Jaʼyainjatü waaʼu kanoulain waya sükajee tü kasa waneekakat

1. ¿Jamüsü talatakaʼa naaʼin Pablo sümaa tü kasa naaʼinrakat?

NÜTÜJAAPA SAAʼU Pablo nuʼutunuinjachin aaʼin nnojotsü mojuin maʼin naaʼin süka jülüjain naaʼin tü naaʼinrakat sünain aʼyatawaa nümüin Maleiwa. Anuu nünüiki: «Tekeraajüitpa tü aʼyatawaa eʼitaanakat tapüleerua jee ayatüshi taya sünain anoujaa» (2 Tim. 4:6-8). Nütüjaa aaʼu talatüin Jehová nümaa sutuma anain tü kasa nüneekakat sünain aʼyatawaa nümüin. Anasü waneeküle kasa anasü maʼaka naaʼinrüin shia Pablo süpüla talatüinjachin Jehová wamaa. ¿Kasa waaʼinrajatka süpüla wountuin tia?

2. ¿Jamüsü nukuwaʼipa wanee wayuu kanoulale nia?

² Anuu nünüiki Pablo süchiki nukuwaʼipa jee nakuwaʼipa na wane anoujashiikana. Müshi nia: «Watüjaa aaʼu tia sünainjee kanoulain waya, nnojotsü shiain sünainjee tü kasa shiʼrakat wayuu» (2 Cor. 5:7). Wanaa sümaa nümüin Pablo «Tü kasa shiʼrakat wayuu» shia nüküjeeka achiki nüneeküin neʼe wanee wayuu wanee kasa sükajee tü kasa niʼrakat, tü jülüjakat naaʼin jee tü kasa naapakat achiki. Eekajasaʼa chi wayuu kanoulakai nüneeküin wanee kasa wanaapünaa sümaa tü nüchekakat Jehová. Nütüjaa aaʼulu aneerüin nukuwaʼipa noonoole sümaa nünüiki Jehová jee eʼreechi nia kasa anasü nutuma mapeena (Sal. 119:66; Heb. 11:6).

3. ¿Jamüsü aneetkaʼa wakuwaʼipa kanoulale waya? (2 Corinto 4:18).

³ Eesü waneeküle wanee kasa sünainjee neʼe tü kasa weʼrakat, waapaka achiki jee tü jülüjakat waaʼin. Eepejeʼe süpüla nnojoluin anain tü kasa waneekakat shiale neʼe jülüjain waaʼin tia. Süka jamüin, eein süpüla nnojoluin shiimain jee anain tü kasa weʼrakat, waapaka achiki jee tü jülüjakat waaʼin. Waneeküle wanee kasa sünainjee neʼe tü kasa weʼrakat, eesüjaʼa süpüla nnojoluin jülüjain waaʼin tü nümakat Jehová wamüin (Ecl. 11:9; Mat. 24:37-39). Kanoulale waya waneekeerü kasa anaka «noʼuluʼu chi Señotkai» (Éf. 5:10). Woonoole sümaa tü nuluwataakat anain waya Jehová jimateerü waaʼin jee talateerü waaʼin (Sal. 16:8, 9; Is. 48:17, 18). Kateerü woʼu süpüla kaʼikat süpüshuaʼa niale Jehová oʼunirüin wakuwaʼipa (paashajeʼera 2 Corinto 4:18).

4. ¿Kasa wasakireʼerüinjatka anain waaʼin süpüla watüjaain saaʼu kasain waneekaka anainjee wanee kasa?

⁴ Anasü wasakirüle waaʼin wapüshuaʼa sünain tüü: «¿Kasa taneekaka anainjee wanee kasa? ¿Shiache neʼe sünainjee tü kasa teʼrakat? ¿Shiataapa süka toʼunuin süchiirua tü kasa nikirajakalü anain taya Jehová?». Sünain ekirajaayaka tüü, wekirajaajeerü anain tü waaʼinrajatkat süpüla woonooin sümaa nünüiki Jehová waneekajatpa wanee aʼyatawaa, waneekajatpa tü wayuu kasaalüinjatkat amaa waya jee sunoutunapa wanee kasa sünain tü waʼyataainkat nümüin Jehová. Wekirajaajeerü anain tü waaʼinrajatkat süpüla anain sukuwaʼipa tü kasa waneekajatkat.

WANEEKAJATPA WANEE AʼYATAWAA

5. ¿Kasa tü jülüjawaika waaʼin waneekajatpa wanee aʼyatawaa?

⁵ Aʼyataashii waya süpüla tü kasa choʼujaakat wamüin jee tü choʼujaakat sümüin wapüshi (Ecl. 7:12; 1 Tim. 5:8). Eesü aʼyatawaa walaaka maʼin otta eesia waneirua eere nnojoluin walaain maʼin tü aʼyatawaakat. Walaale maʼin waʼyataain eesü süpüla wayaʼlajüin süpüshuaʼa tü kasa choʼujaakat wamüin otta kanaajaalain waya nneerü. Shiasaʼa palitchonle wakanain, shia neʼe wayaʼlajaka tü kasa choʼujaakat sümüin wapüshi. Waneekajatpa wanee aʼyatawaa eesüjaʼa jülüjale neʼe waaʼin jeʼreerüin tü nneerü wakanajaka. Müle nukuwaʼipa wanee wayuu shia neʼe jülüjakat naaʼin tü kasa niʼrakat.

6. Kanoulale waya, ¿kasa jülüjeetka waaʼin waneekajatpa wanee aʼyatawaa? (Hebreokana 13:5).

⁶ Kanoulale waya waneekeerü wanee aʼyatawaa eeka anain nnojoleetka amojujaain tü wakuwaʼipakat nümaa Jehová. Waneeküinjatüle wanee aʼyatawaa anasü wasakirüle waaʼin sünain tüü: «¿Anasüche nümüin Jehová tü kasa taaʼinrajatkat sünain tia aʼyatawaakat? ¿Apütaajeetche kaʼi süpüla toʼunuin sünain tü outkajawaakat, taküjain pütchi otta tekirajaain sünain tü Bibliakat? ¿Akolojooinjaitche taya watta suulia tapüshi sutumajee tü taʼyataainkat?» (Prov. 6:16-19; Filip. 1:10). Wasakireʼerapa waaʼin sünain tia jee wayaawatüle saaʼu mojeerüin wakuwaʼipa waneeküle tia aʼyatawaakat, anasü nnojorüle waapaain shia mayaainjeʼe alin shiiʼiree aʼyatawaa. Sutuma watüjaain saaʼu naapeerüin Jehová tü kasa choʼujaakat wamüin nnojoleerü waneeküin wanee aʼyatawaa amojujeʼereetka wakuwaʼipa nümaa Jehová (Mat. 6:33; paashajeʼera Hebreokana 13:5).

7, 8. ¿Kasa naainjaka wanee wawala chejeʼewai Sudamérica niiʼiyataka aka kanoulain maʼin nia? (Piirakaa sümüin tü ayaakuaakat).

⁷ Jülüjataa waaʼin nukuwaʼipa wanee wawala kanüliakai Javier,a chejeʼewai Sudamérica. Kanoulashi maʼin nia. Anuu nünüiki: «Eere taʼyataain aküjünüsü tamüin süchiki wanee aʼyatawaa walaaka maʼin otta kamalainka tamüin». Akaisaʼa Javier pürekutsooleeshi nia. Anuu nünüiki: «Aluwataanüshi taya sünain aashajawaa nümaa shikiipüʼükai tü compañíakat. Süpülapünaa taashajaain nümaa achuntushi taya palajana nümüin Jehová süka niain atüjaain saaʼu tü aneetkat atuma takuwaʼipa. Mayaainjeʼe keeʼireein taaʼin tousütüin wanee aʼyatawaa eere walaainjachin maʼin taya tatüjaa aaʼulu nnojoluinjatüin taapaain amaa tia aʼyatawaakat süka nnojoleerüin apütaain kaʼi süpüla taʼyataain nümüin Jehová.

⁸ Anuu nünüiki Javier: «Wanaa sümaa naashajaain chi shikiipüʼükai tü compañíakat tamaa nüküjain tamüin taʼyataainjachin maʼin noulialeʼeya na waneinnua. Taküjain nümüin süka anakalü akuwaʼipa iseerüin tachiki taaʼinrüin tia aʼyatawaakat süka nnojoleerüin apütaain kaʼi süpüla taʼwaajüinjachin Maleiwa». Nnojotsü naapaain Javier tia aʼyatawaakat. Shiasaʼa piama semaana süchikijee nüneekaka pürekutsoolüin nia. Nuusütaka mapa wanee aʼyatawaa, eere süpütaain kaʼi nüpüla süpüla aküjaa pütchi. Müsü nünüiki: «Naapüin Jehová tü kasa tachuntakat nümüin jee naapüin wanee aʼyatawaa eere süpütaain kaʼi süpüla taʼwaajüinjachin Jehová namaa na wawalayuukana».

9. ¿Kasa watüjaka sünainjee nukuwaʼipa Trésor?

⁹ ¿Kasa waaʼinrajatka wayaawatüle saaʼu nnojoluin anain tü wanoulakat sutuma tü waʼyataainkat? Jülüjataa waaʼin nukuwaʼipa chi wawalakai Trésor, chejeʼewai nia suluʼujee tü mmakat Congo. Müsü nünüiki: «Tousütüin wanee aʼyatawaa walaaka maʼin eere kojutuin maʼin taya atumawaa». Eeshi moʼunuinre Trésor sünain tü outkajawaakat süka niʼyataain maʼin. Apüleeruaanüsü naaʼin süpüla nüküjain naʼalain süchiki tü kasa aainjünakat suluʼu tü compañiakat. Nuuʼulaweein tia aʼyatawaakat, jülüjapejeʼe naaʼin jameerüin nukuwaʼipa maʼyataainre nia. Müsü nünüiki: «Anasü taaʼin sutuma tü sümakat Habacuc 3:17-19 süka tayaawatüin saaʼu naaʼinmajeechi taya Jehová, tooʼulaaka tia aʼyatawaakat. Naashin waneinnua shikiipüʼü compañía walaale maʼin niʼyataain wanee wayuu natuma naainjeerü tü kasa nachuntakat nümüin, jaʼitairü nnojoluin apütaain kaʼi süpüla nümaain nia nüpüshi jee süpüla nuʼwaajüin Maleiwa. Talatüsü taaʼin süka taneeküin anain takuwaʼipa nümaa Jehová otta sümaa tapüshi. Wanee juya süchikijee, nükaalinjain taya Jehová süpüla tousütüin wanee aʼyatawaa süpüla taapüin tü kasa choʼujaakat sümüin tapüshi otta apütaasü kaʼi süpüla taʼyataainjachin nümüin Jehová». Eejeerü kaʼi maʼletseekalü oʼu waya, akatsaʼa waaʼinmaale maʼin tü waʼyataainkat nümüin Jehová, naapeerü tü kasa choʼujaakat wamüin otta naaʼinmajeena maʼin waya. Woonoole sümaa tü nümakat Jehová wamüin jee wanoujale sünain naaʼinmajeenain waya, aneerü tü kasa waneekakat otta weʼreerü kasa anasü nutuma.

WANEEKAJATPA TÜ WAYUU KASAALÜINJATKAT AMAA WAYA

10. (1) ¿Kasa jülüjainjatka naaʼin wanee wayuu nüneeküinjatpa tü wayuu kasaalüinjachika amaa nia? (2) ¿Jamüsü nnojotka anain jülüjale neʼe naaʼin tia?

¹⁰ Nia Jehová keʼinaajalakai sukuwaʼipa kaʼwayuusee. Müsüjeseʼe nnojoluin mojuin kaʼwayuuseere wanee wayuu. Müliale wanee wayuu shiiʼiree wanee jierü jülüjasü naaʼin tü sukuwaʼipakat, anachonle shia, anale pütchi süchiki, washirüle shia jee maʼletsere shia, anale sukuwaʼipa namaa na süpüshikana jee jamüin naaʼin sümaa.b Anasiaajeʼe jülüjale naaʼin wanee wayuu tia süpüla anain süneekia tü wayuu kasaalüinjachikalü amaa nia. Nnojotpejeʼe anain shiale neʼe jülüjain naaʼin tia süka nüneekeerü neʼe tü kasa niʼrakat.

11. ¿Kasa naaʼinrajatka wanee wawala süpüla niiʼiyatüin kanoulain nia nüneekajatpa tü wayuu kasaaleekat amaa nia? (1 Cor. 7:39).

¹¹ Talatüshi Jehová namaa na wawalayuu oonookana sümaa tü nümakat süpülapünaa naneeküin tü wayuu kasaalüinjanakana amaa naya. Naashin Jehová kasaaleere wanee wayuu laülaainjatü naaʼin jee nütüjaainjatü süpüleerua nukuwaʼipa (1 Cor. 7:36). Otta Jülüjainjatü naaʼin jeʼtsüinjatüin sukuwaʼipa tü wayuu kasaalüinjachikalü amaa nia wanaapünaa sümaa tü sümakat tü Bibliakat (Prov. 31:10-13, 26-28; Éf. 5:33; 1 Tim. 5:8). Nnojoishi amüraajiraainjachin wanee wawala sümaa wanee wayuu manoujainka. Jülüjainjatü naaʼin tü sümakat tü Bibliakat süchiki kasaalüinjachin wanee anoujashi sümaa wanee wayuu anoujasü wanaa nümaa (paashajeʼera 1 Corinto 7:39). Naaʼinrüin tia wanee wawala süka nütüjaain saaʼu aneerüin nukuwaʼipa nutuma Jehová (Sal. 55:22).

12. ¿Kasa watüjaka sünainjee sukuwaʼipa Rosa?

¹² Jülüjataa waaʼin sukuwaʼipa Rosa, wanee wawala pürekutsoot chejeʼewatka Colombia. Müliashi wanee wayuu shiiʼiree chayaa eere shiʼyataain jee müsia shiaka müliasü niiʼiree. Müsü sünüiki Rosa: «Anashi aaʼinchi nia, nükaalinjawalin na wayuu kepiakana pejepünaa nünain, nnojoishi akaijülin, jee nnojoishi asülin. Laülaa aaʼinchi nia jee kamaneeshi nia tamüin. Tia shia tü nukuwaʼipainjatkat chi wayuu taʼwayuuseekai, shiajaʼa neʼe choʼujaaka nunoujain. Kapüleesü tamüin taküjain nümüin nnojoluin süpüla wamüraajiraain süka müliain taya niiʼiree. Kasaaleesü taya soʼu tia. Shiajaʼa neʼe nnojoluin eein wanee wawala anakai süpüla kasaalüin amaa taya». Nnojotsü shiain neʼe saaʼinmaaka Rosa tü kasa shiʼrakat, jülüjasü saaʼin jameerüin sukuwaʼipa nümaa Jehová sümüraajiraale nümaa chia wayuukai. Müsüjeseʼe saaʼinmaain maʼin tü shiʼyataainkat nümüin Jehová jee suuʼulaaka suulia aleewa nümaa chia wayuukai. Ounejaanüsü shia süpüla suʼunuinjatüin sünain Tü Ekirajawaa Napülajatkat na Aküjaliikana pütchi. Pürekutsoot pesiaat shia maaʼulu. Anuu sünüiki Rosa: «Talatüsü taaʼin sutuma süpüshuaʼa tü kasa naapakat Jehová tamüin». Eejeerü kaʼi kapüleejeetka oʼu wamüin waaʼinrüin tü nümakat Jehová suchuntaale maʼin waaʼin waaʼinrüin wanee kasa. Aneetpejeʼe wakuwaʼipa woonoole sümaa nünüiki Jehová.

SUNOUTUNAPA WANEE KASA SÜNAIN TÜ WAʼYATAAINKAT NÜMÜIN MALEIWA

13. ¿Kasa waaʼinrajatka süküjünapa wamüin sunoutunuin wanee kasa sünain tü waʼyataainkat nümüin Maleiwa?

¹³ Süpüla anain sukuwaʼipa tü waʼyataainkat nümüin Jehová nüküjain wamüin tü waaʼinrajatkat nakajee na laülaashiikana, nakajee na wawalayuu alapalaakana waaʼu, nakajee na wawalayuu aʼyataakana suluʼu Weteet jee nakajee na Laülaashii Jülüjakana Aaʼin tü waʼyataainkat. Eejeetpejeʼe kaʼi nnojoleetka oʼu wayaawatüin aaʼu jamüin sunoutunaka wanee kasa sünain tü waʼyataainkat nümüin Jehová. ¿Wainmajüsüche waaʼin sünain aneerüle wakuwaʼipa woonoole sümaa tü aluwataanakat anain waya? ¿Jülüjeetche neʼe waaʼin nukuwaʼipa chi wawalakai suulialeʼeya tü nüküjaka wamüin?

14. ¿Kasa jülüjainjatka waaʼin sunoutunapa wanee kasa sünain tü waʼyataainkat nümüin Maleiwa? (Hebreokana 13:17).

¹⁴ Watüjaa aaʼulu niain Jehová chi oʼunirakai nakuwaʼipa na aʼyataashiikana nümüin jee niain atüjaka saaʼu tü anainjatkalü atuma nakuwaʼipa. Müsüjeseʼe woonooinjatüin sümaa tü nuluwataakalü anain waya (paashajeʼera Hebreokana 13:17). Waaʼinrüle tia, paaʼinweena waya namaa na wawalayuukana (Éf. 4:2, 3). Watüjaa aaʼulu nuʼunirüin wakuwaʼipa Jehová nakajee na wawalayuukana mayaainjeʼe nnojoluin lotuin maʼin nakuwaʼipa, müsüjeseʼe anain woonoole sümaa nanüiki (1 Sam. 15:22). Nnojorüle anain maʼin wanee kasa naneekaka na wawalayuukana nunouteʼereerü akuwaʼipa tia Jehová soʼu tü kaʼi anakalü oʼu shia nümüin (Miq. 7:7).

15, 16. ¿Kasa naaʼinraka Kevin süpüla noonooin sümaa tü namakat na wawalayuu oʼunirakana sukuwaʼipa waʼyataain? (Piirakaa sümüin tü ayaakuaakat).

¹⁵ Sünainjee wanee kasa anoutunaka akuwaʼipa chaa Perú wayaawateerü aaʼu jamüin anaka woonoole sümaa tü anoutunakalü akuwaʼipa sünain tü waʼyataainkat nümüin Maleiwa. Wainma anüikii aashajaanaka chaa Perú, maʼaka saaʼin tü anüikiikat quechua. Jamüshiijaʼa na wawalayuukana chaʼayaa nachajawalin na wayuu aashajaakana quechua süpüla naküjain pütchi namüin. Eeʼiratünapejeʼe sukuwaʼipa tia natuma na wawalayuukana süpüla noonooin sümaa tü namakat na süʼlaülashiikana tia mmakat (Roma. 13:1). «¿Jameetche sukuwaʼipa süpüla wantüin nanain na wayuu aashajaakana quechua?», müshii naya. Sutuma noonooin na wawalayuukana sümaa tü aluwataanakalü anain naya nanta anain wainma wayuu aashajaakana quechua. Nayaawataka saaʼu niain Jehová oʼuniraka sukuwaʼipa tia.

¹⁶ Wainmajüsü naaʼin wanee laülaashi Kevin nünülia sünain tü kasa aluwataanakat anain naya. Müshi nia: «¿Jameetche sukuwaʼipa süpüla wantüin nanainmüin na wayuu aashajaakana quechua? Jülüjaka taaʼin tü sümakat Proverbios 3:5 otta jülüjasü taaʼin tü nukuwaʼipakat Moisés. Eesüjaʼa nnojorüle niyaawatüin saaʼu Moisés jamüin nuʼunirüinjanaka na israelitakana sotpaʼamüin tü Palaa Ishosükat, jama malatüjüin tü Palaakat jee neʼrüin na egipciokana nachiiruajee. Sutuma noonooin Moisés sümaa tü nuluwataakat anain Jehová, niʼrüin tü kasa pülasü naainjakat Jehová napüleerua na israelitakana» (Éx. 14:1, 2, 9-11, 21, 22). Oonooshi Kevin sümaa tü namakat na wawalayuukana. Anuu nünüiki: «Anasü maʼin wakuwaʼipa sünain aküjaa pütchi nutuma Jehová. Jamüsüjaʼa paala warai mapuʼushii waya sünain achajawaa nachiki na wayuu aashajaakana quechua. Eeshii wantüle nünain waneeshii jee piamashii wayuu aashajaakana tia anüikiikat. Shiasaʼa maaʼulu yaa aküjashii waya pütchi eere wainmain na aashajaakana quechua. Yootushii maʼin waya sümaa wayuu jee kojuyashii na wayuu wouyantakana amaʼanamüin jee na wekirajaakana sünain tü Bibliakat. Akooʼomüinraasiaʼaya na wayuu outkajaakana wamaa. Aneerü wakuwaʼipa woonoole sümaa tü namakat na wawalayuu oʼunirakana sukuwaʼipa waʼyataain».

17. ¿Kasa pütüjaka sünainjee tü wekirajaaitpakalü anain?

¹⁷ Wekirajaaitpaka anain süchiki tü waaʼinrajatkat süpüla woonooin sümaa nünüiki Jehová waneekajatpa tü waʼyataainjatkalü anain, tü wayuu kasaalüinjatkat amaa waya otta sunoutunapa wanee kasa sünain tü waʼyataainkat nümüin Maleiwa. Oonooinjana waya nümüin Jehová sünain süpüshuaʼa kasa, maʼaka saaʼin waneekajatpa tü peliikula wanajüinjatkat, tü washaitüinjatkat jee wekirajaainjatüle suluʼu universidad otta wepijapa wachonnii. Waneekajatpa wanee kasa jülüjainjatü waaʼin tü nuluwataakalü anain waya Jehová, jameerüle wakuwaʼipa nümaa jee jülüjainjatü waaʼin naaʼinmajeenain waya. Müle shia watuma, «pansaajeerü wakuwaʼipa süpüla kaʼikat süpüshuaʼa sümaa nünülia chi Wamaleiwasekai Jehová» (Miq. 4:5).