Ayataʼaya kojutuin wamüin na wawalayuu oʼunirakana sukuwaʼipa waʼyataain

1. ¿Jamapuʼusü nakuwaʼipa na anoujashiikana nünain Jehová soʼu nakalia na nikirajüinkana Jesús?

NULUWATAALE Jehová wanee kasa namüin na wayuu anoujashiikana nünain, naapaainjatü amaa shia sümaa anain sukuwaʼipa natuma (1 Cor. 14:33). Nücheka achikirü Maleiwa süküjünüinjatüin tü pütchi anakat maʼin sainküinpünaa tü mmakat (Mat. 24:14). Nia Jesús aneekünaka nutuma Jehová süpüla shikiipüʼüinjachin tia aʼyatawaakat. Nüchajaain sukuwaʼipa Jesús süpüla anainjatüin sukuwaʼipa atumawaa tü aküjaakat pütchi. Soʼu nakalia na nikirajüinkana Jesús, akumajüna akuwaʼipa süpüla noutkajaainjanain na anoujashiikana suluʼu kojuyasü mma, aneekünüshii wayuu laülaashii oʼunirajatka nakuwaʼipa jee aneeküinjanaka wanee kasa napüleerua (Aluw. 14:23). Eejana chaa Jerusalén na oʼunirakana akuwaʼipa napüshuaʼa na anoujashiikana, eejana na aluwataaushikana naʼaka jee na laülaashiikana. Naneekapa wanee kasa naapaainjatü amaa na anoujashiikana tia makat (Aluw. 15:2; 16:4). Sükajee noonooin na anoujashiikana sümaa tü kasa münakat namüin «katsüinsü maʼin nanoula na anoujashiikana jee akooʼomüinraashii maʼin naya weinshi» (Aluw. 16:5).

2. ¿Kasa naaʼinraka Jehová soʼujee 1919 süpüla nuʼunirüin nakuwaʼipa na anoujashiikana jee süpüla naapüin wanee kasa choʼujaaka sümüin nanoula?

² Maaʼulu yaa ayatüsia nuʼunirüin nakuwaʼipa Jehová na anoujashiikana nünain. Soʼujee 1919 nüneeküin Jesús waneinnua anoujashii chainjanakana iipünaa süpüla nakumajüin sukuwaʼipa tü aküjaakat pütchi jee süpüla naapüin wanee kasa choʼujaaka sümüin nanoula na nikirajüinkana (Luc. 12:42).a Jaʼyasü saaʼu anain sukuwaʼipa tü waʼyataainkat nutuma Jehová (Is. 60:22; 65:13, 14).

3, 4. (1) ¿Jamüsü anaka wakuwaʼipa sutuma anain sukumajia sukuwaʼipa waʼyataain? (2) ¿Kasa wekirajaainjatka anain sünain ekirajaayakat tüü?

³ Nnojorüle anain sukumajia sukuwaʼipa tü waʼyataainkat, nnojotsüjeʼe waaʼinrüin tü nuluwataakalü anain waya Jesús (Mat. 28:19, 20). Jamüsüjaʼa nnojorüle süküjünüin wamüin tü mma waküjainjatkalü aluʼu pütchi, aküjashiije neʼe waya pütchi eere anain saaʼin wamüin. Eeshiije waneinnua wawalayuu kojuyatuaka aküjain pütchi suluʼu wanee mma jee müsia waneirua mma nnojotsüjeʼe aküjünüin aluʼu pütchi. ¿Aashin eein waneirua kasa anasü weʼraka saaʼujee anain sukuwaʼipa sukumajia waʼyataain?

⁴ Ashatünüsü sukuwaʼipa niʼyataain Jesús soʼu yaajachin nia mmapaʼa süpüla anainjatüin sukumajia tü waʼyataainkat maaʼulu yaa. Sünain ekirajaayakat tüü, wekirajaajeerü anain nukuwaʼipa Jesús jee kasain naaʼinrüin na wawalayuu oʼunirakana sukuwaʼipa waʼyataain süpüla nashatüin nukuwaʼipa. Ekirajaajeenaʼaya waya süchiki tü waaʼinrajatkat süpüla kojutuin wamüin tü naaʼinrakat na wawalayuu oʼunirakana sukuwaʼipa waʼyataain nümüin Jehová.

NA OʼUNIRAKANA SUKUWAʼIPA WAʼYATAAIN NASHATÜIN NUKUWAʼIPA JESÚS

5. ¿Kasa waaʼinrajatka süpüla washatüin nukuwaʼipa Jesús? (Juan 8:28).

⁵ Atüjashi Jesús nünainjee chi Nüshi iipünaajachikai süchiki tü naaʼinrajatkat jee tü pütchi nüküjainjatkat. Na wawalayuu oʼunirakana sukuwaʼipa waʼyataain nashatüin nukuwaʼipa Jesús, nekirajaa anainrü wanee kasa suluʼujee tü Bibliakat jee nooʼulaain suʼunirüin nakuwaʼipa (paashajeʼera Juan 8:28; 2 Tim. 3:16, 17). Asoʼinnawaisü waaʼin sünain waashajeʼerüinjatüin jee waapaainjatüin sümaa tü Nünüikikat Maleiwa. ¿Kasa anaka aluʼu wakuwaʼipa sutuma waapaain sümaa tia pütchikat?

6. ¿Kasa anaka aluʼujee wekirajaain sünain tü sümakat tü Bibliakat?

⁶ Anasü maʼin wakuwaʼipa sutuma wekirajaain sünain tü Bibliakat sükajee tü karaloʼuta aashajaakat süchiki. Jamüshiijaʼa wekirajaale sünain tü Bibliakat, wayaawata aaʼulu wanaawain shia sümaa tü nekirajakalü anain na wawalayuukana. Watüjaapa saaʼu suluʼujeejatüin tü Bibliakat tia pütchikat, wanouja anainrü shiimain maʼin tü namakat na wawalayuu oʼunirakana sukuwaʼipa wanoula (Roma 12:2).

7. (1) ¿Kasa nüküjaka achiki pütchi Jesús? (2) ¿Kasa naaʼinraka na aküjaliikana pütchi nüchiki Jehová maaʼulu yaa süpüla nashatüin nukuwaʼipa Jesús?

⁷ Nüküjain Jesús «tü pütchi anakat maʼin süchiki niainjachin aluwataain Maleiwa» (Luc. 4:43, 44). Nuluwataain Jesús na nikirajüinkana süpüla naküjainjatüin süchiki nuluwataajeechin Maleiwa (Luc. 9:1, 2; 10:8, 9). Napüshuaʼa na Aküjaliikana pütchi maaʼulu yaa naküjain süchiki nuluwataainjachin Maleiwa, naaʼinrüin tia jaʼitashii jalain kepiain naya jee kasain aneekünüin apüla naya sünain aʼyatawaa nümüin Maleiwa.

8. ¿Jeʼtsü tü aʼyatawaa kojutukat maʼin waʼyataaka anain?

⁸ Kojutusü maʼin wamüin waküjain sümüin wayuu süchiki nuluwataainjachin Maleiwa, nnojotsü eein wanee aʼyatawaa eekai müin aka saaʼin tia. Soʼu yaajachin Jesús saaʼu tü mmakat niyouta achikit süküjainjatüin pütchi tü yolujaakalüirua nüchiki (Luc. 4:41). Wanee wayuu eekai aküjeein pütchi maaʼulu yaa namaa na anoujashiikana nünain Jehová, jaʼyainjatü saaʼu sukuwaʼipa soonooin sümaa nünüiki Jehová. Jaʼyasü waaʼu kojutuin wamüin tü aküjaakat pütchi, waaʼinrapa shia jalapünaale waya jee anashiipa shia wamüin, shia wachekaka achiki tü nüchekakat Jesús, waküjainjanain pütchi namüin na wayuukana jee wekirajüin naya süchiki nuluwataainjachin Maleiwa (Mat. 13:3, 23; 1 Cor. 3:6).

9. ¿Kasa naaʼinraka na wawalayuu oʼunirakana wakuwaʼipa süpüla shiʼraajüinjatüin wayuu nünülia Maleiwa?

⁹ Nüküjain Jesús kasaichin nünülia Maleiwa. Anuu nünüiki soʼu nuʼuraajüin nümüin chi Nüshi iipünaajachikai: «Teʼraajirüinnapa naya tü pünüliakat» (Juan 17:26). Na wawalayuu oʼunirakana sukuwaʼipa waʼyataain nashatüin nukuwaʼipa Jesús, nachajaain sukuwaʼipa süpüla shiʼraajüinjatüin wayuu kasaichin nünülia Maleiwa. Suluʼu tü Biblia kanüliakat Namüinjatü na Wayuu Kepieenakana Suluʼu tü Mma Jeketükat ashajünüsü tü nünüliakat Maleiwa eeinjatülejeʼeya shia. Eesü tia Bibliakat suluʼu 270 anüikii, eesü kottule shia jee süpüshire neʼe shia. Püchajaale suluʼu sooʼomüin pütchi A5 (otta müsia A4 alijunaikiruʼusü), pünteerü anain süshajünüin süchikuaʼa tü nünüliakat Maleiwa suluʼu tü Bibliakat. Suluʼu tü kanüliakat Biblia de Estudio (alijunaikiruʼusü) suluʼu apéndice C aküjünüsü jamüin choʼujaaka süshajünüinjatüin tü nünüliakat Maleiwa suluʼu tü Pütchi Ashajuushikat suluʼu griego, ashajünajatü tia 237 sukua.

10. ¿Kasa watüjaka sünainjee tü alatakat sümüin wanee wayuu chaa Myanmar?

¹⁰ Wakaalinjeein watta saalii wayuu süpüla shiʼraajüinjatüin kasaichin nünülia Maleiwa maʼaka naaʼinrüin shia Jesús. Jamüsüjaʼa wanee wayuu 67 suuyase, kepiasü chaa Myanmar, atanalaasü saaʼin sutuma sütüjaain saaʼu kasaichin nünülia Maleiwa. Anuu sünüiki sümaa shiʼyalajüin: «Eeiwaʼalajatia taapüin süchiki Jehováin nünülia chi Maleiwakai. [...] Nnojotsü eein wanee kasa eekai kojutuleʼeinña maʼin suulia tü pikirajakalü anain taya». Tü watüjakat sünainjee tü alatakat sümüin tia wayuukot shia sunoutaain sukuwaʼipa wayuu sutuma sütüjaain saaʼu kasaichin nünülia Maleiwa.

AYATAʼAYA KOJUTUIN WAMÜIN SUʼUNINNÜIN SUKUWAʼIPA WAʼYATAAIN

11. ¿Kasa naaʼinrajatka na laülaashiikana süpüla jaʼyain naaʼu kojutuin namüin suʼuninnüin nakuwaʼipa? (Piirakaa sümüin tü ayaakuaakat).

¹¹ ¿Kasa naaʼinrajatka na laülaashiikana süpüla jaʼyain naaʼu kojutuin namüin suʼuninnüin sukuwaʼipa waʼyataain? Suluwataanüle wanee karaloʼuta namüin na laülaashiikana naashajeʼerüinjatü shia jee naaʼinrajatü tü aluwataanakalü anain naya. Jamüshiijaʼa naya, aküjünawaisü namüin jamüinjatüin sukuwaʼipa natuma nekirajapa sünain tü outkajawaakat, jamüinjatüin noʼuraajia noʼupala na anoujashiikana jee naaʼinmajüinjanain na anoujashiikana, na makana aka saaʼin naʼanneetse Cristo. Naaʼinrüle na laülaashiikana süpüshuaʼa tü aluwataanakalü anain naya, nayaawateerü aaʼu na wawalayuukana alin naya nüpüla Jehová jee naaʼinmajüin naya.

12. (1) ¿Jamüshii woonooinjanaka sümaa nanüiki na laülaakana wapüleerua? (Hebreokana 13:7, 17). (2) ¿Jamüsü shiainjatka jülüjain waaʼin tü kasa anakat natuma na laülaashiikana?

¹² Woonooinjatü amaa tü aluwataanakalü anain waya natuma na laülaashiikana, waaʼinrüle tia mapüleejeerü namüin tü naʼyataainkat wapüleerua. Saashin tü Bibliakat oonooinjana waya namüin na laülaashiikana jee jüüjüüinjana waya namüin (paashajeʼera Hebreokana 13:7, 17). Eesü kapüleere wamüin tia. ¿Kasa kapüleeka aaʼujee shia? Shia süka nnojoluin lotuin sukuwaʼipa wayuu. Shiale neʼe jülüjain waaʼin tü kasa mojukat natuma suulialeʼeya tü kasa anakat natuma, meena wakaalinjakai naaʼin na waʼünüükana. ¿Suluʼu jamüin? Nnojoleerü nanoujain na wawalayuukana nanüiki na oʼunirakana wakuwaʼipa, shiaʼaya nachekaka achiki tia na waʼünüükana. ¿Kasa waaʼinrajatka süpüla wayaawatüin saaʼu tü alawaa nekirajakalü anain na waʼünüükana jee wayoutuin süchiki?

NNOJO WOOʼULAAIN MOJUTUIN WAMÜIN NA OʼUNIRAKANA WAKUWAʼIPA

13. ¿Kasa naaʼinraka na nüʼünüükana Maleiwa süpüla mojuinjatüin pütchi nachiki na nuʼunirakana akuwaʼipa Jehová?

¹³ Nachajaain sukuwaʼipa na nüʼünüükana Maleiwa süpüla mojushiinjatüin sümüin wayuu tü kasa anakat natuma na nuʼunirakana akuwaʼipa Maleiwa. Jamüshiijaʼa waya, wekirajaa anainrü suluʼu tü Bibliakat nücheküin Jehová wuleinjanain na aʼwaajakana nia, wuleinjatüin nakuwaʼipa jee nanoula. Naashin Maleiwa wanee wayuu eekai nnojolin ayaawajaain suulia naainjala ojuʼitinnajachi naʼakajee na anoujashiikana (1 Cor. 5:11-13; 6:9, 10). Waapaa amaa tia sünüikikat tü Bibliakat. Eekajasaʼa na wayuu peʼipaakana wamaa mojusü naashin tia makat, nnojotsü anain wamüin naashin naatain sukuwaʼipa wayuu woulia, mojusü wanüiki süchiki jee nnojoishii aipüraliin waya naashin.

14. ¿Jarai kanainjeejachika tü alawaa aküjünakat nachiki na nuʼunirakana akuwaʼipa Jehová?

¹⁴ Wayaawata jaralin chi mojukai anüiki wachiki. Nia kanainjeejachika Satanás tü alawaa aküjünakat wachiki, «jama niain shikiishin tü alawaakat» (Juan 8:44; Gén. 3:1-5). Nnojotsü woʼtchejaain amaa nootuin Satanás na nümaajanakana süpüla naküjainjatüin alawaa nachiki na nuʼunirakana akuwaʼipa Jehová. Mapuʼusia sukuwaʼipa soʼu nakalia na nikirajüinkana Jesús.

15. ¿Kasa naaʼinraka na nekiipüʼükana na judíokana nümüin Jesús jee namüin na nikirajüinkana?

¹⁵ Watta saalii alawaa nüküjiraka Satanás nüchiki Jesús, chi Nüchonkai Maleiwa. Naaʼinrüin tia mayaainjeʼe lotuin nukuwaʼipa Jesús jee naainjain kasa pülasü. Jamüshiijaʼa na nekiipüʼükana na judíokana, naküjain sümüin wayuu nujuʼitirüin Jesús yolujaa süleʼeruʼujee wayuu «nükajee chi sülaülashikai yolujaa» (Mar. 3: 22). Soʼu süsalain Jesús atumawaa tü kasa naainjakat, naküjain mojuin nünüiki Jesús nüchiki Maleiwa jee nootuin wayuu süpüla suchuntajatüin nuʼutunuin aaʼin Jesús (Mat. 27:20). Soʼu naküjain tü pütchi anakat maʼin na nikirajüinkana Jesús, na wayuu mojulaashiikana namüin nootuin wayuu süpüla müliainjanain na nikirajüinkana Jesús atumawaa (Aluw. 14:2, 19). Tü rewiisütakat Aapiria Wayuu ojuʼitaka tisienpüroʼu 1 soʼu 1998, müsü sünüiki süchiki Aluwataaushikana 14:2: «Na nekiipüʼükana na judíokana nayouta achikirü tü pütchi naküjakat na nikirajüinkana Jesús. Müsüjeseʼe mojuin nanüiki nachiki jee nootuin na wayuu nnojoliikana judíoin nooʼomüin na nikirajüinkana Jesús».

16. ¿Kasa sotuinjatka waaʼin waapüle alawaa nachiki na wawalayuukana?

¹⁶ Nnojoishi ooʼulaain Satanás suulia aküjaa alawaa soʼu nakalia na nikirajüinkana Jesús. Ayatüshia nia maaʼulu yaa emeejüin wayuu sainküin mmakat (Apoc. 12:9). Waapüle alawaa nachiki na wawalayuukana jee nachiki na laülaashiikana wapüleerua, soto waaʼin mojuin nanüiki na nüʼünüükana Maleiwa nüchiki Jesús jee nachiki na nikirajüinkana. Müliashii atumawaa na anoujashiikana nünain Jehová maaʼulu yaa jee mojusü pütchi nachiki maʼaka süküjatüjülüinña shia tü Bibliakat (Mat. 5:11, 12). Nnojoleena emeejünüin waya sükajee tü alawaakat wayaawatüle saaʼu jaralüin kanainjeejatüin shia jee wayoutamaateerü süchiki. ¿Kasa waaʼinrajatka süpüla wayoutuin süchiki?

17. ¿Kasa waaʼinrajatka süpüla nnojoluin mojuin wakuwaʼipa sutuma tü pütchi alawaakat? (2 Timoteo 1:13; paashajeʼera tü pütchikat «Waaʼinrajatka waapüle pütchi süchiki alawaa»).

¹⁷ Wayouta tü pütchi alawaakat. Pansaasü nünüiki Pablo süchiki tü waaʼinrajatkat süpüla nnojoluin wanoujain wanee alawaa. Nuchuntuin nümüin Timoteo nuluwataainjanain waneinnua wayuu süpüla nnojoliinjanain «kacheʼejüin naya sümüin wanee alawaa» jee nayoutajatüin tü alawaa mojutukalü atuma Maleiwa (1 Tim. 1:3, 4; 4:7). Jamüshijaʼa wanee joʼuu, naapaain mmoluʼujee wanee kasa eekai palasütüin jee niʼitaain shia naanaküluʼu. Eekajasaʼa wanee wayuu eekai muloʼuin nnojotsü naaʼinrüin tia süka nütüjaain saaʼu ayuuleechin nia sutuma. Müshiʼiya wayakana wayoutuin tü alawaa aküjünakat wachiki süka wayaawatüin saaʼu jaralin kamaʼanajeejatüin shia. Ayatüsiaʼaya washatüin sukuwaʼipa tü pütchi anasü waapakat (paashajeʼera 2 Timoteo 1:13).

18. ¿Kasa waaʼinrajatka süpüla jaʼyain waaʼu kojutuin wamüin na oʼunirakana wakuwaʼipa?

¹⁸ Ekirajaainnapa waya sünain apünüinsü kasa naaʼinraka na wawalayuu oʼunirakana wakuwaʼipa süpüla nashatüin nukuwaʼipa Jesús. Eepejeʼe sooʼomüin tia. Sümaʼainruʼu pikirajaain sünain tü Bibliakat anasü jülüjale paaʼin tü naaʼinrakat na oʼunirakana wakuwaʼipa süpüla nashatüin nukuwaʼipa Jesús. Pükaalinja waneepia na wawalayuukana süpüla kojutuin namüin na wayuu oʼunirakana wakuwaʼipa jee ayataʼaya kojutuin pümüin piʼyataain waneepia nümüin Jehová jee paaʼinwain pia namaa na oʼunirakana wakuwaʼipa süpüla saaʼinnüin tü nüchekakalü achiki Maleiwa (Sal. 37:28). Ayataʼaya kojutuin wamüin naʼakain waya na wayuu aipüraliikana jee waneepiakana nümaa Jehová.