Wakaalinja na wekirajüinkana süpüla naʼyataain nümüin Jehová

1, 2. (1) ¿Jamüsü wainmajakaʼa naaʼin na wekirajüinkana naneeküinjanapa naküjaliin pütchi nüchiki Jehová? (2) ¿Kasa wekirajaajeetka anain sünain ekirajaayakat tüü?

¿WAINMAJÜSÜCHE PAAʼIN püneekaiwaʼaya püküjalinjachin pütchi nüchiki Jehová? Eesüjaʼa müle pukuwaʼipa sutuma jülüjain paaʼin mojushiijeerüin namüin na wayuu piʼyataajiraakana amaa, namüin püpüshi jee namüin paʼaleewainyuu punoujain nünain Maleiwa. Eesüjaʼa jülüjapuʼule paaʼin iseerüin püchiki poonooin sümaa tü nuluwataakalü anain pia Maleiwa. Sülatülejeʼeya pümüin tia piyaawateerü aaʼu jamüin kapüleeka namüin na pikirajüinkana naneekamaatüin naküjaliin pütchi nüchiki Jehová.

² Nütüjaa aaʼulu Jesús eein süpüla sümalajaain naaʼin wanee wayuu wainmajüle naaʼin (Mat. 13:20-22). Sutumajee tia, nnojoishii nuuʼulaain suulia nükaalinjain naya süpüla nanoujainjanain. Washatüle nukuwaʼipa Jesús, wakaalinjeena na wekirajüinkana süpüla nayaawatüin saaʼu jeʼtsüin tü kasa ataʼülakat nakuwaʼipa süpüla naʼyataain nümüin Jehová, süpüla kooʼomüin naalin Jehová napüla, süpüla nayaawatüinjatüin saaʼu jeʼtsüin tü kasa naaʼinmaainjatkat maʼin jee nachecherüin naaʼin soʼunnaa müliaa. ¿Kasa waaʼinrajatka süpüla washatüin nukuwaʼipa Jesús? Jalouijeerü maʼin wamüin wekirajüin na wekirajüinkana sükajee tü karaloʼutakat Anainjatka atuma pukuwaʼipa waneepia süpüla naküjaliinjanain pütchi nüchiki Jehová mapa.

TU KASA ATAʼÜLAKAT NUKUWAʼIPA SÜPÜLA NIʼYATAAIN NÜMÜIN JEHOVÁ

3. ¿Kasa eeka süpüla sütaʼülüin nukuwaʼipa Nicodemo suulia nuushikajaain süchiirua nukuwaʼipa Jesús?

³ Nicodemo niapuʼu wanee nekiipüʼü na judíokana. Eesü wanee kasa ataʼülaka nukuwaʼipa suulia nuushikajaain süchiirua nukuwaʼipa Jesús. Aipirua kashi süchikijee nuʼttuin Jesús sünain aküjaa pütchi, niyaawata aaʼu Nicodemo niain Jesús chi Mesías aküjünakai achiki paala (Juan 3:1, 2). Nnojoishi aashajaain Nicodemo suʼupala wayuu nümaa Jesús sutuma mmoluin nia «neema na judíokana» (Juan 7:13; 12:42). Eesüjaʼa jülüjale naaʼin mojuteechin atumawaa nia nuushikajaale süchiirua nukuwaʼipa Jesús.a

4. ¿Kasa naaʼinraka Jesús süpüla niyaawatüin saaʼu Nicodemo tü naaʼinrüinjatkat süpüla talatüin naaʼin Jehová nümaa?

⁴ Atüjashi maʼin Nicodemo süpüleerua tü sümakat tü pütchi aapünakat nümüin Moisés, choʼujaapejeʼe nümüin nikirajünüinjachin süpüla niyaawatüinjatüin saaʼu tü naaʼinrüinjatkat süpüla talatüin naaʼin Jehová nümaa. ¿Kasa naainjaka Jesús nüpüleerua? Nikirajüin nia saʼwai, nüküjain nümüin tü naaʼinrajatkat süpüla nuushikajaain süchiirua nukuwaʼipa, nüküjain nümüin niyaawajaainjachin suulia naainjala, woutiisainjachin nia jee kanoulainjachin sünain niain Jesús chi Nüchonkai Maleiwa (Juan 3:5, 14-21).

5. ¿Kasa paaʼinrajatka süpüla niyaawatüin chi pikirajüinkai tü ataʼülakat nukuwaʼipa süpüla niʼyataain nümüin Jehová?

⁵ Eeshijaʼa nütüjale chi pikirajüinkai süpüleerua tü sümakat tü Bibliakat, choʼujaapejeʼe niyaawatüin saaʼu kasain wayuu tü ataʼülakat nukuwaʼipa süpüla niʼyataain nümüin Jehová. Jamüshijaʼa nülatirüle kojuya oora sünain aʼyatawaa jee mojushiire namüin na nüpüshikana nüküjalinjachin pütchi nüchiki Jehová, eesüjaʼa süpüla sütaʼülüin nukuwaʼipa tia. Anashi pükaalinjale chi pikirajüinkai maʼaka naaʼinrüin shia Jesús. Eeshi süpüla puunejaain nia sünain asaa kepein jee shiale puʼunuin sünain awaraijawaa nümaa. Paaʼinrüle tia, mapüleejeerü nümüin yootuin nia pümaa süchiki tü kasa alatakat nümüin. Pükaalinja nia süpüla niyaawatüin saaʼu niiʼiratüinjatüin nukuwaʼipa saaʼujee alin Jehová nüpüla, nnojotsü shiainjatüin neʼe shiiʼiree talatüin pia nutuma.

6. ¿Kasa paaʼinrajatka süpüla pükaalinjain chi pikirajüinkai süpüla naaʼinrüin tü nikirajaakalü anain? (1 Corinto 16:13).

⁶ Nütüjaale saaʼu chi pikirajüinkai nükaalinjeechin nia Jehová süpüla noonooin sümaa nünüiki, naaʼinreerü tü nikirajaakalü anain (paashajeʼera 1 Corinto 16:13). Jülüjataa paaʼin koleejiaiwaʼaya pia. ¿Jetsüpüʼü nukuwaʼipa chi wayuu ekirajapuʼukai pia anapuʼuka paaʼin nümaa? Eeshijaʼa süpüla niain wanee wayuu nnojoikai kashapajaaralin jee akaalinjakai pia süpüla puuntuinjatüin paaʼinrüin wanee kasa. Eesü süpüla müin pukuwaʼipa maʼaka naaʼin chi ekirajapuʼukai pia. Nnojotsü shiain neʼe püküjainjatüin nümüin chi pikirajüinkai süchiki tü nüchekakat Maleiwa nüpüleerua, püsoʼira naaʼin nükaalinjeechin nia Jehová süpüla nuuntuin nunouteʼerüin nukuwaʼipa. ¿Kasa amaa paaʼinrajatka süpüla pükaalinjain chi pikirajüinkai?

PÜKAALINJA NIA SÜPÜLA KOOʼOMÜIN NAALIN JEHOVÁ NÜPÜLA

7. ¿Kasa naaʼinraka Jesús süpüla alinjachin Jehová napüla na wayuukana?

⁷ Nütüja aaʼulu Jesús aire Jehová napüla na nikirajüinkana naainjeerü tü nekirajaakalü anain. Müshijeseʼe nikirajüin naya sünain waneirua kasa akooʼomüinreetkat atuma naalii napüla chi Nashi iipünaajachikai. Nüküjain Jesús müin nukuwaʼipa Jehová maʼaka naaʼin wanee wayuu aapakai kasa anasü namüin nüchonnii (Mat. 7:9-11). Eeshiijaʼa süpüla eejanain wayuu eekai meʼraajüin alin naya napüla nashi naʼakajee na wayuu aapajakana tü nikirajakat Jesús. Jülüjataa paaʼin jamüin naaʼin wanaa sümaa nüküjain Jesús namüin nüchiki wanee wayuu talatakai aaʼin süka nüleʼejüin nüchikuaʼa chi nüchonkai nipialuʼumüin sümaa niyaawajaain suulia naainjala. Nayaawatakajasaʼa saaʼu miyoʼu maʼin saalin wayuu nüpüla Jehová (Luc. 15:20-24).

8. ¿Kasa paaʼinrajatka süpüla kooʼomüin naalin Jehová nüpüla chi pikirajüinkai?

⁸ Kooʼomüinjeerü naalin Jehová nüpüla chi pikirajüinkai püküjale nümüin süchiki tü nukuwaʼipakat Jehová. Pükaalinja nia süpüla niyaawatüin saaʼu nikirajüin waya Jehová sükajee alin waya nüpüla. Pikirajaapa nümaa süchiki nuluwataain Jehová chi nüchonkai süpüla outaa waaʼu, püküja nümüin naaʼinrüin Jehová tia sükajee alin nia nüpüla (Roma 5:8; 1 Juan 4:10). Niyaawatüle saaʼu chi pikirajüinkai alin nia nüpüla Jehová akooʼomüinraajeerü naalin Jehová nüpüla (Gal. 2:20).

9. ¿Kasa nuʼwanajeʼeraka atuma nukuwaʼipa Michael?

⁹ Jülüjataa waaʼin nukuwaʼipa Michael,b chejeʼewai nia Indonesia. Tepichiiwaʼaya nia ekirajünapuʼushi nia nüchiki Maleiwa, nnojoipejeʼe woutiisain nia. Wanaa sümaa 18 nuuyase, oʼunushi nia suluʼumüin wanee mma naata süpüla suchupeetseinjachin nia kemion. Aleʼejüshi nia nüchikuaʼa Indonesiamüin süpüla kasaalüin nia, kachonka mapa tü nuʼwayuusekat nümüin. Ayatapejeʼe nia aʼyataain suluʼu wanee mma naata, watta noulia na nüpüshikana. Shiasaʼa kojuya juya süchikijee, ekirajaasü tü nuʼwayuusekat jee tü nüchonkat sünain tü Bibliakat jee neeʼiratüin nakuwaʼipa. Amülouisü mapa niikat Michael, nüleʼejaka nuumainpaʼamüin süpüla naaʼinmajüinjachin chi nüshikai jee ekirajünüshi nia chayaa sünain tü Bibliakat. Antüsü suluʼumüin naaʼin Michael nikirajaapa sünain tü pütchi «Wekirajaa sooʼomüin» makat suluʼuka tü karaloʼutakat Anainjatka atuma pukuwaʼipa waneepia ekirajaaya 27. Aʼyalajüshi Michael wanaa sümaa jülüjain naaʼin alin maʼin nümüin Jehová niʼrapa müliain Jesús atumawaa. Kojutusü maʼin nümüin naapüin Jehová chi nüchonkai süpüla outaa saaʼu saainjala wayuu, sutumajee tia nuʼwanajeʼerüin nukuwaʼipa jee woutiisaka nia.

PÜKAALINJA NIA SÜPÜLA NIYAAWATÜIN SAAʼU TÜ KASA NAAʼINMAAINJATKAT MAʼIN

10. ¿Kasa naainjaka Jesús süpüla naaʼinmaainjatüin tü aküjaakat pütchi na nikirajüinkana? (Lucas 5:5-11; piirakaa sümüin tü ayaakuaakat).

¹⁰ Nayaawata aaʼulu na palajanakana nikirajüin Jesús niain chi Mesías aküjünakai achiki paala, nnojotpejeʼe nayaawatüin saaʼu naaʼinmaainjatüin maʼin tü aküjaakat pütchi. Wanaa sümaa nuunejaanüin Pedro nümaa Andrés nutuma Jesús süpüla nümaataralin naya sünain aküjaa tü pütchikat, eetüjülia nakalia sünain oushikajawaa süchiirua nukuwaʼipa Jesús (Mat. 4:18, 19). Santiago nümaa Juan aʼyataashii naya sünain olojoo jime süpüla noiküinjatüin joo shia mapa, anasü maʼin nakuwaʼipa sünain tia aʼyatawaakat (Mar. 1:16-20). Wanaa sümaa nüpütüin Pedro otta Andrés tü nakusuinkat, eesüjaʼa süpüla napütüin süpüshuaʼa tü kasa choʼujaakat sümüin napüshi sümaʼainruʼu noʼunuin nümaa Jesús. ¿Kasa nayaawata akajee naaʼinmaainjatüin maʼin tü aküjakat pütchi? Sutumajee naainjain Jesús wanee kasa pülasü neʼitaashaatain naaʼin sünain nükaalinjeenain naya Jehová sünain naapeerüin tü kasa choʼujaakat namüin (paashajeʼera Lucas 5:5-11).

11. ¿Kasa paaʼinrajatka süpüla katchinjatüin nunoula chi pikirajüinkai?

¹¹ Nnojotsü süpüla waaʼinrüin kasa pülasü maʼaka naaʼin Jesús, eepejeʼe süpüla waküjain nümüin chi wekirajüinkai naaʼinmajüneechin nutuma Jehová müleka naaʼinmaale tü niʼyataainkat nümüin. ¿Sotusüche paaʼin tü naainjakat Jehová püpüleerua puʼttaiwaʼaya sünain oʼunaa sünain tü outkajawaakat? Eeshijaʼa yootule pia nümaa chi pülaamainkai süpüla naapüinjatüin kaʼi pümüin süpüla puʼunuin sünain tü outkajawaakat. Püküja nümüin chi pikirajüinkai tü naaʼinrakat Jehová püpüleerua katchinka atuma punoula.

12. (1) ¿Jamüsü anakaʼa puunejaʼawaire na wawalayuukana pikirajapa chi pikirajüinkai? (2) ¿Kasa amaa paaʼinrüinjatka süpüla pükaalinjain chi pikirajüinkai süpüla naaʼinmaain niʼyataain nümüin Jehová? Püküja wanee sukuwaʼipa.

¹² Wane kasa aneetka atuma nunoula chi pikirajüinkai shia naapajüle süchiki tü naaʼinrakat waneinnua wawalayuu süpüla naaʼinmaain tü naʼyataainkat nümüin Jehová. Anashii puunejaʼawaire na wawalayuukana sünain ekirajawaa nümaa chi pikirajüinkai süpüla naküjainjatüin nümüin jamüin sukuwaʼipa süpüla nanoujainjanain jee kasa naaʼinraka süpüla naaʼinmaainjatüin tü naʼyataainkat nümüin Jehová. Anasü pükatarüle kaʼi süpüla pünajüin tü videokalüirua nümaa chi pikirajüinkai sünainkat tü pütchi «Wekirajaa sooʼomüin», «Pünaʼla sooʼomüin» suluʼujeekat tü karaloʼutakat Anainjatka atuma pukuwaʼipa waneepia. Pikirajaapa nümaa sünain ekirajaayaka 37 paashajaa süchiki tü jütüjakat süchiki tü videokot Naapeerü Jehová tü choʼujaakat wamüin.

PÜKAALINJA NIA SÜPÜLA NÜCHECHERÜIN NAAʼIN SOʼUNNAA MÜLIAA

13. ¿Kasa nüküjaka Jesús namüin na nikirajüinkana süpüla nachecherüin naaʼin neʼrapa müliaa?

¹³ Nüküjain Jesús kojuyatua namüin na nikirajüinkana naʼürüleena naya na wayuu kepiajiraakana namaa (Mat. 5:11; 10:22, 36). Nülüʼütpa Jesús süpüla outaa nüküjain namüin na nikirajüinkana neʼreenain müliaa sünainjee tü nanoulakat (Mat. 24:9; Juan 15:20; 16:2). Süpüla ayatüinjanain naya sünain aküjaa pütchi nüküjain Jesús namüin eejüinjatüin naaʼin suulia peʼipaain naya namaa na naʼünüükana.

14. ¿Kasa paaʼinrajatka süpüla pükaalinjain chi pikirajüinkai süpülapünaa süpüleeruaanüin naaʼin? (2 Timoteo 3:12).

¹⁴ Washata nukuwaʼipa Jesús, waküja nümüin chi wekirajüinkai tü naaʼinrajatkat nnojorüle anashiin namüin na wayuu niʼyataajiraakana amaa, na naʼaleewainyuukana jee nayale na nüpüshikana nunoujain nünain Maleiwa (paashajeʼera 2 Timoteo 3:12). Eeshijaʼa meeʼerapalaale nia natuma na wayuu niʼyataajiraakana amaa sükajee niiʼiratüin tü nukuwaʼipakat. Eeshijaʼa süpüla mojuin nanüiki waneinnua nüpüshi sünainjee tü nunoujakalü anain. Püküja nümüin chi pikirajüinkai süchiki süpüleeruaaneerüin naaʼin saaʼujee nunoula, mayaa yapeechi nia süpüla nütüjaain süpüleerua nünüiki jee tü naaʼinrüinjatkat.

15. ¿Kasa paaʼinrajatka süpüla pükaalinjain chi pikirajüinkai mojushiire namüin na nüpüshikana tü nunoujakalü anain?

¹⁵ Mojushiire sümüin nüpüshi chi pikirajüinkai tü nunoujakalü anain pükaalinja nia süpüla niyaawatüin saaʼu jamüin maka nakuwaʼipa nümüin. Eesüjaʼa jülüjale naaʼin nikirajünüin shiiʼiree nimeejünüin jee shiale sutuma naapajüin alawaa nachiki na Aküjaliikana pütchi. Tia shia tü alatakat nümüin Jesús, eeshii noʼutku na nüpüshikana jülüjakana aaʼin mamainnain nia (Mar. 3:21; Juan 7:5). Püküja nümüin chi pikirajüinkai nnojoluin anain naashichijaamaatüin jee anainjatüin sukuwaʼipa nanüiki namüin na nüpüshikana.

16. ¿Kasa paaʼinrajatka süpüla pükaalinjain chi pikirajüinkai süpüla anainjatüin sukuwaʼipa nünüiki nüküjapa süchiki tü nunoujakalü anain?

¹⁶ ¿Kasa naaʼinrajatka wanee wayuu ekirajaakai sünain tü Bibliakat nütüjaweere saaʼu wanee nüpüshi süchiki tü nunoujakalü anain? Nnojotsü anain nüküjale wainma kasa nümüin chi nüpüshikai suulia nukulajaain aaʼin. Püküja nümüin chi pikirajüinkai anain nnojoire kamaʼain nia sünain yooto süchiki tü nunoujakalü anain jee ayaawatünüinjatüin saaʼu nünüiki. Naaʼinrüle tia, eeshi süpüla nütüjaweein saaʼu sooʼomüin chi nüpüshikai süchiki tü sümakat tü Bibliakat (Col. 4:6). Eesiaʼaya süpüla nüküjain namüin na nüpüshikana süchiki jw.org. Müle shia nutuma eeshi süpüla nachajaain pütchi süchiki tü kasa kamalainkat namüin jee soʼu tü kaʼi anakalü oʼu shia namüin.

17. ¿Kasa eeka süpüla pikirajüin akajee chi pikirajüinkai nüsakinnüle nachiki na aküjaliikana pütchi nüchiki Jehová? (Piirakaa sümüin tü ayaakuaakat).

¹⁷ Piiʼiyata nümüin chi pikirajüinkai tü pütchikat süsakirawaika anain wayuu nachiki na aküjaliikana pütchi nüchiki Jehová suluʼuka jw.org süpüla nütüjaainjatüin saaʼu tü sukuwaʼipainjatkat nünüiki nüsakinnapa natuma na nüpüshikana jee na wayuu aʼyataajiraakana nümaa (2 Tim. 2:24, 25). Sajaʼttiamüin wanee ekirajaaya suluʼu tü karaloʼutakat Anainjatka atuma pukuwaʼipa waneepia eesü wanee pütchi makalü anülia «Eeshii wayuu eekai namüin». Pümaa nümüin chi pikirajüinkai nuuʼulaküle tü nünüikinjatkat nusoutapa namüin na wayuu asakirakana nia süchiki tü nunoujakalü anain. Eere wanee kasa nunoutuinjatka sünain tü nünüikikat püküja shia nümüin. Paaʼinrüle tia nümaa, yalayaleerü naaʼin sünain asoutaa saaʼu tü nunoujakalü anain.

18. ¿Kasa paaʼinrajatka süpüla pütütüleʼerüin naaʼin chi pikirajüinkai süpüla nüküjain pütchi namaa na wawalayuukana? (Mateo 10:27).

¹⁸ Nuluwataain Jesús na nikirajüinkana süpüla naküjainjanain pütchi sümüin wayuu maʼleekalia (paashajeʼera Mateo 10:27). Nuʼttamaatüle sünain aküjaa pütchi chi pikirajüinkai namaa na wawalayuukana kooʼomüinjeerü maʼin nunoula sünain nükaalinjeechin nia Jehová. ¿Kasa paaʼinrajatka süpüla pütütüleʼerüin naaʼin chi pikirajüinkai süpüla nüküjain pütchi namaa na wawalayuukana? Jamüsüjaʼa süküjünüle süchiki wanee campaña sünain tü outkajawaakat anashi yootule pia nümaa chi pikirajüinkai süchiki tü naaʼinrajatkat süpüla nüküjain pütchi namaa na wawalayuukana. Pümaa nümüin mapüleejeerü nümüin nüküjain pütchi soʼunnaa wanee campaña. Wanee kasa eeka süpüla naaʼinrüin chi pikirajüinkai shia naashajaain namaa na laülaashiikana süpüla nikirajüin sünain tü outkajawaakat Wakuwaʼipa otta Waʼyataain nümüin Maleiwa. Naaʼinrüle tia, atüjeechi nia aküjaa pütchi sümaa yalayalain naaʼin.

PÜKAALINJA CHI PIKIRAJÜINKAI SÜPÜLA NIYAAWATÜIN SAAʼU NUUNTEERÜIN NIʼYATAAIN NÜMÜIN JEHOVÁ

19. (1) ¿Kasa jülüjaka naaʼin Jesús nachiki na nikirajüinkana? (2) ¿Kasa waaʼinrajatka süpüla washatüin nukuwaʼipa?

¹⁹ Süpülapünaa nuʼunuin nüchikuaʼa Jesús sirumatuʼumüin nüküjain namüin na nikirajüinkana nüleʼejüinjachin nüchikuaʼa süpüla nümaainjanain naya. Nnojotsü nayaawatüin aaʼu na nikirajüinkana Jesús tü nümakat namüin. Nütüjaa aaʼu Jesús noushikajaweein süchiirua nukuwaʼipa jee talateein naaʼin Jehová natuma (Juan 14:1-5, 8). Nütüjaa aaʼulu Jesús nnojoleerü nayaawatamaatüin saaʼu na nikirajüinkana süpüshuaʼa tü nüküjakat namüin, maʼaka saaʼin süchiki noʼunuinjanain chaa iipünaa nümaa (Juan 16:12). Washata nukuwaʼipa Jesús waküja namüin na wekirajüinkana nounteerüin naʼyataain nümüin Jehová.

20. ¿Kasa saaʼinraka wanee wawala chejeʼewat Malaui sutuma sütüjaain saaʼu shiiʼirateein sukuwaʼipa tü shikirajüinkat?

²⁰ Anasü jülüjale waaʼin niiʼirateein nukuwaʼipa chi wekirajüinkai. Jülüjataa waaʼin sukuwaʼipa Leila wanee wawala chejeʼewat Malaui. Ekirajünüsü wanee wayuu sünain tü Bibliakat sutuma, Lina sünülia. Católicapuʼusü shia. Nekirajaapa sünain ekirajaayakat 14 suluʼujee tü karaloʼutakat Anainjatka atuma pukuwaʼipa waneepia süsakirüin Lina tü shikirajüinkat süchiki anale sümaʼanale shiyaakua maleiwayaasü süpüla suʼwaajüinjachin Maleiwa. Nnojotsü anain sümüin Lina süsakinnüin süchiirua tia jee jashichisü shia. Müsüjeseʼe sümaka: «Nnojo püküjain tamüin tü taaʼinrüinjatkat, taneeküin shia süka taaʼin tamüiwaʼa». Jülüjasü saaʼin Leila suuʼulaajeerüin Lina suulia ekirajawaa sünain tü Bibliakat, ayatapejeʼe ekirajünüin shia sutuma. Sütüjaa aaʼu Leila eein süpüla shiyaawatüin mapa tü shikirajüinkat nnojoluin anain suʼwaajüin shiyaakua maleiwayaasü. Kojuya kashi süchikijee, süsakirüin Leila tü shikirajüinkat sünain tü pütchi suluʼuka ekirajaayakat 34, tü makat mayaa: «¿Kasa anasü piʼraka sünainjee pikirajaain sünain tü Bibliakat jee piʼraajüin nukuwaʼipa Jehová?». Süküjain Lina süchiki wainma kasa anasü sütüjaaitpakalü aaʼu maʼaka saaʼin nayoutuin na Aküjaliikana pütchi tü kasa mojukat nümüin Maleiwa. Suuʼulaaka mapa Lina suulia suʼwaajüin shiyaakua maleiwayaasü jee woutiisaka shia.

21. ¿Kasa paaʼinrajatka süpüla pükaalinjain chi pikirajüinkai süpüla nüneeküin niʼyataain nümüin Jehová?

²¹ Mayaainjeʼe niain Jehová chi Miyoʼukai atuma sunoula wayuu, wakaalinjainjana na wekirajüinkana süpüla naʼyataainjanain nümüin Jehová (1 Cor. 3:7). Nnojoishii neʼe wekirajüinjanain naya sünain tü keeʼireekat naaʼin Jehová napüleerua, wakaalinjainjana naya süpüla kooʼomüinjatüin naalin Jehová napüla. Wakaalinjainjana naya süpüla nayaawatüin saaʼu tü kasa naaʼinmaainjatkat maʼin jee kanoulainjanain maʼin naya neʼrapa müliaa. Waküjale nümüin chi wekirajüinkai nuunteerüin niʼyataain nümüin Jehová kooʼomüinjeerü nunoula süpüla niʼyataainjachin nümüin Jehová.