¿Pütüjaa aaʼu?

¿Kamalainpuʼusüche maʼin namüin na israelitakana eeʼirajaa?

KAMALAINPUʼUSÜ maʼin namüin na israelitakana eeʼirajaa. Kojuyatua süküjain tü Bibliakat nachiki na wayuu atalejakana wanee kasa otta eeʼirajakana. Jayeechi süpüshi tü karaloʼutachein suluʼukat tü Bibliakat maʼaka saaʼin Salmos, Cantar de los Cantares otta Lamentaciones. Saashin tü karaloʼutakat Music in Biblical Life (La música en la vida bíblica) «eeʼirajapuʼushii na israelitakana wanaa sümaa naaʼinrüin waneirua kasa».

Eeʼirajawaipuʼushii naya. Naaʼinrapuʼuin tia na israelitakana süpüla naküjain jamüin naaʼin (Is. 30:29). Wanaa sümaa nüneekünüin wanee wayuu süpüla nuluwataainjachin eeʼirajapuʼushi na jieyuukana sümaa talatüin naaʼin. Ayonnajüshii jee atalejüshii naya tü kanüliakat pandereta. Eeʼirajapuʼushii naya wanaa sümaa nakanajüin naʼünüü otta wanaa sümaa naʼwaajüin Maleiwa (Juec. 11:34; 1 Sam. 18:6, 7; 1 Rey. 1:39, 40). Eeʼirajapuʼushii na israelitakana wanaa sümaa mojuin maʼin naaʼin sünainjee nünaajaain wanee wayuu (2 Crón. 35:25). Saashin wanee karaloʼuta «kamalainpuʼusü maʼin namüin na hebreokana eeʼirajaa» (Cyclopedia, nashajala McClintock otta Strong).

Kamalainpuʼusü maʼin namüin naapajüin muusika. Kamalainpuʼusü maʼin namüin naapajüin jayeechi na aluwataashiikana chaʼaya Israel. Jamüshijaʼa chi aluwataashikai Saúl, nüneeküin David süpüla nütalejüin nümüin tü kanüliakat arpa (1 Sam. 16:18, 23). Nuluwataapa David nukumajüin waneirua kasa atalejiainjatü, wainma jayeechi nüshajaka jee nüneeküin wayuu süpüla neeʼirajüinjanain nümüin Jehová suluʼu tü aʼwaajüleekat (2 Crón. 7:6; Amós 6:5). Akaʼaya chi aluwataashikai Salomón nüneeküin wayuu tooloyuu sümaa jieyuu süpüla neeʼirajüinjanain chaa nipialuʼu (Ecl. 2:8).

Eeʼirajapuʼushi naya wanaa sümaa naʼwaajüin Jehová. Eepuʼushii 4.000 wayuu eeʼirajapuʼukana suluʼu tü aʼwaajüleekat Maleiwa chaa Jerusalén. Atalejaapuʼushii naya tü kanüliakat cimbalos, instrumentos de cuerda, arpa otta trompeta (1 Crón. 23:5; 2 Crón. 5:12). Nnojoliipejeʼe nayain neʼe eeʼirajüin namüiwaʼa süpüla naʼwaajüin Jehová. Eeshii na israelita eeʼirajapuʼukana tü kanüliakat Canciones de las Subidas wanaa sümaa noʼunuin chaa Jerusalénmüin süpüla naʼwaajüin Jehová (Sal. 120-134). Saashin waneirua karaloʼuta nashajalaka na judíokana eeʼirajapuʼushii na israelitakana tü kanüliakat Hallela wanaa sümaa nekaain soʼu tü Pascuakat.

Kamalainsia wamüin maaʼulu weeʼirajüin jayeechi süpüla waʼwaajüin Maleiwa (Sant. 5:13). Eeʼirajüshii waya jayeechi süpüla waʼwaajüin Jehová (Éf. 5:19). Paaʼinwajiraashii waya namaa na wawalayuukana sutuma weeʼirajüin tü jayeechikat, katchinsü waaʼin süpüla wachecherüin waaʼin soʼunnaa tü alatakat wamüin (Aluw. 16:25; Col. 3:16). Waküjainña sükajee tü jayeechikat kanoulain waya nünain Jehová otta alin maʼin nia wapüla.