«Anakaja müleka laülaale jaaʼin süpüla eeinjatüin jaaʼin»

1. (1) ¿Kasa nüküjaka Jesús namüin na nikirajüinkana süchiki kasoʼuleerüin sajaʼttinnüin tü kasa mojusü alatakat sainküin mma? (2) ¿Kasa naaʼinrajatka naashin Jesús?

MAʼAKA jeʼra kaʼi süpülapünaa outuin Jesús, asakinnüshi nia natuma pienchishii nikirajüin süchiki kasoʼuleerüin sajaʼttüin tü kasa mojusü alatakat sainküin mma (Mat. 24:3, TNM). Eeshiijaʼa nasakirüle süchiirua tia süpüla natüjaain saaʼu kasoʼuleerüin sajaʼttinnüin tü pueulokot Jerusalén sümaʼaleeya tü aʼwaajüleekat. Nnojotsü neʼe shiain nüküjain achiki Jesús namüin tia, nüküjaleeinña namüin kasoʼuleerüin sajaʼttüin tü kasa mojusü eekat wakalioʼu. Anuu tü nümakat Jesús süchiki tia kaʼikat: «Matüjaaju aaʼu tü kaʼi jee tü oora sülatüinjatkalü oʼu tia, nnojotsü natüjaain aaʼu tia na aapiee chajanakana iipünaa, jaʼitakajeʼe tayakai, nnojotsü tatüjaain aaʼu. Niaʼala neʼe atüjaaka saaʼu chi Tashikai». Süchikijee nüküjain Jesús tia, müshi joo nia namüin süchiki tü naaʼinrajatkat: «Eeja maʼin jaaʼin, jalia jutunkajayaai» (Mar. 13:32-37, TNM).

2. ¿Jamüshii eejüinjanaka maʼin naaʼin na anoujashii eejanakana nükalioʼu Jesús?

² Eejüinjatü maʼin naaʼin na judío anoujashii eejanakana nükalioʼu Jesús süpüla noʼttaainjanain. Nüküjain Jesús namüin na nikirajüinkana tü nayaawatüinjatkalü akajee sülüʼülüin süpüla sajaʼttinnüin tü pueulokot Jerusalén sümaʼaleeya tü aʼwaajüleekat. Anuu nünüiki namüin: «Jiʼrapa suutkajünüin Jerusalén natuma na surulaatkana, jiyaawateerü aaʼu sülüʼülüin sükalia süpüla sajaʼttinnajatüin». Neʼrapa sülatüin tia na anoujashiikana, aʼluwataainjana naya saaʼumüin tü uuchikat (Luc. 21:20, 21, TNM). Na oonookana sümaa tü nümakat Jesús, aʼluwataashii naya süpülapünaa sushutunuin saaʼu Jerusalén natuma na romanokana. Noʼttaakalaka sünainjee tia.

3. ¿Kasa wekirajaainjatka anain sünain ekirajaayakat tüü?

³ Kepiashii waya sükalioʼu sajaʼttajatka oʼu kasa mojusü. Müsüjeseʼe laülaainjatüin waaʼin otta eejüinjatüin waaʼin maʼaka naaʼin na anoujashii eejanakana nükalioʼu Jesús. Sünain ekirajaayakat tüü, wekirajaajeerü anain tü waaʼinrajatkat süpüla laülaainjatüin waaʼin suulia wakumajaʼalüin sooʼomüin pütchi neʼe süchiki tü weʼrakat jee tü waapakat. Wekirajaajeerü anain tü waaʼinrajatkat süpüla eejüin waaʼin suulia tü kasa amojujeʼereetkat wakuwaʼipa nümaa Jehová otta tü waaʼinrajatkat süpüla wajayatüin tü kaʼi apütaakat sümaʼinruʼu waʼatapajüin sajaʼttajatüin tü kasa mojusükat.

LAÜLAA WAAʼIN WAASHAJAAPA SÜCHIKI TÜ ALATAKAT SAINKÜIN MMA

4. ¿Jamüsü anaka jülüjale waaʼin tü kasa alatakat sainküin mma?

⁴ Anasü jülüjale maʼin waaʼin tü kasa alatakat sainküin mma süka watüjaajeerüin saaʼu shikeraajüin tü pütchi aküjünatüjütkalia suluʼu tü Bibliakat. Eesü waneirua kasa nüküjaka Jesús wayaawataka akajee sülüʼülaain süpüla sajaʼttüin tü kasa alatakat sainküin mma (Mat. 24:3-14, TNM). Akaʼaya chi aluwataaushikai Pedro nüküjain wanee kasa waaʼinrajatka süpüla katchin wanoula, shia jülüjainjatüin maʼin waaʼin shikeraajüin tü pütchi aküjünatüjütkalia suluʼu tü Bibliakat (2 Ped. 1:19-21, TNM). Anuu wanee pütchi aküjünaka suʼttianainjee tü karaloʼutakat Alateetkat Mapeena: «Anuu tü tashajakat [...] süchiki tü kasa alatajatkat maalü eeʼiyatünakat tamüin nütüma wane aapiee nümaʼanajeejachi Maleiwa ajütünakai tanainmüin nütüma Jesucristo [...] süpüla nüküjirüinjatüin namüin na anoujashiikana» (Alat. Map. 1:1). Müsüjeseʼe kamalain wamüin watüjaain saaʼu tü kasa alatakat sainküin mma süpüla wayaawatüin saaʼu shikeraajüin tü pütchi aküjünatüjütkalia suluʼu tü Bibliakat. Eesüjaʼa kamalainre wamüin waashajaain süchiki tia namaa na wawalayuukana.

5. (1) ¿Kasa eejüinjatka oulia waaʼin waashajaapa süchiki tü pütchi ekeraajakat suluʼujee tü Bibliakat? (2) ¿Kasa waaʼinrajatka süpüla wountuin tia? (Piirakaa sümüin tü ayaakuaakalüirua).

⁵ Waashajaapa süchiki shikeraajüin tü kasa aküjünatüjütkalia suluʼujee tü Bibliakat, eejüinjatü waaʼin suulia wakumajaʼalüin sooʼomüin pütchi neʼe süchiki tü alatajatkat. Waaʼinrüinjatü tia suulia waküjaʼalüin pütchi nnojoleetka paaʼinwaain atuma na wawalayuukana. Jamüsüjaʼa waapüle süchiki nakumajüin sukuwaʼipa wanee kasachiki na sülaülashiikana mma otta eeinjatüin jimata aaʼin natuma, anasü nnojorüle waküjamaatüin shiain ekeraajüin saaʼin wamüin tü sümakat 1 Tesalónica 5:3. Tü anakat süpüla waaʼinrüin shia jülüjale maʼin waaʼin tü pütchi jeketü ojuʼitakat suluʼu tü videokalüirua otta suluʼu tü karaloʼuta aapünakat wamüin. Shiale waashajaain achiki tia, paaʼinweena waya namaa na wawalayuukana otta wanaaweerü tü jülüjakat waaʼin (1 Cor. 1:10; 4:6).

6. ¿Kasa watüjaka sünainjee tü sümakat 2 Pedro 3:11-13?

⁶ (Paashajeʼera 2 Pedro 3:11-13, TNM). Sünainjee tü nümakat chi aluwataaushikai Pedro wayaawata aaʼu jamüin wekirajaainjanaka sünain tü pütchi ekeraajakat suluʼujee tü Bibliakat. Nüküjain Pedro jamüin eejüinjatka maʼin waaʼin süpüla tü nükaliakat Jehová, tia süpülajatü wulein wakuwaʼipa noʼuluʼu Jehová jee süpüla waʼwaajüin nia, nnojotsü süpülajatüin watüjaain saaʼu tü kaʼi jee tü oora nüntirüinjatkalü oʼu Armagedón (Mat. 24:36; Luc. 12:40). Müsüjeseʼe wuleein maʼin wakuwaʼipa noʼuluʼu Jehová jee waaʼinreein kasa süpüshuaʼa süka alin nia wapüla. Süpüla wountuin tia, eejüinjatü waaʼin suulia tü kasa amojujeʼereetkat wakuwaʼipa nümaa Jehová.

EEJÜINJATÜ WAAʼIN SUULIA MOJUJAIN WAKUWAʼIPA

7. ¿Kasa waaʼinrajatka suulia mojujain wakuwaʼipa? (Lucas 21:34).

⁷ Nnojotsü neʼe nüküjain Jesús namüin na nikirajüinkana jülüjainjatüin naaʼin tü kasa alatakat sainküin mma, nüküjainña namüin eejüinjatüin naaʼin suulia mojujain nakuwaʼipa. Tia shia tü nüküjakat Jesús suluʼu Lucas 21:34, TNM (paashajeʼera). ¿Kasa waaʼinrajatka suulia mojujain wakuwaʼipa? Eejüinjatü maʼin waaʼin suulia tü kasa eekat süpüla mojuin atuma wakuwaʼipa nümaa Jehová jee wayoutajatü shia. Waaʼinrüle tia, ayateena waya alin nüpüla Maleiwa (Prov. 22:3; Jud. 20:21, TNM).

8. ¿Kasa nüküjaka Pablo namüin na anoujashiikana?

⁸ Chi aluwataaushikai Pablo nüküjain namüin na anoujashiikana eejüinjatüin naaʼin suulia mojujain nakuwaʼipa. Anuu tü nümakat namüin na anoujashii chajanakana Éfeso: «Eejeekalaka jaaʼin suulia majüin jia maʼaka naaʼin na wayuu mekiikana, wayuuinjana kekiishii jia» (Éf. 5:15, 16, TNM). Nüchajaain maʼin sukuwaʼipa Satanás süpüla numojujeʼerüin tü wanoulakat. Müsüjeseʼe süküjain tü Bibliakat wayaawatüinjatüin saaʼu tü nüchekakat Jehová wapüleerua. Waaʼinrüle tia, wayamüleerü tü kasa nuuʼulakakalü aka waaʼin Satanás (Éf. 5:17, TNM).

9. ¿Kasa waaʼinrajatka süpüla wayaawatüin saaʼu tü nüchekakat Jehová?

⁹ Nnojotsü süküjain wamüin tü Bibliakat waneʼewai sukua tü kasa eekat süpüla amojujeʼerüin wakuwaʼipa nümaa Jehová. Eesü kaʼi waneeküinjatka oʼu wanee kasa nnojotka saashajaain maʼin achiki tü Bibliakat. Süpüla anain tü waneekakat, wayaawatüinjatü saaʼu tü kasa nüchekakat Jehová. Wounteerü tia wekirajaʼawaire sünain tü Nünüikikat Maleiwa sümaa wasakireʼerüin waaʼin sünain. Wayaawatüle maʼin saaʼu tü nüchekakat Jehová jee waʼyataale maʼin süchiirua wanaawain tü jülüjakat waaʼin sümaa tü jülüjakat naaʼin Cristo, kekiijeena waya sünain tü waaʼinrakat jaʼitairü nnojoluin eein wanee pütchi suluʼu tü Bibliakat aashajaaka süchiki wanee kasa waaʼinrajatka (1 Cor. 2:14-16, TNM). Eesü waneirua kasa wayaawatamaataka aaʼu mojuin shia, eepejeʼe waneirua kasa kapüleeka ayaawataa aaʼu.

10. ¿Jarat tü waneirua kasa wayoutajatka?

¹⁰ Anuu waneirua kasa wayoutajatka: nnojoliinjana aʼalaajaain waya suʼupala jieyuu, akaataajaʼa na jieyuukana nnojoliinjana aʼalaajaain naya noʼupala na tooloyuukana, nnojoluinjatü alanaʼaleein watuma tü asüüshikat, nnojoliinjana kasain aleʼe waya, nnojoluinjatü airuʼuluin wanüiki, nnojoliinjana anajüin waya kasa sümaajatka atkawaa jee nnojoliinjana waya anajüin shiyaakua wayuu masheʼinsat (Sal. 101:3). Nüchajaain maʼin sukuwaʼipa chi Yolujaakai süpüla numojujeʼerüin tü wakuwaʼipakat nümaa Jehová (1 Ped. 5:8). Nnojorüle eejüin waaʼin nuulia, eeshii süpüla kachumüraliin waya, nnojoluin lotuin wakuwaʼipa sünain aaʼinraa kasa, kachiiruain waaʼin washirüü jee keeʼireein waaʼin wanee kasa nnojotka wakoroloin, üttüin waaʼin sünain wayuu, yaletüin waaʼin jee nnojoluin motuin waaʼin saainjala wayuu (Gal. 5:19-21). Sukumajaaiwaʼaya suluʼu waaʼin tia, eesüjaʼa jülüjale waaʼin sülatapünaajeerüin woulia. Nnojorüle wasünneʼeramaatüin suluʼujee waaʼin, amüloʼulaajeerü shia suluʼu waaʼin maʼaka sümüloʼulaain wanee mojuui keipüsesü (Sant. 1:14, 15).

11. (1) ¿Jarat wanee kasa kapüleeka süpüla wayaawatamaatüin aaʼu eein süpüla sumojujeʼerüin wakuwaʼipa nümaa Jehová? (2) ¿Jamüsü wayoutajatka shia?

¹¹ Wekirajaa süchiki wanee kasa kapüleeka maʼin süpüla wayaawatamaatüin saaʼu mojuin shia, tü eekat süpüla amojujeʼerüin wakuwaʼipa nümaa Jehová. Tia shia waʼaleewajaale sümaa wayuu mojuka akuwaʼipa. Jülüjataa waaʼin eein wanee aʼyataajiraakai wamaa nnojoikai aküjalin pütchi. Süka aneein pütchi watuma nachiki na aküjaliikana pütchi nüchiki Jehová, kamaneeshii waya nümüin. Eeshiijaʼa waikalaʼawaire nümaa sünain ekawaa. Mapa kiʼrashii waya nümaa. Eeshijaʼa nukuentajawaire süchiki kasa eekai yarüttüin maʼin noʼuluʼu Jehová. Waapaiwaʼaya tü nümakat, mojusü shia wamüin. Shiasaʼa mapa, kiʼrashii waya sünain. Soʼu wanee kaʼi, nuunejaaka waya sünain asaa wanee kasa süchikijee tü aʼyatawaakat, woʼunaka nümaa. Süka nümaain waya waneepia, wanaawasü waaʼin nümaa. ¿Kamaʼajeetche süpüla washatüin nukuwaʼipa? Watüjaa aaʼulu kamaneeinjanain waya sümüin wayuu süpüshuaʼa jee kojutuinjanain naya wamüin. Sotuinjatpejeʼe waaʼin eein süpüla washatüin nakuwaʼipa na wayuu waʼaleewajaakana amaa (1 Cor. 15:33, TNM). Eejüle waaʼin suulia tü amojujeʼereetkat wakuwaʼipa nümaa Jehová maʼaka nümüin Jesús, nnojoleena namaakuʼu müin waya na wayuu nnojoliikana oonooin sümaa tü nuluwataakalü anain Jehová (2 Cor. 6:15). Otta müsia wayaawateerü aaʼu tü amojujeʼereetkat wakuwaʼipa nümaa Jehová jee wayouteerü shia.

WALATIRA KAʼI SÜNAIN KASA EEKAI ANAIN

12. ¿Kasa naaʼinrajatka na nikirajüinkana Jesús sümaʼinruʼu naʼatapajüin sajaʼttinnüin tü kasa mojusü alatakat sainküin mma?

¹² ¿Eesüche wanee kasa naaʼinrüinjatka na nikirajüinkana Jesús sümaʼinruʼu naʼatapajüin sajaʼttinnüin tü kasa mojusü alatakat sainküin mma? Jamüsaʼa shia. Nuluwataain naya Jesús sünain aküjaa tü pütchi anakat maʼin «sainküinpünaa Jerusalén, Judeapünaa, Samariapünaa otta sainküinpünaa mmakat» (Aluw. 1:6-8, TNM). Miyoʼu tü aʼyatawaa aluwataanakalü anain naya, naaʼinmaale maʼin tia najayateerü tü kaʼikat.

13. ¿Jamüshii walatirüinjanaka kaʼi sünain kasa eekai anain? (Colosas 4:5).

¹³ (Paashajeʼera Colosas 4:5, TNM). Süpüla eejüinjatüin waaʼin suulia tü amojujeʼereetkat wakuwaʼipa nümaa Jehová, anasü jülüjale waaʼin kasain walatirüin anain kaʼi. Anasü waaʼinrüle tia süka eein süpüla sülatalaʼa sümüin kasa wamüin otta eein süpüla outalaa wamüin (Ecl. 9:11).

14, 15. ¿Kasa waaʼinrajatka süpüla walatirüin kaʼi sünain kasa eekai anain? (Hebreokana 6:11, 12; piirakaa sümüin tü ayaakuaakat).

¹⁴ Anasü maʼin walatirüle kaʼi sünain aaʼinraa tü nüchekakat Jehová otta sünain aaʼinraa tü kasa aleeweenakalü atuma waya nümaa (Juan 14:21). Waaʼinra tü sümakat tü Bibliakat, tü makat: «Ayataʼaya katchin jaaʼin, nnojotsü kasain amalajeʼerüinjanain jia, ayataʼaya jiʼyataain waneepia nümüin chi Señotkai» (1 Cor. 15:58, TNM). Shiasaʼa süntapa sükalia sajaʼttajatka oʼu kasa mojusü jee jamüle waya, nnojoleena müin waya mayaa: «Aishaʼajaa, anashijeʼe taʼyataatüjüirejeʼe nümüin Jehová» (Mat. 24:13; Roma 14:8, TNM).

¹⁵ Maʼaka nüküjatüjülin Jesús, ayatüsia nuʼunirüin nakuwaʼipa na nikirajüinkana süpüla naküjain sainküinpünaa mma süchiki Nuluwataainjachin Maleiwa. Nikirajüin waya Jesús nakajee na wawalayuu oʼunirakana sukuwaʼipa tü waʼyataainkat süpüla watüjain aküjaa pütchi otta müsia naapüin wamüin tü choʼujaakat süpüla wountuin tia (Mat. 28:18-20). Sümaʼinruʼu waʼatapajüin najaʼttirüin Jehová tü kasa mojusü alatakat sainküin mma, anasü waaʼinmaale tü aküjaakat pütchi, tü ekirajaakat wayuu otta anasü eejüle maʼin waaʼin suulia tü mojeetkalü atuma wakuwaʼipa nümaa Jehová. Waaʼinrüle tü sümakat Hebreokana 6:11, 12 (paashajeʼera), ayateerü wachecherüin waaʼin sümaʼinruʼu waʼatapajüin tü kasa anasü eejeetkat nutuma Jehová.

16. ¿Kasa ayatüinjatka waaʼinrüin?

¹⁶ Kettaaitpa nutuma Jehová tü kaʼi najaʼttirajatkalü oʼu tü kasa nuluwataakalü aaʼu Satanás. Süntapa tia kaʼikat, nikeraajeerü Jehová süpüshuaʼa tü pütchi nüküjatüjütkalia achiki suluʼu tü Bibliakat. Mayaainjeʼe wattayülüin saaʼin wamüin tü nükaliakat Jehová, nnojoleerü kamaʼain shia (Hab. 2:3). Sümaʼinruʼu waʼatapajüin tia kaʼikat, ayataʼaya waaʼinrüin tü sümakat Miqueas 7:7 tü makat mayaa: «Eejeerü taaʼin sünain tü nümakat Jehová. Nnojoleechi taya ashapajaain aaʼin sünain aʼatapajaa chi Maleiwa oʼtteʼerakai taya».