Jiakana jimaʼaliikana, jüshata nukuwaʼipa Marcos otta Timoteo

1, 2. ¿Kasache eeka süpüla ataʼülüin nukuwaʼipa Marcos otta Timoteo süpüla nakooʼomüinrüin naʼyataain nümüin Jehová?

JIMAʼAIRE pia eesüjaʼa pükooʼomüinjeere piʼyataain nümüin Jehová otta jaloulin pia namüin na wawalayuukana. Talatüsü waaʼin süka weʼrüin watta naalii jimaʼalii akooʼomüinreekana naʼyataain nümüin Jehová (Sal. 110:3). Eesüjaʼa kapüleere pümüin pukooʼomüinrüin piʼyataain nümüin Jehová jee shiale iseerüin püchiki paaʼinrüin waneirua kasa süka wainmajüin paaʼin saaʼu paaʼinrüin shia. Nnojo mojuin paaʼin saaʼujee tia, alatüsü tia wamüin wapüshuaʼa.

² Alatüsü tia nümüin Marcos otta Timoteo, nnojotpejeʼe wainmajüin naaʼin saaʼujee iseerüin nachiki naaʼinrüin wanee kasa otta nakooʼomüinrüin naʼyataain nümüin Jehová. Süpülapünaa nuunejaanüin Marcos nutuma chi aluwataaushikai Pablo otta Bernabé süpüla nuʼunuin namaa sünain aküjaa pütchi eeshijaʼa kepiapuʼule nia sümaa tü niikat (Aluw. 12:12, 13, 25). Mayaainjeʼe müin tia, nüpütüin Marcos nipia jee nüpüshi süpüla nukooʼomüinrüin niʼyataain nümüin Jehová. Oʼunushi nia palajana Antioquíamüin jee nuʼunaka mapa nümaa Pablo otta Bernabé suluʼu waneirua mma naatajannuu (Aluw. 13:1-5). Wanaa sümaa nuunejaanüin Timoteo nutuma Pablo süpüla nuʼunuin nümaa sünain aküjaa pütchi eeshijaʼa kepiapuʼule Timoteo namaa na kachooinkana nia. Eesüjaʼa jülüjale naaʼin Timoteo nnojoluin keraain nia süpüla tia aʼyatawaakat süka jintüiyülin nia (anasü paashajeʼerüle 1 Corinto 16:10, 11 otta 1 Timoteo 4:12). Oʼunapajeʼe nia nümaa Pablo jee niʼraka wainma kasa anasü suluʼujee tia (Aluw. 16:3-5).

3. (1) ¿Jamüsü watüjaakaʼa saaʼu jaloulin maʼin Marcos otta Timoteo nümüin Pablo? (2 Timoteo 4:6, 9, 11; piirakaa sümüin tü ayaakuaakat). (2) ¿Kasa wekirajaainjatka anain sünain ekirajaayakat tüü?

³ Wainma aʼyatawaa naaʼinraka Marcos otta Timoteo napüleerua na anoujashiikana jimaʼaliiwaʼaya naya. Jalouishii maʼin naya nümüin Pablo. Müshijeseʼe nuunejaain naya süpüla yalain naya nümaa sülüʼülaapa sükalia süpüla nuʼutunajachin aaʼin (paashajeʼera 2 Timoteo 4:6, 9, 11). ¿Jamüshi jalouikaʼa Marcos otta Timoteo nümüin Pablo? ¿Kasa naaʼinrajatka na jimaʼaliikana süpüla nashatüin nakuwaʼipa? ¿Jamüsü anakaʼa naaʼinrüle na jimaʼaliikana tü nümakat Pablo? Anashii wekirajaale sünain tia.

JÜSHATA NUKUWAʼIPA MARCOS, JIʼYATAA NAPÜLEERUA NA WANEINNUA

4, 5. ¿Kasa naaʼinraka Marcos sutuma niʼyataweein napüleerua na waneinnua?

⁴ Saashin wanee karaloʼuta waʼyataainjanale napüleerua na waneinnua shia wakaalinjainjanain naya waneepia jaʼitairü kapüleein shia wamüin. Shia naaʼinraka tia Marcos. Eesüjaʼa mojule naaʼin Marcos wanaa sümaa nnojolin nümaain nia Pablo soʼu tü piantuaka nukua sünain aküjaa pütchi wattapünaa (Aluw. 15:37, 38). ¿Ayüülajaashiche Marcos jee ooʼulaashiche nia suulia akaalinjaa na anoujashiikana? Nnojo, nnojotsü naaʼinrüin tia.

⁵ Oʼunushi Marcos nümaa Bernabé sünain aküjaa pütchi suluʼumüin wanee mma naata. Maʼaka poloo waneemüin juya süchikijee tia, akaalinjünüshi Pablo nutuma Marcos wanaa sümaa chajachin püreesain nia Roma (Filem. 23, 24). Kojutusü maʼin nümüin Pablo tü naaʼinrakat Marcos nüpüleerua, «amülialaasü taaʼin natuma», müshijeseʼe nümüin (Col. 4:10, 11).

6. ¿Jamüsü anakaʼa nukuwaʼipa Marcos saaʼujee naʼaleewajaain amaa wayuu laülaakana aaʼin sünain anoujaa? (Paashajeʼera tü nootakat).

⁶ Anasü nukuwaʼipa Marcos saaʼujee naʼaleewajaain namaa wayuu laülaakana aaʼin sünain anoujaa. Oʼunushi mapa Marcos nümaʼanamüin Pedro wanaa sümaa chajachin nia Babilonia süchikijee chajachin nia nümaa Pablo chaa Roma. Aleewashi maʼin Marcos nümaa Pedro müshijeseʼe müin nia maʼaka naaʼin wanee nüchon nümüin (1 Ped. 5:13). Eesüjaʼa nüküjapuʼule Pedro nümüin Marcos süchiki tü nukuwaʼipapuʼukat Jesús otta tü niʼyataainkat nümüin Maleiwa wanaa sümaa yaajachin nia mmapaʼa. Kakalia mapa, nüshajüin Marcos süchiki nukuwaʼipa Jesús suluʼu tü karaloʼuta nünüliamaajatkat.a

7. ¿Kasa naaʼinraka wanee wawala süpüla nüshatüin nukuwaʼipa Marcos? (Piirakaa sümüin tü ayaakuaakat).

⁷ Naaʼinmaasü Marcos tü niʼyataainkat nümüin Jehová jee aleewashi nia namaa wayuu laülaakana aaʼin sünain anoujaa. ¿Kasa paaʼinrajatka süpüla püshatüin nukuwaʼipa Marcos? Piʼyataale süchiirua wanee aʼyatawaa suluʼu tü outkajaaleekat nnojottaarüle saapünüin pümüin, nnojo pümalajaain aaʼin saalinjee tia. Ayataʼaya püchajaain sukuwaʼipa süpüla piʼyataain nümüin Jehová otta napüleerua na wawalayuukana. Jülüjataa paaʼin nukuwaʼipa Sergiob, laülaashi nia maaʼulu suluʼu tü outkajaaleekat. Jimaʼaliiwaʼaya nia niyoujireʼerapuʼuin nukuwaʼipa namaa na jimaʼaliikana wanaa nümaa. Niʼrapa saapünüin aʼyatawaa namüin na wane jimaʼaliikana nuulialeʼeya niakai jülüja müsü naaʼin nnojoluin kachipünaain nia naaʼin na laülaashiikana. Yootoko nia namaa na laülaashiikana süchiki jamüin naaʼin, naküjaka nümüin anain ayatüle nükaalinjain na waneinnua mayaainjeʼe nnojoluin neʼrüin tü kasa naaʼinrakat. Nükaalinjaka mapa na wawalayuu jaʼapüinnakana, kapüleekana amüin oʼunaa sünain tü outkajawaakat. Anuu nünüiki Sergio: «Tayaawataka aaʼu anain maʼin takaalinjain na waneinnua süka shiain tü talatakalü atuma taaʼin».

JÜSHATA NUKUWAʼIPA TIMOTEO, KACHIPÜNA JAAʼIN NAKUWAʼIPA WANEINNUA

8. ¿Jamüshi nüneekakaʼa Pablo Timoteo süpüla nuʼunuinjachin nümaa sünain aküjaa pütchi? (Filipos 2:19-22).

⁸ Choʼujaashii wayuu yalayalakana aaʼin süpüla noʼunuinjanain nümaa Pablo sünain aküjaa pütchi eejachire müliain nia atumawaa paala. Nüneeküin Silas süka niain wanee wayuu nemiyoʼuse na anoujashiikana (Aluw. 15:22, 40). Niaka nümaain mapa Timoteo. ¿Jamüsüche niakaʼa nüneeküin Timoteo? Shia süka anain pütchi nüchiki (Aluw. 16:1, 2). Otta süka niʼrüin Pablo kachipünaain naaʼin Timoteo nakuwaʼipa na anoujashiikana (paashajeʼera Filipos 2:19-22).

9. ¿Jamüsü watüjaakaʼa saaʼu kachipünaain naaʼin Timoteo nakuwaʼipa na nuwalayuukana?

⁹ Jaʼyasü saaʼu nukuwaʼipa Timoteo kachipünaain naaʼin nakuwaʼipa na anoujashiikana suulialeʼeya nukuwaʼipa nümüiwaʼa. Müshijeseʼe nüneeküin nia Pablo süpüla nülapalaainjachin naaʼu na jekenakana anoujain chaa Berea (Aluw. 17:13, 14). Wainma kasa nütüjaka Timoteo sünainjee nukuwaʼipa Silas wanaa sümaa makatüin nia nümaa chaa Berea. Aluwataanüshi mapa Timoteo nümüiwaʼa süpüla nütütüleʼerüinjatüin naaʼin na anoujashii chakana Tesalónica (1 Tes. 3:2). Sülatapa maʼaka 15 juya süchikijee tia, akooʼomüinraasü maʼin naalin na anoujashiikana nüpüla Timoteo, aʼyalajawaishi nia «namaa na aʼyalajakana» (Roma 12:15; 2 Tim. 1:4). ¿Kasa naaʼinrajatka na jimaʼaliikana süpüla nashatüin nukuwaʼipa Timoteo?

10. ¿Kasa naaʼinraka wanee wawala süpüla kachipünaain naaʼin nakuwaʼipa na waneinnua?

¹⁰ Anuu nüchiki wanee wawala William nünülia. Niʼitaain sünain nukuwaʼipa kachipünaain naaʼin nakuwaʼipa na waneinnua. Kapüleepuʼusü nümüin jimaʼaliiwaʼaya nia yootuin nia namaa na laülaayuuinnakana, nüsaküin neʼe naya chapa nia sünain tü outkajawaakat. Nüküjaka nümüin wanee laülaashi tü naaʼinrajatkat süpüla yootuin nia namaa na laülaayuuinnakana jee anain nüküjale namüin tü kamalainkat nümüin sünainjee nakuwaʼipa otta anain yootule nia namaa süchiki kasa kamalainka namüin. Naaʼinraka tia William. Maaʼulu yaa laülaashi nia napüleerua na wawalayuukana. Anuu nünüiki William: «Mapüleeitpa tamüin yootoo namaa na wawalayuu naatayaa makana ouyase. Talatüsü taaʼin süka tayaawatüitpain saaʼu jamüin naaʼin na wawalayuukana. Sutuma tia mapüleeitpa tamüin akaalinjaa na wawalayuukana».

11. ¿Kasa naaʼinrajatka na jimaʼaliikana süpüla kachipünaain naaʼin nakuwaʼipa na wawalayuukana? (Piirakaa sümüin tü ayaakuaakat).

¹¹ Jiakana jimaʼaliikana, eeshii süpüla kachipünaain jaaʼin nakuwaʼipa na juwalayuukana. Yootoo jia namaa napüshuaʼa na wawalayuukana suluʼu tü outkajaaleekat jaʼitasü jeʼrain maʼin nouyase. Jüsakira jamüin naaʼin otta jülüjachon paaʼin nanüiki. Paaʼinrüle tia piyaawateerü aaʼu tü eekat süpüla pükaalinjain anain naya. Eesüjaʼa pütüjaale saaʼu choʼujaain nakaalinjünüin waneinnua wawalayuu laülaainnakana süpüla natüjainjanain süpüleerua JW Library^® jee shiale choʼujaain suʼunuin wayuu namaa sünain aküjaa pütchi. ¿Eesüche süpüla pükaalinjain naya? Pükaalinjale na waneinnua aneerü pukuwaʼipa napüleerua na wawalayuukana.

¿JAMÜSÜ ANAKAʼA JAAʼINRÜLE TÜ NÜMAKAT PABLO?

12. ¿Kasa naaʼinrajatka na jimaʼaliikana süpüla jaloulin namüin tü nüshajakat Pablo nümüin Timoteo?

¹² Aishi maʼin Timoteo nüpüla Pablo müshijeseʼe nikirajüin nia süpüla anain nukuwaʼipa jee anain nutuma tü niʼyataainkat nümüin Jehová (1 Tim. 1:18; 2 Tim. 4:5). ¿Kasa paaʼinrajatka süpüla jaloulin pümüin tü nüshajakat Pablo nümüin Timoteo? Anasü paashajeʼerüle tü piamasü karaloʼuta nümüinjatkat Timoteo. Jülüja paaʼin müin nüshajalaka shia Pablo pümüin otta jülüja paaʼin jamüin aneetka pukuwaʼipa paaʼinrüle shia. Wekirajaa sünain waneirua kasa eeka süpüla paaʼinrüin.

13. ¿Kasa waaʼinrüinjatka süpüla waʼwaajüinjachin Jehová?

¹³ «Shia anaka pikirajaale süpüla puʼwaajüinjachin chi Maleiwakai» (1 Tim. 4:7₂). Süpüla waʼwaajüinjachin Jehová waneepiainjanain waya nümaa otta waaʼinrüinjatü waneepia tü nüchekakat wapüleerua. Nnojoishii joʼuujiraain waya sümaa tia, aʼyataainjana maʼin waya süchiirua. ¿Kasa paaʼinrajatka süpüla puuntuin tia? Anuu nünüiki Pablo: «Shia anaka pikirajaale». Sükajee tia pütchikat shia nüküjeeka achiki Pablo nukuwaʼipa wanee wayuu ayoujiraai. Aainjüinjachin nia ejercicio süpüla yapainjachin nia süpüla ayoujirawaa. Müsia neʼe wakuwaʼipa, ekirajaainjana maʼin waya süpüla aleewainjanain waya nümaa Jehová.

14. ¿Jamüsü waashajeʼerüinjatkaʼa tü Bibliakat soʼukaiwai? Püküja wanee sukuwaʼipa.

¹⁴ Wanee kasa paaʼinrajatka shia paashajeʼerawalinjatü tü Bibliakat soʼukaiwai, paaʼinrajatü tia süpüla aleewain maʼin pia nümaa Jehová. Maa paashajeʼeraka suluʼu tü Bibliakat nüchiki Jesús wanaa sümaa naashajaain nümaa chi jimaʼai washitkai (Mar. 10:17-22). Nütüjaa aaʼu chi jimaʼaikai niain Jesús chi Mesíaskai, nnojoipejeʼe kanoulain maʼin nia. Amülialaapejeʼe naaʼin Jesús naaʼu chi jimaʼaikai. Eesüjaʼa ponule paaʼin kamaneein maʼin Jesús nümüin yootopa nia nümaa. Shia nücheküin Jesús nüpüleerua chia jimaʼaikai anain tü kasa nüneekakat. ¿Kasa pütüjaka sünainjee nukuwaʼipa Jehová sünainjee tü naaʼinrakat Jesús? Saaʼujee sümülialaain naaʼin Jesús naalin chia jimaʼaikai watüjaa aaʼu alinña nüpüla Jehová chi jimaʼaikai, jama nüshatüin Jesús nukuwaʼipa chi Nüshikai (Juan 14:9). Jülüjapa paaʼin nukuwaʼipa chia jimaʼaikai püsakireʼera paaʼin sünain tüü: «¿Kasa taaʼinrajatka süpüla taʼaleewajaain maʼin nümaa Jehová? ¿Kasa taaʼinrajatka süpüla takaalinjain na waneinnua?».

15. ¿Jamüsü choʼujaakaʼa anainjatüin nakuwaʼipa na jimaʼaliikana napüleerua na wawalayuukana? (1 Timoteo 4:12, 13).

¹⁵ «Anakajaʼa anale pukuwaʼipa noʼupala na anoujashiikana» (paashajeʼera 1 Timoteo 4:12, 13). Nüküjain Pablo nümüin Timoteo anain nütüjale süpüleerua aashajeʼeraa karaloʼuta otta nütüjain süpüleerua ekirajaa. Nüküjainña Pablo nümüin alinjatüin wayuu nüpüla, anainjatüin nunoula jee wuleinjatüin nukuwaʼipa. ¿Jamüsü nüküjakaʼa tia Pablo nümüin Timoteo? Shia süka kaawainreesia tü waaʼinrakat suulialeʼeya tü wamakat. Jamüshijaʼa pikirajüinjachire sünain tü outkajawaakat jee püküjale tü waaʼinrajatkat süpüla waaʼinmaain tü aküjaakat pütchi, kaawainrejeʼeria tü pümakat neʼrüle pia na wawalayuukana sünain paaʼinmaain maʼin tü aküjaakat pütchi (1 Tim. 3:13).

16. (1) ¿Jarat tü jaʼraisükat kasa niʼyataainjatü achiirua wanee jimaʼai? (2) ¿Kasa naaʼinrajatka wanee jimaʼai süpüla anainjatüin sukuwaʼipa nünüiki?

¹⁶ Nüküjain Pablo suluʼu 1 Timoteo 4:12 jaʼraisü kasa naaʼinrüinjatka wanee jimaʼai süpüla anainjatüin nukuwaʼipa napüleerua na anoujashiikana, anasü pikirajaale sünain tia. Piʼyataweere süchiirua anain pünüiki, anasü jülüjale paaʼin tü pünüikinjatkat süpüla pütütüleʼerüin naaʼin na waneinnua. Kepiale pia namaa na wayuu kachooinkana pia, anasü paapawaire analuʼutka namüin saaʼu tü naaʼinrakat püpüleerua. Chapa pia suluʼu tü outkajaaleekat anasü pusoutawaire shiʼipajee tü asakinnakalü anain süka pünüiki. Sajaʼttapa tü outkajawaakat püküja nümüin wanee wawala tü kamalainkat pümüin sünainjee sukuwaʼipa nikirajia. Piʼyataale maʼin süchiirua süpüla anainjatüin sukuwaʼipa pünüiki, neʼreerü na wawalayuukana laülaain paaʼin sünain anoujaa (1 Tim. 4:15).

17. ¿Kasa naaʼinrüinjatka wanee jimaʼai süpüla nukooʼomüinrüin niʼyataain nümüin Jehová? (2 Timoteo 2:22).

¹⁷ «Nnojo puʼunuin süchiirua tü kasa suchuntaakat naaʼin wanee jimaʼai [...] shia anaka aluʼu puʼunule süchiirua paaʼinrüin kasa eekai lotuin» (paashajeʼera 2 Timoteo 2:22). Nüküjain Pablo nümüin Timoteo nnojoluin anain nuʼunule süchiirua tü kasa suchuntaakat naaʼin suulia sumojujaain nukuwaʼipa nümaa Jehová. Eesüjaʼa piyaawatüle saaʼu paaʼinmaain maʼin waneirua kasa nnojotka mojuin shiajaʼa neʼe nnojoluin süpütaain kaʼi süpüla pikirajaain, süpüla pujuʼitüin sünain aküjaa pütchi otta süpüla puutkajaain. Jülüja paaʼin jeʼrain oora pülatiraka sünain aainjaa ejercicio, sünain anajaa kasa suluʼupünaa internet jee sünain ashaitaa videojuegos. Anasü pükatarüle süpüshi tü kaʼi pülatirakat sünain tia süpüla pukooʼomüinrüin piʼyataain nümüin Jehová otta pükaalinjain na wawalayuukana. Eeshi süpüla pükaalinjain sünain anoutaa wanee kasa suluʼu tü piichi outkajaaleekat jee pujuʼitüle sünain aküjaa pütchi süka tü kareetachonkat. Paaʼinrüle tia aleeweechi maʼin pia namaa na wawalayuukana jee natütüleʼereerü paaʼin süpüla pukooʼomüinrüin piʼyataain nümüin Jehová.

ANEERÜ MAʼIN PUKUWAʼIPA PÜKAALINJALE NA WANEINNUA

18. ¿Jamüsü watüjaakaʼa saaʼu anain nakuwaʼipa jee talatüin naaʼin Marcos otta Timoteo?

¹⁸ Anasü nukuwaʼipa Timoteo otta Marcos saaʼujee tü kasa naaʼinrakat sünain aʼyatawaa nümüin Jehová jee talatüshii naya saaʼujee tia (Aluw. 20:35). Oʼunushi Marcos wattapünaa sünain aküjaa pütchi otta nüshajüin wanee karaloʼuta nüchikimaajatka Jesús. Akaalinjünüshi Pablo nutuma Timoteo süpüla nakooʼomüinraain otta natütüleʼerüin naaʼin na anoujashiikana. Talatüsü naaʼin Jehová nümaa Marcos otta Timoteo saaʼujee naʼyataain nümüin süka süpüshuaʼa naaʼin.

19. ¿Jamüsü anakaʼa naaʼinrüle na jimaʼaliikana tü nümakat Pablo nümüin Timoteo?

¹⁹ ¿Kasa watüjaka sünainjee tü nüshajakat Pablo nümüin Timoteo? Tü watüjakat shia alin maʼin Timoteo nüpüla Pablo. Müsia neʼe nukuwaʼipa Jehová, aishi pia nüpüla otta nücheküin anainjatüin pukuwaʼipa jee talatüinjatüin paaʼin. Anasü pikirajaale sünain tü nüshajakat Pablo otta püchajaa sukuwaʼipa süpüla pükaalinjain na wawalayuukana. Paaʼinrüle tia talateerü maʼin paaʼin otta achecheraajeechi pia süchiirua katüinjatüin poʼu nutuma Maleiwa (1 Tim. 6:18, 19).