Tü waaʼinrajatkat saainjünüle kasa mojusü wamüin

1, 2. (1) ¿Jamüsü naaʼin watta naalii wayuu neʼrapa saainjünüin kasa mojusü namüin na waneinnua? (2) ¿Kasa wasakireʼerüinjatka anain waaʼin?

WATTA NAALII wayuu mojutuka atumawaa saaʼujee maʼletsein naya, saaʼujee nakuwaʼipa, noumain jee waneirua kasa. Watta naalii wayuu eʼrakana müliaa jee nnojoishii akaalinjünüin naya natuma na süʼlaülashiikana mma jee na shikiipüʼükana compañia süka washireein neʼe naya. Eesiaʼaya süpüla sülatüin tia wamüin jee namüin na wapüshikana

² Sutuma aneein wakuwaʼipa wapüshuaʼa sümaa jimatüin waaʼin, eeshii wayuu jashichikana neʼrapa saainjünüin kasa mojusü namüin na waneinnua. Eeshii wayuu anouteekana sukuwaʼipa tü mmapaʼakat, müshiijeseʼe naainjain protesta namüin na süʼlaülashiikana mma otta eeshii na awotaajakana naaʼu na político aküjakana süchiki nanoutajatüin sukuwaʼipa tü mmapaʼakat. Eekajasaʼa waya anoujashiikana nnojotsü wanaawain waaʼin «sümaa wayuu manoujainsat», jama watüjaain saaʼu niain neʼe Maleiwa anouteʼerüinjachika sukuwaʼipa tü mmapaʼakat (Juan 17:16). Mayaainjeʼe watüjaain saaʼu tia eesüjaʼa mojule waaʼin jee jashichin waya weʼrapa mojutuin wayuu atumawaa. Anasü wasakirüle waaʼin sünain tüü: «¿Kasa taaʼinrajatka teʼrapa müliain wayuu atumawaa? ¿Kasa taaʼinrajatka süpüla takaalinjain wayuu?». Wekirajaajeerü anain tia sünain ekirajaayakat tüü. Wekirajaa palajana sünain jamüin naaʼin Jehová otta Jesús neʼrapa müliain wayuu atumawaa.

MATÜJAINSAI JEHOVÁ OTTA JESÚS AAʼINRAA KASA MOJUSÜ SÜMÜIN WAYUU

3. ¿Jamüsü mojukaʼa wamüin nnojorüle lotuin sukuwaʼipa wanee kasa? (Isaías 5:7).

³ Ashajünüsü suluʼu tü Bibliakat jamüin mojuka wamüin nnojorüle lotuin sukuwaʼipa wanee kasa. Müsü wakuwaʼipa süka nukumajüin waya Jehová maʼaka naaʼin, jamüshijaʼa nia anasü nümüin «lotule sukuwaʼipa wanee kasa» (Sal. 33:5; Gén. 1:26). Matüjainsai Jehová aaʼinraa kasa mojusü sümüin wayuu jee nücheküin müin wakuwaʼipa maʼaka naaʼin (Deut. 32:3, 4; Miq. 6:8; Zac. 7:9). Jamüsüjaʼa soʼu nükalia Isaías chi nünüikimaajachikai Maleiwa nükaalinjain Jehová na israelita müliakana atumawaa (paashajeʼera Isaías 5:7). Kasalajanasü nutuma Jehová naainjala na wayuu müliakana atuma naya, jama moonooin naya sümaa nünüiki jee naaʼinrüin kasa mojusü (Is. 5:5, 13).

4. ¿Jamüsü naaʼin Jesús niʼrapa müliain wayuu atumawaa? (Piirakaa sümüin tü ayaakuaakat).

⁴ Maʼaka naaʼin Jehová aisü nümüin Jesús niʼrüle müliain wayuu atumawaa. Jülüjataa waaʼin tü alatakat wanaa sümaa yaajachin nia yaa mmapaʼa. Soʼu wanee kaʼi niʼrüin «wanee wayuu joso ajapüchi», sümülialaka naaʼin naalii jee anasü najapü chia wayuukai nutuma. Jashichishii maʼin na fariseokana neʼrapa tü naaʼinrakat Jesús. Nnojotsü jamajüin namüin nümüliala chia wayuukai shia neʼe naaʼinmaaka naaʼinrüin tü nayaawatakalü aaʼu sünainjee tü Pütchi Aapünakat nümüin Moisés. «Aisü nümüin [Jesús] mamülialaain naya saalin wayuu» (Mar. 3:1-6).

5. ¿Kasa sotuinjatka waaʼin jashichire waya sutuma weʼrüin müliain wayuu atumawaa?

⁵ Nnojotsiaajeʼe mojuin jashichire waya weʼrüle müliain wayuu atumawaa, jama müin nukuwaʼipa Jehová otta Jesús (Éf. 4:26). Wachecherüinjatpejeʼe waaʼin suulia jashichin waya otta sotuinjatüin waaʼin nnojoleerüin sunoutuin sukuwaʼipa wanee kasa sutuma jashichin waya. Jashichire waya waneepia eesüjaʼa süpüla ayuulin waya jee mojuin waaʼin (Sal. 37:1, 8; Sant. 1:20). Anashii wekirajaale sünain nukuwaʼipa Jesús süpüla watüjaain saaʼu tü waaʼinrajatkat weʼrapa müliain wayuu atumawaa.

TÜ NAAʼINRAKAT JESÚS NIʼRAPA MÜLIAIN WAYUU ATUMAWAA

6. ¿Kasa niʼraka Jesús wanaa sümaa yaajachin nia mmapaʼa? (Piirakaa sümüin tü ayaakuaakat).

⁶ Wanaa sümaa yaajachin Jesús mmapaʼa niʼrüin müliain wayuu natuma na karaloʼutamaajakana otta na fariseokana. Jamüshijaʼa naya naluwataain kasa kapüleeka namüin, tü nnojotkat ashajünüin sünain tü Pütchi Aapünakat nümüin Moisés (Mat. 23:2-4). Niʼrüinña Jesús müliain wayuu natuma na süʼlaülashiikana tü mmakat Roma. Soʼu tia watta naalii judío eʼrüliikana wayumüin namüin na süʼlaülakana tü mmakat Roma maʼaka naaʼin na kanüliakana zelotes. Nnojotsü wanaawain naaʼin Jesús namaa naya judíokana jee nnojoishi nia naʼakain shiiʼiree nunoutuin tü kasa alatakat namüin. Jamüsüjaʼa wanaa sümaa nüsaajünüin Jesús süpüla nüikaleʼerüinjachin sünain aluwatawaa, oʼunushi nia noulia (Juan 6:15).

7, 8. ¿Jamüsü nnojotkaʼa nümaain Jesús na wayuu anouteʼereekana sukuwaʼipa tü kasa müliakalü atuma wayuu? (Juan 18:36).

⁷ Nnojoishi sünainpünaain política Jesús jee nnojoishi namaain na wayuu anouteʼereekana sukuwaʼipa wanee kasa. Nütüjaa aaʼulu Jesús isain süchiki wayuu naluwanaajiraain saaʼu nakuwaʼipa namüiwaʼa, jama nnojolin nukumajüin naya Maleiwa süpüla tia (Sal. 146:3; Jer. 10:23). Otta müsia isasü süchiki wayuu sajaʼttirüin tü kasa müliakat atuma waya, jama niain Satanás aluwataakai naaʼu na manoujainsaliikana otta mojulaashii naya maʼaka naaʼin (Juan 8:44; Éf. 2:2). Jaʼitairü anamiale wanee wayuu isasü nüchiki nunouteerüin tü kasa müliakalü atuma wayuu, jama waleʼeruʼuin süchiki kaainjalaa (Ecl. 7:20).

⁸ Nütüjaa aaʼu Jesús niain neʼe Maleiwa ajaʼttirüinjachika tü kasa müliakalü atuma wayuu. Müsüjeseʼe nüküjain maʼin «tü pütchi anakat maʼin süchiki niainjachin aluwataain Maleiwa saaʼu wayuu» (Luc. 8:1). Nüküjain Jesús namüin «na loteekana atuma sukuwaʼipa wanee kasa» süchiki niainjachin Maleiwa ajaʼttirüinjachika tü müliakalü atuma wayuu (Mat. 5:6; Luc. 18:7, 8). Isasü süchiki wayuu sunoutuin sukuwaʼipa tia, nia neʼe Maleiwa anouteʼerüinjachika tia nuluwataapeena (paashajeʼera Juan 18:36).

WASHATA NUKUWAʼIPA JESÚS WEʼRAPA MÜLIAIN WAYUU ATUMAWAA

9. ¿Jamüshi niaka anain Maleiwa süpüla nunoutuin tü kasa müliakalü atuma wayuu?

⁹ Wainmaleesia na wayuu müliakana atumawaa maaʼulu yaa suulialeʼeya wanaa sümaa yaajachin Jesús mmapaʼa. Nia kasitka tia Satanás jee na wayuu ashatakana nukuwaʼipa (2 Tim. 3:1-5, 13; Apoc. 12:12). Watüjaa aaʼulu niain neʼe Maleiwa ajaʼttirüinjachika tü müliakalü atuma wayuu nuluwataapeena saaʼu tü mmakat. Süka wacheküin nuluwataain waaʼu nnojoishii waya sünainpünaain protesta jee nnojoishii waya atkaain süchiirua lotuin sukuwaʼipa wanee kasa. Wekirajaa süchiki sukuwaʼipa wanee wawala, Stacy sünülia.a Sünainpünaapuʼusü shia protesta süpülapünaa sunoujain, wainmajapejeʼe saaʼin anale tü kasa saaʼinrakat. Anuu sünüiki: «‹Wounteetche anouteʼerüin sukuwaʼipa wanee kasa› maa müsü taaʼin yalapa taya sünain aainjaa protesta. Tatüjaaitpa aaʼu niain neʼe Maleiwa anouteʼerüinjachika tü kasa müliakalü atuma wayuu» (Sal. 72:1, 4).

10. Saashin Mateo 5:43-48, ¿jamüshii nnojotka atkaain waya süchiirua lotuin sukuwaʼipa wanee kasa? (Piirakaa sümüin tü ayaakuaakat).

¹⁰ Watta naalii wayuu atkaakana süchiirua lotuin sukuwaʼipa wanee kasa. Nnojotpejeʼe anain sukuwaʼipa natuma süka jashichin maʼin naya jee naainjain kasa mojusü sümüin wayuu, nnojotsü naaʼinrüin tü nikirajakalü anain Jesús (Éf. 4:31). Anuu nünüiki wanee wawala, Jeffrey nünülia: «Sutuma jashichin maʼin na wayuu aainjakana protesta eeshii na aainjakana kasa mojusü sümüin wayuu jee eeshii na aʼluwajakana kasa». Nüküjain Jesús wamüin alinjatüin wapüla wayuu mayaainjeʼe saainjain kasa mojusü wamüin jee nnojoluin wanaawain naaʼin wamaa (paashajeʼera Mateo 5:43-48). Wayakana anoujashiikana oonooshii waya sümaa tü nikirajakalü anain Jesús jee washatüin nukuwaʼipa.

11. ¿Kasa kapüleeka aaʼujee washatüin nukuwaʼipa Jesús?

¹¹ Mayaainjeʼe watüjaain saaʼu najaʼttirüinjatüin Maleiwa tü kasa müliakalü atuma wayuu, eesüjaʼa kapüleere wamüin washatüin nukuwaʼipa Jesús wayale aainjünüin amüin kasa mojusü. Wekirajaa süchiki tü alatakat sümüin wanee wawala, Janiya sünülia, alerajünüsü shia sutuma wayuu. Anuu sünüiki: «Mojushaatasü taaʼin, ‹nawalaajeerü naainjala tamüin›, müsü taya. Anainjatü taaʼin taaʼinruʼu naʼakale taya na wayuu aprotestaajakana süpüla nnojoluin sülerajünüin wayuu». Shiyaawataka saaʼu mapa nnojoluin anain tü jülüjakat saaʼin. «Tashatüin neʼe nakuwaʼipa na waneinnua jee nnojotsü teʼitaain taaʼin nünain Jehová, shia toʼunaka achiirua sukuwaʼipa wayuu. Tayaawataka saaʼu nnojoluin anain sünainpünaale taya nakuwaʼipa naya wayuukana», müsü shia. Eeshiijaʼa jashichire waya saainjünüle kasa mojusü wamüin jee shiale namüin na waneinnua, wachecherüinjatpejeʼe waaʼin suulia washatüin nakuwaʼipa na manoujainsaliikana (Juan 15:19).

12. ¿Jamüsü eejüinjatkaʼa waaʼin suulia tü wanajakat, tü waashajeʼerakat jee tü waapajakat?

¹² ¿Kasa waaʼinrajatka süpüla wachecherüin waaʼin suulia jashichin maʼin waya saainjünüle kasa mojusü wamüin? Eejüinjatü waaʼin suulia tü kasa wanajakat, waashajeʼeraka jee waapajaka. Eʼitaanüsü suluʼu internet notiisia nnojotka shiimain süpüla ponuin shia saaʼin wayuu jee shiiʼiree mojutuin na süʼlaülashiikana mma. Eesü notiisia nnojotka pansaain maʼin süka shiain neʼe süküjaka wayuu tü jülüjakat saaʼin. Jaʼitakajeʼe shiimain tü aküjünakat suluʼupünaa notiisia nnojotsü anain wanajüle maʼin shia jee waashajeʼerüle maʼin süchiki süka mojeerüin waaʼin sutuma (Prov. 24:10). Otta eesü süpüla motuin waaʼin niain neʼe Maleiwa ajaʼttirüinjachika tü müliakalü atuma wayuu.

13. ¿Jamüsü anakaʼa waashajeʼerüle tü Bibliakat soʼukaiwai?

¹³ Wane kasa waaʼinrajatka shia waashajeʼerüinjatüin tü Bibliakat soʼukaiwai sümaa wasakireʼerüinjatüin waaʼin sünain. Jülüjataa waaʼin tü alatakat sümüin wanee wawala, Alia sünülia. Jashichishaatasü maʼin shia sutuma nnojoluin jamajüin atumawaa na wayuu eʼrakana wayumüin namüin na wayuu kepiakana süʼütpünaa. Anuu sünüiki. «Sotusü taaʼin niain neʼe Jehová anouteʼerüinjachika tü kasa mojusü alatakat sainküin mma. Taashajeʼeraka suluʼu Job 34:22-29 süchiki nnojoluin süpüla wounjulaain wanee kasa nuulia Jehová. Lotusü nukuwaʼipa süsalajatpa saainjala wayuu nutuma, nia neʼe nümüiwaʼa atüjakai süpüleerua anoutaa sukuwaʼipa wanee kasa». ¿Kasa waaʼinrajatka maaʼulu yaa sümaʼainruʼu waʼatapajüin najaʼttirüin Maleiwa tü kasa müliakalü atuma wayuu?

¿KASA TÜ ANAKAT SÜPÜLA WAAʼINRÜIN MAAʼULU YAA?

14. ¿Kasa tü eekat süpüla waaʼinrüin maaʼulu yaa? (Colosas 3:10, 11).

¹⁴ Isasü wachiki weeʼiratüin nakuwaʼipa na wayuu eʼrüliikana wayumüin namüin na waneinnua eepejeʼe süpüla kamaneein waya sümüin wayuu süpüshuaʼa. Washateerü nukuwaʼipa Jesús aire wapüla wayuu. Aire wapüla wayuu kojuteerü naya wamüin jaʼitairü mojulaain naya wamüin (Mat. 7:12; Roma 12:17). Talateerü naaʼin Jehová wamaa kamaneere waya jee lotule sukuwaʼipa süpüshuaʼa tü kasa waaʼinrakat (paashajeʼera Colosas 3:10, 11).

15. ¿Kasa eeka sutumajee waküjain pütchi?

¹⁵ Tü anakat süpüla waaʼinrüin süpüleerua wayuu shia waküjain pütchi namüin nüchiki Jehová. Eeshi süpüla anamiain wanee wayuu eekai mojulaain jee eekai jashichin niʼraajüle maʼin nüchiki Jehová (Is. 11:6, 7, 9). Jülüjataa waaʼin tü alatakat nümüin wanee wawala, Jemal nünülia, süpülapünaa nunoujain nünain Jehová naʼakapuʼushi nia wayuu atkaakana süchiirua niiʼiratünüin chi aluwataakai saaʼu noumain süka mojulaain nia naashin. Anuu nünüiki: «Isasü wachiki weeʼiratüin nukuwaʼipa wanee wayuu eepejeʼe süpüla niiʼiratüin sukuwaʼipa sükajee tü sümakat tü Bibliakat. Jamüshijaʼa tayakai shia anouteʼeraka takuwaʼipa tü Bibliakat». Sutumajee nikirajaain maʼin Jemal sünain tü Bibliakat nnojoliipa kasajatüin nümüin tü naaʼinrapuʼukat. Wekirajaapa wayuu sünain tü Bibliakat wakaalinjain naya süpüla nooʼulaain suulia aaʼinraa kasa mojusü müliaka atuma wayuu.

16. ¿Jamüsü waküjeekaʼa sümüin wayuu süchiki tü naaʼinrüinjatkat Maleiwa nuluwataapeena saaʼu tü mmakat?

¹⁶ Maʼaka naaʼin Jesús waküjeein sümüin wayuu niain neʼe Maleiwa ajaʼttirüinjachika tü kasa müliakalü atuma wayuu nuluwataapeena saaʼu tü mmakat. Aneerü naaʼin naapapa shia na wayuu müliakana atumawaa (Jer. 29:11). Anuu sünüiki Stacy tü wachuntayütkalü anülia suluʼu tü pütchikat 9: «Sutuma teʼraajüin maʼin nüchiki Jehová nnojoliipa mojuin maʼin taaʼin saaʼujee tü kasa aainjünakat tamüin jee tü kasa aainjünakat namüin na waneinnua. Nümülialüin waaʼin Jehová sükajee tü Bibliakat». Yapainjana waya süpüla wamülialüin saaʼin wayuu sükajee tü sümakat tü Bibliakat. Wanoujale maʼin sünain najaʼttirüinjatüin Maleiwa tü kasa müliakalü atuma wayuu mapüleejeerü wamüin waküjain shia sümüin wayuu waʼyataaleruʼu jee eere koleejiain waya.b

17. ¿Kasa nükaalinjaka aka waya Jehová saainjünüle kasa mojusü wamüin?

¹⁷ Ayateenain eein wayuu mojulaakana namüin na waneinnua süka niain Satanás chi aluwataakai naaʼu. Nükaalinjeena waya Jehová otta nüküjain wamüin najaʼttireechi Satanás (Juan 12:31). Ashajünüsü suluʼu tü Bibliakat jamüin eeka wainma wayuu mojulaasü otta süchiki alin nümüin Jehová niʼrüle müliain waya (Sal. 34:17-19). Nikirajüin waya Jehová sükajee nukuwaʼipa chi Nüchonkai süpüla watüjaain saaʼu tü waaʼinrajatkat weʼrapa müliaa otta nüküjain wamüin najaʼttirüinjatüin tü kasa müliakalü atuma waya (2 Ped. 3:13). Ayataʼaya waküjain pütchi sümüin wayuu süchiki nuluwataainjachin Maleiwa sümaʼainruʼu waʼatapajüin tü kaʼi nuluwataainjachikalü oʼu «süka tü lotookalü akuwaʼipaa süpüla kaʼikat süpüshuaʼa» (Is. 9:7).