EKIRAJAAYA 15
JAYEECHI 30 Tashikai, taʼaleewain, Tamaleiwase
Aneerü wakuwaʼipa aleewale maʼin waya nümaa Jehová
«Anasü takuwaʼipa sutuma tarütkaain nünainmüin Maleiwa» (SAL. 73:28).
TÜ WATÜJEETKAT
Tü waaʼinrajatkat süpüla aleewain maʼin waya nümaa Jehová otta tü kasa anasü weʼrakat sünainjee tia.
1, 2. (1) ¿Kasa waaʼinrajatka süpüla waʼaleewain wanee wayuu? (2) ¿Kasa wekirajaajeerü anain sünain ekirajaayakat tüü?
¿KASA waaʼinrajatka süpüla waʼaleewain maʼin wanee wayuu? Alatirüinjana kaʼi waya nümaa, weʼraajüinjatü nukuwaʼipa jee tü kasa kamalainkat nümüin. Washateein tü kasa anasü naaʼinrakat. Sülatapa maʼin kaʼi, kooʼomüinsü tü naalinkat wapüla.
2 Süpüla waʼaleewainjachin wanee wayuu alatirajana kaʼi waya nümaa otta waaʼinrüinjatü kasa nüpüleerua. Müsia neʼe sukuwaʼipa aleeweere waya nümaa Jehová. Sünain ekirajaayakat tüü, wekirajaajeerü anain tü waaʼinrajatkat süpüla aleewain waya nümaa Maleiwa otta tü kasa anasü weʼreetkat sünainjee. Wekirajaajeerü anain jamüin anaka warütkaale nünainmüin Jehová, chi waʼaleewainkai.
3. ¿Jamüsü anakaʼa jülüjale waaʼin tü kasa anasü eekat sünainjee aleewain waya nümaa Jehová? Püküja wanee sukuwaʼipa.
3 Anasü jülüjüle waaʼin jamüin aneetka wakuwaʼipa aleewale waya nümaa Jehová (Sal. 63:6-8). Aneere wanee wayuu, anainjatü niküin, asüinjachi nia wüin, aainjainjachi nia ejercicio otta eemeraainjachin maʼin nia. Wainma na wayuu nnojoliikana aainjüin tia, müsüjeseʼe ayuulin naya. Mapülejeerü nümüin wanee wayuu anain niküin, naainjüin ejercicio müleka jülüjüle naaʼin tü kasa anasü eekat sünainjee. Müsia neʼe wakuwaʼipa nümaa Jehová, süpüla aleewainjanain maʼin waya nümaa jülüjainjatü waaʼin tü kasa anasü eekat sünainjee (Sal. 119:27-30).
4. ¿Kasa nüküjaka chi salmistakai suluʼu Salmo 73:28?
4 (Paashajeʼera Salmo 73:28). Chi ashajakai Salmo 73 nülüin nia Leví otta eeʼirajüi nia suluʼu tü aʼwaajüleekat. Mayaainjeʼe kakaliain nia sünain aʼyatawaa nümüin Jehová, niyaawata aaʼu jülüjainjatüin naaʼin wanee wayuu tü kasa anasü eekat sünainjee aleewaa nümaa Jehová. Müsüjeseʼe nüküjain namüin na waneinnua jamüin aneetka nakuwaʼipa aleewale naya nümaa Jehová. Anashii wekirajaale süchiki tia.
TALATEERÜ WAAʼIN ALEEWALE WAYA NÜMAA JEHOVÁ
5. (1) ¿Jamüshii talateenakaʼa maʼin waya aleewale waya nümaa Jehová? (2) ¿Jamüsü aneetkaʼa pukuwaʼipa sutuma tü kasa nikirajakalü anain pia Jehová? (Proverbios 2:6-16).
5 Talateerü maʼin waaʼin aleewale waya nümaa Jehová (Sal. 65:4). Wainma tü kasa talatakalü atuma waaʼin, jamüsüjaʼa woonoole sümaa tü Nünüikikat Maleiwa aneerü wakuwaʼipa. Nikirajüin waya Jehová süpüla nnojoluinjatüin mojuin wakuwaʼipa otta suulia waaʼinrüin kasa mojusü (paashajeʼera Proverbios 2:6-16). Anuujeseʼe sünüiki tü Bibliakat: «Anataʼaleeshijaʼa chi wayuu kekiikai maʼin otta chi ountakai ayaawataa saaʼu wanee kasa» (Prov. 3:13).
6. ¿Jamüsü sümalajaakaʼa naaʼin chi salmistakai?
6 Mayaapejeʼe anain nakuwaʼipa na aleewakana nümaa Jehová eejeerü kaʼi mojeetkalü oʼu naaʼin. Chi wayuu ashajakai Salmo 73 nnojotsü talatüin naaʼin sutuma shiain jülüjain naaʼin anain nakuwaʼipa na wayuu mojulaakana, na moonooinkana sümüin nünüiki Maleiwa jee achunjasü naaʼin naaʼujee. Saaʼin nümüin anakuwaʼipashii na wayuu yaletakana aaʼin jee na mojulaakana, nnojoliishii naya ayuulin, washitshii naya otta nnojoishii müliain naya naashin. Nnojotpejeʼe shiimain tia (Sal. 73:3-7, 12). Amalajaasü naaʼin sutuma amülaain neʼe niʼyataain nümüin Maleiwa naaʼinruʼu. Anuujeseʼe nünüiki sutumajee mojuin maʼin naaʼin: «Amülashi neʼe taya wulejüin aaʼin otta maainjalajüin neʼe» (Sal. 73:13).
7. Mojule waaʼin, ¿kasa waaʼinrajatka süpüla talatüin waaʼin wachikuaʼa? (Piirakaa sümüin tü ayaakuaakat).
7 Mayaainjeʼe mojuin maʼin naaʼin chi salmistakai, eesü tü kasa naainjakat süpüla anain naaʼin. Sutumajee nikerotuin suluʼumüin tü aʼwaajüleekat Maleiwa, nükaalinjain nia Jehová süpüla nunouteʼerüin tü jülüjakat naaʼin (Sal. 73:17-19). Nütüja aaʼulu Jehová jamüin waaʼin süka naʼaleewain waya. Mojule waaʼin wachunta nümüin Jehová süpüla watüjaainjatüin saaʼu kasain waaʼinrüinjatüin. Mojule waaʼin katchinjeerü waaʼin sutuma tü pütchi sümakat tü Bibliakat otta sutuma natütüleʼerüin waaʼin na wawalayuukana (Sal. 94:19).a
Chi levita ashajakai Salmo 73 soʼuluʼushi nia tü aʼwaajüleekat Maleiwa (paashajeʼera tü pütchikat 7).
ANEERÜ WAKUWAʼIPA MAAʼULU OTTA MAPEENA ALEEWALE WAYA NÜMAA JEHOVÁ
8. ¿Jameerü wakuwaʼipa aleewale maʼin waya nümaa Jehová?
8 Sutuma aleewain maʼin waya nümaa Jehová anasü wakuwaʼipa maaʼulu jee talatüsü maʼin waaʼin sutuma watüjaain saaʼu tü kasa anasü eejeetkat mapeena (Jer. 29:11). Anashii wekirajaale süchiki tia.
9. ¿Jamüsü talatakaʼa waaʼin aleewale waya nümaa Jehová?
9 Talatüshii maʼin waya sutuma aleewain maʼin waya nümaa Jehová. Maaʼulu yaa wainma na wayuu manoujainkana nünain Maleiwa, müsüjeseʼe nnojoluin talatüin naaʼin. Shia nanoujaka anain najaʼlajeʼenain na wayuukana saaʼujee tü mmakat. Sutuma wekirajaain maʼin sünain tü Bibliakat, wayaawata aaʼu «shiimain eein chi Maleiwakai otta naapüin kasa anasü namüin na wayuu achajaakana maʼin nüchiki» (Heb. 11:6). Nukumajüin waya Jehová süpüla waaʼinrüin tü nümakat wamüin, müsüjeseʼe talatüin waaʼin waʼyataale nümüin (Deut. 10:12, 13).
10. Saashin Salmo 37:29, ¿kasa anasü neʼreetka na kanoulakana nünain Jehová?
10 Wainma na wayuu aʼyataakana neʼe, epijakana nachonnii otta anaajakana nneerü süpüla tü kasa choʼujaajeetkat namüin laülaapeena naya. Nnojotsü eein wanee kasa naʼatapajaka talatüinjatkalü atuma naaʼin otta nnojotsü natüjaain aaʼu tü kasa eejeetkat nutuma Maleiwa mapeena. Aluʼujasaʼa wayakana watüjaa aaʼulu naapeerüin kasa anasü Jehová namüin na aʼyataakana nümüin (Sal. 25:3-5; 1 Tim. 6:17). Kanoulashii waya nünain chi Maleiwa waʼaleewainkai otta watüjaa aaʼulu nikeraajeerüin tü nümakat. Watta saalii tü kasa anasü weʼreetkat nutuma Maleiwa otta waʼwaajeechi nia süpüla kaʼikat süpüshuaʼa (paashajeʼera Salmo 37:29).
11. 1 ¿Kasa anasü eeka sutuma aleewain waya nümaa Jehová (2) ¿Jamüsü naaʼin Jehová sutuma tia?
11 Eesia waneirua kasa anasü eeka sutuma aleewain waya nümaa Jehová. Wanee shia moteerüin naaʼin Jehová tü waainjalakat wayaawajaale suulia (Is. 1:18). Sutumajee tia nnojoleerü mojuin maʼin waaʼin sutuma tü kasa mojusü waainjapuʼukat (Sal. 32:1-5). Otta müsia anasü waaʼin sutuma talatüin naaʼin Jehová watuma (Prov. 23:15). Watta saalii tü kasa anasü weʼrakat sutuma aleewain waya nümaa Jehová. Anashii wekirajaale süchiki kasain waaʼinrüinjatüin süpüla aleewain maʼin waya nümaa Jehová.
TÜ WAAʼINRAJATKAT SÜPÜLA ALEEWAIN MAʼIN WAYA NÜMAA JEHOVÁ
12. ¿Kasa paaʼinraka süpüla aleewain maʼin pia nümaa Jehová?
12 Wainma tü kasa waaʼinrakat süpüla kettaain waya süpüla woutiisaa jee süpüla aleewain maʼin waya nümaa Jehová. Ekirajaashii maʼin waya süchiki nukuwaʼipa Jehová otta Jesucristo, ayaawajaashii waya suulia tü kasa nnojotkalü anain watuma, akatchinraasü maʼin tü wanoulakat otta oonooshii waya sümaa tü nümakat Jehová wamüin. Süpüla aleewain maʼin waya nümaa Jehová ayatüinjatü waaʼinrüin tia (Col. 2:6).
13. Püküja tü apünüinsü kasa waaʼinrajatkat süpüla aleewainjanain waya nümaa Jehová.
13 Apünüinsü kasa waaʼinrüinjatka süpüla aleewain maʼin waya nümaa Jehová. Tü palajatkat shia: Waashajeʼerüinjatü otta wekirajaainjatü maʼin anain tü Bibliakat. Nnojotsü shiain neʼe wekirajaainjatü anain tü Bibliakat süpüla watüjaainjatüin aaʼu kasa nüchiki Maleiwa, wekirajaainjatü anain shia süpüla wayaawatüin saaʼu tü jülüjakat naaʼin, tü nüchekakat wapüleerua otta süpüla waaʼinrüin tü nümakat (Éf. 5:15-17). Tü wane kasa waaʼinrajatkat shia wakatchinrüinjatüin wanoula jülüjale waaʼin süpüshuaʼa tü kasa anasü naaʼinrakat Jehová wapüleerua sutuma alin waya nüpüla. Otta tü chiiruaajatkat shia wayoutajatüin tü kasa mojusü nnojotkalü anain nümüin Jehová otta nnojoishii aleewainjanain waya namaa wayuu aainjakana kasa mojusü (Sal. 1:1; 101:3).
14. ¿Kasa waaʼinrüinjatka süpüla talatüinjatüin naaʼin Jehová watuma? (1 Corinto 10:31; piirakaa sümüin tü ayaakuaakat).
14 (Paashajeʼera 1 Corinto 10:31). Waaʼinrüinjatü maʼin tü talatakalü atuma naaʼin Jehová. Nnojotsü shiain neʼe waküjainjanain pütchi jee woʼunajanain sünain tü outkajawaakat. Süpüshuaʼa tü kasa waaʼinrakat, waaʼinrüinjatü shia süpüla talatüin naaʼin Jehová watuma. Jamüshijaʼa Jehová talatüsü maʼin naaʼin lotule wakuwaʼipa sünain tü kasa waaʼinrakat otta müleka kamaneere maʼin waya sümüin wayuu (2 Cor. 8:21; 9:7). Wane kasa talateetka atuma naaʼin Jehová shia kojutule wamüin tü katakalü oʼu nüsülajaka wamüin. Waaʼinrüin tia wanaa sümaa weisattüin sukuwaʼipa tü wekakat, tü wasakat jee waainjale ejercicio süpüla nnojoluin ayuulin waya. Aijeena maʼin waya nüpüla Jehová waaʼinrüle süpüshuaʼa tü kasa talatakalü atuma naaʼin (Luc. 16:10).
Talateerü naaʼin Jehová watuma müleka nnojorüle maaʼinyaain waaʼin woʼunirapa weʼejena, anale tü kasa wekakat, waainjale ejercicio suulia ayuulin waya otta kamaneere waya sümüin wayuu. (Paashajeʼera tü pütchikat 14).
15. ¿Jeʼtsüinjatü wakuwaʼipa sümüin wayuu naashin Jehová?
15 Kamaneeshi maʼin Jehová sümüin wayuu lotokalü akuwaʼipa jee tü nnojotkat lotuin akuwaʼipa (Mat. 5:45). Müinjatü wakuwaʼipa maʼaka nukuwaʼipa Jehová. Nnojotsü mojuinjatüin wanüiki süchiki wayuu, nnojoishii katkaaraliinjanain waya, anamiainjanain waya waneepia sümüin wayuu (Tito 3:2). Müsüjeseʼe nnojoluin jülüjain waaʼin kojutuleein waya noulia na wayuu nnojoliikana anoujain wanaa namaa (2 Tim. 2:23-25). Kamaneere maʼin waya sümüin wayuu aleeweena maʼin waya nümaa Jehová.
AYATAʼAYA ALEEWAIN WAYA NÜMAA JEHOVÁ MAYAAINJEʼE MOJUIN WATUMA WANEE KASA
16. ¿Jamüsü naaʼin chi ashajakai Salmo 73 sutumajee nnojoluin anain nutuma tü kasa naainjakat?
16 Eesü kaʼi jülüjakalü oʼu waaʼin nnojoluin aleewain maʼin waya nümaa Jehová sutumajee tü kasa nnojotkalü anain watuma. Jülüjataa waaʼin tü kasa alatakat nümüin chi ashajakai Salmo 73. Anuu nünüiki sümaa mojuin naaʼin: «Akaajasaʼa tayakai, ojunujaataairüjeʼe tü tooʼuikat, asiranajaataairüjeʼe shia» (Sal. 73:2). Nüküjain jashichikuʼu müin nia jee mayaawajaainpuʼusai saaʼu nukuwaʼipa. Maaʼatshi neʼe nia naashin maʼaka saaʼin wanee wüchii nnojotka kasain sütüjaain aaʼu (Sal. 73:21, 22). Eesüjaʼa süpüla jülüjain naaʼin chi salmistakai nnojoleerüin motuin naaʼin Jehová tü naainjalakat otta nnojoleechin alin nia nüpüla Jehová.
17. (1) ¿Kasa naaʼinraka chi salmistakai mojupa maʼin naaʼin? (2) ¿Kasa watüjaka sünainjee tü alatakat nümüin? (Piirakaa sümüin tü ayaakuaakat).
17 Eesüjaʼa jülüjapünaale naaʼin chi salmistakai nnojoleechin aleeweein sooʼomüin Jehová nümaa. Aʼwanajaasü mapa tü jülüjakat naaʼin. Shiasaʼa mojupa maʼin naaʼin niyaawata aaʼu nürütkaainjachin nünainmüin Jehová. Anuujeseʼe nünüiki: «Eekajasaʼa maaʼulu pümaashi taya waneepia, pajattüin taya süka tü tajapü tekiakat. Puʼunirüin takuwaʼipa sükajee tü pümakat tamüin. Mapa, teʼreerü paʼanasiain» (Sal. 73:23, 24). Mojule waaʼin sutuma tü kasa mojusü waainjakat otta sümalajaweere wanoula wachunta nümüin Jehová nükaalinjain waya (Sal. 73:26; 94:18). Jaʼitairü mojuin maʼin tü waainjalakat eeshii süpüla waleʼejüin wachikuaʼa nünainmüin Jehová süka watüjaain saaʼu moteerüin naaʼin tü waainjalakat (Sal. 86:5). Tü waaʼinrajatkat mojupa maʼin waaʼin shia warütkaainjatüin maʼin nünainmüin Jehová (Sal. 103:13, 14).
Matchinre wanoula aleewainjanain maʼin waya nümaa Jehová, nnojoishii waya ooʼulaainjanain suulia oʼuraajaa otta suulia oʼunaa sünain tü outkajawaakat. (Paashajeʼera tü pütchikat 17).
ALEEWA WAYA WANEEPIA NÜMAA JEHOVÁ
18. ¿Jamüshii ayateenakaʼa waya atüjaain süchiki nukuwaʼipa Jehová aleewale maʼin waya nümaa?
18 Eeshii süpüla aleewain waya nümaa Jehová waneepia jee wainma tü kasa watüjeetkat süchiki nukuwaʼipa. Saashin tü Bibliakat sutuma kekiin maʼin Jehová jee nütüjain maʼin nnojotsü ayaawatünüin aaʼu jamüin sukuwaʼipa nutuma süpüshuaʼa tü kasa naainjakat (Roma 11:33).
19. ¿Jamüsü sütütüleʼerakaʼa waaʼin tü sümakat Salmo?
19 Anuu sünüiki Salmo 79:13: «Wayakana aʼyataashiikana pümüin, na makana aka saaʼin anneerü waapeerü analuʼut pümüin waneepia jee waküjeerü namüin wachonnii jee namüin naikeyuu wachonnii sünain puʼwaajünüinjachin». Aleewale pia nümaa Jehová waneepia piʼreerü wainma kasa anasü nutuma. Sutumajee tia meerü pünüiki: «Niapejeʼe ajapuluʼujuin taaʼin Maleiwa, jama müin nia tamüin maʼaka saaʼin wanee ipa miyoʼu. Otta niaʼala neʼe eeka tamaʼana süpüla kaʼikat süpüshuaʼa›» (Sal. 73:26).
JAYEECHI 32 Eeinjana waya nümaa Jehová
a Na wayuu mojuwaikana aaʼin waneepia sümaa shapaain naaʼin choʼujaasü neʼrajeʼerüin nümaa wanee tottoot. Pütüjeere sooʼomüin paashajeʼera tü pütchi ojuʼitakat suluʼu Aapiria Wayuu nuum. 1 soʼu 2023.