EKIRAJAAYA 41
JAYEECHI 108 Aipürai maʼin Jeʼwaa
Ayateeria miyoʼuin saalin wayuu nüpüla Maleiwa
«Jaapa analuʼut nümüin Jehová süka anamiain nia, ayateeria miyoʼuin saalin wayuu nüpüla waneepia» (SAL. 136:1).
TÜ WATÜJEETKAT
Yüülale waaʼin, katchinjeerü waaʼin jülüjale waaʼin alin waya nüpüla Jehová maʼaka süküjain shia tü Bibliakat.
1, 2. ¿Kasa eeka süpüla jülüjain waaʼin weʼrapa wamüliala?
MAA CHAKAI PAAʼIN suluʼu wanee anuwa pasanain sünain palaa. Sukumajaʼalaa sümaka wanee wawai, katchinsü maʼin tü joutaikat sümaa miyoʼu maʼin tü sümünakat palaa, sajarattüin neʼe tü anuwakat. Süpüla jimatüinjatüin tü anuwakat jee nnojoluin sülüʼüjüin shia tü joutaikat choʼujaasü sujutünüin tü karapinkat shiroku tü palaakat.
2 Eeshii süpüla sükayaleʼerüin waya nuulia Jehová tü kasa mojusü alatawaika wamüin. Tia müsü aka saaʼin wanee joutai katchinka maʼin alüʼüjaka wanee anuwa. Jamüsüjaʼa anale tü wakuwaʼipakat nnojotsü wainmajüin waaʼin alin waya nüpüla Jehová jee nükaalinjain waya, shiasaʼa weʼrapa wamüliala eesüjaʼa motowaire waaʼin tia (Sal. 10:1; 13:1). Eesüjaʼa sütütülaale waaʼin sutuma anain nünüiki wanee waʼaleewain wamüin (Prov. 17:17; 25:11). Eepejeʼe süpüla wainmajüin waaʼin süchikuaʼa mapa jee jülüjain waaʼin maalin waya nüpüla Jehová. ¿Kasa waaʼinrajatka suulia wainmajüin waaʼin sünain alin waya nüpüla Jehová jee nükaalinjeein waya?
3. (1) ¿Jamaluʼulu tü pütchikat «miyoʼuin tü waalinkat nüpüla Jehová»? (Salmo 31:7; 136:1). (2) ¿Jamüsü watüjaakaʼa saaʼu miyoʼuleein maʼin tü waalinkat nüpüla Jehová suulialeʼeya tü waalinkat süpüla wayuu? (Piirakaa sümüin tü ayaakuaakat).
3 Anasü jülüjale waaʼin miyoʼuin tü waalinkat nüpüla Jehová süpüla jimatüinjatüin waaʼin soʼunnaa weʼrüin müliaa (paashajeʼera Salmo 31:7; 136:1). Tü pütchikat «miyoʼuin tü waalinkat nüpüla» müsü aka saaʼin nukuwaʼipa wanee wayuu kiʼrakai aaʼin nümaa wanee jee anakai aaʼin nümaa. Miyoʼuleesia tü waalinkat nüpüla Jehová suulialeʼeya tü waalinkat nüpüla wanee wayuu, müsüjeseʼe müin tü Bibliakat mayaa: «Amülialaasü taaʼin saalin wayuu» otta süküjainña sülanaʼaleein maʼin naalin nüpüla Maleiwa na kojutukana amüin nia (Éx. 34:6, 7; Sal. 103:11). Jülüja paaʼin tüü: Nnojoleechi nüpütüin Jehová nümüiwaʼa chi wayuu waneepiakai nümaa. Jülüjale paaʼin tia, jimateerü paaʼin piʼrapa müliaa (Sal. 23:4).
Maʼaka jimatüin wanee anuwa soʼunnaa wanee wawai sutuma tü karapinkat, jimateerü waaʼin soʼunnaa müliaa wanoujale sünain alin waya nüpüla Jehová. (Paashajeʼera tü pütchikat 3).
JÜLÜJA WAAʼIN SÜSHAJÜNÜIN SULUʼU TÜ BIBLIAKAT ALIN WAYA NÜPÜLA JEHOVÁ
4. (1) ¿Jetsü waneirua kasa ashajünakat suluʼu tü Bibliakat? (2) ¿Jamüsü nnojotkaʼa wainmajüin waaʼin sünain shiimain tü ashajünakat suluʼu tü Bibliakat?
4 Wanee kasa waaʼinrajatka suulia wainmajüin waaʼin sünain alin waya nüpüla Jehová shia jülüjain waaʼin süshajünüin tia suluʼu tü Bibliakat. Tia shia soʼutku tü kasa nütüjaainjatkalü aaʼu wanee wayuu palajana suluʼujee tü Bibliakat, maʼaka saaʼin Jehováin nünülia Maleiwa, niain Jesús chi waneeshikai nüchon Maleiwa, nnojoluin kasain natüjaain aaʼu na outushiikana, paʼaraiisüinjatüin tü mmakat jee kepiainjana na wayuukana yaa saaʼu süpüla kaʼikat süpüshuaʼa (Sal. 83:18; Ecl. 9:5; Juan 3:16; Apoc. 21:3, 4). ¿Aashin nnojoluin wainmajüin paaʼin shiimain tü ashajünakat suluʼu tü Bibliakat? Anasü jülüjale paaʼin süshajünüin suluʼu tü Bibliakat alin pia nüpüla Jehová. Paaʼinrüle tia, nnojoleerü jülüjain paaʼin maalin pia nüpüla Jehová. Anashii wekirajaale süchiki tia.
5. ¿Jamüsü süpüla nuuʼulaainjachin wanee wayuu suulia tü nunoujapuʼukalü anain?
5 Eesüjaʼa naatale tü punoujapuʼukalü anain süpülapünaa pikirajaain sünain tü Bibliakat, piyaawatapejeʼe saaʼu mapa puuʼulaainjatüin suulia punoujain sünain waneirua kasa punoujapuʼukalü anain. Eesüjaʼa punoujapuʼule niain Jesús chi Maleiwakai, shiasaʼa pikirajaapa sünain tü Bibliakat piyaawata aaʼu nnojoluin shiimain tia, punoujakalaka sünain tü sümakat tü Bibliakat süchiki niain Jesús «akumajünaka nutuma Maleiwa palajana süpülapünaa kasa süpüshuaʼa» otta niain «chi waneeshikai Nüchoin Maleiwa» (Col. 1:15; Juan 3:18). Eepejeʼe süpüla kapüleein wamüin wooʼulaain suulia tü wanoujapuʼukalü anain (2 Cor. 10:4,5). Wayaawatüle saaʼu nnojoluin shiimain wanee kasa, nnojotsü wanoujain piantua sünain tia (Filip. 3:13).
6. ¿Kasanainjeesü süshajünakaʼa kojuyatua tü pütchikat «miyoʼuin saalin wayuu nüpüla Jehová» makat suluʼu Salmo 136?
6 Eesüjaʼa jülüjale paaʼin maalin pia nüpüla Jehová müliale pia. Anasüjeseʼe püsakirüle paaʼin sünain tüü: ¿Pansaasüche tü jülüjakat taaʼin sümaa tü ashajünakat suluʼu tü Bibliakat? Anasü paashajeʼerüle tü sümakat Salmo 136:1, miyoʼu «saalin wayuu nüpüla Jehová» müsü tia wetsiikulokot. ¿Kasapülajatü süshajünakaʼa tia pütchikat? Piama shikii aipiruamüin süshajünüin tü pütchikat «miyoʼuin saalin wayuu nüpüla» suluʼu tia kapiitulokat, ¿kasanainjeesü süshajünakaʼa tia pütchikat? Shiimain alin maʼin nüpüla Jehová na wayuu aʼyataakana nümüin maʼaka shiimain pümüin tü wane kasa ashajünakat suluʼu tü Bibliakat. Aishi pia nüpüla Jehová, nnojo punoujain sünain maalin pia nüpüla.
7. ¿Jarat tü wetsiikulo wayaawatakalü akajee alin waya nüpüla Jehová?
7 Wainma pütchi suluʼukat tü Bibliakat eere süshajünüin alin waya nüpüla Jehová. Jülüjataa waaʼin tü nümakat Jesús namüin na nikirajüinkana, anuu tü nümakat namüin: «Alanaʼaleesia maʼin jaalin nüpüla suulialeʼeya tü wüchiicheinkat» (Mat. 10:31). «Jaratka atüjaain saaʼu aire jia nüpüla Maleiwa suulialeʼeya tü wüchiicheinkat», nnojoishi müin Jesús. Jülüjataa waaʼin jooluʼu tü nümakat Jehová namüin na israelitakana: «Shiimain katsüinjeerüin paaʼin tatuma. Shiimainshaata maʼin takaalinjeechin pia. Ayateechi takaalinjain pia süka tü tajapü tekiakat» (Is. 41:10). «Eeshijaʼa takaalinjeechire pia», nnojoishi müin Jehová. Shiimainshaata tü sümakat tia wetsiikulokot, nnojotsü ashajünüin neʼe shia süpüla anainjatüin waaʼin sutuma, shia süpüla wanoujain sünain alin waya nüpüla Jehová. Anasü jülüjale shia paaʼin waneepia jee paashajaa nümaa Jehová süchiki tü wainmajakalü atuma paaʼin. Waaʼinrüle tia, meerü wanüiki maʼaka naaʼin na anoujashii namaiwajanakana wanaa sümaa namüin: «Watüjaa aaʼu alin waya nüpüla Maleiwa otta watüjaa aaʼu shiimain tü waalinkat nüpüla» (1 Juan 4:16).a
8. ¿Kasa waaʼinrajatka maalinre waya nüpüla Jehová waküjainruʼu?
8 Ayatüle wainmajüin paaʼin maalin pia nüpüla Jehová, anasü jülüjale paaʼin tü sümakat tü Bibliakat süchiki alin pia nüpüla Jehová. Sutuma shimeejüin waya tü waaʼinkat, eesüjaʼa jülüjale waaʼin maalin waya nüpüla Maleiwa. Shiimain tü ashajünakat suluʼu tü Bibliakat süchiki alin waya nüpüla Maleiwa. Anasüjeseʼe maʼin sotule waaʼin waneepia aipüraliin wayuu Maleiwa jee meeria nukuwaʼipa süpüla kaʼikat süpüshuaʼa (1 Juan 4:8).
JÜLÜJA WAAIN ALIN WAYA NÜPÜLA CHI WASHIKAI JEHOVÁ
9, 10. ¿Kasa nüküjeeka achiki Jesús wanaa sümaa nümüin: «Aishii jia nüpüla chi Tashikai»? (Juan 16: 26, 27; piirakaa sümüin tü ayaakuaakat).
9 Wane kasa wanoujeetka maʼin atuma alin waya nüpüla Jehová shia jülüjale waaʼin tü nümakat Jesús namüin na nikirajüinkana wanaa sümaa nümüin namüin: «Aishii jia nüpüla chi Tashikai» (paashajeʼera Juan 16:26, 27). Nnojotsü nüküjain Jesús tia shiiʼiree anainjatüin neʼe naaʼin na nikirajüinkana. Wayaawata aaʼu tia sünainjee tü nümakat namüin na nikirajüinkana süpülapünaa nüküjain tia, yootushi nia namaa süchiki tü sukuwaʼipainjatkat natuma noʼuraajapa nümüin Jehová.
10 Nnojotsü nüküjain Jesús namüin na nikirajüinkana noʼuraajüinjanain nümüin, nüküjain namüin noʼuraajüinjanain nümüin Jehová nünülialuʼu niakai (Juan 16:23, 24). Pansaainjatpejeʼe namüin jaralinjachin noʼuraajüin amüin. Nüsoʼiraapa aaʼin Jesús eesüjaʼa jülüjale naaʼin na nikirajüinkana anain noʼuraajüle nümüin jee naapajeerüin nanüiki otta nuchuntuinjachin mapa napüleerua nümüin Jehová süpüla nükaalinjain naya. Anuu nünüiki Jesús namüin suulia jülüjain naaʼin tia: «Aishii jia nüpüla chi Tashikai». Sutuma alin maʼin waya nüpüla Jehová, naapajüin wanüiki woʼuraajapa nümüin jee nnojotsü choʼujaain nuchuntuinjachin wanee wayuu nümüin wapüleerua, ashajünüsü süchiki tia suluʼu tü Bibliakat. Jamüshijaʼa pikirajaapa sünain tü Bibliakat piʼraajüin nukuwaʼipa Jesús jee aishi nia püpüla (Juan 14:21). Niapejeʼe puʼuraajakai amüin Jehová maʼaka naaʼinrüin shia na nikirajüinkana Jesús. Pütüjaa aaʼulu «alin pia nüpüla Jehová» jee naapajeerüin pünüiki, oʼuraajüshi pia nümüin Jehová sutuma punoujain sünain alin pia nüpüla (1 Juan 5:14).
Watüjaa aaʼulu naapajeerüin Jehová wanüiki woʼuraajapa nümüin jama alin waya nüpüla. (Paashajeʼera tü pütchikat 9 otta 10).b
JÜLÜJA WAAʼIN KASAIN WAINMAJAAKA ATÜMA WAAʼIN
11. ¿Jamüsü talateetkaʼa naaʼin Satanás wainmajüle waaʼin sünain alin waya nüpüla Jehová?
11 Wainmajüsü waaʼin nutuma Satanás. Müshi «nikeekai aaʼin» waya chi Yolujaakai otta keeʼireesü naaʼin jülüjain waaʼin maalin waya nüpüla Jehová (1 Ped. 5:8). Watüjaa aaʼulu naapüin Jehová nikii chi Nüchonkai süpüla outajachin nia waaʼu, naaʼinrüin tia süka alin waya nüpüla. Nüchajaapejeʼe sukuwaʼipa Satanás shiiʼiree jülüjain waaʼin amülaain neʼe tü naaʼinrakat Jehová wapüleerua süka kaainjaralin maʼin waya (Heb. 2:9). Talateerü naaʼin Satanás wainmajüle waaʼin alin waya nüpüla Jehová otta talateechiaʼaya nia sümalajaale wanoula sutuma tü müliaa weʼrakat. Jülüja waaʼin tüü: Nimeejeein waya chi Yolujaakai shiiʼiree jülüjain waaʼin maalin waya nüpüla Jehová maʼaka maalin nia nüpüla sutuma mojulaain maʼin nia (Éf. 6:11). Wayaawatüle saaʼu tü nimeejeekalü aka waya Satanás wayouteerü sümaa tü nümakat (Sant. 4:7).
12, 13. ¿Jamüsü waaʼin sutuma waleʼeruʼuin süchiki kaainjalaa?
12 Wane kasa wainmajaka atuma waaʼin aire waya nüpüla Jehová shia sutuma waleʼeruʼuin süchiki kaainjalaa (Sal. 51:5; Roma 5:12). Sutuma waleʼeruʼuin süchiki kaainjalaa nnojoishii waya joʼuujiraain sümaa anajiraain waya nümaa Maleiwa, nnojotsü anain tü jülüjakat waaʼin, mojusü waaʼin jee ayuuishii waya.
13 Nnojotsü anain tü kasa weʼrakat sünainjee waleʼeruʼuin süchiki kaainjalaa. Jamüshiijaʼa kaainjarale waya mojusü waaʼin, shapaasü waaʼin, wainmajüsü waaʼin jee eʼrüshii waya japülii sünainjee. Eesüjaʼa müle waaʼin sutuma watüjaain saaʼu nnojoluin lotuin maʼin wakuwaʼipa maʼaka keeʼireetüjülia shia naaʼin Jehová (Roma 8:20, 21). Jamüsüjaʼa seewaale shiyaantain wanee kemion nnojotsü süpüla suwataainjatüin, müsia wakuwaʼipa sutuma waleʼeruʼuin süchiki kaainjalaa nnojotsü süpüla wekeraajüin süpüshuaʼa tü kasa nukumajaka apüla waya Maleiwa. Sutumajee müin wakuwaʼipa, eesüjaʼa wainmajüle waaʼin aire waya nüpüla Jehová. Sülatüle wamüin tia, jülüja waaʼin niain Jehová chi Miyoʼushikai jee Pülakai maʼin, miyoʼuin maʼin naalin nüpüla na aikana apüla nia jee na oonookana waneepia sümaa tü nuluwataakalü anain (Neh. 1:5).
14. ¿Jamüsü sükatchinraakaʼa waaʼin naapüin Jehová nikii chi nüchonkai? (Roma 5:8) (Paashajeʼera tü pütchikat «Jalia jimeejünüin sutuma kaainjalain jia»).
14 Eesüjaʼa jülüjale waaʼin maalin waya nüpüla Jehová sutuma nnojoluin lotuin maʼin wakuwaʼipa. Wayaawatapejeʼe saaʼu miyoʼuin tü waalinkat nüpüla Jehová sutuma naapüin nikii chi Nüchonkai shiiʼiree anajiraainjanain waya nümaa (1 Juan 4:10). Anasü jülüjale waaʼin nüntüin Jesús saʼakamüin wayuu süpüla nuʼtteʼerajatüin wayuu eekai kaainjaralüin (paashajeʼera Roma 5:8). Eesüjaʼa süpüla jülüjain waaʼin maalin waya nüpüla Jehová süka waleʼeruʼuin süchiki kaainjalaa, nütüjaapejeʼe saaʼu Jehová isain wachiki lotuin sukuwaʼipa süpüshuaʼa tü kasa waaʼinrakat. Sutuma wayaawatüitpain saaʼu tia, wachechereerü waaʼin suulia jülüjain waaʼin tia nüchiki Jehová (Roma 7:24, 25).
WANEEPIA WAYA NÜMAA JEHOVÁ
15, 16. (1) ¿Kaseerü naaʼinrakat Jehová waneepiale waya nümaa? (2) ¿Kasa wayaawataka atuma tia? (2 Samuel 22:26).
15 Nücheküin Jehová waneepiain waya nümaa (Deut. 30:19, 20). Müle shia watuma, eejeechi nia wamaa waneepia jee nnojoleena nüpütüin waya wamüiwaʼa (paashajeʼera 2 Samuel 22:26).
16 Maʼaka wekirajaainnapain anain aneerü waaʼin soʼunnaa weʼrüin wamüliala jülüjale waaʼin alin waya nüpüla Jehová jee nükaalinjeenain waya. Wainmajüle waaʼin sünain maalin waya nüpüla Jehová shia süka shimeejüin waya tü waaʼinkat. Sotuinjatpejeʼe waaʼin süshajünüin suluʼu tü Bibliakat alin waya nüpüla Jehová. Anasü wanoujale waneepia sünain miyoʼuin saalin wayuu nüpüla Jehová waneepia maʼaka süshajünüin suluʼu tü Bibliakat.
JAYEECHI 159 Kojutshi pia tamüin Jehová
a Anuu waneirua wetsiikulo eere süshajünüin alin waya nüpüla Jehová Deuteronomio 31:8; Salmo 94:14 otta Isaías 49:15.
b SÜCHIKI TÜ AYAAKUAAKAT: Nuchuntuin wanee wawala nümüin Jehová süpüla anainjatüin tü naaʼinrakat naaʼinmajapa nuʼwayuuse, süpüla niisattüin nünneetse jee nikirajapa tü nüchonkot süpüla alinjachin Jehová süpüla.