EKIRAJAAYA 20
JAYEECHI 7 Nia Jeʼwaa katchinka atuma taaʼin
Paaʼinrajatka süpüla nümülialüin paaʼin Jehová
«Kasataalejeseʼe nuʼwaajünüin chi Nümaleiwasekai chi Waseñotsekai Jesucristo [...]. Nia kanainjeejachika tü aliikalü apüla wayuu jee nia chi amülialakai saaʼin wayuu» (2 COR. 1:3).
TÜ WATÜJEETKAT
Wayaawateerü aaʼu amüliajülin maʼin Jehová sünainjee tü naaʼinrakat napüleerua na judío amaanakana Babiloniamüin.
1. ¿Jamüsü naaʼin na judío amaanakana Babiloniamüin?
JÜLÜJATAA WAAʼIN jamüin naaʼin na judío amaanakana Babiloniamüin. Neʼrüin sajaʼttinnüin tü pueulokot Jerusalén eejeʼewaliire naya. Amaanüshii naya wattamüin saaʼujee naainjala otta saaʼujee naainjala na natuushinuukana (2 Crón. 36:15, 16, 20, 21). Jutatüsü nakuwaʼipa chaa Babilonia süpüla naaʼinrüin waneirua kasa (Jer. 29:4-7). Mayaainjeʼe müin tia, ayatüsia kapüleein namüin kepiaa chayaa, jama nnojoluin kiʼrain naya. Anuu nanüiki noʼutku na judíokana süchiki jamüin naaʼin: «Aikalaashii waya soʼutpünaa tü süchi chakat Babilonia. Aʼyalajüshii waya wanaa sümaa jülüjain waaʼin Sión» (Sal. 137:1). Mojushaatasü naaʼin na judíokana sutuma müin nakuwaʼipa. ¿Jaraleeiche eera amülialakai naaʼin?
2, 3. (1) ¿Kasa naaʼinraka Jehová napüleerua na judío amaanakana Babiloniamüin? (2) ¿Kasa wekirajaainjatka anain sünain ekirajaayakat tüü?
2 Chi Washikai Jehová «nia chi amülialakai saaʼin wayuu» (2 Cor. 1:3). Aishii nüpüla napüshuaʼa na arütkaakana nünainmüin jee nümülialüin naaʼin. Nütüjaatüjülia aaʼu Jehová eejeenain noʼutku na amaanakana Babiloniamüin ayaawajaajeenaka suulia naainjala otta naʼyataajeenain nachikuaʼa nümüin (Is. 59:20). Aluwataanüshi Isaías nutuma Jehová süpüla nüshajüinjatüin wanee karaloʼuta namüinjatü na judíokana. Nüshajirüin tia karaloʼutakat 100 juya süpülapünaa namaanüin Babiloniamüin. Isaías sünülia tia karaloʼutakat. Müsü tü pütchi nüshajakat Isaías: «‹Jümüliaja naaʼin na aʼyataashiikana tamüin›, müshi chi Jümaleiwasekai jümüin» (Is. 40:1). Sükajee tü karaloʼuta nüshajakat Isaías nümülialüin Jehová naaʼin na judíokana.
3 Choʼujaasiaʼaya wamüin sümüliainnawalüinjatüin waaʼin. Sünain ekirajaayakat tüü wekirajaajeerü anain apünüinsü kasa naaʼinraka Jehová süpüla nümülialüin naaʼin na judío amaanakana Babiloniamüin. Nüküjain Jehová moteerüin naaʼin naainjala na ayaawajaakana suulia naainjala. Nüküjainña namüin naleʼejeenain nachikuaʼa noumainpaʼamüin, nükaalinjain naya süpüla nnojoluinjatüin mmoluin naaʼin. Müsiaʼaya tü naaʼinrakat Jehová wapüleerua süpüla nümülialüinjatüin waaʼin.
NÜMÜLIAJÜIN WAAʼIN JEHOVÁ OTTA MOTUSÜ NAAʼIN WAAINJALA
4. ¿Kasa naaʼinraka Jehová süpüla nümülialüin naaʼin na judíokana? (Isaías 55:7).
4 Chi Washikai Jehová «nia chi amülialakai saaʼin wayuu» (2 Cor 1:3). Nüküjain Jehová nükajee Isaías nümülialeerü naaʼin na judío ayaawajaakana suulia naainjala (paashajeʼera Isaías 55:7). Müshi Jehová: «Süka miyoʼuin paalin tapüla tamüliajeechi pia» (Is. 54:8). ¿Kasa naaʼinraka Jehová süpüla nümülialüin naaʼin na judíokana? Makatüinjana na judíokana soʼu wainmashaata juya chaa Babilonia saalinjee naainjala. Nüküjapejeʼe Jehová naleʼejeenain nachikuaʼa noumainpaʼamüin, nnojoliinjana müinnaʼaleeinña makatüin naya chaa Babilonia (Is. 40:2). Amülialakajasaʼa naaʼin na judío ayaawajaakana suulia naainjala natüjaapa saaʼu tü nüchekakat Jehová napüleerua.
5. ¿Kasa watüjaka nüchiki Jehová noulialeʼeya na judío amaanakana Babiloniamüin?
5 ¿Kasa watüjaka nanainjee na judíokana? Tü watüjakat nanainjee shia motuin naaʼin Jehová naainjala na aʼyataakana nümüin. Watüjaa aaʼulu wainmain tü kasa naaʼinrakat Jehová süpüla motuin naaʼin waainjala. Nnojotpejeʼe natüjaain saaʼu tia na judío amaanakana Babiloniamüin. Kakalia mapa süchikijee nüshajüin Isaías motuin naaʼin Jehová saainjala wayuu, nüjütüin chi Washikai Maleiwa chi Nüchonkai yaa mmapaʼamüin süpüla naapajiraain nikii naaʼu na wayuu ayaawajaakana suulia naainjala. Nülatirüin Maleiwa sooʼopünaa naaʼin waainjala saaʼujee naapajiraain nikii Jesús waaʼu (Aluw. 3:19; Is. 1:18; Éf. 1:7). Anataʼaleesüjaʼa nukuwaʼipa chi Wamaleiwasekai süka nümülialüin saaʼin wayuu.
6. ¿Jamüsü anakaʼa jülüjale waaʼin nümülialüin Jehová saaʼin wayuu? (Piirakaa sümüin tü ayaakuaakat).
6 Tü pütchi nüshajirakat Jehová suluʼu Isaías 55:7 sümülialüin waaʼin ayatüle mojuin waaʼin saalinjee waainjala. Eeshii na ayatakana mojuin aaʼin sutuma tü kasa mojusü naaʼinrapuʼukat. Waküjale süchiki waainjala jee wayaawajaale suulia, anasü jülüjale waaʼin motuitpain shia naaʼin Jehová. Motopa naaʼin Jehová waainjala nnojotsü jülüjakuʼu müin naaʼin shia (anasü paashajeʼerüle Jeremías 31:34). Anasü nnojorüle jülüjakuʼu müin waaʼin waainjala, jama motuitpain shia naaʼin Jehová. Tü naaʼinmaakat maʼin Jehová shia tü kasa anasü waaʼinrakat maaʼulu, nnojotsü shiain tü kasa mojusü waaʼinrapuʼukat (Ezeq. 33:14-16). Kepiapa waya suluʼu tü Paʼaraiisükat, najaʼttireerü chi Washi amüliajüikai süpüshuaʼa tü kasa mojukalü atuma waaʼin.
Nnojotsü jülüjakuʼu müin naaʼin Jehová tü kasa mojusü waaʼinrapuʼukat. Shia naaʼinmaaka tü kasa anasü waaʼinrakat maaʼulu. (Paashajeʼera tü pütchikat 6).
7. ¿Kasa waaʼinrajatka süpüla waküjain süchiki waainjala?
7 ¿Kasa waaʼinrüinjatka mojule waaʼin sutuma nnojoluin waküjain süchiki waainjala? Saashin tü Bibliakat achuntuinjana waya kaalinwaa namüin na laülaashiikana (Sant. 5:14, 15). Kapüleesiaʼaya wamüin waküjain namüin süchiki waainjala. Anapejeʼe waaʼinrüle tia süka nüneeküin naya Jehová süpüla nakaalinjain waya. Aishii waya nüpüla Jehová otta nümülialüin waaʼin. Akaʼaya na laülaashiikana aishii waya napüla otta namüliajüin waaʼin. Jülüjale waaʼin tia jee shiimainre wayaawajaain suulia waainjala waküjeerü süchiki tia. Jülüjataa waaʼin tü naaʼinrakat Jehová süpüla nümüliajüin naaʼin wanee wawala, Arthur nünülia.a Mojusü maʼin naaʼin chia wawalakai saalinjee wanee kasa naaʼinraka. Müshi nia: «Eetaasü maʼaka wanee juya tanajüin shiyaakua wayuu masheʼinsat. Soʼu wanee kaʼi taapaka wanee pütchi süchiki wuleinjatüin wakuwaʼipa noʼuluʼu Jehová. Taküjaka süchiki tü taaʼinrakat sümüin taʼwayuuse jee namüin na laülaashiikana. Mayaainjeʼe anain taaʼin süchikijee taküjain shia, ayatüsia mojuin taaʼin saalinjee tü kasa mojusü taaʼinrakat. Naküjain tamüin na laülaashiikana nnojolin niyüülajüin taya Jehová jee nüchiaain taya süka alin taya nüpüla. Antüsü suluʼumüin taaʼin tü namakat tamüin otta tatüjaaitpa aaʼu shiimain motuin naaʼin Jehová taainjala». Maaʼulu yaa pürekutsootshi rekulaat Arthur otta neʼipajanashi nia na laülaashiikana. Shiimain moteerüin naaʼin Jehová waainjala wayaawajaale suulia. Anataʼaleeshijaʼa maʼin Jehová.
AʼATAPAJÜSHII WAYA KASA ANASÜ NUTUMA JEHOVÁ
8. (1) ¿Kasa anasü naʼatapajaka na judíokana nutuma Jehová? (2) ¿Jamüsü naaʼin na judío ayaawajaakana suulia naainjala sutuma tü kasa anasü naʼatapajakat nutuma Jehová? (Isaías 40:29-31).
8 Na chejeʼewaliikana Babilonia matüjainsalii ajütaa nachiki na nachepchiakana. Eesüjaʼa jülüjale naaʼin na judíokana müinnamaʼaleeinña maleʼejüin nachikuaʼa noumainpaʼamüin (Is. 14:17). Nüküjapejeʼe Jehová namüin najütüneenain chejee Babilonia. Shia wanee kasa anasü naʼatapajaka nutuma Jehová. Nnojotsü jaralüin ataʼülüinjatüin sukuwaʼipa tü kasa anasü naaʼinrüinjatkat Jehová (Is. 44:26; 55:12). Na chejeʼewaliikana Babilonia müshii aka saaʼin sümamüla mma nümüin Jehová (Is. 40:15). Jamüsüjaʼa sujuunnule tü sümamülakat mma nnojolaa meerü shia. Müsia neʼe tü naaʼinrüinjatkat Jehová naka na chejeʼewaliikana Babilonia. Talatakajasaʼa naaʼin na judíokana sutuma tü kasa anasü naʼatapajakat nutuma Jehová. Anuu wanee pütchi nüshajaka Isaías: «Na aʼatapajakana tü naaʼinrajatkat Jehová, katsüinjeerü naaʼin nutuma» (paashajeʼera Isaías 40:29-31). Sutuma tü kasa anasü naʼatapajakat nutuma Jehová katsüinjeerü naaʼin, meena nawatakai aaʼin maʼaka nuwatüin wanee warulapai.
9. ¿Jamüsü neʼitaainjatkaʼa naaʼin na judío amaanakana Babiloniamüin sünain nikeraajeerüin Jehová tü nümakat namüin?
9 ¿Jamüsü neʼitaainjatkaʼa naaʼin na amaanakana Babiloniamüin sünain nikeraajeerüin Jehová tü nümakat namüin? Watta saalii tü pütchi nüküjakat Jehová ekeraajaka noʼupala. Jamüshiijaʼa naya neʼrajüin sukua wanaa sümaa nashutuin na asiriokana saaʼu tü poloosükat eʼiruku Israel otta wainma na amaanakana (Is. 8:4). Neʼrüinña sajaʼttinnüin Jerusalén natuma na chejeʼewaliikana Babilonia otta amaanüshii naya Babiloniamüin (Is. 39:5-7). Natüjaa aaʼulu shiyuʼnnuin noʼu Sedequías nutuma chi aluwataakai saaʼu Babilonia jee püreesashi nia nutuma (Jer. 39:7; Ezeq. 12:12, 13). Ekeraajüsü süpüshuaʼa tü nümatüjütkalia Jehová (Is. 42:9; 46:10). Müsüjeseʼe natüjaain saaʼu najütüneenain achiki maʼaka nüküjatüjülin shia Jehová.
10. ¿Kasa waaʼinrajatka süpüla waaʼinmaain tü kasa anasü waʼatapajakat nutuma Maleiwa?
10 ¿Kasa watüjaka nanainjee na judíokana? Mojule waaʼin, katsüinjeerü waaʼin jülüjale waaʼin tü kasa anasü waʼatapajakat nutuma Maleiwa. Keemasü maʼin tü kaʼi kepiakalü oʼu waya otta eeshii na aainjeekana kasa mojusü wamüin. Nnojoliinjanapejeʼe eimmolojooin waya. Waʼatapajüin katüinjatüin woʼu waneepia, jimatüinjatüin waaʼin otta nnojoluinjatüin eein mojulawaa. Naapeerü süpüshuaʼa tia wamüin Jehová. Nnojorüle jülüjain maʼin waaʼin tia meena weirakaakai aaʼin sümüin wanee jardín suluʼupünaa wanee wentaana eekai yarüttüin arouyain, nnojoleerü weʼrüin anain maʼin shiyolojo tü jardínkat sutuma yarüttüin tü wentaanakat. Jülüjainjatü waaʼin waneepia tü kasa anasü waʼatapajakat nutuma Maleiwa. Tia müsü aka saaʼin walaʼajaale surouyain tü wentaanakat süpüla weʼrüinjatüin anain maʼin shiyolojo tü jardínkat. Anashii wakatarüle kaʼi süpüla jülüjain waaʼin jameerüin wakuwaʼipa kepiapa waya suluʼu tü Paʼaraiisükat. Waashajeʼera pütchi, wanaja video otta waapaja jayeechi aashajaaka süchiki tü kasa anasü waʼatapajakat nutuma Maleiwa. Waküja nümüin Jehová kasain maʼin weʼreein amüin suluʼu tü Paʼaraiisükat.
11. ¿Kasa saaʼinraka wanee wawala ayuuika süpüla sükatsüinrüin saaʼin?
11 Jülüjataa waaʼin sukuwaʼipa wanee wawala, Joy sünülia. Ayuuisü maʼin shia, süchecherüin saaʼin sutuma tü kasa anasü saʼatapajakat. Anuu sünüiki: «Wanaa sümaa mojushaatain taaʼin taküjain shia nümüin Jehová süka tatüjaain saaʼu niyaawatüin saaʼu jamüin taaʼin. Naapajüin tanüiki Jehová, nükatchinrüin taaʼin sükajee tü nüpülainkat» (2 Cor. 4:7). Wane kasa saaʼinrawaika shia jülüjain saaʼin jameerüin sukuwaʼipa kepiapa shia suluʼu tü Paʼaraiisükat eere nnojoleechin «eein wanee wayuu eekai ‹ayuuishi taya› nümeechin» (Is. 33:24). Katsüinjeerü waaʼin waküjale nümüin Jehová jamüin waaʼin otta waaʼinmaale tü kasa anasü waʼatapajakat nutuma.
12. ¿Jamüsü wanoujakaʼa sünain nikeraajeerüin Jehová tü nümakat? (Piirakaa sümüin tü ayaakuaakat).
12 Eesü süpüla wanoujain sünain nikeraajeerüin Jehová tü nümakat wamüin maʼaka nikeraajüin tü nümakat namüin na judío amaanakana Babiloniamüin. Jülüja waaʼin tü pütchi weʼrakat ekeraajüin maaʼulu. Jamüsüjaʼa maaʼulu eesü wanee mma laülaaka saaʼu wainma mma, eesü tü anakalü atuma shia otta eesü tü mojukalü atuma shia (Dan. 2:42, 43). Waapa achikit sukutkujaain mma sainküinpünaa tü mmakat otta süküjünüin maʼin tü pütchi anakat maʼin sainküinpünaa tü mmakat (Mat. 24:7, 14). Wanoujain maʼin sünain nikeraajeerüin Jehová süpüshuaʼa tü nümakat süka weʼrüin shikeraajüin maaʼulu tü sümakat tü Bibliakat.
Weʼitaain maʼin waaʼin sünain nikeraajeerüin Jehová tü nümakat wamüin süka weʼrüin shikeraajüin maaʼulu tü sümakat tü Bibliakat. (Paashajeʼera tü pütchikat 12).
NÜKAALINJAIN WAYA JEHOVÁ SÜPÜLA NNOJOLUIN MMOLUIN WAAʼIN
13. (1) ¿Kasa neʼreetka na judíokana sülüʼülapa nakalia süpüla najütünüin achiki? (2) ¿Kasa naaʼinraka Jehová süpüla nümülialüin naaʼin na judío amaanakana Babilonia? (Isaías 41:10-13).
13 Nümülialüin naaʼin Jehová na judío amaanakana Babiloniamüin. Nütüjaapejeʼe saaʼu neʼreenain namüliala sülüʼülapa sükalia süpüla najütünüin achiki. Nüküjatüjülia achiki Jehová eejeechin wanee aluwataai ashuteechikai saaʼu waneirua mma pejepünaaka sünain Babilonia otta nushuteechin mapa saaʼu Babilonia (Is. 41:2-5). ¿Eimmolojooinjanache na judíokana sutuma tia? Nüküjatüjülia achiki Jehová wanee pütchi atütüleʼerüinjatka naaʼin na judíokana. Müsü mayaa: «Nnojo mmoluin pia, anii taya pümaa. Nnojo shapaain paaʼin, taya chi Pümaleiwasekai» (paashajeʼera Isaías 41:10-13). ¿Jamüshi «taya chi Pümaleiwasekai», nümaka Jehová namüin? Nüküjain tia Jehová namüin süpüla natüjaain saaʼu naʼwaajüinjachin nia otta eejeechin nia namaa süpüla nükaalinjain naya (Sal. 118:6).
14. ¿Kasa amaa nüküjaka Jehová süpüla nnojoluinjatüin mmoluin naaʼin na judío amaanakana Babiloniamüin?
14 Nüküjainña Jehová namüin na judío amaanakana Babiloniamüin kekiin maʼin nia jee pülashin maʼin nia. Naaʼinrüin tia süpüla nnojoluinjatüin mmoluin naaʼin. «Jiirakaa iipünaamüin», müshi Jehová namüin süpüla neʼrüinjatüin tü shüliwalakat. Nnojotsü nüküjain neʼe nukumalain tia, nüküjainña namüin kanüliain shia nutuma waneʼewai sukua (Is. 40:25-28). Tü wayaawatakat sünainjee tia shia niʼraajüin Jehová nanülia napüshuaʼa na aʼyataashiikana nümüin. Nükaalinjeena Jehová na aʼyataashiikana nümüin, jama pülashin maʼin nia. Nnojotsüjeseʼe mmoluinjatüin naaʼin na judío amaanakana Babiloniamüin.
15. ¿Kasa nuluwataaka anain Jehová na judío amaanakana Babiloniamüin süpüla eejüin naaʼin?
15 Nuluwataain Jehová na judíokana sünain aaʼinraa waneirua kasa süpüla eejüinjatüin naaʼin. Anuu tü nümakat namüin suluʼu Isaías 26:20: «Jia aʼyataaliikana tamüin, jikerota suluʼumüin tü kuatta suluʼukat jipia, jüsürüla tü miichoʼukot jikerotopa. Juunjulaa motsomüin sujuuna sülatüin tü kasachikikat». Eesüjaʼa shikeraajüle tia pütchikat wanaa sümaa nushutuin Ciro saaʼu Babilonia. Naashin wanee wayuu nümaiwajachi ashajüi süchiki tü kasa alatüitpakat, nuluwataain Ciro na nusurulaatsekana süpüla noʼutuinjanain naaʼin na wayuu sainküinpünaakana kaaye suluʼu tü pueulokot Babilonia. Mmotkajasaʼa maʼin naaʼin na wayuu chejeʼewaliikana Babilonia. Eeshiijaʼa noʼttaale na judíokana sutuma naaʼinrüin tü nuluwataakalü anain Jehová.
16. ¿Jamüshii nnojoleenakaʼa eimmolojooin waya suuntapa tü kaʼi shiʼrüinjatkat maʼin oʼu wayuu müliaa? (Piirakaa sümüin tü ayaakuaakat).
16 ¿Kasa watüjaka nanainjee na judíokana? Alüʼütsü maʼin tü kaʼi shiʼrüinjatkat maʼin oʼu müliaa wayuu. Suuntapa tia kaʼikat ayoʼujaajeerü saaʼin wayuu otta mmoleerü saaʼin. Eekajasaʼa wayakana nnojoleerü alatüin wamüin tia, jama watüjaain saaʼu eein wamaa chi Wamaleiwasekai Jehová. Talateena waya süka sülüʼülüin tü kaʼi taasheetkalü oʼu wakuwaʼipa (Luc. 21:28). Ayateeria weʼitaain waaʼin sünain naaʼinmajeenain waya Jehová nushutapa Gog waaʼu. Gog nayaawase waneinnua sülaülashii mma oonoojeenakana nekiira na aʼyataashiikana nümüin Maleiwa. Naaʼinmajeena waya Jehová nakajee na aapieekana otta nuluwataajeena waya sünain aaʼinraa waneirua kasa süpüla nnojoliin outuin waya. Nnojotsü watüjaain saaʼu jameerüin sukuwaʼipa nutuma Jehová süpüla nüküjain wamüin tü waaʼinrajatkat. Eesüjaʼa naaʼinreerüle tia nakajee na wawalayuu outkajaakana wamaa. Eeshiijaʼa nayale shiyaawasein «tü kuatta suluʼukat jipia» ashajünakat suluʼu Isaías. Süpüla eejüin waaʼin paaʼinwainjana waya namaa na wawalayuukana, jüüjüüinjana waya sümüin tü namakat wamüin na wawalayuu oʼunirakana sukuwaʼipa waʼyataain otta wayaawatüinjatü saaʼu niain Jehová oʼunirüin nakuwaʼipa (Heb. 10:24, 25; 13:17).
Jülüjale waaʼin pülain maʼin Jehová otta nükaalinjeenain waya süpüla nuʼtteʼerüin waya, nnojoleena eimmolojooin waya süntapa tü kaʼi shiʼreetkat maʼin oʼu wayuu müliaa. (Paashajeʼera tü pütchikat 16).b
17. ¿Kasa paaʼinrajatka süpüla nümülialüin paaʼin Jehová?
17 Mayaainjeʼe kapüleein tü alatakat namüin na judío chajanakana Babilonia, amüliannüsü naaʼin nutuma Jehová. Shieeria naaʼinraka tia Jehová wapüleerua. Jaʼitairü kasain alatüin mapeena ayataʼaya püchajaain sukuwaʼipa süpüla nümülialüin paaʼin Jehová, chi Maleiwa amüliajüikai wayuu. Paaʼinmaa waneepia tü kasa anasü paʼatapajakat nutuma. Jülüja paaʼin waneepia niain Jehová chi Pümaleiwasekai, nnojoleetka kasain mmoluin eema pia.
JAYEECHI 3 Teʼitaain taaʼin pünain jee katchinsü taaʼin putuma
a Aʼwanajaanüsü waneirua anüliee.
b SÜCHIKI TÜ AYAAKUAAKAT: Jutkatüshii waneinnua wawalayuu. Süka natüjaain saaʼu pülain maʼin Jehová neʼitaain maʼin naaʼin sünain naaʼinmajeenain na aʼyataashiikana nümüin jaʼitainna jalain kepiain naya.