Paaʼinrajatka nünajüle puʼwayuuse shiyaakua wayuu masheʼinsat

• «Müsü kawalaʼatakai taaʼin nutuma chi taʼwayuusekai».

• «Japüisü maʼin taya, müsü mojutukai taaʼin atumawaa».

• «Yüütüsü neʼe taya, nnojotsü jaralüin taashajaain amaa süchiki tia».

• «Jülüjasü taaʼin maalin taya nüpüla Jehová».

Sünainjee nanüiki naya wayuukana, wayaawata aaʼu mojuin maʼin saaʼin wanee wayuu nünajüle suʼwayuuse shiyaakua wayuu masheʼinsat. Kakaliairüle nuunjulajüin suulia tia, eesüjaʼa nnojorüle sunoujain anain nünüiki piantua. «Müshi nnojoikai maʼin teʼraajüin taʼwayuuse. ¿Kasa amaa nuunjulajaka toulia?», müsü wanee wayuu.

¿Anajüshiche puʼwayuuse shiyaakua wayuu masheʼinsat?a Pütchikat tüü pümüinjatü, wekirajaajeerü süchiki waneirua pütchi suluʼujee tü Bibliakat amülialeetka paaʼin, piyaawateetka atuma eein Jehová pümaa, akatsüinreetka paaʼin suulia mojuin paaʼin otta akatsüinreetka punoula.b

TÜ EEKAT SÜPÜLA PAAʼINRÜIN

Mayaainjeʼe nnojoluin süpüla püpüleeruain naaʼin puʼwayuuse süpüla nunouteʼerüin nukuwaʼipa, eesü waneirua kasa paaʼinrajatka süpüla anain paaʼin. Waashajaa süchiki tia.

Nnojo piʼitaain paaʼu piain kasirüin tü alatakat. Eesüjaʼa jülüjale saaʼin wanee wayuu shiain kasirüin nünajüle suʼwayuuse shiyaakua wayuu masheʼinsat. Shiaʼaya alataka tia sümüin Alice.c «¿Jamüsüche kamalainka nümüin taʼwayuuse nünajüin waneirua jieyuu toulialeʼeya tayakat?», maa müsü saaʼin Alice. Eetaashii joo na mojukana aaʼin saaʼujee jülüjain naaʼin nnojoleerüin nanouteʼerüin nakuwaʼipa naʼwayuuse sutuma jashichin naya namüin. Müsü sünüiki Danielle: «Üttüsü maʼin taaʼin süka macheʼein taʼwayuuse süchiirua nünajüin shiyaakua wayuu masheʼinsat. Jashichisü taya waneepia otta jülüjasü taaʼin tayain mojuin atuma takuwaʼipa nümaa taʼwayuuse».

Mülejeʼeya paaʼin, soto paaʼin nnojoluin jülüjain naaʼin Jehová piain kasirüin tü alatakat nümüin chi puʼwayuusekai. Müsü Santiago 1:14 (TNM): «Shiainjaʼaya ooʼulaküin naaʼin wanee wayuu tü kasa suchuntaakaliaʼaya neʼe naaʼin otta müshi nütaʼünakai aaʼin sutuma» (Roma 14:12; Filip. 2:12). Suulialeʼeya jülüjain naaʼin Maleiwa piain kasirüin tia, kojutusü maʼin nümüin waneepiain pia nümaa (2 Crón. 16:9).

Kiʼrale puʼwayuuse sünain anajaa shiyaakua wayuu masheʼinsat, nnojotsü shiain saaʼujee wayuuin mojusü pia. Naashin na ekirajaakana süchiirua nukuwaʼipa wanee wayuu kiʼrakai sünain anajaa tia, amojujaajeerü tü suluʼukat nikii sutuma niʼrüin tia. Ayateeria keeʼireein naaʼin nuʼluwajiraain nukuwaʼipa. Nnojoleetpejeʼe anain naaʼin sutuma tia, jama nnojoleerüin naaʼinrüin süpüshuaʼa tü suchuntaakat naaʼin.

Nnojo paaʼinmaain maʼin tü alatakat pümüin. Jülüjasü saaʼin Catherine waneepia tü alatakat nümüin suʼwayuuse sutuma nünajüin shiyaakua wayuu masheʼinsat. «Shapaasü maʼin taaʼin nnojoire tatüjaain aaʼu jalain taʼwayuuse. ‹¿Chashi ee nia sünain anajaa shiyaakua wayuu masheʼinsat?›», maʼwaisü saaʼin Frances. Eesü wayuu japüika yalale namaa na wayuu atüjaakana saaʼu tü alatakat namüin. Eetaashii joo na jülüjakana aaʼin müin namüiwaʼakai aaʼin sutuma nnojoluin jaralüin atüjaain saaʼu jamüin naaʼin.

Jülüjale paaʼin waneepia tü alatakat pümüin, mojeerü maʼin paaʼin. Shia anaka maʼin paaʼinmaale pukuwaʼipa nümaa Jehová. Paaʼinrüle tia, katsüinjeerü maʼin paaʼin (Sal. 62:2; Éf. 6:10).

¿Jamüsü sümülialeetka paaʼin paashajeʼerüle tü Bibliakat sümaa püsakireʼerüin paaʼin sünain? Aashajaasü tü Bibliakat nachiki waneinnua wayuu mojukana maʼin aaʼin sutuma tü alatakat namüin, anapejeʼe naaʼin mapa sutuma naküjain tia nümüin Jehová. Mayaainjeʼe nnojoluin nüsünneʼerüin Jehová noulia tü alatakat namüin, naapüin wanee anaa namüin. Jülüjataa waaʼin sukuwaʼipa Ana. Shapaasü maʼin saaʼin sutuma tü alatakat sümüin. Oʼuraajüsü maʼin shia nümüin Jehová. Anasü saaʼin sutuma saaʼinrüin tia mayaainjeʼe nnojoluin sütüjaain saaʼu jameerüin sukuwaʼipa watta kaʼi (1 Sam. 1:10, 12, 18; 2 Cor. 1:3, 4).

Puchunta kaalinwaa namüin na laülaashiikana, meena naya pümüin «maʼaka saaʼin wanee ounjulaaya suulia joutai otta suulia juya wawaimaajatü» (Is. 32:2). Eesü süpüla naküjain pümüin jaralüin tü wawala anakat süpüla paashajaain amaa (Prov. 17:17).

¿EESHICHE SÜPÜLA PÜKAALINJAIN NIA?

Eesüjaʼa jülüjale paaʼin anain pükaalinjale puʼwayuuse süpüla nuuʼulaain suulia anajaa shiyaakua wayuu masheʼinsat. «Anashii piamashii wayuu nuulia waneeshia» süka eein süpüla nanoutuin wanee kasa otta eein süpüla nakanajüin wanee naʼünüü (Ecl. 4:9-12). Saashin wanee pütchi ekirajaanaka achiirua, eesü süpüla nuuʼulaain wanee wayuu suulia nünajüin shiyaakua wayuu masheʼinsat otta eein süpüla anajiraain nia sümaa nuʼwayuuse nakaalinjiraale.

Wanee kasa jülüjainjatka paaʼin shia jaʼyale naaʼu puʼwayuuse nuuʼulaweein suulia anajaa shiyaakua wayuu masheʼinsat otta niʼyataale süchiirua süpüla nuuntuin tia. ¿Piʼrüiche nia sünain achuntaa kaalinwaa nümüin Jehová jee nayale namüin na laülaashiikana? (2 Cor. 4:7; Sant. 5:14, 15). ¿Nüchajaainche sukuwaʼipa süpüla nnojolin waneepiain nia suluʼu computador jee serulaat? ¿Eejüsüche naaʼin suulia naaʼinrüin wanee kasa nünajeeka atuma tia kasa yarüttüsükat? (Prov. 27:12). ¿Nücheküinche pükaalinjain nia? ¿Jutatüsüche nukuwaʼipa sünain aashajawaa pümaa? Naaʼinrüle tia, eeshi süpüla pükaalinjain nia.

Jülüjataa paaʼin tü saaʼinrakat Felicia, Ethan nünülia chi suʼwayuusekai. Anajapuʼushi nia shiyaakua wayuu masheʼinsat jintüliiwaʼaya nia. Süchajaain maʼin sukuwaʼipa Felicia süpüla sükaalinjain nia nünajeere süchikuaʼa tia kasa yarüttüsükat. Anuu nünüiki Ethan süchiki tü saaʼinrakat nüpüleerua: «Jutatüsü takuwaʼipa süpüla taashajaain sümaa. Sümülialüin taaʼin otta sükaalinjain taya süpüla tachecherüinjatüin taaʼin suulia tanajüin shiyaakua wayuu masheʼinsat. Jülüjashi taya saaʼin waneepia süpüla sükaalinjain taya otta süpüla eejüinjatüin taaʼin suulia tü teʼrakat suluʼu internet». Talatüsü saaʼin Felicia süka sükaalinjain suʼwayuuse, aipejeʼe sümüin sutuma nünajeein kasa yarüttüsü. Müsü shia: «Mayaainjeʼe mojuin maʼin taaʼin sutuma tia, tatüjaa aaʼu nnojoleechin takaalinjain taʼwayuuse süpüla nunouteʼerüin nukuwaʼipa niʼrüle müin takuwaʼipa waneepia. Anapa naaʼin sutuma takaalinjain nia, nükaalinjainña taya süpüla nnojoluinjatüin mojuin maʼin taaʼin».

Jutatüle nukuwaʼipa wanee wayuu sünain aashajawaa sümaa nuʼwayuuse, mapüleejeerü nümüin nuuʼulaain suulia anajaa shiyaakua wayuu masheʼinsat. Akaʼaya joo tü nuʼwayuusekat, sunoujeerü anain süchikuaʼa nünüiki. Nnojorüle nuunjulajüin wanee wayuu suulia nuʼwayuuse tü kasa mojusü suchuntaakat naaʼin otta kasain naaʼinrüin nümüiwaʼapa, nnojoleerü wainmajüin saaʼin naaʼu.

¿Eesüche süpüla paaʼinrüin tia süpüla pükaalinjain puʼwayuuse? Eerejeʼe süpüla paaʼinrüin tia, anasü pikirajaale nümaa ekirajaayakat tüü. ¿Kasa niʼyataainjatka achiirua puʼwayuuse? Aʼyataainjachi nia süchiirua nuuʼulaain suulia nünajüin shiyaakua wayuu masheʼinsat otta nnojoluinjatü nuunjulajüin puulia süchiki wanee kasa. Suulialeʼeya jashichin nia pümüin saalinjee paashajaweein nümaa süchiki tia, nüchajaainjatü sukuwaʼipa süpüla niyaawatüin saaʼu jamüin paaʼin. ¿Jama piakat? ¿Kasa piʼyataainjatka achiirua? Pükaalinjainjachi nia otta puuʼulaainjatü nunouteʼerüin nukuwaʼipa pümaa.d Jütüjaainjatü aaʼu kasain nünajüin atuma wanee wayuu shiyaakua wayuu masheʼinsat otta kasain naaʼinrüinjatüin süpüla nuuʼulaainjachin suulia nünajüin tia.

Kapüleere jümüin yootojiraain jia süka anakalü akuwaʼipa sümaa nnojoliin jashichin jia, eesü süpüla juchuntuin nümüin wanee laülaashi süpüla yalain nia jümaa yootiraapa jia. Jaaʼinrüinjatüle tia, jüneeka wanee laülaashi anaka aaʼin jümaa. Mayaainjeʼe eein süpüla nuuʼulaain puʼwayuuse suulia anajaa shiyaakua wayuu masheʼinsat, eesü kakaliale süpüla nnojoluin wainmajüin paaʼin naaʼu. Paaʼinmaa tü junouteʼerakat sünain jukuwaʼipa shiʼipaʼaya. Ayataʼaya paʼatapajüin aneerüin pukuwaʼipa nümaa puʼwayuuse mapeena (Ecl. 7:8; 1 Cor. 13:4).

NÜNAJÜLE TIA SÜCHIKUAʼA

¿Mepisaiche puʼwayuuse nünajüle süchikuaʼa shiyaakua wayuu masheʼinsat? Kepishi nia. Nüchecherüinjatpejeʼe naaʼin suulia nünajüin süchikuaʼa tia kasa yarüttüsükat kapüleere shia nümüin. ¿Kasa naaʼinrajatka nünajüle süchikuaʼa tia kasa mojusükat? Nüchajaainjatü maʼin sukuwaʼipa süpüla nuuʼulaain suulia waneirua kasa süpüla nnojoluin sülatüin tia süchikuaʼa nümüin (Prov. 28:14; Mat. 5:29; 1 Cor. 10:12). Nuʼwanajaainjatü tü jülüjakat naaʼin otta nülerajüinjatü tü kasa mojusükat maʼaka saaʼin tü anajaakat shiyaakua wayuu masheʼinsat jee tü amülejaakat akoroloo (Éf. 4:23; Sal. 97:10; Roma 12:9). Naaʼinrüle tia puʼwayuuse, kepishi nia.e

¿Kasa paaʼinrajatka nnojoire nuuʼulaweein puʼwayuuse suulia anajaa shiyaakua wayuu masheʼinsat? Eesüjaʼa mojuwaire maʼin paaʼin, üttüle maʼin paaʼin jee müin kawalaʼatakai paaʼin nutuma. Sülatüle pümüin tia, puuʼulaa tia najapuluʼu Jehová. Paaʼinrüle tia, jimateerü paaʼin (1 Ped. 5:7). Ayata pikirajaain sünain tü Bibliakat sümaa püsakireʼerüin paaʼin sünain otta ayata puʼuraajüin nümüin Jehová. Paaʼinrüle tia, aleeweerü maʼin pia nümaa Jehová otta müshia Jehová aleeweechi maʼin nia pümaa. Saashin Isaías 57:15, eeshi Jehová namaa na yüülakana aaʼin süpüla nükatsüinrüin naaʼin. Ayataʼaya püchajaain sukuwaʼipa süpüla anain pukuwaʼipa sünain anoujaa. Puchunta kaalinwaa namüin na laülaashiikana otta ayataʼaya paʼatapajüin niiʼiratüin nukuwaʼipa chi puʼwayuusekai mapeena (Roma 2:4; 2 Ped. 3:9).