Waaʼinrajatka süpüla talatüin waaʼin sünain aküjaa pütchi

1. ¿Jamüsü naaʼin waneinnua wawalayuu sünain aküjaa pütchi? (Piirakaa sümüin tü ayaakuaakat).

WAYAKANA na aʼyataashiikana nümüin Jehová, aküjashii waya pütchi süka alin wapüla chi Washi iipünaajachikai otta süka keeʼireein waaʼin niʼnnaajünüin sutuma wayuu. Eeshii wawalayuu kamalainkana maʼin amüin aküjaa pütchi otta eeshii na nnojoliikana anain aaʼin sünain aaʼinraa tia. Müsü naaʼin waneinnua wawalayuu sutuma japüleʼein naya otta jülüjain naaʼin iseerüin nachiki naaʼinrüin tia. Eetaashii joo na mmotkana aaʼin noʼunuin sümaʼanamüin wayuu süka nnojoliin nounejaaushin otta suulia jamüin pütchi namüin. Eeshii na ekirajünakana sünain nnojoliinjanain peʼipaain sümaa wayuu. Mayaainjeʼe aishaatain Jehová napüla na wawalayuukana kapüleesü namüin naküjain tü pütchi anakat maʼin sümüin wayuu nnojotka neʼraajüin. Waneepiashii naya sünain aküjaa pütchi süka kojutuin namüin tü aʼyatawaakat nümüin Maleiwa. Talatakajasaʼa maʼin Jehová namaa.

2. ¿Jamüsü nnojoluinjatka mojuin paaʼin mayaainjeʼe nnojoluin anain paaʼin sünain aküjaa pütchi?

² Nnojorüle anain paaʼin sünain aküjaa pütchi, nnojo mojuin paaʼin. Jülüjale paaʼin isain püchiki paaʼinrüin tia, jaʼyasü paaʼu nnojoluin yaletüin paaʼin. Eesüjaʼa nnojorüle keeʼireein paaʼin «atüjakaiche» pümünüin amüin jee shiale suulia peʼipaain pia sümaa wayuu. Nnojoishi eein wanee wayuu anakai aaʼin shiyoutajaanüle amaa tü nümakat, shialeekajaʼa nükaalinjeere. Nütüjaa aaʼulu chi Jüshikai Maleiwa tü kapüleekat jümüin otta nükaalinjeein jia (Is. 41:13). Sünain ekirajaayakat tüü, wekirajaajeerü anain jaʼraisü kasa waaʼinrajatka süpüla talatüin waaʼin sünain aküjaa pütchi.

PÜCHAJAA SUKUWAʼIPA SÜPÜLA KATSÜIN PAAʼIN SUTUMA TÜ SÜMAKAT TÜ BIBLIAKAT

3. ¿Kasa akatsüinraka naaʼin Jeremías süpüla nüküjain pütchi?

³ Katsüinsü naaʼin na aʼyataapuʼukana nümüin Jehová sutuma tü nünüikikat süpüla nekeraajüin tü aʼyatawaa aluwataanakalü anain naya. Jülüjataa waaʼin nukuwaʼipa Jeremías, chi nünüikimaajachikai Maleiwa, eimmolojooshi nia wanaa sümaa nuluwataanüin nutuma Maleiwa sünain aküjaa nünüiki. Nümaka nümüin Jehová: «Isasü tachiki aashajawaa. Jintüi neʼe taya» (Jer. 1:6). Yalayalasü naaʼin sutuma tü nümakat Jehová, müshi nia: «Mapejeʼe aka saaʼin suchuwala siki suluʼu taaʼin jee suluʼu teipüse tü nünüikikat. Isasü tachiki koʼutuinjachin taya» (Jer. 20:8, 9). Katsüinsü naaʼin sutuma tü nünüikikat Jehová süpüla nikeraajüin tü niʼyataainkat mayaainjeʼe neʼrüliin wayumüin na wayuu nüküjainjanakana amüin tü pütchikat.

4. ¿Jameerü wakuwaʼipa waashajeʼerüle tü Bibliakat otta wasakirüle waaʼin sünain? (Colosas 1:9, 10).

⁴ Katsüinsü waaʼin wayakana na anoujashiikana sutuma tü Nünüikikat Maleiwa. Nüküjain Pablo namüin na anoujashii chajanakana Colosas natüjaale saaʼu tü nuchuntakat Maleiwa, laülaajeerü naaʼin wanaapünaa sümaa tü nüchekakat. Talateechikalaka nia namaa sünainjee süpüshuaʼa tü kasa naaʼinrakat (paashajeʼera Colosas 1:9, 10). Wanee kasa anaka maʼin süpüla waaʼinrüin shia waküjain tü pütchi anakat maʼin. Maʼaka wekirajaainnapain waashajeʼerüle tü Nünüikikat Maleiwa suluʼujee tü Bibliakat otta wasakirüle waaʼin sünain, akatsüinraajeerü wanoula nünain Jehová otta wayaawateerü aaʼu choʼujaain waküjain süchiki nuluwataainjachin.

5. ¿Kasa waaʼinrajatka süpüla anain wakuwaʼipa sünainjee tü sümakat tü Bibliakat?

⁵ Süpüla anain wakuwaʼipa sünainjee tü waashajeʼerakat suluʼujee tü Bibliakat, wekirajaainjatü anain otta wasakireʼerüinjatü waaʼin sünain sümaa nnojoluin washapajaain aaʼin. Wousütüle sünain wanee wetsiikulo nnojotka wayaawatüin aaʼu, eesü süpüla wekirajaain sooʼomüin tü aküjüneekalü achiki suluʼu Índice de las publicaciones Watch Tower jee shiale suluʼu Nachajaayainjatü pütchi na aküjaliikana pütchi nüchiki Jehová. Pikirajaale waneepia piyaawateerü aaʼu shiimain tü sümakat tü Bibliakat (1 Tes. 5:21). Sünainjee tia, keeʼireejeerü paaʼin püküjain süchiki tü pikirajaakalü anain namüin na waneinnua.

YAPA PUTUMA TÜ PÜNÜIKINJATKAT SÜNAIN AKÜJAA PÜTCHI

6. ¿Jamüsü anaka yapale watuma tü wanüikinjatkat sünain aküjaa pütchi?

⁶ Yapajüle pia süpüla aküjaa pütchi aneerü paaʼin sünain yootoo namaa na wayuukana. Nüküjain Jesús namüin na nikirajüinkana tü naaʼinrajatkat sünain aküjaa pütchi (Luc. 10:1-11). Talatüsü naaʼin na nikirajüinkana Jesús sutuma neʼrüin kasa anasü sünainjee naaʼinrüin tü nümakat namüin (Luc. 10:17).

7. ¿Kasa waaʼinrajatka süpüla yapain watuma tü wanüikinjatkat sünain aküjaa pütchi? (Piirakaa sümüin tü ayaakuaakat).

⁷ ¿Kasa waaʼinrajatka süpüla yapain watuma tü wanüikinjatkat sünain aküjaa pütchi? Jülüjainjatü waaʼin tü wanüikinjatkat waküjapa pütchi namüin na wayuukana, müinjana yootokoi waaʼin waaʼinrapa tia. Jülüja waaʼin jameerüin nanüiki wamüin na wayuu waküjakana amüin pütchi otta jameerüin wanüiki namüin. Waaʼinrüle tia, aneerü waaʼin sünain yootoo namaa otta kamaneejeena waya namüin.

8. ¿Kasa wanaawaka aluʼu wakuwaʼipa sümaa tü iita atüküüshikat süka pootshi?

⁸ Nüküjain chi aluwataaushikai Pablo süchiki tü aʼyatawaa aluwataanakalü anain waya. Müshi nia: «Mayaapejeʼe müin waya maʼaka saaʼin wanee iita atüküüshi süka pootshi, wountuin tü aʼyatawaakat nümüin Maleiwa» (2 Cor. 4:7). Tü waʼyataainkat nümüin Maleiwa shia waküjain süchiki tü kasa anasü naaʼinrajatkat niapa aluwataain, kateerü noʼu na wayuu aapaakana sümaa tia pütchikat (2 Cor. 4:1). Jamüsüjaʼa nükalioʼu Pablo na oikaaliikana nanaajaapuʼuin eküülü, wiino otta nneerü suluʼu tü iita atüküüshikat süka pootshi. Naashin Pablo müshii waya maʼaka saaʼin wanee iita atüküüshi süka pootshi, niʼitaain Jehová wajapuluʼu waküjainjanain tü pütchi anakat maʼin. Sükajee nükaalinjain waya Jehová wountuin waaʼinrüin tia aʼyatawaakat.

PUCHUNTA NÜMÜIN MALEIWA YALAYALAA AAʼIN

9. ¿Kasa waaʼinrajatka suulia mmoluin waaʼin sünain aküjaa pütchi sümüin wayuu? (Piirakaa sümüin tü ayaakuaakat).

⁹ ¿Kasa waaʼinrajatka mmorüle waya sünain aashajawaa sümaa wayuu? Washata nakuwaʼipa na aluwataaushikana. Achuntushii maʼin naya nümüin Maleiwa soʼu süpülajünüin noulia naküjain pütchi. Nnojoishii naya eimmolojooin, nachuntuin maʼin nümüin Jehová yalayalainjatüin naaʼin sünain aküjaa tü nünüikikat. Nükaalinjamaatüin naya Jehová (Aluw. 4:18, 29, 31). Mmorüle waya seema wayuu, wachunta kaalinwaa nümüin Jehová. Wachunta nümüin Jehová alinjanain wapüla na wayuukana süpüla nnojoluinjatüin mmoluin waaʼin sünain aküjaa pütchi namüin.

10. ¿Kasa nükaalinjaka akajee waya Jehová süpüla waküjain tü pütchi anakat maʼin? (Isaías 43:10-12).

¹⁰ Nüneekajala waya Jehová süpüla Waküjaliinjanain pütchi nüchiki (paashajeʼera Isaías 43:10-12). Nükaalinjeena waya süpüla yalayalain waaʼin sünain aaʼinraa tia. Wekirajaa sünain pienchisü kasa nükaalinjaka akajee waya Jehová. Palajana, eeshi Jesús wamaa sünain aküjaa tü pütchi anakat maʼin (Mat. 28:18-20). Tü wane, nuluwataain Jehová na aapieekana süpüla nakaalinjain waya (Apoc. 14:6). Tü wane, naapüin wamüin Jehová tü nüpülainkat süpüla sotuinjatüin waaʼin tü wekirajaakalü anain (Juan 14:25, 26). Otta tü chiiruaajatkat, naapüin wamüin Jehová na wawalayuu wamaakana sünain aküjaa pütchi. Sükajee nükaalinjain waya Jehová otta na wawalayuukana, nnojoleerü mmoluin waaʼin sünain aküjaa pütchi sümüin wayuu.

PÜCHAJAA SUKUWAʼIPA SÜPÜLA PÜKÜJAIN PÜTCHI

11. ¿Kasa paaʼinrajatka süpüla püküjain pütchi sümüin wainma wayuu? (Piirakaa sümüin tü ayaakuaakat).

¹¹ ¿Mojusüche paaʼin nnojorüle wayuu püpüla püküjapa pütchi? Mülejeʼeya paaʼin püsakira paaʼin sünain tüü: «¿Jalashii naya? ¿Chashiiche naya aʼyataain? ¿Chataapa naya sünain ayaʼlajaa kasa?» (Aluw. 16:13). Jülüja paaʼin eere süpüla püküjain pütchi kaayeruʼupünaa. Anuu nünüiki wanee wawala Joshua nünülia: «Wainma maʼin na wayuu taküjakana amüin pütchi metkaaruluʼu otta patkeruʼu». Nüküjapa pütchi Joshua sümaa Bridget, tü nuʼwayuusekat, motsopa kaʼikat otta müsia rimiinkoʼu kaleʼu wainma wayuu nousütaka anain nepialuʼu (Éf. 5:15, 16).

12. ¿Kasa waaʼinrajatka süpüla watüjaain saaʼu kasain sunoujain anain wayuu otta kasain shapaain atuma saaʼin?

¹² Nnojorüle kamalain maʼin sümüin wayuu tü pütchi waküjakat, wachajaa sukuwaʼipa süpüla watüjaain saaʼu kasain nanoujain anain otta kasain shapaain atuma naaʼin. Jamüshijaʼa Joshua sümaa Bridget nashatüin tü ashajünakat sünain süta tü karaloʼuta waküjakalü aka pütchi. Naapapa tü karaloʼutachonkot ¿Jara kanüikika tü Bibliakat?, müshii naya namüin na wayuukana: «Eeshii na nnojoliikana anoujain sünain nümaʼanajeejatüin Maleiwa tü Bibliakat. ¿Jamüsüjaʼa pünüiki süchiki tia?». Sutuma naaʼinrüin tia, yootushii maʼin naya namaa na wayuukana.

13. ¿Jamüsü anainjatka waaʼin mayaasüjeʼe shiyoutuin wayuu tü pütchi waküjakat? (Proverbios 27:11).

¹³ Jaʼitairü nnojoluin saapajeein wayuu tü waküjakat, anainjatü waaʼin süka waaʼinrüin tü nuluwataakalü anain waya Jehová otta chi Nüchonkai (Aluw. 10:42). Jaʼitairü nnojoluin jaralüin waashajaain amaa sünain aküjaa pütchi, anainjatü waaʼin süka talatüin watuma chi Washi iipünaajachikai (paashajeʼera Proverbios 27:11).

14. ¿Jamüsü waaʼin weʼrapa nuusütüin anain wanee wawala wanee wayuu eekai kamalain amüin tü pütchikat?

¹⁴ Talatüshii waya namaa na wawalayuu aashajaakana sümaa wanee wayuu eekai kamalain amüin tü pütchikat. Saashin tü rewiisütakat Aapiria Wayuu, tü waʼyataainkat sünain aküjaa pütchi müsü aka saaʼin tü naaʼinrakat waneinnua wayuu sünain achajawaa nüchiki wanee jintüi eekai machikin. Nousütapa anain chi jintüi machikikai, nnojoishi talatüin neʼe nümüiwaʼa chi wayuu ousütakai anain chi jintüikai, talatüshiʼiya napüshuaʼa na achajaakana nüchiki. Müsia neʼe tü waaʼinrakat, akaalinjiraashii waya süpüla wachajaain nachiki na wayuu ekirajaweekana nüchiki Maleiwa. Choʼujaashii wamüin na wawalayuu outkajakana wamaa süpüla waküjain pütchi namüin na wayuu kepiakana eere waya otta talatüshii waya weʼrapa wanee wayuu nuutkajaain wamaa.

AI WAPÜLA JEHOVÁ OTTA NA WAYUUKANA

15. ¿Kasa waaʼinrajatka süpüla talatüin waaʼin sünain aküjaa pütchi? (Mateo 22:37-39; piirakaa sümüin tü ayaakuaakat).

¹⁵ Talateena maʼin waya sünain aküjaa pütchi aire maʼin wapüla Jehová otta na wayuukana (paashajeʼera Mateo 22:37-39). Jülüja waaʼin talateechin maʼin Jehová wamaa niʼrüle waya sünain aküjaa pütchi otta talateerüin naaʼin na wayuu nekirajaapa sünain tü Bibliakat. Nnojo motuin waaʼin noʼttaajeenain na wayuu achekakana tü pütchi waküjakat namüin (Juan 6:40; 1 Tim. 4:16).

16. ¿Kasa waaʼinrajatka süpüla talatüin waaʼin sünain aküjaa pütchi isale wachiki wojuʼitüin wepialuʼujee? Püküja tü naaʼinrakat wanee wawala sümaa nuʼwayuuse.

¹⁶ Isalejeʼeya maʼin püchiki pujuʼitüin pipialuʼujee, jülüja paaʼin tü eekat süpüla paaʼinrüin süpüla sütüjaanüin aaʼu alin Jehová otta na wayuukana püpüla. Jamüshijaʼa Samuel sümaa Dania nnojoishii ojuʼitüin naya nepialuʼujee soʼunnaa tü ayuuliikat COVID-19. Soʼu tia aküjashii pütchi suluʼupünaa teleepono, ashajüshii karaloʼuta otta ekirajüshii wayuu sünain tü Bibliakat suluʼupünaa Zoom. Sutuma kanserüin Samuel oʼunawaishi suluʼumüin wanee pitaalü süpüla niʼrajeʼerüinjachin, nüküjaka pütchi namüin na wayuu yalajanakana. Müshi nia: «Weʼrapa müliaa eeshii mapüsale waya, shapaale waaʼin otta seemiajaale wanoula. Choʼujaashiijeseʼe waʼyataain nümüin Jehová süpüla ayatüinjanain talatüin waya». Soʼutpünaa tia, seewaaka Dania, apünüin kashi jimatüin miichipaʼa. Anatpa saaʼin, aipirua kashi saaʼu silla de ruedas. Müsü shia: «Tachajaain sukuwaʼipa süpüla taküjain pütchi wanaapünaa sümaa takuwaʼipa. Taküjain pütchi sümüin wanee perümeera anaʼlawaika tamüin otta na wayuu eʼikajaawaliikana kasa tepialuʼu. Taküjain pütchi suluʼupünaa teleepono sümüin wanee wayuu aʼyataaka suluʼu wanee pitaalü». Talatüshi maʼin Samuel sümaa Dania süka naküjain pütchi mayaainjeʼe kapüleein tü alatakat namüin.

17. ¿Kasa waaʼinrajatka süpüla talatüin waaʼin sünain aküjaa pütchi?

¹⁷ Talateena waya sünain aküjaa pütchi wooʼulaküle tü jaʼraisü kasa wekirajaaitpakalü anain. Waneʼewai sukua tü wekirajaaitpakalü anain müsü aka saaʼin tü kasa ejitünakat saʼaka eküülü süpüla jemetüinjatüin shia. Nnojoleerü jemetüin tü eküütkat nnojorüle wejitüin süpüshuaʼa tü kasa saʼakainjatkat süpüla jemetüin shia. Müsia neʼe wakuwaʼipa, waaʼinrüle süpüshuaʼa tü wekirajaaitpakalü anain talateena maʼin waya sünain aküjaa pütchi otta nnojoleerü mojuin waaʼin nayoutule na wayuukana tü waküjakat namüin.