Kojuta wamüin wayuu

1. ¿Jamüsü choʼujaakaʼa kojutuin waya atumawaa? (Proverbios 22:1).

TALATÜSÜ WAAʼIN kojutule waya sümüin wayuu. Choʼujaasü wamüin kojutuin waya atumawaa. Müsüjeseʼe sümüin tü Bibliakat: «Shia anaka aluʼu kojutule atumawaa wanee wayuu suulialeʼeya tü oorokot jee tü pülaatakat» (paashajeʼera Proverbios 22:1).

2, 3. (1) ¿Jamüsü kapüleʼewaikaʼa wamüin kojutuin wamüin na waneinnua? (2) ¿Kasa wekirajaajeetka anain sünain ekirajaayakat tüü?

² Eejeerü kaʼi kapüleejeetka oʼu wamüin kojutuin wamüin na waneinnua sutumajee weʼrüin nnojoluin anain maʼin nakuwaʼipa otta sutuma kepiain waya saʼaka wayuu mojutukana atuma na waneinnua. Kojutupejeʼe wamüin wayuu maʼleekalia süka nuchuntuin shia Jehová wamüin (1 Ped. 2:17).

³ Sünain ekirajaayakat tüü, wekirajaajeerü anain tü naaʼinrajatkat wanee wayuu süpüla kojutuin nümüin na waneinnua otta tü waaʼinrajatkat süpüla kojutuin wamüin wapüshi, na wawalayuukana jee na wayuu nnojoliikana anoujain wanaa wamaa. Otta tü waaʼinrajatkat süpüla kojutuin wamüin wayuu mayaainjeʼe kapüleein shia wamüin.

TÜ WAAʼINRAJATKAT SÜPÜLA KOJUTUIN WAMÜIN NA WANEINNUA

4. ¿Kasa waaʼinrajatka kojutule wamüin na waneinnua?

⁴ Kojutule wamüin wanee wayuu, anasü tü jülüjakat waaʼin nüchiki otta kapülashi nia waaʼin. Kojutushi wanee wayuu sünainjee anain nukuwaʼipa, sünainjee tü kasa nuuntakalü apüleerua jee shiale sutumajee laülaain nia saaʼu wanee kasa. Jaʼyainjatü saaʼu wakuwaʼipa kojutuin wayuu wamüin (Mat. 15:8).

5. ¿Kasa kojutuinjatka anainjee wayuu watuma?

⁵ Nücheküin Jehová kojutuin wamüin wayuu maʼaka saaʼin kojutuinjana wamüin na «sülaülakana mma» (Roma 13:1, 7). Eeshijaʼa nümüle wanee wayuu: «Chi eekai naaʼinrüin kasa tapüleerua, kojuteechi nia tamüin» nnojotpejeʼe anain müle tü jülüjakat waaʼin. Watüjaa aaʼu kojutuinjatü wayuu watuma saaʼujee alin wapüla Jehová otta talateein nia watuma, nnojotpejeʼe waaʼinrajatüin tia sutuma tü saaʼinrakat wayuu wapüleerua (Jos. 4:14; 1 Ped. 3:15).

6. ¿Eesüche süpüla kojutuin wanee wayuu wamüin mojutule waya nümüin? (Piirakaa sümüin tü ayaakua sünainkat süta tü rewiisütakat).

⁶ ¿Eesüche süpüla kojutuin wanee wayuu wamüin mojutule waya nümüin? Eesü süpüla. Jülüjataa waaʼin tü naaʼinrakat waneinnua wayuu. Jamüshijaʼa Saúl chi aluwataashikai, airuʼutsü nünüiki nümüin Jonatán chi nüchonkai. Naaʼinrüin tia suʼupalapünaa wayuu (1 Sam. 20:30-34). Mayaainjeʼe müin tia, ayatüshia kojutuin Saúl nümüin Jonatán jee nükaalinjain nia sünain atkawaa namaa na nüʼünüükana (Éx. 20:12; 2 Sam. 1:23). Jamüshijaʼa Elí chi laülaashikai napüleerua na sacerdotekana, nülirajüin Ana sünain epeʼrüin shia (1 Sam. 1:12-14). Kojutupejeʼe nia sümüin Ana mayaainjeʼe sütüjaain saaʼu nnojoluin anain nipijia nüchonnii nutuma sümaa nnojoluin nüchiajaain naya jee nnojoluin anain sukuwaʼipa niʼyataain suluʼu tü aʼwaajüleekat (1 Sam. 1:15-18; 2:22-24). Eeshii waneinnua wayuu chejeʼewalii Atenas mojukana anüiki nümüin Pablo «koyoroloikai» müshii nümüin (Aluw. 17:18). Mayaainjeʼe mojuin nanüiki nüchiki, ayatüshiʼiya kojutuin naya nümüin (Aluw. 17:22). Sutuma alin Jehová wapüla otta talateein nia watuma kojutusü wayuu wamüin mayaainjeʼe airuʼuluin nanüiki wamüin. Wekirajaa sooʼomüin süchiki jaralii na kojutuinjanaka wamüin otta jamüsü waaʼinrajatka tia.

KOJUTA WAMÜIN NA WAPÜSHIKANA

7. ¿Kasa eeka süpüla kapüleein aaʼujee wamüin kojutujiraain waya sümaa wapüshi?

⁷ Tü kapüleekalü aaʼujee. Wanee kasa shia saaʼujee weʼraajashaatain maʼin nakuwaʼipa na wapüshikana, jama wamaain naya waneepia. Eeshijaʼa eere wanee wapüshi eekai jashichin wamüin waneepia sutuma tü ayuulii nünainkat, eesüjaʼa shiale airuʼurule nünüiki wamüin sutuma shapaain maʼin naaʼin jee eeshii na nnojoliikana anajiraain sümaa napüshi sutuma mojutujiraain naya. Eesüjaʼa kapüleere wamüin kojutuin na wapüshikana wamüin saaʼujee tia. Jamüsüjaʼa saapüle wamüin wanee ayuulii, eesüjaʼa aire wamüin süpüshuaʼa tü watapaʼakat, akaʼaya neʼe mojutujiraale waya sümaa wapüshi nnojoleena paaʼinwain waya namaa. Kepiipejeʼe tia.

8. ¿Jamüsü anakaʼa kojutule wamüin na wapüshikana? (1 Timoteo 5:4, 8).

⁸ Anasü kojutule wamüin wapüshi (paashajeʼera 1 Timoteo 5:4, 8). Nüshajüin Pablo nümüin Timoteo tü naaʼinrajatka na anoujashiikana süpüla anainjatüin nakuwaʼipa sümaa napüshi jee süpüla naaʼinmajiraainjanain. Naashin Pablo kojutuinjatü wamüin wapüshi saaʼujee alin Jehová wapüla otta wanoujain nünain. Nia Jehová kapüshika atuma wayuu (Éf. 2:19; 3:14, 15). Kojutule wamüin na wapüshikana, nia kojutuka wamüin Jehová. Anasüjeseʼe kojutule wamüin na wapüshikana.

9. ¿Kasa naaʼinrajatka na kaʼwayuuseshiikana süpüla kojutujiraain naya? (Piirakaa sümüin tü ayaakuaakat).

⁹ Tü waaʼinrajatkat kojutule naya wamüin. Kojutule nümüin wanee wayuu tü nuʼwayuusekat jaʼyeerü tia saaʼu nukuwaʼipa suʼupala wayuu jee namüiwaʼapa naya (Prov. 31:28; 1 Ped. 3:7). Nnojotsü niʼyaatüin shia, nnojotsü japülin shia nutuma otta nnojotsü mojutuin shia nümüin. Jülüjataa waaʼin tü alatakat nümüin wanee wawala Ariel nünülia,a chejeʼewai nia Argentina: «Eesüjaʼa airuʼurule sünüiki taʼwayuuse tamüin sutuma tü ayuulii sünainkat, tayaawata aaʼu nnojoluin shiain tü suluʼukat saaʼin. Kapüleere tamüin tachecherüin taaʼin suulia jashichin taya sümüin, jülüjasü taaʼin tü sümakat 1 Corinto 13:5 süpüla anain tanüiki sümüin jee kojutuin shia tamüin» (Prov. 19:11). Kojutule sümüin wanee wayuu chi suʼwayuusekai, aneerü sünüiki nüchiki (Éf. 5:13). Nnojoleechi meeʼerapalain nia sutuma, nnojoleerü mojuin sünüiki nüchiki jee nnojoleerü airuʼuluin sünüiki nümüin süka sütüjaain saaʼu mojeerüin sukuwaʼipa nümaa sünainjee tia (Prov. 14:1). Jülüjataa waaʼin tü sümakat wanee wawala chejeʼewatka Italia, shapaasü naaʼin waneepia chi suʼwayuusekai, anuu sünüiki: «Shapaamaatüsü naaʼin süküjünüle wanee kasa nümüin, nnojotpuʼusü anain tanüiki nümüin jee jaʼyasü saaʼu toʼupünaa mojutuin nia tamüin. Tanoutuin takuwaʼipa jee kojutushi tamüin taʼwayuuse süka tamaain wayuu kojutukana amüin na waneinnua».

10. ¿Kasa naaʼinrajatka na jimaʼalii jee na majayünnüükana süpüla kojutuin natuma na wayuu kachooinkana naya?

¹⁰ Jiakana jimaʼalii jee majayünnüükana, kojuta jutuma na wayuu kachooinkana jia jee jüüjüü jia namüin (Éx. 21:17; Éf. 6:1-3). Laülaapa na wayuu kachooinkana jia, choʼujaajeerü namüin naaʼinmajünüin. Anasüjeseʼe jaaʼinmajüle naya. Jülüjataa waaʼin tü alatakat sümüin wanee wawala, María sünülia, saaʼinmajüin chi süshikai wanaa sümaa ayuulin nia, nnojoishi anoujain nia wanaa sümaa jee airuʼutpuʼusü nünüiki sümüin. Anuu sünüiki tü wawalakat: «Tachuntuin maʼin nümüin Jehová süpüla kojutuinjachin tamüin chi tashikai jee süpüla niʼrüinjatüin chi tashikai kojutuin nia tamüin. ‹Nükaalinjeerü taya Jehová süpüla kojutuinjachin tamüin chi tashikai, jama nuchuntuin shia Jehová tamüin›, mapuʼusü taya suluʼu taaʼin. Tayaawataka saaʼu kojutuinjachin tamüin chi tashikai jaʼitairü mojutuin taya nümüin». Kojuteechi Jehová watuma kojutule wamüin na wapüshikana mayaainjeʼe nnojoluin anain maʼin nakuwaʼipa, jama niain Jehová kapüshika atuma wayuu.

KOJUTA WAMÜIN NA WAWALAYUUKANA SÜNAIN ANOUJAA

11. ¿Kasa kapüleeka aaʼujee wamüin kojutuin watuma na wawalayuukana?

¹¹ Tü kapüleekalü aaʼujee shia. Mayaainjeʼe naaʼinrüin maʼin na wawalayuukana tü sümakat tü Bibliakat, eeshiijaʼa jashichire naya wamüin, mojule nanüiki wachiki jee airuʼurule nanüiki wamüin. Eeshiijaʼa nnojoliire kojutuin wamüin na wawalayuukana naaʼinrüle tia wamüin (Col. 3:13). ¿Kasa waaʼinrajatka süpüla ayatüin kojutuin wamüin na wawalayuukana?

12. ¿Jamüsü kojutuinjanakaʼa wamüin na wawalayuukana? (2 Pedro 2:9-12).

¹² Anasü kojutule wamüin na wawalayuukana (paashajeʼera 2 Pedro 2: 9-12). Suluʼu tü chiiruaajatkat karaloʼuta nüshajaka Pedro nüküjain airuʼuluin nanüiki waneinnua anoujashii nachiki na laülaashiikana napüleerua, na «kojutukana nümüin Maleiwa». ¿Kasa naaʼinraka na aapieekana neʼrapa mojuin nanüiki naya anoujashiikana? Anuu nünüiki Pedro süchiki tia: «Nnojotsü airuʼuluin nanüiki namüin na wayuu ekirajakana sünain alawaa, jama kojutuin Jehová namüin». Anataʼaleesüjaʼa nakuwaʼipa naya aapieekana wapüleerua, nnojotsü mojuin nanüiki nachiki naya anoujashiikana. Nooʼulaain tia najapuluʼu Jehová süpüla niainjachin süsalain atuma naainjala jee niainjachin achiaain naya (Roma 14:10-12; anasü paashajeʼerüle Judas 9). Anuu tü watüjaka nanainjee na aapieekana, kojutule wamüin na wayuu eʼrüliikana wayumüin wamüin, kojutuleeinjanaʼaya wamüin na wawalayuu anoujakana wanaa wamaa kojutuinjana naya wamüin. Kojutule wamüin na wawalayuukana sünain anouja, kojuteechi Jehová wamüinña (Roma 12:10).

13, 14. ¿Kaseerü waaʼinraka kojutule wayuu wamüin? (Piirakaa sümüin tü ayaakuaakat).

¹³ Tü waaʼinrajatkat süpüla kojutuin naya wamüin. Jiakana laülaashiikana jaʼyainjatü saaʼu jukuwaʼipa alin jüpüla na wawalayuukana jikirajaapa naya (Filem. 8:9). Jüchiaainjachire wanee wawala anashi kamaneere jia nümüin jee anasü nnojorüle jüshapajaain aaʼin sünain aaʼinraa tia. Jiakana wawalayuu jieyuukana, paaʼinweena na wawalayuukana otta kojutujiraajeena naya nnojorüle jaashajaain süchiki perulaa otta nnojorüle mojuin jünüiki nachiki na waneinnua (Tito 2:3-5). Atüjaaneerü aaʼu kojutuin wamüin na laülaashiikana jüüjüüle waya namüin, waküjale namüin anain naʼyataain wapüleerua sünain akumajaa sukuwaʼipa tü outkajawaakat jee tü aküjakat pütchi otta müsia sutuma nakatchinrüin nanoula na eemiajaakana anoula (Gal. 6:1; 1 Tim. 5:17).

¹⁴ Anuu tü alatakat sümüin wanee wawala Rocío sünülia, mojutusai sümüin wanee laülaashi sutuma nüchiaain shia. Anuu tü sümakat: «Nnojotsü anain tamüin sukuwaʼipa nünüiki chi wawalakai nüchiaapa taya. Nnojotsü taaʼinreein tü nümakat tamüin sutuma alin tamüin tü nümakat otta mojupuʼusü tanüiki nüchiki. Taashajeʼeraka 1 Tesalónica 5:12,13 jee tayaawata saaʼu mojutusai chi wawalakai tamüin. ‹Nnojotsü anain tü taaʼinrakat› maa müsü taaʼin, müsüjeseʼe toʼuraajüin nümüin Jehová jee tekirajaaka süpüla tatüjaain saaʼu tü taaʼinrajatkat süpüla tanoutuin takuwaʼipa. Tayaawataka saaʼu nnojoluin mojuin tü nümakat chi wawalakai tamüin, aisü tü nümakat sutuma yaletüin taaʼin. Tatüjaaitpa aaʼu choʼujaain tamüin nnojoluinjatüin yaletüin taaʼin süpüla kojutuinjatüin wayuu tamüin. Anasü taaʼin süka tatüjaain saaʼu talatüin naaʼin Jehová tamaa süka tachajaain sukuwaʼipa süpüla kojutuin wayuu tamüin».

KOJUTA WAMÜIN NA NNOJOLIIKANA ANOUJAIN WANAA WAMAA

15. ¿Jamüsü eekaʼa süpüla kapüleein wamüin kojutuin wamüin na wayuu nnojoliikana anoujain wanaa wamaa?

¹⁵ Tü kapüleekalü aaʼujee. Eeshii waküjale pütchi sümüin wayuu mojutukana amüin Maleiwa otta tü sümakat tü Bibliakat (Éf. 4:18). Eetaashii joo na nnojoliikana aapajeein wanüiki sutuma aleʼeya sukuwaʼipa napüshi napüleerua. Eeshiijaʼa mamaneere otta mojulaain wamüin na wayuu aʼyataajiraakana wamaa jee na wayuu koleejiajiraakana wamaa. Otta eeshijaʼa mojutusalii waya nümüin chi walaamainkai jee namüin na ekirajaakana waya suluʼu koleejia. Sutuma müin nakuwaʼipa wamüin, eeshijaʼa süpüla mojutuin naya wamüin jee mamaneein waya namüin.

16. ¿Jamüsü kojutuinjanakaʼa wamüin na nnojoliikana anoujain wanaa wamaa? (1 Pedro 2: 12; 3:15).

¹⁶ Anasü kojutule naya wamüin. Jülüjasü maʼin naaʼin Jehová kamaneere waya namüin na nnojoliikana anoujain wanaa wamaa. Nüküjain chi aluwataaushikai Pedro namüin na anoujashiikana eein süpüla nuʼwaajünüin Maleiwa sutuma wayuu anale nakuwaʼipa napüleerua kamaneere naya namüin otta kojutule naya namüin (paashajeʼera 1 Pedro 2:12; 3:15). Jamüshiijaʼa nasoutuinjanale saaʼu nanoula laülaapialuʼu jee suʼupala wayuu, kojutuinjana naya namüin. Müinjachi yalakai naaʼin Jehová namaa, jama niʼrüin Jehová süpüshuaʼa tü waaʼinrakat jee naapüin süpüshuaʼa tü wamakat. Sotuinjatüin waaʼin tia waneepia süpüla kojutuinjatüin wamüin wayuu maʼleekalia.

17. ¿Kasa waaʼinrajatka kojutule wamüin na wayuu nnojoliikana anoujain wanaa wamaa?

¹⁷ Tü waaʼinrajatka kojutule naya wamüin. Waküjapa pütchi eejüinjatü waaʼin suulia jülüjain saaʼin wayuu wayain atüjaleein noulia süka watüjaain saaʼu tü sümakat tü Bibliakat. Shia anaka aluʼu kojutule naya wamüin, jama kojutuinña naya nümüin Maleiwa (Ageo 2:7; Filip. 2:3). Nnojoliinjana waya peʼipaain namaa na wayuu mojukana anüiki süchiki tü wanoujakalü anain jee nnojotsü anain waküjale namüin wanee kasa airuʼujeetka namüin (1 Ped. 2:23). «Nnojotsü shiain tia tü taküjeekat pümüin» mamaatüinjana waya sümüin wayuu airuʼule namüin wanüiki. Kojutule wamüin na wayuu waʼyataajiraakana amaa shiainjatü jülüjaka waaʼin tü kasa anasü naaʼinrakat otta tütüinjana waya sünain aʼyatawaa (Tito 2:9,10). Lotuinjatü sukuwaʼipa süpüshuaʼa tü kasa waaʼinrakat waʼyataaleruʼu jee aʼyataainjana waya süka süpüshuaʼa waaʼin. Mayaainjeʼe eejeenain wayuu nnojoliikana talatüin aaʼin wamaa, nieechi talataka watuma Jehová (Col. 3:22, 23).

18. ¿Jamüsü kojutuinjatkaʼa watuma wayuu?

¹⁸ Wainma kasa kojutuinjatka anainjee watuma wayuu. Jamüshiijaʼa kojutule watuma na wapüshikana, kojuteechi watuma Jehová chi kapüshika atuma wayuu. Müsia neʼe sukuwaʼipa kojutule watuma na wawalayuukana sünain anoujaa, kojuteechi watuma chi Washikai Jehová otta eeshijaʼa nuʼwaajünüle sutuma wayuu kojutule watuma na nnojoliikana anoujain wanaa wamaa. Weʼreerü kasa anasü nutuma Jehová kojutule wamüin wayuu jaʼitainna mojutuin waya natuma. Anuu nünüiki Jehová: «Kojuteena tamüin, na kojutukana amüin taya»(1 Sam. 2:30).