Waashajaa suluʼu waaʼin süchiki tü kasa nümaʼanajeejatkat Maleiwa

1, 2. ¿Jamüsü waneejatka wakuwaʼipa suulia tü mürütkalüirua?

WANEʼEYA sümüin wakuwaʼipa suulia tü mürütkalüirua. Jamüshiijaʼa waya, eeshii süpüla yootuin waya sümaa wayuu, eeshii süpüla washajüin karaloukta sümaa waashajeʼerüin shia jee wayaawatüin saaʼu sünüiki wayuu. Akaʼaya waya, eeshii süpüla woʼuraajüin otta weeʼirajüin nümüin Jeʼwaa. Nnojotsü natüjaain aaʼu na cientiificokana jamüin saaʼinraka tü wekiisholoinkat tia.

² Eesü wanee kasa naapaka wamüin Jeʼwaa naataka atuma wakuwaʼipa suulia tü mürütkalüirua (Sal. 139:14; Alat. Map. 4:11). Nukumajüin waya Jeʼwaa sünain müin aka naaʼin, wainküinjeseʼe waneeküin süka waaʼin wamüiwaʼa tü waaʼinreekalü amüin (Gén. 1:27). Waya neʼe aneekaka süka waaʼin wamüiwaʼa müleka waʼyataainjanale nümüin Jeʼwaa jee waʼwaajüinjachire nia.

3. ¿Kasa naapaka Jeʼwaa wamüin süpüla nükaaliinjain waya?

³ Naapüin Jeʼwaa wamüin tü Wiwüliakat süpüla watüjaainjatüin saaʼu tü waaʼinrajatkat süpüla waʼwaajüinjachin nia otta waʼyataain nümüin. Maaʼulu yaa, eesü maʼaka saaʼin 2.800 anüikii sülatinnaka aluʼu tü Wiwüliakat, eesü eekai sülatinnüin süpüshuaʼa jee eesü tü eekai süpüshin neʼe. Waashajeʼerüle tü Wiwüliakat sümaa waashajaain suluʼu waaʼin süchiki tü sümakat, wayaawateerü aaʼu tü jülüjakat naaʼin Jeʼwaa (Sal. 40:5; 92:5; 139:17). Shiasaʼa sutuma wayaawatüin saaʼu tü jülüjakat naaʼin Jeʼwaa, waaʼinreerü tü kasa anasükat otta kateerü woʼu süpüla kaʼikat süpüshuaʼa (paashajeʼera 2 Timoteo 3:14-17).

4. (1) ¿Kasa waaʼinrajatka süpüla waashajaain suluʼu waaʼin süchiki wanee kasa? (2) ¿Jarat tü pütchi wekirajaainjatkalü anain jooluʼu?

⁴ Süpüla waashajaain suluʼu waaʼin süchiki wanee kasa, jülüjashaatainjatü shia waaʼin palajana otta weʼitaainjatü maʼin waaʼin sünain (Sal. 77:12; Prov. 24:1, 2). Choʼujaasü maʼin jülüjainjatüin waaʼin tü wekirajaakalü sünainjee nukuwaʼipa Jeʼwaa nümaa Jesuu (Juan 17:3). Wekirajaainjatü anain jooluʼu apünüinsü pütchi: ¿Kasa waaʼinrajatka süpüla mapüleeinjatüin wamüin aashajawaa suluʼu waaʼin? ¿Kasa eeka süpüla waashajaain achiki suluʼu waaʼin? ¿Kasa waaʼinrajatka süpüla waashajaʼawalin suluʼu waaʼin sümaa kamalain shia wamüin?

TÜ MAPÜLEEJEETKALÜ ATUMA AASHAJAWAA SULUʼU WAAʼIN

5, 6. ¿Kasa waaʼinrajatka süpüla nnojoluinjatüin motuin waaʼin tü pütchi waashajeʼerakat sümaa wayaawatüin shia?

⁵ Wainma kasa waainjaka sümaa nnojoluin jülüjain maʼin waaʼin shia, maʼaka saaʼin wasanalüin, wokoyojuin otta woʼunüin saaʼu wisiküleeta. Nnojotpejeʼe müin sukuwaʼipa waashajeʼerapa wanee karaloukta, süka jamüin, nnojorüle jülüjain waaʼin tü waashajeʼerakat, watteerü neʼe tü waaʼinkat. Sutuma tia, choʼujaasü jülüjashaatainjatüin waaʼin jamaluʼuluin tü pütchi waashajeʼerakat. Süchikijee waashajeʼerüin wanee pütchi jee shiale sünülia wanee ekirajaaya, anashii wasakireʼerüle waaʼin sünain tüü: «¿Kasa shikirajaka anain taya tü taashajeʼerüitpakat? ¿Tayaawatüinche saaʼu tü pütchikat?».

⁶ Waashajeʼerüinjanapa wanee karaloukta, shia anaʼleeka aluʼu waashajeʼerüle shia sümaa jiattain wanüiki. Waainjüle tia, nnojoleerü motuin waaʼin tü waashajeʼerakat naashin na cientiificokana. Nütüjaatüjülia aaʼu Jeʼwaa tia süka niain kakumalain waya, müshijeseʼe nuluwataain Josué sünain aashajeʼeraa tü pütchi aapünakat nümüin Moisés sümaa jiattain nünüiki, müinjachi nejejaakai aaʼin sünain aashajeʼeraa (paashajeʼera Josué 1:8). Waashajeʼerüle tü Wiwüliakat sümaa jiattain wanüiki, jülüjeerü waaʼin tü waashajeʼerakat otta nnojoleerü motuin shia waaʼin.

7. ¿Kasa waaʼinrajatka süpüla mapüleeinjatüin wamüin aashajawaa suluʼu waaʼin? (Piirakaa sümüin tü ayaakuaa suluʼukat süpana 27.)

⁷ Eesü kapüleere wamüin jülüjashaatain waaʼin tü pütchi waashajeʼerakat otta eesü kapüleerü wamüin waashajaain suluʼu waaʼin süchiki tia. Eesüjaʼa kapüleere tia wamüin sutuma mapüsain waya, miyoʼuin shiiʼira telewisoot, raawia otta jaʼyale shiyorolo wayuu. Anashii waashajaale suluʼu waaʼin eere yüütüülin otta jamaamapa waaʼin. Mapuʼusü sukuwaʼipa nutuma David, aashajaapuʼushi nia suluʼu naaʼin aipaʼa (Sal. 63:6). Jee müshia Jesuu, oʼunapuʼushi eere yüütüülin süpüla naashajaain suluʼu naaʼin jee süpüla nuʼuraajüin (Luc. 6:12).

TÜ WAASHAJAAINJATKAT SULUʼU WAAʼIN

8. (1) ¿Kasa eeka süpüla waashajaain achiki suluʼu waaʼin? (2) ¿Jamüsü naaʼin Jeʼwaa wanaa sümaa waküjüin pütchi nüchiki sümüin wayuu?

⁸ Choʼujaashaatasü waashajaain suluʼu waaʼin süchiki tü sümakat tü Wiwüliakat, eepajaʼa süpüla waashajaain suluʼu waaʼin süchiki tü kasa nukumajalakat Maleiwa. Jülüjapa waaʼin tü kasa nukumajakat Maleiwa, wasakireʼera waaʼin sünain tüü: «¿Kasa shikirajaka anain taya tüü nüchiki Jeʼwaa?». Waaʼinrüle tia, keeʼireejeerü waaʼin oʼuraajaa süpüla waapüin analuʼut nümüin Jeʼwaa. Akaʼaya wayakana, eesü süpüla waküjüin sümüin wayuu sünain talatüin waaʼin sutuma tü kasa nukumajakat Jeʼwaa (Sal. 104:24; Aluw. 14:17). Talatüshi maʼin Jeʼwaa müleka jülüjale nia waaʼin, woʼuraajüle nümüin jee waküjüle pütchi nüchiki sümüin wayuu. Müsü tü Wiwüliakat yaa: «Ashajünüsü suluʼu wanee karaloukta nanülia na sotokana naaʼin Jeʼwaa, na mmoluwaakana neema otta na jülüjakana aaʼin tü nünüliakat» (Mal. 3:16, TNM).

9. (1) ¿Kasa nümaka Pablo nümüin Timoteo? (2) ¿Kasa waashajaainjatka achiki suluʼu waaʼin süpülapünaa woʼunüin sünain aküjaa pütchi jee süpülapünaa wekirajüin wayuu sünain tü Wiwüliakat?

⁹ Nüküjüin Pablo nümüin Timoteo eejüinjatüin naaʼin sünain tü nümakat, sünain tü nukuwaʼipakat jee sünain tü nikirajakat (paashajeʼera 1 Timoteo 4:12-16). Eeinjatü waaʼin wayakanaya sünain tia. Jamüshiijaʼa waya, yapapa watuma tü pütchi wekirajüinjachikai anain wanee wekirajüin, aashajaainjana waya suluʼu waaʼin süchiki tia pütchikat. Jülüjeesü waaʼin kasain wasakirüinjachin anain nia süpüla naʼaleewajaain nümaa Maleiwa. Waaʼinrawaire tia, icheerü wanoula otta talateena waya sünain ekirajaa. Akaataajaʼa süpülapünaa woʼunüin sünain aküjaa pütchi, aashajaainjana waya suluʼu waaʼin süchiki tü wanüikinjatkat (paashajeʼera Esdras 7:10). Eesü süpüla waashajeʼerüin wanee kapiitulo suluʼu tü karalouktakat Aluwataaushikana jee eesü süpüla waashajaain suluʼu waaʼin süchiki tü wetsiikulo waashajeʼerüinjatkat sünain aküjaa pütchi jee shiale tü karaloukta waapüinjatkat sümüin wayuu. Keeʼireejeerü maʼin waaʼin aküjaa pütchi waainjüle tia (2 Tim. 1:6, TNM). Jülüjeesü waaʼin kasain jalouijeerüin namüin na wayuu waküjüinjanakana amüin pütchi otta jülüjeesü waaʼin jamüinjatüin wanüiki namüin süpüla kamalainjatüin namüin ekirajawaa sünain tü Wiwüliakat. Waaʼinrüle tia, atüjeena maʼin waya aküjaa pütchi süka tü Wiwüliakat (1 Cor. 2:4).

10. ¿Kasa maa eeka süpüla waashajaain achiki suluʼu waaʼin?

¹⁰ ¿Kasa maa eeka süpüla waashajaain achiki suluʼu waaʼin? Eesü süpüla shiain tü pütchi washajakat sünain tü outkajawaakat jee sünain tü outkajawaakat miyoʼu, akatalüinjana waya kaʼi süpüla wekirajaain wachikuaʼa sünain tia otta wasakira waaʼin mayaa: «¿Kasa tatüjaka sünainjee tü Wiwüliakat soʼu tia? ¿Kasa ekirajünaka süchiki nupueulose Maleiwa?». Eeshii süpüla waashajaain suluʼu waaʼin süchiki wanee pütchi suluʼujeejatka Aapiria Wayuu, ¡Despertad! otta tü karalouktairua ojuʼitawaikat sünain tü outkajawaakat miyoʼu. Akaʼaya waashajeʼerapa nüchiki wanee wawala suluʼu tü Anuariokot, waashajaa suluʼu waaʼin süchiki tia süpüla sujutuuinjatüin suluʼu waaʼin. Suʼunnaa waashajeʼerüin tü karalouktakalüirua, anasü wejeettüle otta washajüle sücheʼetoʼu tü karalouktakat tü pütchi eekai anain maʼin. Waaʼinrüle tia, nnojoleerü motuin waaʼin tü washajakat otta eesü süpüla waashajaain süchiki wekirajüinjanapa sünain tü outkajawaakat; eesü süpüla watütüleʼerüin naaʼin na wawalayuukana sükajee tia pütchikat otta eesü süpüla waashajaain süchiki tia wouyantapa wachikuaʼa namaʼanamüin na wayuu ekirajaweekana sünain tü Wiwüliakat. Wachajaainjatü sukuwaʼipa süpüla sujutuuin suluʼu waaʼin tü pütchi wekirajaakalü anain otta süpüla waapüin analuʼut nümüin Jeʼwaa saaʼujee tia.

WAASHAJAA SULUʼU WAAʼIN SÜCHIKI TÜ SÜMAKAT TÜ WIWÜLIAKAT

11. (1) ¿Kasa waashajaainjatka maʼin achiki suluʼu waaʼin? (2) ¿Jamüsü choʼujaaka maʼin waashajaain suluʼu waaʼin süchiki tü sümakat tü Wiwüliakat? (Paashajeʼera tü nootakat.)

¹¹ Tü waashajaainjatkat maʼin achiki suluʼu waaʼin shia tü sümakat tü Wiwüliakat. ¿Kaseetka waaʼinrüin napülajüle woulia na sülaülashiikana mma eeinjatüin Wiwülia wamaʼana?a Jaʼitairü süpülajünüin tia woulia, nnojoleerü jaralin apülajüin woulia waashajaain suluʼu waaʼin süchiki tü wetsiikulo watüjakat sünainjee tü Wiwüliakat otta müsia tü jayeechi watüjakalü apüleerua (Aluw. 16:25). Nükaaliinjeena waya Jeʼwaa nükajee chi naaʼinkai süpüla sotuinjatüin waaʼin tü wekirajaakalü anain jee nükaaliinjeena waya süpüla waneepiain waya nümaa (Juan 14:26).

12. ¿Kasa eeka süpüla paaʼinrüin süpüla paashajeʼerüinjatüin tü Wiwüliakat waneepia?

¹² Anuu wanee sukuwaʼipa süpüla paashajeʼerüin tü Wiwüliakat waneepia: eesü süpüla pükatalüin waneeirua kaʼi paashajeʼerüinjatka oʼu wanee kapiitulo wekirajaainjatkalü anain sünain tü outkajawaakat süpülajatka Ekirajawaa süpüla Aküjaa Pütchi. Asakireʼerüinjachi pia paaʼin sünain tü paashajeʼerakat. Soʼu tü wanee kaʼikalüirua, eesü süpüla paashajeʼerüin tü karalouktakat Mateo, Marcos, Lucas jee shiale Juan. Aashajaainjachi pia suluʼu paaʼin süchiki tü naainjakat Jesuu jee tü nikirajakalü anain (Roma 10:17, TNM; Heb. 12:2, TNM; 1 Ped. 2:21). Shiasaʼa süpüla pütüjaleeinjachin maʼin sünainjee tü paashajeʼerakat, anashi paashajeʼerüle wanee karalouktaka eeka wamaʼana aashajaaka süchiki tü naainjakat Jesuu soʼu yaajachin nia yaa mmapaʼa maʼaka saaʼin El hombre más grande (Juan 14:6).

CHOʼUJAASÜ MAʼIN WAASHAJAAIN SULUʼU WAAʼIN

13, 14. (1) ¿Jamüsü choʼujaaka waashajaain suluʼu waaʼin waneepia süchiki nukuwaʼipa Jeʼwaa otta nukuwaʼipa Jesuu? (2) ¿Kaseerü waaʼinraka müleka jülüjale waaʼin waneepia nukuwaʼipa Jeʼwaa nümaa Jesuu?

¹³ Waashajaale suluʼu waaʼin süchiki nukuwaʼipa Jeʼwaa otta nukuwaʼipa Jesuu, laülaajeerü waaʼin sünain anoujaa, icheerü wanoula (Heb. 5:14; 6:1). Nnojorüle waaʼinrüin maʼin tia, akaaʼinjaweena waya nuulia Jeʼwaa otta ooʼulaajeena waya suulia aleewa nümaa (Heb. 2:1; 3:12). Naashin Jesuu, naapaale wanee wayuu tü nünüikikat Maleiwa mojusheeka, eemiajaajeerü nunoula sutuma «shapaain naaʼin naaʼujiraa shiiʼiree washirüü je shiiʼiree emiʼijaa» (Luc. 8:14, 15).

¹⁴ Choʼujaasia maʼin waashajaain suluʼu waaʼin waneepia süchiki tü sümakat tü Wiwüliakat otta choʼujaasü weʼraajüinjachin Jeʼwaa, süka jamüin, washateerüin nukuwaʼipa (2 Cor. 3:18, TNM). Müleka masütaajüle waya süchiirua tia, ayateena waya ekirajaain nünain Jeʼwaa süpüla kaʼikat süpüshuaʼa (Ecl. 3:11).

15, 16. (1) ¿Jamüsü anaka waashajaale suluʼu waaʼin süchiki nukuwaʼipa Jeʼwaa otta nüchiki Jesuu? (2) ¿Jamüsü kapüleʼewaika wamüin wakatalüin kaʼi süpüla aashajawaa suluʼu waaʼin? (3) ¿Kasa weʼreetka waashajaale suluʼu waaʼin?

¹⁵ Talateena maʼin waya sünain aʼyatawaa nümüin Jeʼwaa müleka waashajaale suluʼu waaʼin süchiki nukuwaʼipa Jeʼwaa otta nüchiki Jesuu. Atütülaajeerü naaʼin na wawalayuukanaya sutuma müin wakuwaʼipa otta aneerü naaʼin na wayuu waküjakana amüin pütchi. Waashajaale suluʼu waaʼin süchiki tü naainjakat Jeʼwaa wanaa sümaa naapüin chi Nüchonkai waaʼu, keeʼireeshaateerü waaʼin aleewain waya nümaa Jeʼwaa (Roma 3:24; Sant. 4:8). Eeshi wanee wawala püreesashinka soʼu apünüin juya sutuma jüüjüüin nia nümüin Jeʼwaa, Mark nünülia, chejeʼewai nia Sudáfrica. Naashin chia wawalakai, anashaatasü nümüin aashajawaa suluʼu naaʼin süchiki nukuwaʼipa Jeʼwaa, süka jamüin, wainmain kasa nütüjaka nünainjee Jeʼwaa. Wanaa sümaa shapaain naaʼin Mark, naashajeʼerüin tü Wiwüliakat sümaa naashajaain suluʼu naaʼin süchiki tü naashajeʼerakat. Sutuma naainjain tia, anajaasü naaʼin sutuma.

¹⁶ Eesü kapüleere wamüin wakatalüin kaʼi süpüla waashajaain suluʼu waaʼin süchiki tü sümakat tü Wiwüliakat. ¿Jamüsü kapüleʼewaika wamüin tia? Kapüleʼewaisü wamüin süka wainmain kasa jülüjaka waaʼin. Jamüshijaʼa wanee wawala chejeʼewai África, Patrick nünülia, watta maʼin saalii kasa naainjaka otta eesü shapaale maʼin naaʼin sutuma tia naashin. Süpülapünaa naashajaain Patrick suluʼu naaʼin, oʼuraajüshi nia palajana süpüla nüküjüin nümüin Jeʼwaa tü shapaakalü atuma naaʼin. Sutuma naainjain tia, arütkaashi maʼin nia nünainmüin Jeʼwaa. Jee müsia, mapüleesat nümüin ayaawataa saaʼu nünüiki Jeʼwaa (Sal. 94:19). Waashajeʼerüle tü Wiwüliakat waneepia sümaa waashajaain suluʼu waaʼin süchiki tü sümakat, eʼreena waya kasa anasü suluʼujee tia (Aluw. 17:11).

MAPÜTAAINRE KAʼI PÜPÜLA

17. ¿Joujawaishi pia aashajaain suluʼu paaʼin süchiki tü paashajeʼerakat suluʼu tü Wiwüliakat?

¹⁷ Eeshii eekai natamaain wattachon sünain aashajeʼeraa tü Wiwüliakat, aashajaashii naya suluʼu naaʼin süchiki tü naashajeʼerakat jee oʼuraajüshii naya. Eeshii eekai naainjain tia kaleʼu, aliika jee shiale aipaʼa süpülapünaa neisalaain. Eetaashii joo na aashajeʼerakana tü Wiwüliakat motsomüin wattaʼa maalü otta motsomüin aipaʼa (Jos. 1:8). Akatalüinjana waya kaʼi waneepia süpüla waashajeʼerüin tü Wiwüliakat sümaa waashajaain suluʼu waaʼin süchiki tü waashajeʼerakat (Éf. 5:15, 16, TNM).

18. ¿Jameerü nakuwaʼipa nutuma Jeʼwaa na wayuu aashajaakana suluʼu naaʼin?

¹⁸ Aneerü nakuwaʼipa nutuma Jeʼwaa na aashajaakana suluʼu naaʼin süchiki tü naashajeʼerakat suluʼu tü Wiwüliakat jee na eʼitaakana suluʼu nakuwaʼipa tü naashajeʼerakat (paashajeʼera Salmo 1:1-3). Naashin Jesuu, talateena maʼin na oonookana sümaa tü sümakat tü Wiwüliakat (Luc. 11:28, TNM). Waashajaale suluʼu waaʼin waneepia süchiki tü sümakat tü Wiwüliakat, weʼitaajeerü shia suluʼu wakuwaʼipa jee kojuteechi Jeʼwaa amüinyüü sükajee tia. Akaʼaya wayakana, talateena maʼin waya maaʼulu yaa otta kateerü woʼu waneepia nutuma Jeʼwaa suluʼu tü Paʼaraiisükat (Sant. 1:25; Alat. Map. 1:3).