¿Jamüshi kojutuinjachika maʼin wamüin Jehová?

1, 2. Sünainjee tü sümakat Salmo 25:14, ¿kasa waaʼinrajatka süpüla aleewain maʼin waya nümaa Jehová?

¿KASA paaʼinrajatka süpüla ayatüin aleewain pia nümaa wanee wayuu? Aijiraainjana jia otta akaalinjiraainjana jia. Eesüjaʼa jülüjale paaʼin nnojoluinjachin mmoluin pia neema chi paʼaleewainkai süpüla alinjachin nia püpüla. Eekajasaʼa süpüla aleewain maʼin waya nümaa Jehová kojutuinjachi nia watuma otta mmoluinjana waya saaʼu waaʼinrüin wanee kasa mojuka nümüin maʼaka süküjain Salmo 25:14 (paashajeʼera).

² Jaʼitainna kakaliainnale waya sünain anoujaa, ayatüinjachi kojutuin Maleiwa watuma otta ayatüinjana mmoluin waya saaʼu waaʼinrüin wanee kasa mojuka nümüin. ¿Jamüsü waaʼinrajatka tia? ¿Kasa waaʼinrajatka süpüla kojutuin nia watuma? Jamüshijaʼa Abdías chi sülaülajanakai nipia Acab otta Jehoiadá chi laülaashikai napüleerua na sacerdotekana, kojutushi maʼin natuma chi Maleiwakai. Akaajasaʼa Jehoás chi aluwataakai saaʼu Judá mojutusai Maleiwa nutuma. Wekirajaa süchiki tü naaʼinrakat.

¿JAMÜSHII MMOLUINJANAKA WAYA SAAʼU WAAʼINRÜIN TÜ MOJUKAT NÜMÜIN MALEIWA?

3. ¿Jamüsü anaka mmorüle waya saaʼu waaʼinrüin wanee kasa?

³ Eeshii mmorüle waya suulia jamajüin waya sutuma wanee kasa. Anasü müle wakuwaʼipa süka eejeerüin waaʼin suulia tü waaʼinrajatkat. Jamüshijaʼa mmorüle wanee wayuu nülatapa süʼütpünaa wanee ishi eekai oʼutuin maʼin, eejeerü naaʼin suulia nujutuʼulaain suluʼu. Aire wapüla wanee waʼaleewain, mmoleena waya saaʼu waaʼinrüin wanee kasa mojeetka nümüin.

4. ¿Jamüsü keeʼireeka naaʼin Satanás mmoluinjanain waya neema Jehová?

⁴ Keeʼireesü naaʼin Satanás mmoluinjatüin wayuu neema Jehová. Nunoujireein waya sünain tü nümakat Elifaz nümüin Job. Jamüshijaʼa Elifaz nüküjain jashichin Jehová sümüin wayuu, nüchekajeein tü shiʼralakat wayumüin otta nnojoluin süpüla talatüin nia sutuma wayuu (Job 4:18, 19). Keeʼireesü naaʼin Satanás mmoluinjanain waya neema Jehová süpüla wooʼulaainjanain suulia aʼyatawaa nümüin. Suulia nimeejüin waya, wayaawatüinjatü saaʼu nnojoluin anain mmorüle waya neema Jehová. Tü anakat süpüla waaʼinrüin shia mmoluinjanain waya saaʼu waaʼinrüin wanee kasa mojuka nümüin.

5. ¿Jamüshii mmoluinjanaka waya saaʼu waaʼinrüin wanee kasa mojuka nümüin Maleiwa?

⁵ Chi wayuu aikai maʼin apüla Maleiwa mmotshi nia saaʼu naaʼinrüin wanee kasa amojujeʼereetka nukuwaʼipa nümaa. Anasü maʼin nukuwaʼipa Jesús wapüleerua süka kojutuin chi Maleiwakai nümüin (Heb. 5:7, TNM). Nnojoishi nia mmoluin neema Jehová (Is. 11:2, 3). Aishi maʼin nia nüpüla jee oonooshi nia waneepia sümaa nünüiki (Juan 14:21, 31). Müshiʼiya wayakana, kojutushi maʼin wamüin Jehová otta mmotshii waya saaʼu waaʼinrüin wanee kasa amojujeʼereetka wakuwaʼipa nümaa. Waaʼinrüin tia süka aipüralin nia, kekiin nia, lotuin nukuwaʼipa otta pülashin nia. Watüjaa aaʼu aishaatain waya nüpüla otta eein süpüla talatüin naaʼin jee mojuin naaʼin sünainjee tü waaʼinrakat. Nnojoliire woonooin sümaa nünüiki, mojeerü naaʼin. Eekajasaʼa woonoole sümaa nünüiki, talateerü naaʼin (Sal. 78:41; Prov. 27:11).

¿KASA WAAʼINRAJATKA SÜPÜLA KOJUTUIN MAʼIN MALEIWA WATUMA?

6. Püküja wanee kasa paaʼinrajatka süpüla kojutuin maʼin pümüin Jehová (Salmo 34:11).

⁶ Nnojoishii waya joʼuujiraain sümaa kojutuin Jehová watuma, aʼyataainjana waya süchiirua tia (paashajeʼera Salmo 34:11). Wanee kasa waaʼinrajatka shia wekirajaale sünain tü kasa nukumajakat Jehová. Wayaawateetkalaka saaʼu kekiin maʼin nia, pülashin nia jee alin waya nüpüla. Saaʼujee tia kojuteechi maʼin nia wamüin jee aijeechi maʼin nia wapüla (Roma 1:20, TNM). Anuu sünüiki wanee wawala kanüliaka Adrienne: «Teʼrapa tü kasa nukumajakat Jehová ponusü maʼin taaʼin kekiin maʼin nia. Tayaawata aaʼu niain neʼe atüjaakai saaʼu tü anainjatkalü atuma takuwaʼipa. Nnojotsü taainjeein wanee kasa akayaleʼereetka taya nuulia Jehová, chi katakai atuma toʼu». Anasü pükatarüle kaʼi soʼu semaanakat tüü süpüla pikirajaain sünain wanee kasa nukumajaka Jehová. Paaʼinrüle tia, kojuteechi maʼin pümüin Jehová otta aijeechi maʼin nia püpüla (Sal. 111:2, 3).

7. ¿Jamüshi kojuteechika Jehová watuma woʼuraajüle nümüin?

⁷ Wane kasa waaʼinrajatka süpüla kojutuin maʼin watuma Jehová otta süpüla mmoluin waya saaʼu waaʼinrüin wanee kasa amojujeʼereetka wakuwaʼipa nümaa shia woʼuraajüle nümüin. Waashajaale maʼin nümaa chi Wamaleiwasekai, kanouleena maʼin waya nünain. Wachuntule nümüin yalayalaa aaʼin soʼunnaa müliaa, wayaawateerü aaʼu nükaalinjeein waya süka pülashin nia. Waapüle analuʼutka nümüin saaʼujee naapüin nikii chi Nüchonkai waaʼu, wayaawateerü aaʼu alin waya nüpüla. Wachuntule nümüin nuʼunirüin wakuwaʼipa soʼunnaa müliaa, wayaawateerü aaʼu kekiin maʼin nia.

8. ¿Kasa waaʼinrajatka süpüla ayatüinjachin kojutuin maʼin wamüin Jehová?

⁸ Süpüla ayatüinjachin kojutuin maʼin wamüin Jehová, ekirajaainjana waya sünain tü Bibliakat süpüla watüjain nanainjee na wayuu saashajaakana achiki, maʼaka naaʼin na anakana akuwaʼipa jee na nnojoliikana anain akuwaʼipa. Joʼu wekirajaai nüchiki Abdías, chi sülaülajanakai nipia Acab chi aluwataakai saaʼu Israel otta nüchiki Jehoiadá chi laülaashikai napüleerua na sacerdotekana. Jee müsia nüchiki Jehoás, chi anapuʼukai akuwaʼipa nuʼttaiwaʼaya sünain aluwatawaa saaʼu Judá jee mapa akayalaashi nia nuulia Jehová.

MEIMMOLUINJANA WAYA MAʼAKA NAAʼIN ABDÍAS

9. ¿Kasa naaʼinraka Abdías saaʼujee kojutuin maʼin nümüin Jehová? (1 Reyes 18:3, 12).

⁹ «Kojutushi maʼin Jehová nümüin Abdías»,b müsü tü Bibliakat suʼttaiwaʼaya saashajaain nüchiki Abdías (paashajeʼera 1 Reyes 18:3, 12). Saaʼujee naaʼinrüin tia Abdías, lotusü nukuwaʼipa sünain kasa süpüshuaʼa otta jüüjüüshi nia sümüin tü münakat nümüin. Nüneeküinjeseʼe nia chi laülaashikai saaʼu Israel süpüla sülaülajanain nia nipia (anasü paashajeʼerüle Nehemías 7:2). Saaʼujee mmoluin nia suulia naaʼinrüin wanee kasa mojuka nümüin Maleiwa, meimmoluinsai nia. ¿Jamüshi meimmoluinjachikai nia? Shia süka mojulaain maʼin Acab, keemaleesia tü naaʼinrakat suulialeʼeya tü naaʼinrapuʼukat na aluwataaliikana nüpülapünaa (1 Rey. 16:30). Jee müsia Jezabel, tü nuʼwayuusekat, suʼwaajüin Baal jee shiyoutashaata achikichi nuʼwaajünüin Jehová. Suʼutira aaʼinchii na wayuu aʼwaajakana Jehová kepiakana palaajeeruʼu sünain tü mmakat Israel. Watta naalii na nünüikimaajanakana Maleiwa suʼutirakana aaʼin (1 Rey. 18:4). Soʼu kaʼikat tia, kapüleesü maʼin namüin na wayuukana naʼyataain nümüin Jehová.

10. ¿Jamüsü watüjaaka saaʼu meimmoluin maʼin Abdías?

¹⁰ ¿Jamüsü watüjaaka saaʼu meimmoluin maʼin Abdías? Wanaa sümaa suʼutireein naaʼin Jezabel na nünüikimaajanakana Jehová, nuunjulüin Abdías 50 nünüikimaajana Jehová suluʼu wanee koʼushii otta müshiʼiya wane 50 suluʼu wane koʼushiʼiya. Nikirüin naya Abdías jee nüsirüin naya wüin (1 Rey. 18:13, 14). Sütüjaalejeʼeya saaʼu Jezabel tü naaʼinrakat Abdías, outushijeʼe nia sutuma. Eeshijaʼa mmorüle Abdías suulia nuʼutunuin aaʼin, shiapejeʼe alanaʼaleein nümüin alin nüpüla Jehová otta alin nüpüla na aʼyataashiikana nümüin Jehová.

11. Maʼaka naaʼin Abdías, ¿kasa naaʼinraka waneinnua wawalayuu maaʼulu yaa? (Piirakaa sümüin tü ayaakuaakat).

¹¹ Watta naalii wawalayuu kepiakana suluʼu wanee mma eere süpülajünüin woulia tü waʼyataainkat nümüin Maleiwa. Mayaainjeʼe kojutuin namüin na sülaülashiikana mma, ayatüshiʼiya naʼwaajüin Jehová maʼaka naaʼinrüin shia Abdías (Mat. 22:21). Jaʼyasü naaʼu kojutuin maʼin namüin chi Maleiwakai wanaa sümaa noonooin sümaa nünüiki suulialeʼeya noonooin sümaa sünüiki wayuu (Aluw. 5:29). Müshiijeseʼe ayatüin naya sünain aküjaa tü pütchi anakat maʼin jee ayatüin noutkajaain. Naaʼinrüin tia sujuunaluʼu wayuu suulia püreesain naya atumawaa (Mat. 10:16, 28). Nachajaainña sukuwaʼipa süpüla namaʼanain na wawalayuukana tü akatsüinrüinjatkat nanoula. Jülüjataa waaʼin nukuwaʼipa Henri, wanee wawala kepiakai chaa África. Soʼunnaa süpülajünüin woulia tü waʼyataainkat nümüin Maleiwa chayaa, niʼikajaain Henri namüin na wawalayuukana tü karaloʼutakalüirua. Müshi nia: «Japüleʼe maʼin taya, meimmoluinpejeʼe taya saaʼujee kojutuin maʼin tamüin Jehová». Kojutule maʼin pümüin chi Maleiwakai, meimmoluinjeechi pia maʼaka naaʼin Henri.

WANEEPIA WAYA NÜMAA JEHOVÁ MAʼAKA NAAʼIN JEHOIDÁ

12. ¿Kasa naaʼinraka Jehoiadá sümaa tü nuʼwayuusekat sutuma waneepiain naya nümaa Jehová?

¹² Kojutushi maʼin Jehová nümüin Jehoiadá chi laülaashikai napüleerua na sacerdotekana. Saaʼujee müin nukuwaʼipa, waneepiashi nia nümaa Jehová otta nükaalinjain na waneinnua süpüla naʼwaajüin Maleiwa. Jaʼyasü naaʼu kojutuin maʼin nümüin Jehová soʼunnaa suluwataain Atalía saaʼu Judá. Wayuukat tia, süchon Jezabel otta aainjasü kasa mojusü süpüla shiainjatüin aluwataain. Suʼutira aaʼinchii na süikeyuukana, na aluwataainjanakana nüchikumüin chi nashikai (2 Crón. 22:10, 11). Saaʼujee tü naaʼinrakat Jehoiadá sümaa Jehosabeat, tü nuʼwayuusekat, nnojoishi suʼutuin aaʼin Atalía wanee sülüin, Jehoás nünülia chia joʼuukai. Nounjuluin chi joʼuukai jee naaʼinmajüin nia. Müshiijeseʼe ayatüin aluwataain na nüikeyuukana David nüchikumüin. Eetaasü maʼaka 100 nuuyase Jehoiadá soʼu kaʼikat tia. Ayatüsia naaʼinrüin tü kasa anakat noʼuluʼu Jehová, nnojoishi nia eimmolojooin suulia Atalía (Prov. 29:25).

13. ¿Jarat tü wane kasa naaʼinrakat Jehoiadá sutuma waneepiain nia nümaa Jehová?

¹³ Wekirajaa sünain wane kasa naaʼinraka Jehoiadá sutuma waneepiain nia nümaa Jehová. Nukumajüin sukuwaʼipa Jehoiadá süpüla niainjachin aluwataain Jehoás, jama niain wanee nülüin David. Akaratshi nuuyase Jehoás soʼu tia. Nnojorüle nuuntuin tia Jehoiadá, outushijeʼe nia. Anakuwaʼipatsü tü kasa naainjakat nutuma Jehová. Nakaalinjain nia na levitakana otta waneinnua laülaayuu sulujunakana tü mmakat Israel. Müshijeseʼe nüneeküin Jehoás süpüla nuluwataainjachin jee nuʼutirüinjatüin saaʼin Atalía (2 Crón. 23:1-5, 11, 12, 15; 24:1). Nüpansaajaka Jehoiadá wanee pütchi nümaa Jehová, nümaa Jehoás otta namaa na israelitakana süpüla ayatüinjanain naʼwaajüin Jehová (2 Rey. 11:17). Niʼitaainña na aaʼinmajüliikana tü supuettoʼusekat nipia Jehová süpüla nnojolin nekerotirüin chi eekai yarüttüin akuwaʼipa (2 Crón. 23:19).

14. ¿Kasa aainjünaka nüpüleerua Jehoiadá süka kojutuin maʼin nümüin Jehová?

¹⁴ Anuu tü nümatüjütkalia Jehová: «Kojuteena tatuma na kojutukana atuma taya». Shiaʼaya naaʼinraka tia nüpüleerua Jehoiadá (1 Sam. 2:30). Nüshajirüin Jehová suluʼu tü Nünüikikat süchiki tü kasa anasü naaʼinrakat chia wayuukai laülaashikai napüleerua na sacerdotekana süpüla washatüinjatüin nukuwaʼipa (Roma 15:4). Süka kojutuin nia atumawaa, ojoitunüshi nia eere naamaka na aluwataaliikana otta eejeʼewaire David. Wainma kasa anasü naainjaka Jehoiadá süpüla anainjatüin tü aʼwaajüleekat Maleiwa (2 Crón. 24:15, 16).

15. ¿Kasa watüjaka sünainjee tü nüchikimaajatkat Jehoiadá? (Piirakaa sümüin tü ayaakuaakat).

¹⁵ Tü watüjakat sünainjee nukuwaʼipa Jehoiadá shia mmoluinjanain waya saaʼu waaʼinrüin wanee kasa mojuka nümüin chi Maleiwakai. Anasü nashatüle na laülaashiikana tü nukuwaʼipakat. Naaʼinrüin tia wanaa sümaa nachajaain sukuwaʼipa süpüla naaʼinmajüin na wawalayuukana (Aluw. 20:28). Kojutule maʼin Jehová namüin na wawalayuu laülaayuukana otta noonoole namaa, eesü süpüla naaʼinrüin Jehová nakajee tü keeʼireekat naaʼin. Jülüjale naaʼin na jimaʼaliikana otta na majayünnüükana tü nukuwaʼipakat Jehová nümaa Jehoiadá, kojuteena maʼin namüin na wawalayuu laülaayuukana, nayaleekajaʼa na wawalayuu kakaliainnakana sünain aʼyatawaa nümüin Jehová (Prov. 16:31). Eesiaʼaya tü watüjakat nanainjee na levitakana otta tü naainjakat waneinnua laülaayuu sulujunakana tü mmakat Israel süpüla nakaalinjain Jehoiadá: wakaalinja waneepia na wawalayuu oʼunirakana sukuwaʼipa waʼyataain otta woonoo namaa (Heb. 13:17).

NNOJO WASHATÜIN NUKUWAʼIPA JEHOÁS

16. ¿Kasa naaʼinraka Jehoás saaʼujee nuʼunuin süchiirua tü sümakat wayuu?

¹⁶ Jintüliiwaʼaya Jehoás anasü nukuwaʼipa noʼuluʼu Jehová. Nuuntuin tia süka nükaalinjain nia Jehoiadá (2 Rey. 12:2). Outapa Jehoiadá oʼunushi nia süchiirua tü namakat na aluwataaliikana saaʼu Judá, na ooʼulaakana suulia aʼwaajaa Maleiwa. Müshijeseʼe nuʼwaajüin maleiwayaasü namaʼaleeya na israelitakana (2 Crón. 24:4, 17, 18). Mayaainjeʼe mojushaatain naaʼin Jehová saalinjee tü naainjakat, ayatüshia nuluwataain na nünüikimaajanakana namaʼanamüin süpüla nayaawajaainjanain suulia naainjala. Nayoutajaapejeʼe sümaa nünüiki Jehová na israelitakana. Nayoutüinña sümaa nünüiki chi nüchonkai Jehoiadá, Zacarías nünülia, nünüikimaajachi nia Maleiwa, sacerdote nia otta nüpüriimose nia Jehoás. Mayaainjeʼe nütüjaain saaʼu Jehoás katüin noʼu sünainjee nüpüshi Zacarías, ayatüshia nuʼutirüin naaʼin Zacarías. ¡Mojulaakaiche maʼin nia! (2 Crón. 22:11; 24:19-22).

17. ¿Kasa alataka nümüin Jehoás?

¹⁷ Sutuma mojutuin chi Maleiwakai nümüin Jehoás, eʼrüshi nia müliaa. Ekeraajüsü nünain tü pütchi nümatüjütkalia Jehová, tü makat mayaa: «Na mojutukana atuma taya, mojuteena naya atumawaa» (1 Sam. 2:30). Nükanajuuka Jehoás namaa na nümaajanakana natuma na siriokana eerejeʼe palitchon naya noulia. Asotunushi Jehoás jee mayeinshi maʼin nia. Noʼunapa na siriokana namaʼanajee, oʼutuna aaʼinchi Jehoás natuma na aʼyataashiikana nümüin saalinjee nuʼutuin naaʼin Zacarías. Saaʼujee mojulaain maʼin Jehoás, nnojoishi ojoitunüin nia eere naamaka na aluwataaliikana (2 Crón. 24:23-25, paashajeʼera nota de estudio suluʼujeejatka Mateo 23:35 eere sümüin «hijo de Baraquías» [alijunaikiruʼusü]).

18. Sünainjee tü sümakat Jeremías 17:7, 8, ¿kasa waaʼinrajatka suulia washatüin nukuwaʼipa Jehoás?

¹⁸ Wanee wunuʼulia eekai jepetüin ourala, kapüjiainjatü shia atumawaa suulia sujutuuin. Müsia neʼe tü alatakat nümüin Jehoás, müshi nia maʼaka saaʼin tü wunuʼulia jepetükalü ourala. Choʼujaashi nükaaliijainjachin nia Jehoiadá süpüla müinjachin shaʼwatakai naaʼin. Shiasaʼa outapa Jehoiadá, müshi nujutuukai aaʼin Jehoás mmoluʼumüin. Anuu tü watüjakat sünainjee tia: nnojoishi neʼe kojutuinjachin wamüin Jehová saaʼujee weʼrüin kojutuin nia namüin na wawalayuukana, saaʼujee kojutuin nia namüin na wapüshikana otta shiale saaʼujee nakaalinjain waya süpüla wountuin tia. Süpüla katsüin wanoula, wakooʼomüinrüinjatü tü naalinkat Jehová wapüla jee kojutuinjachin maʼin nia wamüin. Wountuin tia wanaa sümaa wekirajaain sünain tü Nünüikikat sümaa wasakireʼerüin waaʼin sünain otta wanaa sümaa woʼuraajüin nümüin waneepia (paashajeʼera Jeremías 17:7, 8; Col. 2:6, 7).

19. ¿Kasa nuchuntaka wamüin Jehová?

¹⁹ Nnojotsü nuchuntuin wamüin Jehová wanee kasa isaka wachiki. Anuu tü nuchuntakat wamüin suluʼu Eclesiastés 12:13: «Kojuta pümüin chi Maleiwa shiimainshikai otta paaʼinra tü nuluwataakalü anain pia, shiainjatü naaʼinraka wanee wayuu tia». Kojutule maʼin wamüin Jehová otta mmorüle waya saaʼu waaʼinrüin wanee kasa mojuka nümüin, yalayaleerü waaʼin soʼunnaa müliaa otta meimmoluinjeena waya maʼaka naaʼin Abdías otta Jehoiadá. Waaʼinrüle tia, aleeweena waya nümaa Jehová süpüla kaʼikat süpüshuaʼa.