«Jüneeka jooluʼuleʼeya jaralinjachin jiʼyataain amüin»

1. (1) ¿Kasa waaʼinrajatka süpüla talatüin waaʼin? (2) ¿Jamüsü anakaʼa waaʼinrüle tia? (Isaías 48:17, 18).

AISHII maʼin waya nüpüla chi Washi iipünajachikai. Keeʼireesü maʼin naaʼin talatüin waaʼin maaʼulu jee mapeena (Ecl. 3:12, 13). Anasü maʼin tü wakumajiakat nutuma, wountuin waaʼinrüin wainma kasa, nnojotpejeʼe nukumajüin wayuu süpüla süʼlaülaajaainjatüin naaʼu na waneinnua otta nnojoishii nukumajüin naya süpüla noʼunirajatüin nakuwaʼipa namüiwaʼa (Ecl. 8:9; Jer. 10:23). Nütüjaa aaʼulu Jehová talateerüin naaʼin wanee wayuu niʼyataale nümüin jee noonoole sümaa nünüiki (paashajeʼera Isaías 48:17, 18).

2. (1) ¿Kasa nunoujireeka anain waya Satanás? (2) ¿Kasa naainjaka Jehová süpüla sütüjaain aaʼu wayuu nnojoluin shiimain tü nümakat Satanás?

² Keeʼireesü naaʼin Satanás wanoujain sünain nnojolin choʼujaain wamüin Jehová süpüla talatüinjanain waya jee aneerüin wakuwaʼipa woʼunirüle neʼe wakuwaʼipa wamüiwaʼa (Gén. 3:4, 5). Süpüla sütüjaain aaʼu wayuu nnojolin shiimain tü nümakat Satanás nuuʼulaain Jehová noʼunirüin na wayuukana nakuwaʼipa namüiwaʼa. Sutumajee tia weʼrüin nnojoluin anain nakuwaʼipa. Aküjünüsü suluʼu tü Bibliakat nachiki wainma wayuu talatakana maʼin aaʼin sünain aʼyatawaa nümüin Jehová maʼaka naaʼin Jesucristo. Wekirajaajeerü anain jamüin nüneekaka Jesús aʼyatawaa nümüin Jehová otta müsia wekirajaajeerü anain jamüin niakaʼa Jehová waʼwaajüinjachin maʼin jee soteerü waaʼin kasain waneekaka anainjee waʼyataain nümüin Jehová.

¿JAMÜSÜ NÜNEEKAKAʼA JESÚS AʼYATAWAA NÜMÜIN JEHOVÁ?

3. (1) ¿Kasa ooʼulakünaka aka naaʼin Jesús nutuma Satanás? (2) ¿Kasa nüneekaka Jesús?

³ Yaaiwaʼaya Jesús saaʼu tü mmakat nüneeküin jaralin niʼyataainjachin amüin. Süchikijee woutiisain Jesús ooʼulaküna aaʼinchi nia nutuma Satanás. Nüküjain nümüin naapajatüin süpüshuaʼa suumain wayuu sümaʼaleeya süwashirüin müleka nuʼwaajüle nia. «Nusoutakalaka Jesús niʼipajee: ‹¡Puʼuna yaajee toulia Satanás! Nia puʼwaajüinjachika Jehová nümüiwaʼa, nia Pümaleiwaseka otta nia piʼyataainjachika amüin›» (Mat. 4:8-10). Anashii wekirajaale süchiki jamüin nüneekaka Jesús tia.

4, 5. ¿Jamüsü nüneekakaʼa Jesús niʼyataain nümüin Jehová?

⁴ Nüneeküin Jesús niʼyataain nümüin Jehová süka alin nia nüpüla süka süpüshuaʼa naaʼin (Juan 14:31). Aʼyataashi Jesús nümüin Jehová süka shiain tü nüchekakat nüpüleerua (Juan 8:28, 29; Apoc. 4:11). Nütüjaa aaʼu niain chi aapakai kataa oʼu wamüin otta kamaneeshi maʼin nia müshijeseʼe kanoulain maʼin nia nünain (Sal. 33:4; 36:9; Sant. 1:17). Kanoulashi maʼin Jesús sükajee lotuin maʼin nukuwaʼipa chi Nüshikai. Nütüjaa aaʼulu niain aapaka süpüshuaʼa tü kasa choʼujaakat nümüin (Juan 1:14). Nia kasitka Satanás eein tü outaakat saaʼu tü mmakat. Nia kanainjeejachikaʼaya tü alawaakat otta jülüjasü naaʼin nukuwaʼipa nümüiwaʼa (Juan 8:44). Sutuma niʼraajüin maʼin Jesús nukuwaʼipa Jehová otta nukuwaʼipa Satanás nnojotsü antapünaain suluʼu nikii nüshatüinjatüin nukuwaʼipa Satanás jee nüʼlaülaajaain nuulia Jehová (Filip. 2:5-8).

⁵ Nüneeküinña Jesús aʼyatawaa nümüin Jehová süka jülüjain naaʼin tü kasa anasü eejeetkat sünainjee oonooin nia waneepia nümaa Jehová (Heb. 12:2). Nütüjaa aaʼulu Jesús kojuteechin atumaa chi Nüshikai jee najaʼlajeʼerüinjatüin tü kasa numojujakat Satanás müleka ayatüle noonooin waneepia nümaa chi Nüshikai.

¿JAMÜSHI NIAKAʼA WAʼWAAJÜINJACHIN JEHOVÁ?

6, 7. (1) ¿Jamüshii nnojoliikaʼa aʼyataain nümüin Jehová watta naalii wayuu? (2) ¿Jamüshi niakaʼa waʼwaajüinjachin Jehová?

⁶ Maaʼulu yaa wainma na wayuu nnojoliikana aʼyataain nümüin Jehová süka nnojoluin neʼraajüin nukuwaʼipa jee nnojotsü natüjaain aaʼu tü naaʼinrakat napüleerua. Majatü nakuwaʼipa na wayuu nüküjaka namüin pütchi Pablo chayaa Atenas (Aluw. 17:19, 20, 30, 34).

⁷ Nüküjain Pablo namüin naya wayuukana niain Maleiwa «kataka atuma soʼu wayuu, nia asanatka atuma saaʼin jee naapüin kasa süpüshuaʼa sümüin. Nünainjee waneeshia wayuu, nukumajüin Maleiwa napüshuaʼa na wayuukana». Wayaawata aaʼu sükajee tia, niain neʼe waʼwaajüinjachika Jehová süka niain chi Kakumalakai waya (Aluw. 17:25, 26, 28).

8. ¿Kasa tü nnojoleetkat naaʼinrüin Jehová?

⁸ Nüpüleeruasüjeʼe saaʼin Jehová wayuu süpüla shiʼyataainjatüin nümüin, jama niain joo chi Kakumalakai naya jee niain Miyoʼushikai saaʼu kasa süpüshuaʼa. Nnojotpejeʼe naaʼinrüin tia. Keeʼireesü naaʼin Jehová aleewain na wayuukana nümaa, müsüjeseʼe naaʼinrüin wainma kasa wapüleerua süpüla wayaawatüin saaʼu eein nia otta alin waya nüpüla (1 Tim. 2:3, 4). Nikirajüin waya Jehová süpüla wekirajüinjanain na wayuukana süchiki tü kasa anasü naaʼinrüinjatkat napüleerua otta waküjain namüin jamüinjatüin sukuwaʼipa nutuma (Mat. 10:11-13; 28:19, 20). Jee müsia naapüin Jehová wamüin na wawalayuukana, namaa na laülaashiikana suluʼu tü outkajaaleekat süpüla naaʼinmajüin waya sümaa alin waya napüla (Aluw. 20:28).

9. ¿Jamüsü watüjaakaʼa saaʼu alin nüpüla Jehová wayuu?

⁹ Aishii nüpüla Jehová na wayuukana sükajee naapüin kasa anasü namüin jaʼitainna wayuuin manoujain naya nünain. Mayaainjeʼe kakaliainnain na wayuukana sünain naneeküin tü keeʼireekat naaʼin namüiwaʼa naapüin Jehová süpüshuaʼa tü kasa choʼujaakat namüin süpüla talatüinjatüin naaʼin, jama niain wanee Maleiwa anamia (Mat. 5:44, 45; Aluw. 14:16, 17). Süka kamaneein maʼin chi Maleiwakai sümüin wayuu eeshii süpüla kachooin naya, kaʼaleewain naya otta neʼrüin kasa anasü sükajee tü naʼyataainkat (Sal. 127:3; Ecl. 2:24). Sükajee tia wayaawata aaʼulu aishaatain waya nüpüla Jehová (Éx. 34:6). Anashii wekirajaale sünain kasain waʼyataain anainjee nümüin Jehová otta süchiki tü kasa anasü weʼrakat nutuma.

¿KASA TÜ WAʼYATAAKALÜ ANAINJEE NÜMÜIN JEHOVÁ?

10. (1) ¿Kasa tü waʼyataakalü anainjee nümüin Jehová? (Mateo 22:37). (2) ¿Jamüsü anakaʼa pukuwaʼipa süka pütüjaain saaʼu nnojolin naashichijaamaatüin Jehová? (Salmo 103:13, 14).

¹⁰ Aʼyataashii waya nümüin Jehová süka alin maʼin nia wapüla maʼaka naaʼinrüin shia Jesús (paashajeʼera Mateo 22:37). Arütkaajeena maʼin waya nünainmüin Jehová sükajee weʼraajüin tü nukuwaʼipakat. Jamüshijaʼa nia nnojoishi niain wanee Maleiwa aashichijaamaatakai. Jamüsüjaʼa wanaa sümaa moonooin na israelitakana nümüin, nuchuntuin namüin nouyantaainjanain suulia tü kasa mojusü naaʼinrakat (Jer. 18:11). Nütüjaa aaʼulu Jehová sümamülain waya mma (paashajeʼera Salmo 103:13, 14). Jülüjapa waaʼin nnojolin niain wanee Maleiwa kaashichijaarai otta anain maʼin tü nukuwaʼipakat keeʼireejeerü waaʼin waʼyataain nümüin waneepia.

11. ¿Kasa tü waʼyataakalü anainjee nümüin Jehová?

¹¹ Aʼyataashii waya nümüin Jehová süka watüjaain saaʼu shiain tü nüchekakat wapüleerua (Mat. 4:10). Anuu waneirua kasa anasü weʼreetka woonoole waneepia nümüin Jehová: kojuteechi nia atumawaa, sütüjaajeerü aaʼu wayuu alaain Satanás otta talateechi Jehová watuma. Waneeküle aʼyatawaa nümüin Jehová maaʼulu kateerü woʼu süpüla kaʼikat süpüshuaʼa (Juan 17:3).

12, 13. ¿Kasa watüjaka sünainjee sukuwaʼipa Jane otta Yésica?

¹² Eeshi süpüla alin Jehová napüla na tepichikana otta eesü süpüla ayatüin alin nia napüla miyoʼuyuupa naya. Jülüjataa waaʼin sukuwaʼipa piamasü wawalayuu Jane otta Yésica nanülia.a Poloo waneemüin suuyase wanee otta tü wane poloo suuyase wanaa sümaa nekirajünüin sünain tü Bibliakat. Mayaainjeʼe nnojoluin nekirajaain sünain tü Bibliakat na kachonniikana naya nooʼulaain naya nekirajaain sünain tü Bibliakat shiajaʼa neʼe ayatüinjanain naya oʼunuin namaa suluʼu tü iküleesiakat noʼunawaika aluʼu. Müsü sünüiki Jane: «Jalouisü tamüin tü nekirajakalü anain taya na Aküjaliikana pütchi süka nnojoluin taaʼinrüin tü kasa mojusü naaʼinrakat na koleejiakana tamaa maʼaka saaʼin akaijaa otta aʼluwajirawaa akuwaʼipa».

¹³ Shiasaʼa miyoʼuyuupa naya aküjaliishii naya pütchi. Maʼaka jeʼra juya süchikijee, pürekutsootshii naya otta aaʼinmajünajana na kachooinkana naya natuma sükajee laülaayuuinnapain naya. Süküjain Jane süchiki jamüin saaʼin sükajee tü kasa anasü naainjakat Jehová süpüleerua. Anuu sünüiki: «Tayaawata aaʼulu naaʼinmajüin Jehová na naʼaleewainkana maʼaka süküjain 2 Timoteo 2:19: ‹Niʼraajüin Jehová na wayuu aʼyataakana nümüin›». Naaʼinmajüin Jehová na aʼyataakana nümüin otta na aikana apüla nia.

14. ¿Kasa waaʼinrajatka süpüla kojutuin watuma Jehová? (Piirakaa sümüin tü ayaakuaakat).

¹⁴ Kojuteein watuma Jehová. Jülüjataa waaʼin eein wanee waʼaleewain anamiakai maʼin, kamaneekai otta amüliajüikai. Shiasaʼa soʼu wanee kaʼi paapüin pütchi mojuluʼut nüchiki, süchiki mojulaain nia otta nüküjalain naʼalain. Asoutamaateechi pia naaʼu. Müsüjaʼa neʼe nukuwaʼipa Jehová. Saashajaanüle alawaa nüchiki asoutamaateena waya naaʼu jee waküjeerü tü shiimainkat nüchiki (Sal. 34:1; Is. 43:10). Sütüjaajeerü aaʼu wayuu waʼyataain nümüin Jehová süka süpüshuaʼa waaʼin sükajee tü wamakat otta sükajee tü wakuwaʼipakat.

15. ¿Kasa anasü niʼraka chi aluwataaushikai Pablo sutuma nüneeküin aʼyatawaa nümüin Jehová? (Filipos 3:7, 8).

¹⁵ Wooʼulaain wainma kasa süpüleerua waaʼinrüin tü talatakalü atuma naaʼin Jehová otta wakooʼomüinrüin tü waʼyataainkat nümüin. Shia tü naaʼinrakat chi aluwataaushikai Pablo. Niyouta achikit niain wanee wayuu kojutushi süpüla nuushikajaain süchiirua nukuwaʼipa Cristo otta niʼyataain nümüin Jehová (Gal. 1:14). Sutumajee tia talatüsü maʼin naaʼin otta eeichipa süpüla nuluwataain nümaa Cristo chayaa iipünaa. Nnojotsü wainmajüin naaʼin Pablo sünain nüneeküin aʼyatawaa nümüin Jehová. Müshiʼiya wayakana, nnojotsü wainmajüinjatüin waaʼin sünain aʼyatawaa nümüin Jehová (paashajeʼera Filipos 3:7, 8).

16. ¿Kasa watüjaka sünainjee sukuwaʼipa Julia? (Piirakaa sümüin tü ayaakuaakat).

¹⁶ Weʼreerü wainma kasa anasü maaʼulu otta mapeena waaʼinmaale maʼin tü waʼyataainkat nümüin Jehová. Jülüja waaʼin sukuwaʼipa wanee wawala, Julia sünülia. Jintuluiwaʼaya shia eeʼirajaapuʼusü shia suluʼu wanee iküleesia. Süka sütüjain maʼin Julia süpüleerua eeʼirajaa nikirajüin shia wanee wayuu atüjakai süpüleerua eeʼirajaa ópera. Shiasaʼa mapa eʼraajünüsü maʼin shia sutuma wayuu, eeʼirajaapuʼusü shia eere süpülee tü wayuu washinnuukat. Shiasaʼa chayaa eere shikirajaain sünain muusika shiʼraajüin wanee wayuu aküjaka sümüin süchiki nukuwaʼipa Maleiwa otta süchiki Jehováin nünülia Maleiwa. Sünainjee tia ekirajaasü Julia sünain tü Bibliakat piantua soʼu semaanakat. Shiasaʼa mapa suuʼulaaka tü shiʼyataainkat sünain eeʼirajaa süpüla aʼyatawaa nümüin Jehová süka süpüshuaʼa saaʼin, kapüleesü sümüin süneeküin tia. Anuu sünüiki süchiki: «Watta naalii na wayuu aküjakana tamüin nnojoluin kasain saamüin tamüin tü taaʼinrakat süka nnojoluin taaʼinrüin tü tatüjakalü apüleerua. Talatapejeʼe taaʼin süka shiain taneeküin aʼyatawaa nümüin Jehová». Mayaainjeʼe sülatüin 30 juya süchikijee süneeküin Julia tia, talatüsü maʼin saaʼin süka sütüjaain aaʼu nikeraajeerüin Jehová süpüshuaʼa tü kasa suchuntakat saaʼin (Sal. 145:16).

AYATA PIA SÜNAIN AʼYATAWAA NÜMÜIN JEHOVÁ

17. (1) ¿Kasa weʼreetka sutuma sülüʼülüin sükalia süpüla sajaʼttüin tü kasa alatakat sainküin mma? (2) ¿Jamüsü choʼujaakaʼa naʼyataain nümüin Jehová na nnojoyüliikana aʼyataain nümüin?

¹⁷ Alüʼütsü maʼin süpüla sajaʼttüin tü kasa alatakat sainküin mma. Anuu tü nüshajakat chi aluwataaushikai Pablo: «‹Soʼu palit kaʼi›, ‹semaateechi chi antajachikai anülia, nnojoleechi kamaʼain nia›» (Heb. 10:37). Sutuma tia wayaawata aaʼulu apütaain palit kaʼi süpüla naneeküin na wayuukana aʼyatawaa nümüin Jehová (1 Cor. 7:29). Watüjaa aaʼulu weʼreerüin müliaa sutuma waʼyataain nümüin Jehová, watüjaapejeʼe saaʼu motsoʼojeerüin sümaʼa tia.

18. ¿Kasa tü anakat süpüla waaʼinrüin naashin Jehová otta Jesús?

¹⁸ Nikirajüin Jesús na wayuukana süpüla noushikajaainjanain süchiirua nukuwaʼipa otta süpüla ayatüinjatüin shia naaʼinrüin (Mat. 16:24). Kakaliainnale waya sünain tü aʼyatawaakat nümüin Jehová ayata waaʼinrüin shia. Mayaainjeʼe eejeerüin kaʼi kapüleejeetka oʼu wamüin waʼyataain nümüin Jehová talateerü maʼin waaʼin otta weʼreerü kasa anasü nutuma Jehová (Sal. 35:27).

19. ¿Kasa watüjaka sünainjee nukuwaʼipa Gene?

¹⁹ Eeshii waneinnua wayuu jülüjakana aaʼin nnojoluin süpüla talatüin naaʼin wanee wayuu niʼyataale nümüin Jehová. Sutuma jimaʼalin pia otta majayülüin pia, ¿jülüjasüche paaʼin nnojoleerüin talatüin paaʼin sutuma piʼyataain nümüin Maleiwa? Anuu nünüiki wanee jimaʼai, Gene nünülia: «Jülüjapuʼusü taaʼin wainmain tü kasa apülajünakat noulia na aküjaliikana pütchi nüchiki Jehová. Jülüjapuʼusü taaʼin anain maʼin nakuwaʼipa na wane jimaʼaliikana toulia süka eein süpüla noʼunuin sünain miʼiraa, neʼraajüin wainmain jieyuu otta nashaitüin videojuegos eere sütkaain wayuu. Eekajasaʼa tayakai shia neʼe toutkajaainjachin sümaa taküjain pütchi». ¿Kasa alataka nümüin Gene sutuma jülüjain naaʼin tia? Anuu nünüiki: «Taaʼinraka tü kasa mojusü naaʼinrakat na wane jimaʼaliikana. Kamalainsü tamüin tü taaʼinrakat nnojotpejeʼe talatüin maʼin taaʼin sutuma. Jülüjaka taaʼin aneerüin takuwaʼipa müleka toonoole sümaa tü sümakat tü Bibliakat. Müsüjeseʼe shiaka taneeküin taʼyataain maʼin nümüin Jehová. Soʼujeʼereeya tia tayaawata aaʼulu naapüin Jehová süpüshuaʼa tü tachuntakat nümüin».

20. ¿Kasa waaʼinrajatka maʼaka naaʼin Josué?

²⁰ Anuuka niiʼirain wanee salmista nümüin Jehová: «Anataʼaleeshijaʼa chi wayuu püneekakai süpüla chain nia suluʼu püpaatiase» (Sal. 65:4). Anasü müle wanüiki maʼaka nünüiki Josué: «Aluʼusaʼa tayakai sümaa tapüshi, aʼyataajeena waya nümüin Jehová» (Jos. 24:15).