EKIRAJAAYA 34
JAYEECHI 3 Teʼitaain taaʼin pünain jee katchinsü taaʼin putuma
Punouja maʼin sünain motuin naaʼin Jehová paainjala
«Pülatirüinjeseʼe sooʼopünaa paaʼin tü taainjalakat» (SAL. 32:5).
TÜ WATÜJEETKAT
Tü sümakat tü Bibliakat süchiki motuin naaʼin Jehová naainjala na wayuu ayaawajaakana suulia otta jamüin wanoujainjanaka maʼin sünain tia.
1, 2. ¿Jamüsü waaʼin sutuma watüjaain saaʼu nülatirüin sooʼopünaa naaʼin Jehová tü waainjalakat? (Piirakaa sümüin tü ayaakuaakat ).
MOJUSHAATASÜ maʼin naaʼin chi aluwataashikai David sutuma wainmain tü kasa mojusü naainjapuʼukat (Sal. 40:12; 51:3 pütchi ashajünaka iipünaa sünain). Niyaawajaapejeʼe suulia naainjala jee motusü shia naaʼin Jehová (2 Sam. 12:13). Anasü naaʼin David jee talatüshi maʼin nia niyaawatapa saaʼu nülatirüin Jehová sooʼopünaa naaʼin tü naainjalakat (Sal. 32:1).
2 Akaʼaya wayakana, talatüsü waaʼin otta jimatüsü waaʼin sutuma watüjaain saaʼu nülatirüin Jehová sooʼopünaa naaʼin tü waainjalakat jaʼitakajeʼe mojuin maʼin shia. Süpüla motuinjatüin naaʼin Jehová waainjala, nnojoluinjatüin wounjulajüin süchiki, ayaawajaainjana waya suulia jee wachajaainjatüin sukuwaʼipa süpüla nnojoluinjatüin waaʼinrüin shia süchikuaʼa (Prov. 28:13; Aluw. 26:20; 1 Juan 1:9). Anasü maʼin waaʼin sutuma watüjaain saaʼu nnojoleerüin sotokuʼu müin naaʼin Jehová tü waainjalakat, meena maainjalakai waaʼin noʼuluʼu (Ezeq. 33:16).
Kojuyasü tü Salmo nüshajakat David eere nüküjain sukuwaʼipa nutuma Jehová süpüla motuin naaʼin waainjala. (Paashajeʼera tü pütchikat 1 otta 2).
3, 4. (1) ¿Kasa jülüjapuʼuka saaʼin Jennifer? (2) ¿Kasa wekirajaainjatka anain sünain ekirajaayakat tüü?
3 Eesüjaʼa jülüjawaire waaʼin nnojoluin nülatirüin Jehová sooʼopünaa naaʼin tü waainjalakat. Jülüjataa waaʼin tü alatakat sümüin Jennifer, anoujashii na wayuu kachooinkana shia. Shiasaʼa majayütpa shia amojujaasü sukuwaʼipa sunoula jee akayalaasü shia nuulia Jehová. Kojuya juya mapa, anoujasü shia süchikuaʼa jee woutiisaka shia. Anuu sünüiki: «Shia kachiiruapuʼuka maʼin taaʼin tü washirüükat jee taʼluwajiraapuʼuin maʼin takuwaʼipa. Asütpuʼu maʼin taya jee wayuu jashichipuʼu maʼin taya. Suluʼusü tekii waneepia nnojoluin wulein takuwaʼipa noʼuluʼu Jehová. Mayaainjeʼe tatüjaain saaʼu nülatirüin Jehová sooʼopünaa naaʼin tü taainjalakat saaʼujee naapajiraain nikii Jesús taaʼu».
4 ¿Müsüche pukuwaʼipa maʼaka saaʼin Jennifer? ¿Suluʼusüche paaʼin waneepia nnojoluin motuin naaʼin Jehová tü kasa mojusü paaʼinrapuʼukat? Nücheküin Jehová talatüin maʼin waaʼin maʼaka naaʼin David sutuma wanoujain maʼin sünain nümülialüin waaʼin otta motuin naaʼin tü waainjalakat. Ekirajaainjana waya sünain ekirajaayakat tüü wanoujainjanain sünain nülatirüin Jehová sooʼopünaa naaʼin tü waainjalakat jee tü waaʼinrajatkat süpüla wanoujain sünain.
¿JAMÜSÜ WANOUJAINJANAKAʼA SÜNAIN NÜLATIRÜIN JEHOVÁ SOOʼOPÜNAA NAAʼIN TÜ WAAINJALAKAT?
5. ¿Kasa nunoujireeka anain waya Satanás? Püküja wanee sukuwaʼipa.
5 Wanoujale sünain nülatirüin Jehová sooʼopünaa naaʼin tü waainjalakat nnojoleena waya nimeejüin Satanás. Nüchajaain sukuwaʼipa waneepia süpüla wooʼulaain suulia aʼyatawaa nümüin Jehová. Jamüshijaʼa nia, nunoujireein waya sünain mojuleein maʼin tü waainjalakat jee nnojoleerüin motuin shia naaʼin Jehová. Jülüjataa waaʼin tü alatakat chaa Corinto sümaiwa paala, ojuʼitinnüshi wanee wayuu naʼakajee na anoujashiikana sutuma nuʼluwajirüin nukuwaʼipa (1 Cor. 5:1, 5, 13). Ayaawajaashi mapa chia wayuukai suulia naainjala. Nunoujireepejeʼe Satanás chia wayuukai sünain nnojoleerüin nülatirüin Jehová sooʼopünaa naaʼin tü naainjalakat. Shia nüchekakat Satanás nnojoluin motuin naaʼin na nuwalayuukana tü naainjalakat otta nnojoluin kamaneein naya nümüin, shiiʼiree suupünaajüin naaʼin tü mojuukalü aaʼin jee nuuʼulaain suulia anoujaa nünain Jehová. Mayaainjeʼe ayatüin naaʼinrüin tia chi Yolujaakai maaʼulu yaa, watüjaaitpa saaʼu kasain tü nimeejakalü aka wayuu (2 Cor. 2:5-11).
6. ¿Kasa waaʼinrajatka suulia mojuin maʼin waaʼin sutuma tü kasa mojusü waaʼinrapuʼukat?
6 Wanoujale sünain nülatirüin Jehová sooʼopünaa naaʼin tü waainjalakat nnojoleerü yüülain waaʼin sutuma tü kasa mojusü waaʼinrapuʼukat. ¿Aashin mojuin waaʼin kaainjarale waya? (Sal. 51:17). Mülejeʼe waaʼin shia süka wayaawatüin saaʼu mojuin tü waaʼinrakat jee keeʼireejeerü waaʼin wanoutuin tü wakuwaʼipakat (2 Cor. 7:10, 11). Ayatülejeʼeya mojukuʼu müin waaʼin süchikijee wayaawajaain suulia waainjala eesü süpüla yüülain waaʼin jee wakayalaain nuulia Jehová. Eekajasaʼa wanoujale sünain motuin naaʼin Jehová tü waainjalakat moteerü shia waaʼinña jee nnojoleerü mojukuʼu müin waaʼin sutuma tü kasa mojusü waaʼinrapuʼukat. Talateerü waaʼin jee jimateerü waaʼin sünain aʼyatawaa nümüin Jehová maʼaka nücheküin shia wapüleerua (Col. 1:10, 11; 2 Tim. 1:3). Anashii wekirajaale sünain tü waaʼinrüinjatkat süpüla wanoujainjanain sünain nülatirüin Jehová sooʼopünaa naaʼin tü waainjalakat.
¿KASA PAAʼINRAJATKA SÜPÜLA PUNOUJAIN SÜNAIN NÜLATIRÜIN JEHOVÁ SOOʼOPÜNAA NAAʼIN TÜ PAAINJALAKAT?
7, 8. (1) ¿Kasa nüküjaka Jehová süchiki nukuwaʼipa suluʼu Éxodo 34:6, 7? (2) ¿Kasa wanoujaka anain sutuma tü nümakat?
7 Jülüja paaʼin tü nümakat Jehová süchiki tü nukuwaʼipakat. Jülüjataa paaʼin tü nümakat Jehová nümüin Moisés saaʼu tü uuchikat Sinaí (paashajeʼera Éxodo 34:6, 7).a Nüküjain Jehová niain wanee Maleiwa amüliajüi jee anamia maʼin nia. Sünainjee tia wayaawatüin nülatireerü Jehová sooʼopünaa naaʼin naainjala wanee wayuu niyaawajaale suulia tü naainjalakat. Nnojoleerü naaʼinrüin Jehová wanee kasa müliaka atuma waaʼin, jama anamiain maʼin nia.
8 Wanouja sünain tü nümakat Jehová süchiki amüliajülin nia, jama matüjain nia aküjaa alawaa (Sal. 31:5). Wainmajüle paaʼin sünain nülatirüin Jehová sooʼopünaa naaʼin tü paainjalakat anasü jülüjale paaʼin tüü: Maʼaka punoujain sünain nülatirüin Jehová sooʼopünaa naaʼin naainjala napüshuaʼaleʼeya na wayuu ayaawajaakana suulia naainjala sutuma amüliajülin nia jee anamiain maʼin nia, punouja sünain motuin naaʼin tü paainjalakat.
9. ¿Kasa watüjaka sünainjee Salmo 32:5 süchiki nukuwaʼipa Jehová nülatirapa sooʼopünaa naaʼin tü waainjalakat?
9 Anasü püsakireʼerüle paaʼin sünain tü sümakat tü Bibliakat süchiki nukuwaʼipa Jehová nülatirapa sooʼopünaa naaʼin tü waainjalakat. «Pülatirüinjeseʼe sooʼopünaa paaʼin tü taainjalakat», müshi David nümüin Jehová (paashajeʼera Salmo 32:5). Tü pütchikat «nülatirüin sooʼopünaa naaʼin» maluʼulu suluʼu hebreo «nüpataain» jee shiale «nülüʼüjain». Wanaa sümaa nülatirüin Jehová sooʼopünaa naaʼin tü naainjalakat David müshi naakatakai wanee kasa jawataka naaʼujee jee noʼotoko shia nunuloʼupünaa süpüla nülüʼüjain shia. Asamalaasü maʼin naaʼin David sutuma tia otta talatüsü maʼin naaʼin (Sal. 32:2-4). Wayaawajaale suulia waainjala meerü waaʼin maʼaka naaʼin David, jama müin nülüʼüjakai saaʼin Jehová tü jawatakat woulia, nnojoleerü müliajüin waaʼin sutuma tü kasa mojusü waaʼinrapuʼukat.
10, 11. ¿Kasa watüjaka sünainjee Salmo 86:5 süchiki nukuwaʼipa Jehová?
10 (Paashajeʼera Salmo 86:5). «Motusü paaʼin naainjala wanee wayuu», müshi David nüchiki Jehová. Nukuwaʼipaʼaya Jehová tia saashin wanee karaloʼuta, müshijeseʼe nülatirüin sooʼopünaa naaʼin saainjala wayuu. ¿Jamüshi kamaneekaʼa maʼin Jehová namüin na wayuu ayaawajaakana suulia naainjala? Anuu tü ashajünakat sajaʼttiamüin tia wetsiikulokot: «Aishii maʼin püpüla na wayuu achuntakana pümüin». Wekirajaaitpa anain suluʼu tü ekirajaayakat 33 miyoʼu maʼin naalin nüpüla Jehová na wayuu aʼyataashiikana nümüin. Müshijeseʼe nülatirüin sooʼopünaa naaʼin tü naainjalakat nayaawajaale suulia (Is. 55:7). Nnojorüle punoujain maʼin sünain tia anasü jülüjale paaʼin tüü: «Maʼaka motuin naaʼin Jehová naainjala napüshuaʼaleʼeya na wayuu ayaawajaakana jee achuntaakana kaalinwaa nümüin meeriaʼaya takuwaʼipa, moteerü naaʼin Jehová taainjala».
11 Talatüsü maʼin waaʼin süka watüjaain saaʼu niʼraajüin maʼin Jehová tü wakuwaʼipakat otta nütüjaain saaʼu waleʼeruʼuin süchiki kaainjalaa (Sal. 139:1, 2). Anashii wekirajaale sünain wanee kasa nüshajaka David wayaawateetka atuma moteein naaʼin Jehová tü waainjalakat.
SOTO PAAʼIN TÜ JÜLÜJAKAT NAAʼIN JEHOVÁ PÜCHIKI
12, 13. (1) Saashin Salmo 103:14, ¿kasa sotoka naaʼin Jehová? (2) ¿Kasa naainjeeka wapüleerua sutuma tia?
12 (Paashajeʼera Salmo 103:14). Anuu nünüiki David: «Sotusü naaʼin sümamülain mma waya». Sutuma sotuin naaʼin Jehová waleʼeruʼuin süchiki kaainjalaa nülatirüin sooʼopünaa naaʼin tü waainjalakat wayaawajaale suulia. Anashii wekirajaale sooʼomüin süchiki tü nüküjeekat achiki David.
13 Naashin David niʼraajüin maʼin Jehová tü wakumajiakat. Nukumajüin Jehová Adán süka pootshi, niʼraajüinjeseʼe maʼin tü wakuwaʼipakat. Mayaainjeʼe anain maʼin wakumajia nutuma nütüjaain saaʼu eein tü kasa isakat wachiki otta tü choʼujaakat wamüin süpüla katüin woʼu maʼaka saaʼin wasanalüin waaʼin, weküin jee watunkuin (Gén. 2:7). Tü wane süküjeekat tü Bibliakat wanaa sümaa süküjain sümamülain waya mma shia waleʼeruʼuin süchiki kaainjalaa otta suchuntaain waaʼin aaʼinraa kasa mojusü, jama nüikeyuu waya Adán sümaa Eva. Nnojotsü shiain neʼe nüküjain David nütüjaain saaʼu Jehová waleʼeruʼuin süchiki kaainjalaa, sotusiaʼaya naaʼin tia. Tü pütchi «sotusü naaʼin sümamülain mma waya» ashajünaka suluʼu Salmo 103:14 nnojotsü shiain neʼe maluʼuluin jülüjain naaʼin Jehová waleʼeruʼuin süchiki kaainjalaa, shia süküjeeka achiki nükaalinjeein waya Jehová. Nütüjaa aaʼulu Jehová eejeerü kaʼi waainjeekalü oʼu kasa mojusü shiasaʼa wayaawajaale suulia tia amülialaajeerü naaʼin waalin jee moteerü naaʼin tü waainjalakat (Sal. 78:38, 39).
14. (1) ¿Kasa watüjaka sutuma tü sümakat Salmo 103:12 süchiki nukuwaʼipa Jehová nülatirapa sooʼopünaa naaʼin tü waainjalakat? (2) ¿Kasa watüjaka sünainjee motuin naaʼin Jehová naainjala David? (Paashajeʼera tü pütchikat «Nülatirüin Jehová sooʼopünaa naaʼin tü waainjalakat otta motusü shia naaʼin»).
14 ¿Kasa maa watüjaka süchiki nukuwaʼipa Jehová nülatirapa sooʼopünaa naaʼin tü waainjalakat? (Paashajeʼera Salmo 103:12). Nüküjain David nülatirüin Jehová tü waainjalakat woulia, wattasü nutuma, maʼaka wattain eere niweetüin chi kaʼikai suulia eere nikerotüin. ¿Kasa watüjaka sünainjee? Anuu tü ashajünakat suluʼu wanee karaloʼuta: «Nülatirapa Jehová sooʼopünaa naaʼin tü waainjalakat nnojoleerü nujuʼitirakuʼu müin shia süchikuaʼa, müirümaʼaleeya motuin shia naaʼin» (El tesoro de David, de Charles Spurgeon, volumen 2, traducción de Samuel Vila, alijunaikiruʼusü). Eesüjaʼa sotojoole waaʼin wanee kasa waatule seejuu, nnojotpejeʼe müin nukuwaʼipa Jehová. Nülatirapa sooʼopünaa naaʼin tü waainjalakat nnojoleerü eein wanee kasa sotokuʼu meetka atuma naaʼin shia (Ezeq. 18:21, 22; Aluw. 3:19).
15. ¿Kasa waaʼinrajatka ayatüle mojuin waaʼin sutuma tü kasa mojusü waaʼinrapuʼukat?
15 Ayatüle mojuin paaʼin sutuma tü kasa mojusü paaʼinrapuʼukat anasü jülüjale paaʼin tü ashajünakat suluʼu Salmo 103, punoujeetka sünain motuin naaʼin Jehová tü paainjalakat. Jülüjaa paaʼin tüü: Moteesü naaʼin Jehová tü waainjalakat wayaawajaale suulia, jama sotuin naaʼin waleʼeruʼuin süchiki kaainjalaa. Jülüja waaʼin nnojoluin sotokuʼu müin naaʼin Jehová tü kasa mojusü waaʼinrapuʼukat süka motuin shia naaʼin, anasüjeseʼe motule shia waaʼinña (Sal. 130:3). Punoujale maʼin sünain nülatirüitpain Jehová sooʼopünaa naaʼin tü paainjalakat moteeriaʼaya shia paaʼin.
16. ¿Jamüsü mojukaʼa jülüjale waaʼin waneepia tü kasa mojusü waaʼinrapuʼukat? (Piirakaa sümüin tü ayaakuaakat).
16 Jülüjakuʼu müle paaʼin tü kasa mojusü paaʼinrapuʼukat müsü aka puʼunirüle wanee kemion sümaa piirakaain waneepia püchiiruajee suluʼupünaa surouyain peʼejena. Anasiaajeʼe weirakaawaire wachiiruajee süpüla eejüinjatüin waaʼin suulia wanee kasa, mayaapejeʼe weiraküinjatüin waneepia wapüleeruajee. Müsia neʼe pukuwaʼipa, nnojotsiaajeʼe mojuin jülüjawaire paaʼin tü kasa mojusü paaʼinrapuʼukat süpüla eejüin paaʼin suulia paaʼinrüinjatüin shia süchikuaʼa. Mojupejeʼe shiale jülüjain paaʼin waneepia tia süka mojeerüin maʼin paaʼin jee nnojoleerü piʼyataain nümüin Jehová süka süpüshuaʼa paaʼin. Anasü jülüjale paaʼin waneepia tü paaʼinrakat süpüla suluʼuinjachin pia tü mma jeketükat eere nnojoluinjatüin sotuin paaʼin tü kasa alatüitpakat (Is. 65:17; Prov. 4:25).
Maʼaka jülüjain naaʼin wanee wayuu nüpüleeruajee nuʼunirapa wanee kemion suulialeʼeya niirakaain maʼin nüchiiruajee, müinjatia wakuwaʼipa. Jülüjainjatü waaʼin tü kasa weʼrüinjatkat mapeena suulialeʼeya tü kasa mojusü waainjapuʼukat. (Paashajeʼera tü pütchikat 16).
PUNOUJA SÜNAIN TIA SÜKA SÜPÜSHUAʼA PAAʼIN
17. ¿Jamüshii wanoujainjanaka süka süpüshuaʼa waaʼin alin waya nüpüla Jehová jee moteerüin naaʼin tü waainjalakat?
17 Anasü wanoujale süka süpüshuaʼa waaʼin sünain moteerüin naaʼin Jehová tü waainjalakat süka alin waya nüpüla (1 Juan 3:19). Ayata waaʼinrüin tia süka nunoujireein waya Satanás maalin waya nüpüla Maleiwa jee nnojoleerüin nülatirüin sooʼopünaa naaʼin tü waainjalakat. Naaʼinrüin tia shiiʼiree wooʼulaain suulia aʼyatawaa nümüin Jehová. Nuuʼulakeerü maʼin waaʼin sutuma nütüjaain saaʼu süpütaain palit kaʼi nüpüla (Apoc. 12:12). ¡Jalia waya nuulia chi Yolujaakai!
18. ¿Kasa paaʼinrajatka süpüla punoujain maʼin sünain alin pia nüpüla Jehová jee motuin naaʼin paainjala?
18 Wekirajaaitpa anain sünain ekirajaaya 33 tü paaʼinrajatkat süpüla punoujain maʼin sünain alin pia nüpüla Jehová. Wekirajaaitpa anain sünain ekirajaayakat tüü tü paaʼinrajatkat süpüla punoujain maʼin süka süpüshuaʼa paaʼin sünain nülatirüin Jehová sooʼopünaa naaʼin tü kasa mojusü paaʼinrapuʼukat. Anasü jülüjale paaʼin tü sümakat tü Bibliakat süchiki nukuwaʼipa Jehová nülatirapa sooʼopünaa naaʼin tü waainjalakat. Jülüjeesü paaʼin waneepia amülialaajeerü naaʼin Jehová paalin saaʼujee sotuin naaʼin kaleʼeruʼuin pia süchiki kaainjalaa jee moteerü naaʼin paainjala otta nnojoleerü jülüjain naaʼin piantua. Jülüjale paaʼin tia, meerü pünüiki mayaa: «Anasia müin pükaalinjain taya Jehová jee motuin paaʼin taainjala» (Sal. 32:5).
JAYEECHI 1 Anaʼleesia maʼin nukuwaʼipa Jeʼwaa
a Paashajeʼera tü pütchikat «Acérquese a Dios: Jehová se describe a sí mismo», ojuʼitaka suluʼu Aapiria Wayuu maayoʼu 1 soʼu 2009 (alijunaikiruʼusü).