«Pia wanee wayuu kojutukai maʼin»

1, 2. ¿Kasa akaalinjeenaka waya süpüla wanoujain sünain kojutuin maʼin waya nümüin Jehová?

KOJUTUSHII maʼin nümüin Jehová napüshuaʼa na wayuu aʼyataashiikana nümüin. Eepejeʼe waneinnua naʼakajee eekai jülüjain naaʼin maalin naya nüpüla. Eesüjaʼa müle nakuwaʼipa sutuma nalerajünüin jee mojutuin naya amüinñüü. Müle pukuwaʼipa, ¿kasa akaalinjeechika pia süpüla punoujain sünain kojutuin maʼin pia nümüin Jehová?

² Jamüsüjaʼa pikirajaale sünain tü Bibliakat, pütüjaajeerü aaʼu jeʼtsüinjatüin pukuwaʼipa namüin na waneinnua naashin Jehová. Jamüshijaʼa Jesucristo chi Nüchonkai Maleiwa, kamaneeshi maʼin sümüin wayuu otta kojutusü maʼin wayuu nümüin. Sutuma müin nukuwaʼipa Jesús wayaawata aaʼu kojutuin nümüin Maleiwa na wayuukana jaʼitakajeʼe na jülüjakana aaʼin maalin naya apülawaa (Juan 5:19; Heb. 1:3). Sünain ekirajaayaka tüü, wekirajaajeerü anain piamasü pütchi. Palajana, tü naaʼinrakat Jesús süpüla shiyaawatüin aaʼu wayuu kojutuin maʼin naya nümüin Jehová. Otta piama, tü paaʼinrajatkat süpüla punoujain sünain kojutuin pia nümüin (Ageo 2:7).

SHIYAAWATA AAʼU WAYUU NUTUMA JESÚS KOJUTUIN NAYA NÜMÜIN JEHOVÁ

3. ¿Jamüsü nukuwaʼipa Jesús namüin na wayuu galileajeʼewaliikana?

³ Soʼu tü apünüintuakat nukua Jesús sünain aküjaa pütchi Galileamüin, watta naalii na wayuu antakana nünainmüin süpüla nekirajünüin nutuma jee süpüla naawalaainjanain. «Amülialaasü naaʼin Jesús naalin na wayuukana süka müliain naya niʼrüin. Müshii unatakai naaʼin maʼaka saaʼin anneerü eekai marüleejuuin» (Mat. 9:36). Alerajünüshii jee mojutusalii naya wayuukana natuma na karaloʼutamaajanakana jee natuma na fariseokana, «nnojoishii kasain anain apüla» naya naashin (Juan 7:47-49). Kojutupejeʼe naya wayuukana nümüin Jesús. Nükatalüin kaʼi süpüla nikirajüin naya jee süpüla naawaleʼerüin naya suulia ayuulii (Mat. 9:35). Nikirajüin na nikirajüinkana süpüla naküjain pütchi sümüin wayuu jee naapüin laülawaa namüin süpüla naawaleʼerajatüin wayuu eekai ayuulin (Mat. 10:5-8).

4. ¿Kasa watüjaka sünainjee nukuwaʼipa Jesús namüin na wayuu arütkaakana nünainmüin?

⁴ Saaʼu kamaneein jee kojutuin nümüin Jesús na wayuu mojutukana atumawaa, wayaawata aaʼu kojutuin maʼin naya nümüin Jehová. Jülüjale paaʼin nnojoluin kasajachin pia nümüin Jehová, jülüjaa paaʼin tü nukuwaʼipakat Jesús namüin na wayuu arütkaakana nünainmüin. Paaʼinrüle tia, piyaawateerü saaʼu kojutuin maʼin pia nümüin Jehová.

5. ¿Kasa alataka sümüin tü wayuu chejeʼewatkat Galilea?

⁵ Nükaalinjeeinña Jesús waneʼewai nakua na wayuukana. Jamüshijaʼa nia wanaa sümaa nüküjain pütchi chaa Galilea saʼaka tü wayuukalüirua eejatü wanee wayuu polooirü piamamüin juya amülain isha sümüin (Mar. 5:25). Saashin Tü pütchi Aapünakat nümüin Moisés yarüttüsü sukuwaʼipa wanee wayuu ayuuire shia sutuma amülaain isha sümüin. Eesüjaʼa sümüiwaʼapuʼule tü wayuukat sutuma nnojoluin eein süpüla shipettünüin sutuma wayuu otta nnojotsü süpüla suʼwaajüinjachin Maleiwa namaa na waneinnua suluʼu tü aʼwaajüleekat jee nnojotsü süpüla suʼunuin sünain tü miʼiraa naainjapuʼukat na judíokana (Lev. 15:19, 25). Mojukajasaʼa maʼin saaʼin waneepia tia wayuukat sutuma müin sukuwaʼipa (Mar. 5:26).

6. ¿Kasa saaʼinraka tü wayuu chejeʼewatkat Galilea süpüla anainjatüin shia?

⁶ Shia neʼe keeʼireeka saaʼin tia wayuukat anainjatüin shia nutuma Jesús, nnojotpejeʼe suchuntuin shia nümüin. Eesüjaʼa japüire shia sutuma tü ayuulii sünainkat jee eesüjaʼa mmorüle shia seema jashichire Jesús sümüin saaʼujee saʼakain shia watta naalin wayuu sümaa sütüjaain aaʼu nnojoluin eein süpüla naʼakain shia. Shiasaʼa sünainjee kanoulain maʼin shia shipettüin nee nüsheʼin Jesús, sütüjaa aaʼu aneerüin shia saaʼinrüle neʼe tia (Mar. 5:27, 28). Nüsakiraka Jesús jaralin epettüin nüsheʼin. Süküjaka nümüin shia epettüin nüsheʼin. ¿Kasa naaʼinraka Jesús nütüjaapa saaʼu tia?

7. ¿Jamüsü nukuwaʼipa Jesús sümüin tü wayuukat? (Marcos 5:34).

⁷ Kamaneeshi maʼin Jesús sümüin tia wayuukat otta kojutusü shia nümüin, jama niʼrüin kutkuttaʼalaain neʼe shia (Mar. 5:33). «Nii waaʼiraa» müshi Jesús sümüin tia wayuukat sutuma sümülialaain naaʼin saalii jee sutuma alin shia nüpüla (paashajeʼera Marcos 5:34). Nuchuntuin Jesús tia pütchikat suulia mmoluin maʼin saaʼin tü wayuukat. Shia neʼe tia wayuukat naaʼinraka apüleerua Jesús tia. Talatakajasaʼa maʼin saaʼin tü wayuukat, jama kamaneein maʼin Jesús sümüin. «Nnojotsü mojuin tü paaʼinrakat» müshi nümakai aaʼin Jesús sümüin. Naawaleʼerüin shia otta anasü saaʼin nutuma. Shiyaawata aaʼu tü wayuukat sutuma tü naaʼinrakat Jesús süpüleerua alin maʼin shia nüpüla Maleiwa.

8. ¿Kasa alataka sümüin wanee wawala chejeʼewat Brasil?

⁸ Eeshii maaʼulu yaa waneirua wawalayuu mojukana maʼin aaʼin sutuma ayuulin naya jee eesü jülüjale naaʼin nnojoluin kasain anain apüla naya. Jülüjataa waaʼin tü alatakat sümüin wanee pürekutsoot chejeʼewat Brasil, Renata sünülia.a Joʼuusü shia sümaa nnojoluin wanee sajapü sümaa masaʼain shia. Anuu sünüiki: «Kanüliayaasü taya atumawaa otta aturaanüsü taya waneepia suluʼu koleejia jaʼitakajeʼe neʼe na tapüshikana mojusü maʼin taaʼin natuma».

9. ¿Kasa shiyaawataka atuma Renata kojutuin shia nümüin Jehová?

⁹ Akaalinjünüsü Renata natuma na wawalayuukana otta namülialüin saaʼin süpüla shiyaawatüin aaʼu kojutuin maʼin shia nümüin Jehová. «Isasüjeʼe tachiki tashajüin nanülia napüshuaʼa na wawalayuu akaalinjakana taya jee taapüin analuʼut nümüin Jehová süka naʼakain taya». Shiyaawata aaʼu Renata kojutuin maʼin shia nümüin Jehová sutuma süpüshuaʼa tü naainjakat na wawalayuukana süpüleerua.

10. ¿Kasa alataka sümüin María Magdalena? (Piirakaa sümüin tü ayaakuaakat).

¹⁰ Anasü wekirajaale jooluʼu sünain tü naaʼinrakat Jesús süpüla nükaalinjain María Magdalena. Wayuukat tia kaleʼeruʼupuʼusü yolujaa (Luc. 8:2). Sutuma müin sukuwaʼipa eesüjaʼa mmorüle wayuu seema jee suunjulajüin süpüleerua. Mojukajasaʼa maʼin saaʼin tia wayuukat sutuma maalin shia apülawaa otta nnojoluin jaralin akaalinjaa shia. Niyuʼluin Jesús süleʼeruʼujee María tü yolujaakalüirua jee kanoulasü shia nünain. Shiyaawata aaʼu María Magdalena sutuma süpüshuaʼa tü naaʼinrakat Jesús süpüleerua, kojutuin maʼin shia nümüin Maleiwa. Nnojotpejeʼe shiain neʼe naaʼinrüin Jesús tia süpüleerua.

11. ¿Kasa naaʼinraka Jesús süpüla shiyaawatüin saaʼu María kojutuin maʼin shia nümüin Jehová? (Piirakaa sümüin tü ayaakuaakat).

¹¹ Nuunejaain Jesús María Magdalena süpüla suʼunuinjatüin nümaa sünain aküjaa pütchi.b Saapajüinjeseʼe María Magdalena süpüshuaʼa tü nikirajaakalü anain Jesús. Nüsoʼiraapa aaʼin Jesús yootushi nia sümaa María Magdalena jee nüjütüin shia süpüla saapirüin na aluwataaushikana süchiki nüsoʼiraaichipain aaʼin süchikijee outaa. Sutuma tü naaʼinrakat Jesús süpüleerua María Magdalena shiyaawata aaʼu kojutuin maʼin shia nümüin Jehová (Juan 20:11-18).

12. ¿Jamüsü shikiiruʼukaʼa Lidia maalin shia apüla?

¹² Müsia nakuwaʼipa watta naalii wayuu maaʼulu yaa, maalinsalii naya apülawaa. Jülüjataa waaʼin tü alatakat sümüin wanee wawala chejeʼewat España, Lidia sünülia. Saashin shiaka süleʼeruʼuiwa tü shiikat sujutireein shia. Shiasaʼa jintuluiwaʼaya shia nnojotsü kasajatüin shia sümüin tü shiikat. Anuu sünüiki Lidia: «Sutuma maalin taya süpüla tü teikat shia keeʼireekat maʼin taaʼin alin taya napüla na waneinnua. Wainmajapejeʼe taaʼin jama tekiiruʼuin waneepia mojuin takuwaʼipa otta nnojoluin kasain anain apüla taya».

13. ¿Kasa shiyaawataka atuma Lidia kojutuin shia nümüin Jehová?

¹³ Aʼwanajaasü tü jülüjakat saaʼin Lidia sunoujapa nünain Jehová. Süka suʼuraajawalin sümaa saashajeʼerawalin tü Bibliakat jee sutuma tü namakat na wawalayuukana sümüin shiyaawata aaʼu kojutuin maʼin shia nümüin Jehová. Anuu sünüiki: «Nüküjawalin tamüin chi taʼwayuusekai tü kasa anakat tatuma otta alin taya nüpüla. Müsia neʼe nanüiki tamüin na taʼaleewainyuukana». ¿Piʼraajüinche wanee wawala choʼujaakai amüin nükaalinjünüin süpüla niyaawatüin saaʼu kojutuin nia nümüin Jehová? Anashi pükaalinjale nia.

PIYAAWATA SAAʼU KOJUTUIN PIA NÜMÜIN JEHOVÁ

14. ¿Kasa watüjaka nüchiki Jehová sünainjee tü sümakat 1 Samuel 16:7? (Paashajeʼera tü pütchikat «¿Kasa kojutuka atuma nümüin Jehová na aʼyataashiikana nümüin?»).

¹⁴ Naata tü jülüjakat naaʼin Jehová wachiki suulia tü jülüjakat saaʼin wayuu (paashajeʼera 1 Samuel 16:7). Nnojotsü anain neʼe nukuwaʼipa wanee wayuu nümüin Jehová sutuma anachoin nia, sutuma washirüin nia jee shiale sutuma nikirajaain suluʼu wanee universidad (Is. 55:8, 9). Anasü jülüjale paaʼin tü kojutukat atuma wanee wayuu nümüin Jehová. Süpüla tia anasü paashajeʼerüle suluʼu tü Bibliakat nachiki wayuu namaiwajannuu maʼaka naaʼin Elías, Noemí otta Ana jee jülüja paaʼin tü naaʼinrakat Jehová napüleerua nayaawataka atuma kojutuin naya nümüin. Eesiaʼaya süpüla püshajüin tü naaʼinrüitpakat Jehová püpüleerua saaʼujee alin pia nüpüla jee kojutuin pia nümüin. Otta wane kasa eeka süpüla paaʼinrüin shia püchajaain suluʼu tü karaloʼuta eekat wamaʼana süpüla pütüjaain saaʼu tü paaʼinrajatkat pikiiruʼule waneepia nnojoluin kasain anain apüla pia.c

15. ¿Jamüshi kojutukaʼa Daniel nümüin Jehová? (Daniel 9:23).

¹⁵ Kojutushi pia nümüin Jehová saaʼujee waneepiain pia nümaa. Jülüjataa waaʼin tü alatakat nümüin Daniel, chi nünüikimaajachikai Maleiwa. Soʼu wanee kaʼi mojusü maʼin naaʼin otta mapüsashi maʼin nia. Eetaasü maʼaka 100 nuuyase wanaa sümaa tia (Dan. 9:20, 21). Atütüleʼennüsü naaʼin Daniel nutuma Jehová nükajee wanee aapiee nümaʼanajeejachikai, Gabriel nünülia. «Pia wanee wayuu kojutukai maʼin», müshi nia nümüin (paashajeʼera Daniel 9:23). Kojutushi Daniel nümüin Jehová sutuma wayuuin loto akuwaʼipachi nia otta waneepiain nia nümaa (Ezeq. 14:14). Nüshajirüin Maleiwa suluʼu tü Bibliakat nüchiki Daniel süpüla nümülialüin waaʼin (Roma 15:4). Kojutushia pia nümüin Jehová otta naapajüin pünüiki puʼuraajapa sutuma waneepiain pia nümaa jee lotuin pukuwaʼipa (Miq. 6:8; Heb. 6:10).

16. ¿Kasa paaʼinrajatka süpüla müinjachin Jehová maʼaka naaʼin wanee püshi pümüin?

¹⁶ Müinjachi Jehová maʼaka naaʼin wanee püshi pümüin aikai maʼin apüla pia. Nükaalinjeein pia Jehová otta nnojotsü jülüjain naaʼin tü mojukat sünain pukuwaʼipa (Sal. 130:3; Mat. 7:11; Luc. 12:6, 7). Süka natüjaain saaʼu tia, anasü saaʼin watta saalii wayuu jülüjapuʼukana aaʼin nnojoliin kasain anain apüla naya. Jülüjataa waaʼin tü alatakat sümüin wanee wawala chejeʼewat España, Michelle sünülia. Müliasü maʼin saaʼin sutuma mojuin nünüiki chi suʼwayuusekai sümüin. Sutuma tia, shikiiruʼusü waneepia nnojoluin kasain anain apüla shia jee maalin shia apülawaa. Anuu sünüiki: «Mojupa maʼin taaʼin jülüjasü taaʼin yaain tamaa Jehová jee müshi nukoʼojokoi tanain süpüla naaʼinmajüin taya jee nümülialüin taaʼin» (Sal. 28:9). Anuu tü jülüjawaikat saaʼin wanee wawala chejeʼewat Sudáfrica, Lauren sünülia: «Saaʼujee alin taya nüpüla Jehová nürütkeʼerüin taya nünainmüin süpüla taʼyataainjatüin nümüin. Soʼujeʼereeya tia nükaalinjain taya süpüla waneepiainjatüin taya nümaa. Kojutusüjaʼamata taya nümüin süka müin takuwaʼipa nutuma» (Juan 6:44).

17. ¿Kasa paaʼinrajatka süpüla punoujain maʼin sünain talatüin naaʼin Jehová pümaa? (Salmo 5:12; piirakaa sümüin tü ayaakuaakat).

¹⁷ Punouja maʼin sünain talatüin naaʼin Jehová pümaa (paashajeʼera Salmo 5:12). Naashin David naaʼinmajüin Jehová na wayuu lotokana akuwaʼipa süka talatüin naaʼin namaa. Müshi niʼitaakai saaʼin wanee escudo naaʼu. Punoujale maʼin sünain talatüin naaʼin Jehová pümaa otta naaʼinmajüin pia atüjeechi pia süpüleerua pukuwaʼipa jülüjale paaʼin maalin pia nüpüla Jehová. Soteesü paaʼin nüküjain Jehová suluʼu tü Bibliakat alin pia nüpüla jee nüküjainña pümüin kojutuin pia nümüin nakajee na wawalayuukana otta na laülaashiikana wapüleerua. ¿Kasa paaʼinrajatka sümüliannüle paaʼin natuma na waneinnua?

18. ¿Jamüsü anakaʼa paapaale sümaa tü namakat pümüin na waneinnua?

¹⁸ Anale nanüiki na waneinnua pümüin nnojo piyoutajaain sümaa, punouja tü namakat pümüin. Eeshijaʼa niale Jehová aküjakai tia pümüin nakajee. «Taapaain sümaa tü namakat tamüin na waneinnua, jama nücheküin Jehová tanoujain sünain kojutuin taya nümüin», müsü sünüiki Michelle tü achuntunakat anülia suluʼu tü pütchikat 16. Kamaneeshii maʼin na laülaashiikana sümüin otta nakaalinjain maʼin shia. Pürekutsoot shia maaʼulu yaa, weteliita shia jee aʼyataasü shia shipialuʼujee.

19. ¿Jamüsü anakaʼa punoujale maʼin sünain kojutuin maʼin pia nümüin Jehová?

¹⁹ Pansaaleeitpa wamüin kojutuin waya nümüin Jehová sünainjee tü nukuwaʼipakat Jesús sümüin wayuu (Luc. 12:24). Anasüjeseʼe punoujale maʼin sünain alin pia nüpüla Jehová otta anasü pükaalinjale na waneinnua süpüla nayaawatüin saaʼu kojutuin naya nümüin Maleiwa.