Kasa eekai anain suulia kasa eekai mojuin: Tü waneekajatkat wapüshuaʼa
¿Kasa paaʼinrajatka puʼunuinjachire suluʼumüin wanee mma nnojotka piʼraajüin?
1. Oʼuneechi pia suluʼu tü wopu anakat saaʼin pümüin.
2. Oʼuneechi pia nachiirua na wayuu eʼraajakana tia wopukot saaʼin pümüin.
3. Püsakireechi chi paʼaleewain eʼraajakai tia wopukot otta eesüjaʼa pünaʼlaale sümüin wanee GPS jee shiale wanee mapa.
Waneeküle tü palajatkat jee shiale tü piamakat, eeshiijaʼa maaʼawale waya, waneeküle tü chiiruaajatkat anteena waya eeʼewalinjanale waya.
Müshii suluʼupünaakai waaʼin wanee wopu apaajiraaka. ¿Kasa waaʼinrajatka süpüla waneeküin tü wopu anakat? ¿Jarai akaalinjeenaka waya?
Eesü waneeküle waneirua kasa anaka atuma wakuwaʼipa sümaa wapüshi, eepejeʼe waaʼinrüle waneirua kasa mojuka atuma wakuwaʼipa. Sünainjee tü waneekakat atüjaaneerü aaʼu tü jülüjakat waaʼin süchiki tü kasa eekai anain otta süchiki tü kasa eekai mojuin.
¿Kasa jülüjaka waaʼin süchiki...
... aainjirawaa akuwaʼipaa otta süchiki sukuwaʼipa kaʼwayuusee?
... lotoo akuwaʼipaa, süchiki aʼyatawaa otta süchiki washirüü?
... sukuwaʼipa shipijia tepichi?
... tü wakuwaʼipainjatkat namaa na waneinnua?
Waneekajatpa wanee kasa wanaapünaa sümaa tia, ¿kasa waaʼinrajatka süpüla waneeküin tü aneetkalü atuma wakuwaʼipa otta sukuwaʼipa wapüshi?
¿Kasa wayaawateetka atuma anale jee mojule tü kasa waneeküinjatkat?
Ashajünüsü suluʼu rewiisütakat tüü anain tü pütchi suluʼukat tü Bibliakat süpüla wayaawatüin saaʼu anale wanee kasa jee mojule shia.