¿Pütüjaa aaʼu?

**¿Jamüsü watüjaaka saaʼu shiimain tü sümakat tü Bibliakat sünainjee tü ladrillo ousütünakalü anain süchikanainruʼu Babilonia otta sünainjee sukumajia?**

WATTA SAALII ladrillo ousütünaka anain süchikanainruʼu Babilonia, akumajünüsü tia pueulokot sükajee tia ladrillokalüirua. Naashin chi arqueólogo kanüliakai Robert Koldewey, aʼyajünüsü tü ladrillokat suluʼu horno anooipaʼaka suulia tü pueulokot, chayaa eejatü pootshi anasü otta wunuʼulia sukuainjatka tü ladrillokot.

Ousütüna anainrü waneirua kasa ayaawatünaka akajee tü kasa mojusü naainjakat na sülaülashiikana Babilonia sükajee tü hornokot. Anuu nünüiki Paul-Alain Beaulieu, chi profesoot ekirajaakai süchiki nakuwaʼipa na asirio namaiwajanakana, ekirajüshi nia suluʼu tü Universidad chakat Toronto: «Saashin waneirua karaloʼuta nashajaka na babiloniokana […], aküjünüsü süchiki nuluwataain chi sülaülashikai Babilonia naʼajünüin na eʼrüliikana wayumüin otta na mojutukana amüin tü kasa naʼwaajakat». Müsü sünüiki wanee karaloʼuta ashajünaka soʼunnaa nuluwataain Nabucodonosor: «Juʼuta naaʼin, jaʼajapan, jüsijaapan, […] jujuta naya suluʼu tü hornokot […], juuʼulaa jotoiwa naya».

Sünainjee tia jülüjasü naaʼin na aashajeʼerakana tü Bibliakat tü sümakat Daniel kapiitulo 3. Saashin tia kapiitulokat nukumajirüin Nabucodonosor anooipaʼajee suulia tü pueulokot wanee ayaakuaa miyoʼu maʼin ooroleʼeya shia. Chajatü nukumajirüin shia suluʼu tü patajatshii kanüliakat Dura. Eejana apünüinshii jimaʼalii hebreo kanüliakana Sadrac, Mesac otta Abednego, nnojoishii nasapainkain sümülatuʼu tia ayaakuaakat. Naashichijaaka Nabucodonosor jee nuluwataaka sünain chuwatüinjatüin maʼin atumawaa tü sikikat süpüla nojutunüinjanain naya saʼaka. Nuʼtteʼerapejeʼe naya wanee aapiee (Dan. 3:1-6, 19-28).

Wanee *ladrillo* eere süshajünüin nünülia Nabucodonosor.

Sünain tü ladrillo ousütünakalü anain, ashajünüsü pütchi eere kojutuin maʼin atumawaa chi sülaülashikai Babilonia. Anuu wanee pütchi ashajünaka sünain: «Tayakai Nabucodonosor, taya chi sülaülashikai Babilonia. Takumajirüin piichikat tüü eeinjachire taluwataain. Kasataalejeseʼe naluwataain saaʼu na taikeyuukana süpüla kaʼikat süpüshuaʼa». Pütchikat tüü meematsü aka saaʼin tü ashajünakat suluʼu Daniel 4:30 eere yaletüin naaʼin Nabucodonosor sünain maa: «¿Aashin shiain tüü, Babilonia tü Miyoʼukat? Takumajaka süpüla nipiain shia chi aluwataashikai, takumajüin shia süka tayain chi laülaashikai, süpüla kojutuinjachin taya atumawaa».