Nia Jehová atkaaka wapüleerua

Soʼu tü juyakat 1999, achekajünüsü wainma nneerü sümüin tü Weteet chakat Francia natuma na süʼlaülashiikana mma saaʼujee tü nneerü nasülajakat na wawalayuukana soʼujee tü juyakat 1993 sünainmüin 1996. Asoutüshiiajee waya naaʼu na wawalayuukana suluʼu tü laülaapia chakat Francia. Eetaayaai nakaalinjain waya. Nasütaka na süʼlaülashiikana mma sünainjee tü sünneetsekat Weteet 4 miyoone 500 euros (6 miyoone 300 dólares tia). Shiaka wachuntuin sümüin Tribunal Europeo sunoutuin sukuwaʼipa tia makat. Suchuntunaka wamüin yootuin waya palajana namaa na neʼipajanakana na süʼlaülashiikana mma suʼupala wanee wayuu aluwataanaka sutuma Tribunal Europeo.

Süpüleeruainjatü waaʼin waaʼinruʼu tia wayuukot süpüla wawalaajüin süpüshi tü nneerü nachekajakat na süʼlaülashiikana mma. Watüjaapejeʼe saaʼu nnojoluin anain wawalaajüle tia nneetkat, jama nasülajüin shia na wawalayuukana süpüla tü aʼyatawaakat nümüin Jehová. Nnojotsü napülajatüin shia na süʼlaülashiikana mma (Mat. 22:21). Mayaainjeʼe nnojoluin watüjaain saaʼu nakaalinjainjanale waya, waaʼinraka tü sümakat Tribunal Europeo.

Yootoko waya namaa suluʼu wanee kuatta miyoʼuka maaʼin suluʼuka Tribunal Europeo. Shiaka saaʼinrüin tü wayuukot tü jülüjakat waaʼin paala. Anasü saaʼin jümüin nawalaajüle na aküjaliikana pütchi nüchiki Jehová tü nneerü nachuntakat na süʼlaülashiikana mma. Süntajaaka joo wekiiruʼumüin wasakirüin shia, wamaka sümüin: «¿Pütüjaa aaʼulu süsütünüitpain woulia 4 miyoone 500 euros natuma na süʼlaülashiikana mma?».

Ainküsü saaʼin tia wayuukot saapapa tia, jama nnojoluin sütüjaain saaʼu tia. Jashichika maʼin shia süküjünapa sümüin natuma na neʼipajanakana na süʼlaülashiikana mma shiimain tia, süchiaaka naya jee süküjaka wamüin nnojoluin choʼujaain yootuin waya süchiki tia. Ponoshootosü waaʼin tia, wayaawata aaʼu niain Jehová oʼuniraka sukuwaʼipa tia süpüla anainjatüin sukuwaʼipa tü wakumajakalü akuwaʼipa. Talatashaatasü maʼin waaʼin soʼu tia.

Juunioʼu 30 soʼu 2011 anasü namüin napüshuaʼaleʼeya na suluʼukana Tribunal Europeo nakaalinjain waya. Naküjaka nnojoluin choʼujaain nachekajüin na süʼlaülashiikana mma tia nneetkat jee naluwataaka naya süpüla naleʼejeerüinjatüin süchikuaʼa tü nneerü nasütakat noulia na Aküjaliikana pütchi sümaʼaleeya süchon tü nneetkat. Ayatüshiʼiya anain nakuwaʼipa na wawalayuukana chejeʼewaliikana Francia maaʼulu yaa sutuma tü kasa aneekünakat soʼu tia. Maʼaka nükanajüin David Goliat sükajee wanee ipachon neʼe anasü wakuwaʼipa sutuma tü pütchi antajaakat wekiiruʼumüin süpüla wasakirüin sünain. Wayaawataka saaʼu niain Jehová atkaaka wapüleerua (1 Sam. 17:45-47).

Wainmatua nükaalinjain waya Jehová. Mayaainjeʼe süpüleeruaanüin waaʼin natuma shikiipüʼü iküleesia jee natuma político eʼnnaajünaka maʼin, akaalinjünüshii waya maʼaka saaʼin 1.225 wakua wachuntapa kaalinwaa suluʼu 70 mma jee suluʼupünaa kojuyasü laülaapia sainküinpünaa mmakat süpüshuaʼa. Sutuma tia taashisü wakuwaʼipa süpüla waʼwaajüin Jehová, waküjain pütchi jee waneeküin nnojoluin sünainpünaain waya tü miʼiraa aainjünakat shikiira wanee mma jee wayoutuin shiʼitaanüin isha wanain.

Anasü takuentajüle jümüin jamakuwaʼipalüin süpüla naʼakain taya na wayuu asoutakana naaʼu na wawalayuukana chaa Europa, jama chajachin taya aʼyataain chaa eejeerüin sukumajüin naʼyataain na aküjaliikana pütchi nüchiki Jehová chakat Nueva York (Estados Unidos).

NAAʼINMAASÜ MAʼIN NA KACHOOINKANA TAYA NAʼYATAAIN NÜMÜIN JEHOVÁ

George nünülia chi tashikai otta Lucille sünülia tü teikat. Agraduaajüshii naya suluʼujee tü Ekirajüleekat Galaad sünain tü ekirajawaakat 12 jee aluwataanüshii naya Etiopíamüin. Shiasaʼa soʼu 1956 joʼuushi taya, Philip tanülia natuma maʼaka naaʼin «Felipe, chi wayuu eʼikajüikai tü pütchi anakat maʼin» (Aluw. 21:8). Wanee juya süchikijee tia, apülajünüsü suluʼu tia mmakat tü waʼyataainkat nümüin Jehová. Sotusü taaʼin woʼunawalin sünain tü outkajawaakat jee waküjain pütchi nojuunaluʼu na pulusiiakana. Kamalainshaatasü maʼin tamüin tia. Sotusü taaʼin tia eereje tepichin taya wanaa sümaa tia. Shiasaʼa soʼu 1960, ojuʼinajeʼennüshii waya suluʼujee tia mmakat.

Wakolojooka Wichitamüin (Kansas, Estados Unidos). Ayatüsia naaʼinmaain maʼin na wayuu kachooinkana taya tü naʼyataainkat nümüin Jehová jee anasü maʼin nakuwaʼipa napüleerua na wawalayuukana. Wayuu kanoulashi chi tashikai jee tü teikat. Müshiijeseʼe nekirajüin taya, nekirajüin Judy tü epayaakat otta Leslie chi temüliakai süpüla kanoulainjanain waya. Joʼuushii waya wapüshuaʼa chaa Etiopía. Woutiisashi taya soʼu 13 touyase. Apünüin juya süchikijee tia, wakolojooka Arequipamüin, Perú eere choʼujaain Aküjalii pütchi.

Soʼu 1974, wanaa sümaa 18 touyase aneekünüshi taya namaa pienchishii wawalayuu süpüla pürekutsoolüinjanain waya pesiaat. Aluwataanüshii waya suluʼumüin wanee mma uuchoʼusü maʼin chakat Andes. Wayainjana palajanaka aküjain pütchi chayaa. Naʼakajee na wayuu waküjakana amüin pütchi chayaa eeshii na aashajaakana quechua otta aymara. Oʼunawaishii waya suluʼu wanee kemion jee watunkule shia. «Anuwa miyoʼu» müsü sünülia watuma süka miyoʼuin maʼin shia. Talatüsü taaʼin sotopa taaʼin tekirajapuʼuin na wayuu aashajaakana quechua otta aimara süchiki najaʼttirüinjatüin Jehová tü müliaakat, tü ayuuliikat jee tü outaakat (Apoc. 21:3, 4). Wainma wayuu aapaakana sümaa tü pütchi süchikikat nuluwataainjachin Maleiwa.

AʼYATAASHI TAYA EEJEERE SUKUMAJÜNÜIN TÜ WAʼYATAAINKAT

Soʼu 1977 alapalaashi naaʼu na wawalayuukana chaa Perú chi wawalakai Albert Schroeder, noʼutku nia na Laülaashii Jülüjakana Aaʼin na Aküjaliikana pütchi. Nüküjaka tamüin anain tepirajüle tü karaloʼutakat süpüla taʼyataainjachin suluʼu tü Weteet eejeere sukumajüin tü waʼyataainkat. Taaʼinraka tü nümakat chi wawalakai. Ounejaanüshi taya juunioʼu 17 soʼu 1977 süpüla taʼyataainjachin suluʼu tü Weteet chakat Brooklyn. Aʼyataashi taya sünain Departamento de limpieza otta Mantenimiento soʼunnaa pienchi juya.

Juunioʼu soʼu 1978 chajachi taya Nueva Orleans (Luisiana) sünain wanee outkajawaa miyoʼu eere nantüin wawalayuu naatakana oumain. Teʼraajaka chayaa Elizabeth Avallone, kanoulashii maʼin na wayuu kachooinkana shia. Pienchi juya sünain pürekutsoolin rekulaat shia wanaa sümaa tia jee aʼyataweesü shia waneepia nümüin Jehová. Yootojiraʼawaishii waya jee wamüraajiraaka. Kasaatshii waya mapa oʼutuupüroʼu 20 soʼu 1979 jee waʼyataaka piamaleʼeya suluʼu Weteet.

Outkajaashii waya namaa na wawalayuu aashajaakana alijunaiki chaa Brooklyn. Aishii maʼin waya napüla na wawalayuukana. Naatawaishii na wawalayuu woutkajaʼawaikana amaa jee kamaneejüshii naya wamüin sümaa natütüleʼerüin waaʼin süpüla ayatüin waʼyataain suluʼu Weteet. Laülaapa na wayuu kachooinkana waya aaʼinmajünüshii naya natuma na wawalayuukana, na wapüshikana jee na waʼaleewainyuukana. Waapüin maʼin tü analuʼutkat namüin saaʼujee naaʼinrüin tia wapüleerua.

AʼYATAASHI TAYA SULUʼU DEPARTAMENTO DE ASUNTOS LEGALES

Eeʼiratalaa müsü tü taʼyataainkat suluʼu Weteet. Aneekünüshi taya süpüla taʼyataainjachin suluʼu Departamento de Asuntos Legales, eneeroʼujatü tia soʼu 1982. Apünüin juya süchikijee tia, aluwataanüshi taya suluʼumüin wanee universidad süpüla abogadoinjachin taya. Eesü wanee kasa kamalainka maʼin tamüin jee wekirajaaka maʼin anain chaiwaʼaya taya suluʼu universidad, shia süchiki anain nakuwaʼipa watta naalii wayuu yaa Estados Unidos jee suluʼu waneirua mma sutuma tü kasa nakumajakat akuwaʼipa na Aküjaliikana pütchi laülaapialuʼu.

Aneekünüshi taya süpüla nekiipüʼüinjachin taya na wawalayuu aʼyataakana suluʼu Departamento de Asuntos Legales. 30 touyase wanaa sümaa tia, soʼujatü tia tü juyakat 1986. Kojutusü maʼin tamüin saapünüin tamüin tia aʼyatawaakat, jama tepichiyülin maʼin taya taaʼinruʼu, shapaapejeʼe taaʼin süka kaawain maʼin tia aʼyatawaakat.

Agraduajüshi taya suluʼujee universidad soʼu tü juyakat 1988. Amojujaasü takuwaʼipa nümaa Jehová sümaa nnojoluin tayaawatüin saaʼu. Nikirajaapa wanee wayuu suluʼu universidad kachiiruasü naaʼin washirüü jee yaletajaasü naaʼin. Akalajasaʼa sükaalinjain taya Elizabeth süpüla katchinjatüin tanoula süchikuaʼa shiʼipaʼaya. Tayaawatüitpa aaʼu shiain anain atuma nukuwaʼipa wanee wayuu aleewale nia nümaa Jehová, aire nia nüpüla jee aire nüpüla na wawalayuukana nnojotsü shiain saaʼujee nütüjain maʼin.

TAASHISÜ WAKUWAʼIPA SÜPÜLA WAKÜJAIN TÜ PÜTCHI ANAKAT MAʼIN

Kettaapa tatuma tü universidakat aʼyataashi maʼin taya sümaa Weteet süpüla wasoutuinjanain naaʼu na wawalayuukana laülaapialuʼu süpüla anainjatüin sukuwaʼipa naʼyataain nümüin Jehová. Talatüsü taaʼin sümaa tü taʼyataainkat, eepejeʼe kaʼi kapüleeka oʼu tamüin süka suʼwanajaʼalaa sümüin tü aʼyatawaa wakumajakalü akuwaʼipa. Jamüshiijaʼa waya paala achuntapuʼushii waya nneerü saaʼu tü karaloʼuta weitajakat. Shiasaʼa soʼu 1991 suchuntaka wamüin Weteet süpüla shiiʼiratünüinjatüin sukuwaʼipa tia. Soʼujeʼereeya tia nnojoishii waya achuntuin nneerü saaʼu tü karaloʼuta weitajakat. Sutuma tia, mapüleeitpa naʼyataain na wawalayuu suluʼukana Weteet jee suluʼu tü outkajaaleekalüirua jee nnojotsü süpüla nachuntuin maʼin nneerü na süʼlaülashiikana mma sümüin Weteet. Eeshii na wawalayuu shapaakana aaʼin süka nnojoluinjatüin nneerü jee nnojoluinjatüin anain sukuwaʼipa tü aküjaakat pütchi naaʼinruʼu. Nnojotpejeʼe müin shia. Akooʼomüinraashii maʼin na aʼyataakana nümüin Jehová maaʼulu suulialeʼeya na eejanakana soʼu tü juyakat 1990 jee ayatüshii waya eitajüin karaloʼuta sümüin wayuu sümaa nnojoluin wachekajüin saaʼu. Mayaainjeʼe wainmain tü kasa eeʼiratünaakalü akuwaʼipa sünain tü waʼyataainkat nümüin Jehová anasü sukuwaʼipa tia süka nükaalinjain waya Jehová nükajee chi achepchiee oonookai jee kekiikai maʼin (Éx. 15:2; Mat. 24:45).

Wainma kasa anoutunaka akuwaʼipa laülaapialuʼu saaʼujee anain maʼin nakuwaʼipa na wawalayuukana. Nnojotsü shiain saaʼujee natüjain maʼin na abogadokana. Jamüsüjaʼa soʼu 1998, oʼunushii apünüinshii wawalayuu sümaa naʼwayuuse chaa Cuba sünain kojuyasü outkajawaa miyoʼu. Noʼutku naya na Laülaashii Jülüjakana Aaʼin na Aküjaliikana pütchi. Alanaʼaleesia maʼin namüin na süʼlaülashiikana mma kamaneein jee kojutuin naya namüin na wawalayuukana suulialeʼeya tü wamakat süchiki jamüin nnojoliika waya sünainpünaain política.

Eepejeʼe kaʼi choʼujaakalü oʼu woʼunuinjanain laülaapialuʼu süpüla waashajaain noʼupala na süʼlaülashiikana mma süpüla süküjünüinjatüin tü pütchi anakat maʼin (Filip. 1:7). Jamüshiijaʼa na süʼlaülashiikana mma chakana Europa otta Corea del Sur, kakaliashii naya ichein süchiirua surulaalüinjanain na wawalayuukana. Müshiijeseʼe nataʼünüin 18 miit wawalayuu chaa Europa otta alatüshii suulia 19 miit ataʼünaka chaa Corea del Sur sutuma nayoutuin surulaalüin naya.

Anashaatasü maʼin tü alatakat juulioʼu 7 soʼu 2011. Süikaleʼerüin wanee pütchi Tribunal Europeo de Derechos Humanos. Bayatyan contra Armenia sünülia natuma, eere naluwataain na süʼlaülashiikana mma chakana Europa süpüla nooʼulaainjanain naneeküin na wayuukana süka naaʼin namüiwaʼa wanee aʼyatawaa naata suulia surulaalüin naya. Shiasaʼa kakalia mapa wanaawasü tü süneekakat Tribunal Constitucional chakat Corea del Sur, juunioʼu 28 soʼu 2018. Nnojoliire waneepiain nümaa Jehová na wawalayuu jimaʼalii chakana chayaa nnojotsüjeʼe anoutunuin sukuwaʼipa tia.

Aʼyataashii maʼin na wawalayuukana chaa eejeere sukumajünüin tü waʼyataainkat jee na suluʼukana Departamento de Asuntos Legales süpüla anainjatüin nakuwaʼipa na wawalayuukana sünain aʼyatawaa nümüin Jehová. Kojutusü maʼin tamüin süka tasoutuin naaʼu na wawalayuu apüleeruaanakana aaʼin saaʼujee nanoujain, mayaainjeʼe nnojoluin sunoutunuin akuwaʼipa wanee kasa laülaapialuʼu naapajüin nüchiki Jehová na süʼlaülashiikana mma (Mat. 10:18). Napüshuaʼa na suluʼukana tü laülaapiakat naashajeʼerüin tü pütchi suluʼujeekat tü Bibliakat washajaka suluʼu tü karaloʼuta wanüikimaajatkat. Sutuma tia eeshii wayuu eʼraajakana nakuwaʼipa na aküjaliikana pütchi nüchiki Jehová jee nayaawata aaʼu nanoujain tü sümakat tü Bibliakat otta eeshii na anoujakana mapa wanaa wamaa.

ANASIA MÜIN PUTUMA JEHOVÁ

Kojuyasü tü Weteet taʼyataakalü amaa soʼunnaa tü 40 juya alatüitpakat süpüla takaalinjain na wawalayuukana sünain anoutaa wanee kasa laülaapialuʼu noʼupala na süʼlaülashiikana mma. Aishii tapüla na wawalayuu aʼyataakana suluʼu Departamento de Asuntos Legales sainküin mmakat süpüshuaʼa jee na aʼyataakana eejeere sukumajünüin tü waʼyataainkat jee kojutushii naya tamüin. Wainma kasa anasü teʼrakat nutuma Jehová jee talatashaatasü taaʼin sutuma tia.

Soʼunnaa tü 45 juya alatüitpakat waneepiasü tamaa Elizabeth sünain akaalinjaa taya. Saaʼinrüin tia mayaainjeʼe ayuulin shia jee matchinsü saaʼin. Kojutushaatasü tamüin tü saaʼinrakat tapüleerua.

Tayaawata aaʼu sümaa Elizabeth eein süpüla wachecherüin waaʼin soʼunnaa tü kasa alatakat wamüin jee wountuin kasa süpüshuaʼa sutuma nükaalinjain waya Jehová, nnojotsü shiain saaʼujee watüjain maʼin. Maʼaka nümüin David nia Jehová katchinka atuma naaʼin na aʼyataakana nümüin (Sal. 28:8). Shiimain niain Jehová atkaaka wapüleerua.