Müinjatü tü jülüjakat waaʼin maʼaka tü jülüjakat naaʼin Jehová otta Jesús

1, 2. (1) ¿Kasa weeʼiyataka akajee alin wapüla Jehová? (2) ¿Kasa niiʼiyataka akajee Jesús jülüjain maʼin naaʼin nukuwaʼipa chi Nüshikai?

NÜKÜJATÜJÜLIA Jesús jeʼtsüin tü pütchi waaʼinmaainjatkat maʼin sünainjee tü Pütchi Aapünakat nümüin Moisés. «Alinjachi püpüla Jehová chi Pümaleiwasekai, alinjachi nia püpüla süka süpüshuaʼa paaʼin, sükajee pukuwaʼipa, süka süpüshuaʼa pütchin otta jülüjainjachi nia paaʼin waneepia» (Luc. 10:27). Müsüjeseʼe weeʼiyatajatü alin wapüla Jehová süka süpüshuaʼa waaʼin, sükajee süpüshuaʼa wakuwaʼipa otta sükajee süpüshuaʼa watchin. Otta müsia weeʼiyatüinjatüin alin wapüla Jehová sükajee tü kasa jülüjakat waaʼin. Watüjaa aaʼulu isain wachiki wayaawatüin saaʼu tü kasa nikiirujutkat Jehová. Wanee kasa waaʼinrajatka süpüla wayaawatüin saaʼu shia wekirajaale süchiki tü nikiirujutkat Cristo süka nüshatüin nukuwaʼipa chi Nüshikai (1 Cor. 2:16).

² Sutumajee alin Jehová nüpüla Jesús nütüjaa aaʼu kasapülajachin nüjütünüin yaa mmapaʼa. Müsüjeseʼe naaʼinrüin tü nümakat Jehová nümüin mayaainjeʼe müliainjachin nia sünainjee. Sutumajee shiain jülüjain naaʼin tü kasa nuluwataakalü anain chi Nüshikai nnojotsü nuuʼulaain shiain alanaʼaleein sujutu nümüin wanee kasa naata suulia tia.

3. (1) ¿Kasa nütüjaka Pedro nünainjee Jesús? (2) ¿Kasa nüküjaka Pedro namüin na anoujashiikana? (1 Pedro 4:1).

³ Alatitshi kaʼi Pedro otta na wanee aluwataaushikana nümaa Jesús jee atüjashii naya sünainjee sukuwaʼipa tü kasa jülüjakat naaʼin Jesús. Sünain tü palajatkat karaloʼuta nüshajakat Pedro nütütüleʼerüin naaʼin na anoujashiikana sünain wanaawainjatüin nakuwaʼipa nümaa Cristo (paashajeʼera 1 Pedro 4:1). Wanaa sümaa nüküjain Pedro namüin na anoujashiikana wanaawainjatüin nakuwaʼipa nümaa Cristo, shia nüküjaka achiki wanee kasa suluʼujeejatkat tü pütchikat griego aashajaaka süchiki nakuwaʼipapala na surulaatkana. Jamüshijaʼa na surulaatkana yapajüinjana naya palajana sümaa naʼapüla süpüla noʼunajanain sünain tü atkawaakat. Akaataajaʼa wayakana anoujashiikana süpüla wanaawainjatüin wakuwaʼipa nümaa Cristo yapajüinjana waya süpüla wachecherüinjatüin waaʼin suulia tü kasa mojusü suchuntakat waaʼin otta tü kasa mojusü saaʼinrakat wayuu (2 Cor. 10:3-5; Éf. 6:12).

4. ¿Kasa wekirajaainjatka anain sünain ekirajaayakat tüü?

⁴ Sünain ekirajaayakat tüü, wekirajaajeerü anain tü jülüjakat naaʼin Jesús süchiki wanee kasa otta jamüin anaka washatüle shia. Jülüjale waaʼin tü jülüjakat naaʼin Jehová, wanaaweerü tü kasa jülüjakat waaʼin namaa na wawalayuukana, nnojoleerü yaletüin waaʼin otta laülaajeerü waaʼin. Anashii wekirajaale sünain tia.

WANAAWA TÜ JÜLÜJAKAT WAAʼIN SÜMAA TÜ JÜLÜJAKAT NAAʼIN JEHOVÁ

5. ¿Jamüsü nnojotkaʼa wanaawain tü jülüjakat naaʼin Pedro sümaa tü jülüjakat naaʼin Maleiwa?

⁵ Niiʼiyatüin Pedro soʼu wanee kaʼi nnojoluin wanaawain tü jülüjakat naaʼin sümaa tü jülüjakat naaʼin Jehová. Nüküjain Jesús namüin na nikirajüinkana nuʼunajachin Jerusalénmüin sümaa niʼrüinjachin müliaa chaʼayaa natuma nekiipüʼü na sacerdotekana otta nüküjain nuʼutunajachin aaʼin (Mat. 16:21). Nütüjaa aaʼu Pedro niain Jesús chi Mesías aküjünakai achiki paala, chi Oʼtteʼerajachikai wayuu. Eesüjaʼa süpüla nnojoluin nunoujain maʼin Pedro sünain naapünajachin ekii Jesús nutuma Maleiwa (Mat. 16:16). Müshijeseʼe nümaka Pedro nümüin Jesús: «Señotkalee, aituashiaʼaya maʼin pia, nnojorüleejaʼa sülatajatüin pümüin tia pümakat» (Mat. 16:22). Nnojotsü wanaawain tü jülüjakat naaʼin Pedro sümaa tü jülüjakat naaʼin Jehová otta Jesús wanaa sümaa tia.

6. ¿Jamüsü watüjaakaʼa saaʼu wanaawain tü jülüjakat naaʼin Jesús sümaa tü jülüjakat naaʼin Jehová?

⁶ Wanaawasü tü jülüjakat naaʼin Jesús sümaa tü jülüjakat naaʼin chi Nüshikai. Müshijeseʼe nümüin nümüin Pedro: «Puʼuna toulia Satanás, pütaʼülee akuwaʼipachi neʼe taya. Nnojotsü jülüjain paaʼin tü jülüjakat naaʼin Maleiwa, shia neʼe jülüjaka paaʼin tü jülüjakat saaʼin wayuu» (Mat. 16:23). Nütüjaa aaʼu Jesús niʼrüinjatü müliaa jee outajachin nia noonoole sümaa nünüiki Jehová. Müsüjeseʼe nnojolin naapaain amaa tü nüküjakat Pedro nümüin mayaainjeʼe anain maʼin nünüiki nümüin. Sünainjee tia niyaawata aaʼu Pedro wanaawainjatüin tü jülüjakat naaʼin sümaa tü jülüjakat naaʼin Jehová. Anakatche maʼin sukuwaʼipa tü kasa shikirajakalü anain waya.

7. ¿Jamüsü watüjaakaʼa saaʼu wanaawain tü jülüjakat naaʼin Pedro sümaa tü jülüjakat naaʼin Jehová? (Piirakaa sümüin tü ayaakuaakat).

⁷ Shiasaʼa mapa jülüjasü naaʼin Pedro niiʼiyatüinjatüin wanaawain naaʼin sümaa tü jülüjakat naaʼin Jehová. Soʼu tia nuuʼulaain Jehová naʼyataainjanain nümüin na wayuu nnojoliikana judíoin. Nuluwataain Jehová Pedro sünain aküjaa pütchi nümüin Cornelio, nia chi palajachikai wayuu nnojoikai judíoin anoujaka nünain Cristo. Süpüla nüküjainjachin pütchi Pedro namüin na wayuu nnojoliikana judíoin niiʼiratüinjatü nukuwaʼipa süka nnojoluin anajiraain na wayuu judíokana namaa na wane wayuukana. Niyaawatapa saaʼu Pedro tü keeʼireekat naaʼin Maleiwa napüleerua na nnojoliikana judíoin niiʼiratüin tü nukuwaʼipakat. Müsüjeseʼe wanaa sümaa nüsaajinnüin Pedro nutuma Cornelio nnojoishi niyoutajaain amaa nia (Aluw. 10:28, 29). Nüküjaka pütchi nümüin Cornelio jee namüin napüshuaʼa na yalajanakana suluʼu nipia jee woutiisakana naya (Aluw. 10:21-23, 34, 35, 44-48).

8. ¿Kasa waaʼinrajatka süpüla wanaawain tü jülüjakat waaʼin sümaa tü jülüjakat naaʼin Jehová? (1 Pedro 3:8).

⁸ Maʼaka jeʼra juya süchikijee tia, nümaka Pedro namüin na anoujashiikana: «Anakajaʼa paaʼinwale jia jüpüshuaʼa sünain tü jülüjakat jaaʼin» (paashajeʼera 1 Pedro 3:8). Süpüla wanaawainjatüin tü jülüjakat naaʼin napüshuaʼa na aʼyataashiikana nümüin Jehová nashatüinjatü sukuwaʼipa tü jülüjakat naaʼin Jehová, tü aküjünakat suluʼu tü Bibliakat. Nüküjain Jesús namüin na nikirajüinkana naaʼinmaainjatüin maʼin tü naʼyataainkat nümüin Maleiwa (Mat. 6:33). Müleka eere wanee wawala aneekakai pürekutsoolin rekulaat nia nnojotsü anain wamalajeʼerüle naaʼin. Shia anaka aluʼu watütüleʼerüle naaʼin sükajee anain maʼin tü aʼyatawaa naainjakat otta wakaalinja nia.

NNOJO YALETÜIN WAAʼIN

9, 10. ¿Kasa naaʼinraka Jesús sutuma nnojoluin yaletüin naaʼin?

⁹ Wanee ai süpülapünaa nuʼutunuin aaʼin Jesús ekirajünüshi Pedro nutuma jee na wane aluwataaushikana sünain nnojoluinjatüin yaletüin naaʼin. Nüküjain Jesús nümüin Pedro otta Juan yapainjatüin natuma wanee ekawaa namaa na nikirajüinkana süpülapünaa saapünüin nikii süpüla outa. Eesüjaʼa süpüla keraatüjülin natuma wanee iita miyoʼu sümaa wüin jee wanee tuwaaya süpüla noʼlojooin nooʼui na wayuu antajanakana sünain tü ekawaakat. ¿Jaraiche chi wayuu nnojoika yaletüin aaʼin oʼlojeeshika nooʼui na waneinnua?

¹⁰ Niapuʼu aainjaka tia wanee wayuu achepchiee, akatsaʼa soʼu kaʼikat tia nia Jesús aainjakat tia aʼyatawaakat, nuʼlojuin nooʼui na wayuukana. Ponusü maʼin naaʼin na nikirajüinkana Jesús neʼrapa tü naaʼinrakat. Naakataka tü saajunakat nüsheʼin sümaa niʼitaain shia naʼatoʼu sümaa nijittaain wanee tuwaaya nüseʼeruʼupünaa jee nipirajaka wüin wanee iita miyoʼu süpüla nuʼlojuin nooʼui na nikirajüinkana (Juan 13:4, 5). Eeshijaʼa süpüla kamaain Jesús sünain nuʼlojuin nooʼui na poloo piamamüin aluwataaushikana jee nuʼlojuin nuuʼui Judas chi wayuu aapakai nikii mapa. Nnojotsü yaletüin naaʼin Jesús. Anuu nünüiki namüin na nikirajüinkana: «¿Jiyaawata aaʼu tü taaʼinrakat jüpüleerua? ‹Wayuu ekirajüi› müshii jia tamüin, ‹Señotkalee› müshii joo jiaʼaya, pansaasü tia jümakat süka tayainjaʼaya chi jümakai. Toʼlojooitpa juuʼui eerejeʼe tayain chi Jüseñotsekai otta tayain chi Ekirajüikai jia. Akaainjanaʼaya neʼe jiakana, juʼlojiraainjatü tü juuʼuikat» (Juan 13:12-14).

11. ¿Jamüsü watüjaakaʼa saaʼu nnojoluin yaletüin naaʼin Pedro? (1 Pedro 5:5) (Piirakaa sümüin tü ayaakuaakat).

¹¹ Nüshatüin Pedro nukuwaʼipa Jesús, nnojotsü yaletüin naaʼin. Süchikijee nüleʼejüin Jesús chaa iipünaamüin niiʼiyajüin Pedro wanee wayuu joʼuujiraakai sümaa masaʼain nia (Aluw. 1:8, 9; 3:2, 6-8). Sutumajee naainjain Pedro tia kasa pülasükat ponusü maʼin naaʼin na wayuukana (Aluw. 3:11). Mayaainjeʼe neʼnnaajüneein maʼin na judíokana sutuma tü kasa naaʼinrawaikat, nnojotsü müin nukuwaʼipa Pedro süka nnojoluin yaletüin naaʼin. Shia keeʼireeka naaʼin kojutuinjachin atumawaa Jehová otta Jesús. Anuu nünüiki nüchiki Jesús: «Saaʼujee nünülia Jesús jee saaʼujee wanoujain nünain, akatchinraaichipa wayuukai chii, anii joo jiʼrüin jee jiʼraajüin nia» (Aluw. 3:12-16). Nüshajüin mapa Pedro namüin na anoujashiikana nnojoluinjatüin yaletüin naaʼin. Suluʼu tü pütchi griego nüshajakalü aka Pedro tia pütchikat nuʼwanaajireʼerüin shia sümaa wanee kuluulu naʼataka nünain wanee wayuu. Sotusü waaʼin tü naaʼinrakat Jesús wanaa sümaa nijittaain nüseʼeruʼupünaa wanee tuwaaya süpüla nuʼlojuin nooʼui na nikirajüinkana (paashajeʼera 1 Pedro 5:5).

12. ¿Kasa waaʼinrajatka süpüla washatüin nukuwaʼipa Pedro jee nnojoluin yaletüin waaʼin?

¹² Washateerü nukuwaʼipa Pedro nnojorüle yaletüin waaʼin. Ayaawatüna aaʼu nnojoluin yaletüin naaʼin wanee wayuu sükajee sukuwaʼipa nünüikipala otta sükajee tü kasa jülüjakat naaʼin. Tia shia tü nüküjeekat Pedro sükajee tü pütchikat nnojo yaletüin paaʼin makat. Waaʼinrüin kasa anasü napüleerua na waneinnua sükajee alin naya wapüla otta alin wapüla Jehová, nnojotsü waaʼinrüin shia sükajee weʼnnaajüneein sutuma wayuu. Nnojoishii aʼyataain waya nümüin Jehová sümaa waaʼinrüin kasa anasü süpüleerua wayuu shiiʼiree neʼe aneein pütchi wachiki. Waaʼinrüin tia süka alin wapüla Jehová otta alin wapüla na waneinnua (Mat. 6:1-4).

LAÜLAA WAAʼIN

13. ¿Jamüsü nukuwaʼipa wanee wayuu laülaale naaʼin?

¹³ ¿Jamüsü nukuwaʼipa wanee wayuu laülaale naaʼin? (1 Ped. 4:7). Laülaale naaʼin wanee wayuu, nüneekeerü kasa wanaapünaa sümaa tü jülüjakat naaʼin Jehová. Kojuteerü maʼin nümüin aleewain nia nümaa Jehová. Laülaale waaʼin nnojoleerü jülüjain waaʼin alanaʼaleein wakuwaʼipa noulia na waneinnua jee watüjalein noulia. Nnojoleerü yaletüin waaʼin jee wachunteerü kaalinwaa nümüin Jehová süpüla nuʼunirüin wakuwaʼipa.

14. Püküja wanee kasa naaʼinraka Pedro sutuma niʼitaain naaʼin nünainjiraa.

¹⁴ Anuu nünüiki Jesús soʼu tü ai süpülapünaa outuin nia: «Soʼu aikat tüü jüpüteechi taya tamüiwaʼa». Nusoutaka joo Pedro nümüin Jesús: «Nnojoireejaʼa tapüteechin pia pümüiwaʼa, jaʼitashi napütüin pia pümüiwaʼa na waneinnua». Nümaka Jesús namüin na nikirajüinkana: «Nnojo jutunkajüin, shia anaka aluʼu juʼuraajüle waneepia» (Mat. 26:31, 33, 41). Naaʼinrayüleje Pedro tü nümakat Jesús nümüin nnojoishije nuunjulajüin achiki niʼraajüin nia, mojukajasaʼa maʼin naaʼin sutuma naaʼinrüin tia (Mat. 26:69-75).

15. Sutuma laülaain naaʼin Jesús, ¿kasa naaʼinraka soʼu tü ai süpülapünaa outuin nia?

¹⁵ Sutuma nnojoluin niʼitaain naaʼin Jesús nünainjiraa oʼuraajüshi nia nümüin Jehová süpüla nuchuntuin kaalinwaa nümüin soʼu tü ai süpülapünaa nuʼutunuin aaʼin. Müshijeseʼe meimmoluin nia süpüla naaʼinrüin tü nüchekakat Jehová (Mat. 26:39, 42, 44; Juan 18:4, 5). Sotokajasaʼa naaʼin Pedro nuʼuraajüin maʼin Jesús nümüin Jehová, jama niʼrapuʼuin nia sünain aaʼinraa tia.

16. ¿Jamüsü watüjaakaʼa saaʼu nülaüleʼerüin naaʼin Pedro mapa? (1 Pedro 4:7).

¹⁶ Atüjashi Pedro nünainjee Jesús jee achuntawaishi nia kaalinwaa nümüin Jehová. Nüsoʼirapa aaʼin Jesús nüküjain nümüin Pedro jee namüin na wane nikirajüinkana naapeerüin Maleiwa namüin tü nüpülainkat süpüla naküjain pütchi. Naʼatapajüinjatpejeʼe shikeraajüin tia chaa Jerusalén (Luc. 24:49; Aluw. 1:4, 5). Süküjain tü Bibliakat nuʼuraajawalin Pedro jee na wane anoujashiikana sümaʼainruʼu naʼatapajüin tia (Aluw. 1:13, 14). Sünain tü palajatkat karaloʼuta nüshajaka Pedro nütütüleʼerüin naaʼin na anoujashiikana süpüla laülaainjatüin naaʼin jee noʼuraajüinjanain nümüin Jehová (paashajeʼera 1 Pedro 4:7). Kanoulashi maʼin Pedro mapa jee nükaalinjain na anoujashiikana süpüla katchinjatüin nanoula (Gal. 2:9).

17. ¿Kasa waaʼinrajatka süpülapünaa waneeküin wanee kasa jaʼitairü müin mapüleekai saaʼin wamüin? (Piirakaa sümüin tü ayaakuaakat).

¹⁷ Oʼuraajüinjana maʼin waya nümüin Jehová süpüla laülaainjatüin waaʼin. Achuntuinjana waya kaalinwaa nümüin waneepia jaʼitairü müin mapüleekai saaʼin wamüin tü waaʼinrüinjatkat. Wachuntuinjatü kaalinwaa waneepia nümüin Jehová waneekajatpa wanee kasa, jama watüjaain saaʼu aneerüin wakuwaʼipa waaʼinrüle tü nümakat.

18. ¿Kasa waaʼinrajatka süpüla washatüin nukuwaʼipa Pedro?

¹⁸ Watüjaa aaʼulu nnojoluin süpüla müin wakuwaʼipa maʼaka naaʼin Jehová (Is. 55:9). Kojutupejeʼe wamüin süka eein süpüla washatüin nukuwaʼipa Jehová (Gén. 1:26). Anasü washatüle nukuwaʼipa Pedro wanaawa tü jülüjakat waaʼin sümaa tü jülüjakat naaʼin Jehová, nnojo yaletüin waaʼin jee laülaa waaʼin.