¿Atüjaichiche pia süpüleerua pukuwaʼipa?

1. ¿Kasa tü talatakalü atuma naaʼin wanee wayuu?

¿KASA tü talatakalü atuma naaʼin wanee wayuu? Talatüsü naaʼin süka jülüjain naaʼin tü kasa anasü naapakat Jehová nümüin. Anasü naaʼin sümaa tü kasa eekat nümaʼana jee nnojoishi jashichikuʼu müin nia. Jamüshijaʼa wanee anoujashi shia nüchajaain sukuwaʼipa süpüla nukooʼomüinrüin niʼyataain nümüin Jehová (Roma 12:1; 1 Tim. 3:1). Mayaainjeʼe nnojoluin saapünüin wamüin wanee aʼyatawaa keeʼireeka maʼin waaʼin suluʼu tü outkajaaleekat, ayatüinjatü talatüin waaʼin.

2. ¿Jameerü wakuwaʼipa nnojorüle talatüin waaʼin sümaa tü kasa eekat wamaʼana?

² Nnojorüle talatüin waaʼin sümaa tü kasa eekat wamaʼana, mojeerü sukuwaʼipa tü kasa waneekakat. Eeshii wayuu aʼyataakana maʼin süpüla nayaʼlajüin kasa nnojotka choʼujaain namüin. Eeshii waneinnua wawalayuu aʼluwajakana sutumajee wainmeein kasa namaʼana, eeshii na jülüjakana aaʼin nnojoluin mojuin naapaale tia nneetkat jama palirüin tü nneerü awalaajünaka namüin jee eeshii na jülüjakana aaʼin anain naapaale tia nneetkat süka naleʼejireerüin shia süchikuaʼa. Jaʼitairü palirüin wanee kasa nuʼluwajaka wanee wayuu, mojusü tia nümüin Jehová, jama mojutuin nünülia sünainjee (Prov. 30:9). Sutumajee nnojoluin saapünüin wanee aʼyatawaa namüin suluʼu tü outkajaaleekat eeshii na wawalayuu amalajaakana aaʼin jee akayalaashii naya nuulia Jehová (Gal. 6:9). ¿Jamüsüche eekaʼa süpüla naaʼinrüin tia wanee wayuu eekai nunoujain nünain Jehová? Eesüjaʼa sülatüle nümüin tia sutumajee nnojoluin talatüin naaʼin sümaa tü kasa eekat nümaʼana.

3. ¿Jamüsü sütütüleʼerakaʼa waaʼin tü sümakat Filipos 4:11, 12?

³ Eesü süpüla talatüin naaʼin na aʼyataashiikana nümüin Jehová sümaa tü kasa eekat namaʼana. Anuu tü nümakat chi aluwataaushikai Pablo: «Jama tatüjüichin süpüleerua takuwaʼipa jaʼitasü kasain alatüin tamüin» (paashajeʼera Filipos 4:11, 12). Mayaainjeʼe püreesain Pablo wanaa sümaa nüshajüin tia pütchikat ayatüsia talatüin naaʼin. Sünainjee nukuwaʼipa Pablo wayaawata aaʼulu eein süpüla talatüin waaʼin mayaainjeʼe sülatüin kasa wamüin. ¿Kasa waaʼinrüinjatka süpüla talatüin waaʼin maʼaka talatüin naaʼin Pablo? Wekirajaajeerü anain apünüinsü kasa süchiki tia.

ANA WAAʼIN SÜMAA TÜ KASA EEKAT WAMAʼANA

4. ¿Jamüsü talateetkaʼa waaʼin anale waaʼin sümaa tü kasa eekat wamaʼana? (1 Tesalónica 5:18).

⁴ Anale naaʼin wanee wayuu sümaa tü eekat nümaʼana, talateerü naaʼin (paashajeʼera 1 Tesalónica 5:18). Müle shia watuma nnojoleerü shapaain waaʼin saaʼu tü kasa choʼujaakat wamüin. «Nnojotsü yaakuʼu meein taya sünain tü aʼyatawaakat, anasü saapünüle tamüin wanee aʼyatawaa naata suulia». Nnojotsü anain müle wanüiki, anasü kojutule wamüin tü aʼyatawaa aapünakat wamüin jee waaʼinrüinjatü shia süka süpüshuaʼa waaʼin. Waapüinjatü analuʼut nümüin Jehová wachuntapa nümüin, waaʼinrüle tia jimateerü waaʼin nutuma, anuu tü sümakat tü Bibliakat: «Nnojoishi eein wanee wayuu ayaawatakai saaʼu tia jimataa aaʼin naapakat Maleiwa» (Filip. 4:6, 7).

5. ¿Kasa naainjaka Jehová napüleerua na israelitakana süpüla talatüinjatüin naaʼin? (Piirakaa sümüin tü ayaakuaakat).

⁵ Jülüjataa waaʼin nakuwaʼipa na israelitakana. Aʼyounalaashii naya sutumajee nasükajüin tü eküülü nekapuʼukat chaa Egipto (Núm. 11:4-6). Kapüleesü maʼin namüin kepiaa chaa isashiipaʼa. Talatüsüjeʼe naaʼin kojutule namüin süpüshuaʼa tü kasa naainjakat Jehová napüleerua jee sotule naaʼin nuluwataain paala Jehová poloo kasa mojusü nooʼomüin na egipciokana süpüla taashinjanain naya suulia achepchiain naya jee müliain naya natuma. Nojuʼitapa Egiptojee na israelitakana nachuntuin namüin na egipciokana kasa aainjuushi süka pülaata, aainjuushi süka ooro otta kuluulu (Éx. 12:35, 36). Neʼrüin sujutalaain tü Palaa Ishosükat sutuma nüpülain Jehová süpüla nountuin nalatüin waneemüin saʼata noulia na egipciokana. Eküshii maná nutuma Jehová chaa isashiipaʼa. Mayaainjeʼe naapüin Jehová tü choʼujaakat namüin, nnojotsü talatüin naaʼin sükajee nnojoluin kojutuin namüin tü kasa naapakat namüin.

6. ¿Kasa waaʼinrüinjatka süpüla anain waaʼin sümaa tü kasa eekat wamaʼana?

⁶ ¿Kasa waaʼinrajatka süpüla anain waaʼin sümaa tü kasa eekat wamaʼana? Talatüinjatü waaʼin sümaa tü kasa naapakat Maleiwa wamüin. Eesü süpüla washajüin süchiki apünüinsü kasa naapaka Maleiwa wamüin talataka atuma waaʼin (Lam. 3:22, 23). Tü wane kasa waaʼinrajatkat shia waapüin analuʼut nümüin Jehová jee namüin na waneinnua saaʼujee süpüshuaʼa tü kasa naaʼinrakat wapüleerua (Sal. 75:1). Aleewa waya namaa wayuu anakana aaʼin sümaa tü kasa eekat namaʼana jee washata nakuwaʼipa. Nnojorüle kojutuin namüin na waʼaleewainkana tü kasa eekat namaʼana eesü süpüla washatüin nakuwaʼipa (Deut. 1:26-28; 2 Tim. 3:1, 2, 5). Kojutule wamüin tü kasa aainjünakat wapüleerua, nnojoleerü amalajaain waaʼin sutuma nnojoluin wainmain kasa wamaʼana.

7. ¿Kasa saaʼinraka Aci süpüla talatüinjatüin saaʼin?

⁷ Jülüjataa waaʼin sukuwaʼipa wanee wawala kanüliaka Aci, chejeʼewat shia Indonesia. Anuu sünüiki: «Soʼunnaa tü ayuuliikat COVID 19, taʼwanajireʼerüin sukuwaʼipa tü alatakat tamüin sümaa tü alatakat namüin waneinnua wawalayuu, sutumajee tia, nnojotsü talatüin taaʼin» (Gal. 6:4). ¿Kasa saaʼinraka Aci süpüla suʼwanajeʼerüin tü jülüjakat saaʼin? Müsü sünüiki: «Jülüjasü taaʼin süpüshuaʼa tü kasa anasü teʼrakat nutuma Jehová otta tü kasa anasü eekat sutuma taʼyataain nümüin Jehová namaa na wawalayuukana. Taapaka tü analuʼutkat nümüin Jehová sutumajee tia, anakalaka taaʼin jee talatüsü taaʼin». Anasü sotule waaʼin sukuwaʼipa tü wawalakat nnojorüle talatüin waaʼin sutuma wanee kasa alataka wamüin.

NNOJO YALETÜIN WAAʼIN

8. ¿Kasa alataka nümüin Baruc?

⁸ Nnojotsü talatüin naaʼin Baruc chi aʼyataakai niʼipajee Jeremías sutumajee tü jülüjakat naaʼin. Akaalinjünüshi Jeremías nutuma süpüla nüküjain tü alatajatkat namüin na israelita eʼrüliikana wayumüin nümüin Jehová. Ooʼulaashi Baruc shiʼipaʼaya suulia naaʼinmaain maʼin tü nüchekakat Jehová nüpüleerua, shia jülüjaka neʼe naaʼin tü nukuwaʼipakat nümüiwaʼa otta tü nüchekakat. Anuu tü nümakat Jehová nümüin Baruc nükajee Jeremías: «Kachiiruasü paaʼin tü kasa anakat poʼuluʼu. Puuʼulaa suulia kachiiruain paaʼin tia» (Jer. 45:3-5). Müshi nümakai aaʼin Jehová nümüin: «Talata paaʼin sümaa tü piʼyataainkat tamüin». Naapa amaat Baruc tü nümakat Jehová nümüin jee ayatüshia nia aleewain nümaa.

9. ¿Kasa watüjaka sünainjee tü sümakat 1 Corinto 4:6, 7? (Piirakaa sümüin tü ayaakuaakat).

⁹ Eesüjaʼa jülüjale naaʼin wanee wawala saapünüinjatüin wanee aʼyatawaa nümüin suluʼu tü outkajaaleekat sutuma nütüjain maʼin, sutuma niʼyataain maʼin süchiirua jee sükajee kakaliaichin nia aʼyataain nümüin Jehová. Nnojorüle saapünüin tia aʼyatawaakat nümüin chi wawalakai, ¿kasa naaʼinrajatka suulia niyüülajüin? Anasü jülüjale naaʼin tü nüshajakat chi aluwataaushikai Pablo suluʼu 1 Corinto 4:6, 7 (paashajeʼera). Nnojotsü wountuin waaʼinrüin tü waʼyataainkat nümüin Jehová sutuma watüjain maʼin. Wountuin shia süka nükaalinjain waya Jehová jee kamaneein maʼin nia wamüin (Roma 12:3, 6; Éf. 2:8, 9).

10. ¿Kasa waaʼinrajatka suulia yaletajüin waaʼin?

¹⁰ Washatüle nukuwaʼipa Jesús nnojoleerü yaletüin waaʼin. Mayaainjeʼe nüchoin niain Maleiwa jee saapünüin laülawaa nümüin nuʼlojooin nooʼui na nikirajüinkana. Anuu tü nüshajakat chi aluwataaushikai Juan: «Sutuma nütüjaain saaʼu Jesús laülaain nia nutuma chi Nüshikai saaʼu kasa süpüshuaʼa otta nütüjaain saaʼu nümaʼanajeejachin nia Maleiwa jee nüleʼejüinjachin nümaʼanamüin [...], nuʼlojooka nooʼui na nikirajüinkana» (Juan 13:3-5). Nnojotsü jülüjain naaʼin Jesús nayainjanain na nikirajüinkana oʼlojuin nuuʼui niakai. Nnojotsü jülüjain naaʼin kapülainjachin maʼin nia atumawaa sutumajee nüchoin nia Maleiwa (Luc. 9:58). Anasü washatüle nukuwaʼipa Jesús, talatüsü naaʼin waneepia sutuma nnojoluin yaletüin naaʼin (Juan 13:15).

11. ¿Kasa naaʼinraka Dennis süpüla talatüin naaʼin?

¹¹ Jülüjataa waaʼin nukuwaʼipa wanee wawala Dennis nünülia, chejeʼewai nia Países Bajos. Nüshateein nukuwaʼipa Jesús, nnojotsü yaleteein naaʼin, kapüleepejeʼe shia nümüin. Müsü nünüiki: «Saapünüle wanee aʼyatawaa keeʼireeka taaʼin nümüin wanee wawala suluʼu tü outkajaaleekat, mojushiisü tamüin tia. Tayaawata aaʼu sükajee tia, yaletüin taaʼin. Eesü wanee etiqueta suluʼu JW Library^® eere tashajüin wanee pütchi suluʼujee tü Bibliakat süchiki tü pütchi jalouikat tamüin suulia yaletüin taaʼin. Taashajeʼerawalin shia süntajaala sümüle suluʼumüin taaʼin tü yaletaakalü aaʼin. Tadescargajawalin suluʼu tateleefonoin waneirua video süchiki nnojoluin anain tü yaletaakalü aaʼin jee taapajawalin shia.a Tayaawata aaʼu taʼyataain nümüin Jehová süpüla nuʼwaajünajachin, nnojotsü shiain süpüla tayain aʼwaajünüin sünainjee jee anajiraashii waya nümaa Jehová sükajee kamaneein maʼin nia wamüin». Wachajaa sukuwaʼipa süpüla nnojoluinjatüin yaletüin waaʼin. Müle sukuwaʼipa watuma nnojoleerü mojuin waaʼin nnojorüle saapünüin wamüin wanee aʼyatawaa suluʼu tü outkajaaleekat jee aleeweena maʼin waya nümaa Jehová (Sant. 4:6, 8).

JÜLÜJA WAAʼIN TÜ KASA ANASÜ EEJEETKAT MAPEENA

12. ¿Jeʼtsü tü kasa waʼatapajakat talataka atuma waaʼin? (Isaías 65:21-25).

¹² Jaʼitairü kasain maʼin tü alatakat wamüin maaʼulu talateena waya jülüjale waaʼin tü kasa anasü eejeetkat mapeena. Aküjünüsü suluʼu tü karaloʼutakat Isaías niyaawatüin saaʼu Jehová tü kasa alatakat wamüin maaʼulu. Nüküjapejeʼe wamüin najaʼlajeʼereerüin tü müliaa weʼrakat (paashajeʼera Isaías 65:21-25). Aneerü wepia, aneerü waaʼin sümaa tü waʼyataainkat jee aneerü tü eküülü wekakat suluʼupa waya tü paʼaraiisükat. Nnojoleena mmoluin waya seema sülatalaʼa sümüin kasa wamüin jee namüin wachonnii (Is. 32:17, 18; Ezeq. 34:25). Watüjaa aaʼulu shikeraajeerüin süpüshuaʼa tü kasa anasü nüküjatüjütkalia achiki Jehová.

13. (1) ¿Kasa tü alatawaikat wamüin maaʼulu? (2) ¿Jamüsü anakaʼa jülüjale waaʼin tü kasa anasü eejeetkat mapeena?

¹³ ¿Jamüsü anakaʼa jülüjale waaʼin tü kasa anasü eejeetkat mapeena? Shia süka kapüleejeerüin maʼin tü kasakalüirua «sülüʼütpa sükalia süpüla sajaʼttüin kasa mojusü» (2 Tim. 3:1). Wachecherüin waaʼin sutuma tü pütchi nüküjakat Jehová wamüin, katchinsü waaʼin nutuma jee nükaalinjain maʼin waya (Sal. 145:14). Sülatüle kasa mojusü wamüin anasü waaʼin sutumajee tü kasa anasü waʼatapajakat. Aʼyataashii maʼin waya süpüla waapüinjatüin tü kasa choʼujaakat sümüin wapüshi. Shiasaʼa paʼaraiisüpa tü mmakat nnojoleerü müliain maʼin waaʼin sünain achajawaa tü kasa choʼujaakat wamüin, jama naapeerüin shia wamüin Jehová (Sal. 9:18; 72:12-14). Mayaainjeʼe müliain maʼin waaʼin sutumajee wanee ayuulii aikat maʼin jee shiale mojuwaire waaʼin soto waaʼin nunouteʼerajatüin sukuwaʼipa tia Jehová, nnojoleerü tü ayuuliikat jee tü outaakat (Apoc. 21:3, 4). Jülüjale waaʼin tia, nnojoleerü mojuin waaʼin jee nnojoleena jashichikuʼu müin waya sutumajee tü kasa mojusü weʼrakat maaʼulu. Eeshii süpüla talatüin waaʼin jaʼitairü saainjünüin kasa mojusü wamüin, ayuuire waya, nünaajaale wanee wapüshi jee shiale sutumajee waneirua kasa alatakat. Talatüsü waaʼin maaʼulu süka motsoʼojeerüin sümaa tü müliaa weʼrakat maaʼulu jee najaʼttireerü shia Maleiwa mapeena (2 Cor. 4:17, 18).

14. ¿Kasa waaʼinrajatka süpüla katchin wanoula sünain tü kasa waʼatapajakat?

¹⁴ Talatüsü waaʼin sutuma tü kasa anasü waʼatapajakat nutuma Maleiwa. ¿Kasa waaʼinrajatka süpüla katchin wanoula sünain tia? Jülüja waaʼin müin chakai waaʼin suluʼu tü paʼaraiisükat. Shapaale maʼin waaʼin sutumajee manneetsein waya anasü jülüjale waaʼin nnojoleerü choʼujaain tü nneetkat suluʼu tü paʼaraiisükat. Mojule waaʼin sutumajee nnojoluin saapünüin wamüin wanee aʼyatawaa keeʼireeka waaʼin suluʼu tü outkajaaleekat anasü sotule waaʼin alanaʼaleejeeria tü kasa anasü weʼreetkat suluʼu tü paʼaraiisükat jee aʼyataajeena maʼin waya waneepia nümüin Jehová (1 Tim. 6:19). Eesüjaʼa nnojorüle jülüjain waaʼin tü kasa anasü eejeetkat mapeena sutumajee shapaain maʼin waaʼin. Talateetpejeʼe waaʼin jülüjale waaʼin tü naaʼinrajatkat Maleiwa mapeena suulia tü kasa alatakat wamüin maaʼulu.

15. ¿Kasa watüjaka sünainjee sukuwaʼipa Christa?

¹⁵ Jülüjataa waaʼin sukuwaʼipa Christa, nuʼwayuuseka Dennis, chi aküjünakai achiki suluʼu pütchikat 11. Anuu sünüiki: «Eesü wanee ayuulii tanain mayeinkalü atuma taaʼin, aisü teʼirukuluʼupünaa sutuma. Isasü tachiki oʼunaa, acheküsü toʼunajatüin suluʼu wanee silla de ruedas. Jüleetsü taya waneepia sutumajee alin maʼin shia tamüin. Nnojoleerü aawalaain taya naashin chi tottootkai, jülüjaka taaʼin aneerüin takuwaʼipa mapeena jee jimatüsü taaʼin sutuma tia. Tachecherüin taaʼin maaʼulu yaa süka tatüjaain saaʼu talateerüin maʼin taaʼin suluʼupa taya tü paʼaraiisükat».

NNOJOLEERÜ KASAIN CHOʼUJAAIN NAMÜIN NA KOJUTUKANA ATUMA JEHOVÁ

16. ¿Jamüsü nüküjakaʼa David tü sümakat Salmo 34:9, 10?

¹⁶ Mayaainjeʼe talatüin waya maaʼulu yaa eesia tü kasa mojusü weʼreetkat. Jamüshijaʼa David, chi aluwataashikai, amülouishii apünüinshii nüchonnii. Aküjüna achiki alawaa nia, emeejünüshi nia jee kojuya juya nüchajaanüin süpüla nuʼutunuin aaʼin. Mayaainjeʼe sülatüin tia nümüin, ayatüsia talatüin naaʼin. Naashin Jehová nnojoleerü kasain choʼujaain namüin na kojutukana atuma nia (Sal. 34:9, 10). Mayaainjeʼe nuuʼulaain Jehová weʼrüin müliaa naapüinña tü kasa talatakalü atuma waaʼin naashin David (Sal. 145:16). Jaʼitasü jeʼtsüin maʼin tü kasa alatakat wamüin, talata waaʼin maʼaka naaʼin David süka watüjaain saaʼu eejeechin Jehová wamaa waneepia.

17. ¿Kasa nüchekaka Jehová wapüleerua?

¹⁷ Nücheküin Jehová wapüleerua talatüin waaʼin (Sal. 131:1, 2). Talateerü waaʼin anale waaʼin sümaa tü kasa eekat wamaʼana. Nnojorüle yaletüin waaʼin jee jülüjale waaʼin tü kasa anasü eejeetkat mapeena. Müsüjeseʼe meerüin wanüiki maʼaka naaʼin Pablo: «Jama tatüjüichin süpüleerua takuwaʼipa jaʼitasü kasain alatüin tamüin» (Filip. 4:11).