü wanee wawala eenajaanaka sutuma Weteet. Wanaa sümaa tayuruluin tatüna süpüla tasaküin shia, süsapainkaka tamülatuʼu. Moʼooshi joo taya, sotojooko taaʼin tü sümakat Aluwataaushikana 10:25, 26 otta Alateetkat Mapeena 19:10. «¿Jameetche joo tanüiki sümüin?», maa müshi taya. «Müleka seenajuushire sutuma Weteet sütüjaa aaʼulu tü sümakat tü Bibliakat», maa müsü taaʼin.

Ayatüshia yootuin taya sümaa tia wawalakat mayaainjeʼe japülin taya saaʼujee süsapainkain shia tamülatuʼu. Tayaawataka saaʼu mapa müin nakuwaʼipa na wayuukana suluʼu waneirua pueulo eekat suluʼu tia mmakat. Tia shia tü süshatakat tü wawalakat, akaʼaya na tooloyuukana naaʼinrüinña tia. Müsü nakuwaʼipa süpüla neeʼiyatüin kojutuin wayuu namüin, nnojotsü süpülajatüin naʼwaajüin wayuu. Aküjünüsü suluʼu tü Bibliakat naaʼinrüin tia waneinnua wayuu (1 Sam. 24:8). Akalajasaʼa nnojoluin jamüin tanüiki sümüin tia wawalakat.

Wainma wawalayuu weʼraajakana chaa Nigeria, kanoulashii maʼin naya. Wanee nia Isaiah Adagbona.a Anoujashi nia jintüliiwaʼaya jee ayuuijaaka nia mapa sutuma lepra. Niʼikajaanaka eere süpülee tü ayuuisükat sutuma lepra, nia neʼe Aküjaikai pütchi nümüiwaʼa chayaa. Mayaainjeʼe müliain nia, alatüshii suulia 30 wayuu nükaalinjakana süpüla Naküjaliin pütchi. Sutuma tü naaʼinrakat, akumajaasü wanee outkajaalee chayaa.

KENIA: KAMANESHII NAYA TAMÜIN

Soʼu 1996 aluwataanüshii waya süpüla waʼyataain suluʼu tü Weteet chakat Kenia. Kakaliaichi taya nnojolin chapünaain Kenia, akatüjülia soʼu tü palajatkat takua makaʼa taküjain paalapain. Suluʼu Weteet antapuʼushii waneinnua mono kanüliashii cercopiteco verde. Naya wüchiikana naʼluwajapuʼuin noulia na wawalayuu jieyuukana tü süchon wunuʼu nanaajaakat. Soʼu wanee kaʼi, nnojotsü süsürülüin wanee wawala shiwentaanase sukuatse. Shiasaʼa süleʼejapa, watta naalii na mono yalajanakana ekaʼalaain süpüla. Sutuma süinkuuin saaʼin tü wawalakat, suʼwaataka sümaa süpantajaain, akaʼaya na wüchiikana ainkuusü naaʼin jee napantajaaka.

Toutkajaaka sümaa Pauline namaa na wawalayuu aashajaakana suajili. Maʼaka jeʼra semaana neʼe, nachuntaka tamüin toʼunirüinjatüin sukuwaʼipa tü Ekirajawaakat sünain tü Bibliakat namaa na wawalayuukana. Isasü maʼin tachiki tü nanüikikat. Tekirajaa maʼin anainrü tü karaloʼutakat süpüla anainjatüin tatuma saashajeʼeria tü pütchi asakinnakalü anain. Eere wanee wawala asoutakai sümaa nnojoluin shiain tü suluʼukat tü karaloʼutakat, nnojotsü tayaawatüin aaʼu. Sutuma müin takuwaʼipa, mojuwaisü taaʼin naaʼu na wawalayuukana. Ponusü maʼin taaʼin süka kamaneein tamüin na wawalayuukana jee nayaawatüin saaʼu tü takuwaʼipakat.

ESTADOS UNIDOS: NAAʼINMAASÜ TÜ NAʼYATAAINKAT NÜMÜIN JEHOVÁ

Nnojotsü süsaʼwatüin wanee juya chajanain waya Kenia. Soʼu 1997, eenajaanüshii waya süpüla waʼyataain suluʼu tü Weteet chakat Brooklyn (Nueva York). Kepiashii joo waya eere wainmain wayuu washinnuu, kapüleesia tia nümüin chi eekai niʼyataweein nümüin Maleiwa (Prov. 30:8, 9). Nnojotpejeʼe naaʼinmaain na wawalayuukana tü washirüükat, shia naaʼinmaaka tü aʼyatawaakat nümüin Jehová.

Wainma na wawalayuu weʼraajakana. Mayaainjeʼe wainmain tü alatakat namüin, ayatüshiʼiya kanoulain naya. Jamüshiijaʼa na wawalayuu chakana Irlanda, eʼrüshii wainma atkawaa, na chakana África, maʼletsesalii naya otta na chakana Estados Unidos, kapüleesü namüin naaʼinmaain naʼyataain nümüin Jehová sutuma naʼakain naya wayuu washinnuu. Talatakajasaʼa maʼin naaʼin Jehová namaa naya wawalayuukana süka alin nia napüla.

Alatamaatüsü tü kaʼikat (Job 7:6). Aʼyataashii waya maaʼulu eejeere sukumajünüin tü waʼyataainkat, Warwick (Nueva York). Aʼyataajiraashii waya namaa na wawalayuu aijiraakana maʼin. Talatüsü maʼin waaʼin süka waʼyataajiraain nümaa Jesucristo, chi Aluwataakai waaʼu. Aapeechi kasa anasü namüin na oonookana waneepia nümaa (Mat. 25:34).