«Anashii jiʼyalajüle wanaa namaa na aʼyalajakana»

1, 2. ¿Jamüsü choʼujaaka watüjaain saaʼu tü waaʼinrajatkat süpüla wakaaliinjain na outakana apüshi? (Piirakaa sümüin tü ayaakuaakat).

ANUU sünüiki wanee wawala Susi sünülia: «Mojushaatasü waaʼin nüchiirua chi wachonkai süka outuin nia, eesü maʼaka wanee juya suluʼu müin wakuwaʼipa». Naashin wanee wawala, süchikijee outuin tü nuʼwayuusekat, müshi ayuuikai naaʼin, aijashaatasü jala nünain yaa. Wainma wayuu alatakana amüin tia. Eeshii wawalayuu nnojoliikana eʼitaain naaʼin sünain outuinjachin wanee napüshi süpülapünaa süntüin Armagedón. Nünaajaale wanee kasa pünain jee niale anaajaain wanee kasa nünain chi paʼaleewainkai: «¿Kasa paaʼinrajatka süpüla pükaaliinjain naya?».

² Eesü waapüirüle wanee pütchi makat mayaa: «Aneechi pia watta kaʼi», ¿shiimainchejeʼe tia? Anuu sünüiki wanee wawala outaka aʼwayuuse süchiki tia: «Tü anakalü atuma wanee wayuu shia tü kasa naaʼinrakat jükaaluʼuwai wanee kaʼi». Aishaatasü wamüin seewaale jala wanain yaa, akaajaʼa neʼe mojule waaʼin sutuma wanee kasa, aishaatasü wamüin. Süpüla süshatüin jiattaʼaya tü walioʼukat, weiyajüinjatü shia. ¿Kasa waaʼinrüinjatka süpüla anatchoinjatüin naaʼin wanee wayuu outule wanee kasa nünain?

JEʼWAA CHI AMÜLIAJÜIKAI WAAʼIN

3, 4. ¿Jamüsü nütüjaaka aaʼu Jeʼwaa aishaatain wamüin outule wanee kasa wanain?

³ Wayaawata aaʼu niain analüin atuma waaʼin Jeʼwaa chi Washi amüliajüikai maʼin (paashajeʼera 2 Corinto 1:3, 4). Nia neʼe Jeʼwaa atüjaaka saaʼu jamüin naaʼin wanee wayuu. Müsü nünüiki Jeʼwaa namüin na wayuu aʼyataakana nümüin: «Taya Chi atütüleʼerakai jaaʼin» (Isa. 51:12; Sal. 119:50, 52, 76).

⁴ Outuinna kasa nünain chi Washikai Jeʼwaa, chi amüliajakai waya. Anaa nanülia: Abraham, Isaac, Jacob, Moisés otta David (Núm. 12:6-8; Mat. 22:31, 32; Aluw. 13:22). Keeʼireeshaatasü naaʼin Jeʼwaa süntüin tü kaʼi nüsoʼirüinjanakalü oʼu naya (Job 14:14, 15). Soʼu kaʼikat tia, talateena maʼin naya otta nnojoleena naya ayuulin. Oʼutunushinka aaʼin chi Nüchonkai Jeʼwaa, aishaatashi maʼin nia nüpüla (Prov. 8:22, 30). Isasü wachiki wayaawatüin saaʼu aishaatain nümüin Jeʼwaa wanaa sümaa outuin chi Nüchonkai (Juan 5:20; 10:17).

5, 6. ¿Kasa naainjaka Jeʼwaa süpüla nümülialüin waaʼin?

⁵ Weʼitaashaata waaʼin sünain nükaaliinjeenain waya Jeʼwaa. Waküja nümüin süpüshuaʼa tü suluʼukat waaʼin. Jimatüsü waaʼin sutuma niyaawatüin saaʼu Jeʼwaa jamüin waaʼin sülatüle wamüin wanee kasa jee amülialaasü naaʼin waalin. ¿Jamüsü sukuwaʼipa tia nutuma?

⁶ Wanee soʼutku kasa nümüliajaka aka waya Jeʼwaa nia nüka chi naaʼinkai (Aluw. 9:31). Naashin Jesuu, chi wayuu achuntakai nümüin Jeʼwaa chi naaʼinkai, naapeechi nia nümüin (Luc. 11:13). Anuu sünüiki Susi: «Wasapainkapuʼushii waya sünain oʼuraajaa nümüin Jeʼwaa, wachuntuin nümüin nümülialüinjatüin waaʼin. Naapawalin Jeʼwaa wamüin wanee anaa jutataka atuma waaʼin suulia shapawaa aaʼin» (paashajeʼera Filipos 4:6, 7).

NÜTÜJAA AAʼU JESUU TÜ WAMÜLIALAKAT

7, 8. ¿Jamüsü watüjaaka saaʼu nümülialeerüin waaʼin Jesuu?

⁷ Wanaa sümaa yaajachin Jesuu yaa Mmapaʼa, nüshatüin nukuwaʼipa chi Nüshikai, jaʼyasü tia naaʼu sükajee tü nümakat jee sükajee tü naaʼinrakat (Juan 5:19). Nuluwataain Jeʼwaa Jesuu yaa Mmapaʼa süpüla nümülialüin naaʼin na müliakana aaʼin jee na outakana apüshi (Isa. 61:1, 2; Luc. 4:17-21). Natüjaa aaʼu na wayuukana sünain niyaawatüin aaʼu Jesuu tü namülialakat jee nükaaliinjeeshaatain naya (Heb. 2:17).

⁸ Wanaa sümaa jimaʼalin Jesuu, mojusü naaʼin sutuma outuin naʼaleewainyuu jee kasayuu nünain. Jamüshijaʼa José, chi nüshiyaashikai Jesuu, outushi nia wanaa sümaa jimaʼalin Jesuu.a Aikajasaʼa maʼin nümüin Jesuu tia jee mojusü naaʼin sutuma müliain saaʼin tü niikat jee na nuwalayuukana.

9. ¿Kasa naainjaka Jesuu wanaa sümaa outuin Lázaro?

⁹ Wanaa sümaa nüküjapuʼuin Jesuu pütchi, amülialaasü naaʼin naalin na wayuukana jee niyaawata aaʼu tü alatakat namüin. Wanaa sümaa outuin Lázaro chi naʼaleewainkai Jesuu, aʼyalajüshi nia süka niʼrüin sümüliala María sümaa Marta (Juan 11:33-36).

10. ¿Jamüsü watüjaaka saaʼu sümülialaain naaʼin Jesuu waalin niʼrapa müliain waya?

¹⁰ ¿Jamüsü sümülialaka waaʼin tü naaʼinrakat Jesuu sümaiwa? Süküjain tü Wiwüliakat nnojoluin suʼwanajaain nukuwaʼipa Jesuu, tü nukuwaʼipakat paala, müsia aka tü nukuwaʼipakat maaʼulu yaa jee ayateerü shia süpüla kaʼikat süpüshuaʼa (Heb. 13:8). Niakai nia «chi katakai atüma soʼu wayuu», nütüjaa aaʼu Jesuu sümüliala wayuu müsüjeseʼe eein süpüla nükaaliinjain na aainjinneekana kasa mojusü (Aluw. 3:15; Heb. 2:10, 18). Weʼitaain waaʼin sünain nümüliajeerüin waaʼin niʼrapa müliain waya. Naainjeerü tia soʼu tü kaʼi choʼujaakalü oʼu shia (paashajeʼera Hebreokana 4:15, 16).

«KATSÜINSÜ WAAʼIN SÜTÜMA TÜ PÜTCHIKAT»

11. ¿Jarat tü wetsiikuloirua amülialakat paaʼin?

¹¹ Amülialaasü waaʼin waashajeʼerapa tü aainjünakat nüpüleerua Lázaro wanaa sümaa nüsoʼireʼennüin aaʼin. Wainma pütchi suluʼuka tü Wiwüliakat amülialeetka waaʼin. Anuu wanee kasa watüjaaka aaʼu: «Aamasü maʼi wamüin süpüshua tü pütchi ashajünakat paala suluʼu tü karaloukta nüchikimaajatkat Maleiwa süpüla wekirajaajiraain sünain. Müleka weʼrüle müliaa, akaaliijünüshii waya sütüma tü pütchikat süpüla süchecherüinjatüin waaʼin suʼutpünaa tü müliaakat. Je müleka süshapajaale waaʼin sünain waʼatapajüin tü naaʼinrüinjateetkat chi Maleiwakai wamüin, katsüinsü waaʼin sütüma tü pütchikat sümaʼinruʼu waʼatapajüin» (Roma 15:4). ¿Anaajaaichi wanee kasa pünain? Anuu waneirua wetsiikulo amülialeetka paaʼin:

• «Nnojoishi wattaluʼuin Jeʼwaa noulia na mojukana aaʼin otta nükaaliinjain na wayuu yüülakana aaʼin» (Sal. 34:18, 19, TNM).

• «Wanaa sümaa wattain maʼin saalin tü kasa shapaakalü atuma taaʼin, anasü taaʼin sutuma pümülialüin taaʼin» (Sal. 94:19, TNM).

• «Waapüin analuʼut nümüin chi Maleiwakai süka alin maʼi waya nüpüla sünain anamiain maʼi nia wamüin. Ayatshiʼiya waya sünain wachecherüin waaʼin, süka watüjaain naaʼu sünain naaʼinrüinjatüin süpüshua tü nüküjakat achiki wamüin paala. Je sükajee tia, achuntüshii waya jaaʼu nümüin chi Wasenyotsekai Jesucristo je nümüin chi Washikai Maleiwa süpüla natütüjüinjanain jia süpüla katsüinjatüin jaaʼin» (2 Tes. 2:16, 17).b

NAMÜLIALÜIN NAYA NA WAWALAYUUKANA

12. ¿Kasa maa eeka süpüla waaʼinrüin süpüla wamülialüin naaʼin na waneinnua?

¹² Na wawalayuu anaajaakana apüshi, amülialaajeerü naaʼin natuma na wawalayuukana (paashajeʼera 1 Tesalónica 5:11). ¿Kasa waaʼinrüinjatka süpüla watütüleʼerüin naaʼin jee wamülialüin naaʼin na mojukana aaʼin? (Prov. 17:22). Soto waaʼin tüü: «Eesü kaʼi süpüla koʼutaa otta kaʼi süpüla aashajawaa» (Ecl. 3:7, TNM). Wekirajaa sünain tü sümakat piamasü wawalayuu. Anuu sünüiki Dalene, wanee wayuu outa aʼwayuuset: «Na wayuu anaajaakana apüshi, choʼujaasü naküjain tü jülüjakat naaʼin otta jamüin naaʼin. Naaʼinrapa tia, waapaja neʼe nanüiki». Anuu sünüiki Junia, wanee wayuu oʼunajiraakai aaʼin suwala: «Shiimainya nnojoluin wayaawatüin maʼin saaʼu jamüin naaʼin na anaajaakana apüshi, keeʼireepejeʼe waaʼin wamülialüin naaʼin».

13. ¿Kasa wayu sotuinjatka waaʼin?

¹³ Na anaajaakana apüshi, eeshii eekai naʼyalajüin maʼin otta eeshii eekai nachecherüin naaʼin suulia aʼyalajaa. Niaʼala neʼe chi wayuu anaajaakai apüshi atüjaaka saaʼu nümüiwaʼa jamüin naaʼin, eesüjaʼa isale nüchiki nüküjain jamüin maʼin naaʼin. Müsü sünüiki tü Wiwüliakat süchiki tia: «Chi wayuu mojukai aaʼin, niaʼala neʼe atüjaaka saaʼu jamüin maka tü naaʼinkat otta nnojotsü jaralüin talatajiraain aaʼin wanaa nümaa» (Prov. 14:10, TNM). Eesü süpüla nüküjain wanee wayuu anaajaakai apüshi jamüin naaʼin, isapejeʼe nachiki nayaawatüin maʼin aaʼu na waneinnua jamüin maka naaʼin.

14. ¿Kasa maa eeka süpüla waainjain süpüla wamülialüin naaʼin na mojukana aaʼin?

¹⁴ Sutuma süpüshuaʼa tia, eesü nnojorüle watüjaain saaʼu jamüinjatüin wanüiki nümüin wanee wawala anaajaakai apüshi. Anuupejeʼe sünüiki tü Wiwüliakat: «Akaajasaʼa nanüiki na kekiikana maʼin, aawalaasü saaʼin wayuu sutuma» (Prov. 12:18, TNM). Wainma wawalayuu aaʼinrakana tü sümakat tü poyeetokot Cuando muere un ser querido.c Anuu wanee kasa eeka süpüla waaʼinrüin: «Anashii jiʼyalajüle wanaa namaa na aʼyalajakana» (Roma 12:15, TNM). Anuu sünüiki Gaby, wanee wawala outaka aʼwayuuse: «Süpüla taküjain tü suluʼukat taaʼin, aʼyalajüsü taya. Amülialaasü taaʼin naʼyalajüle na taʼaleewainkana wanaa tamaa. Suʼunnaa tiayaalai, nnojotsü müin tamüiwaʼakai maʼin aaʼin».

15. ¿Kasa waaʼinrüinjatka isale wachiki jamüinjatüin wanüiki namüin na mojukana aaʼin? (Paashajeʼera tü pütchikat: «Tü wanüikinjatkat süpüla watütüleʼerüin naaʼin»).

¹⁵ Isale wachiki waküjain jamüinjatüin wanüiki, eesü süpüla washajüin shia sünain wanee tarjeta, wanee correo, wanee mensaaje jee washajüle shia sünain wanee karaloʼuta. Eesü süpüla washajüin wanee pütchi suluʼujeejatka tü Wiwüliakat, waküja süchiki wanee kasa anasü naainjaka müliashii jee shiale wanee kasa sotoka waaʼin nüchiki. Anuu sünüiki Junia: «Taapashaatain analuʼut suluwataanapa tamüin wanee karaloʼuta atütüleʼeraka taaʼin jee suunejaale taya wanee tawala süpüla toʼunuin shipialuʼumüin. Süpüshuaʼa tia makat, shiiʼiyatüin tamüin alin taya napüla jee naaʼinmajüin taya».

16. ¿Jarat tü wane kasa eekat süpüla waaʼinrüin?

¹⁶ Tü wane eekat süpüla waaʼinrüin shia woʼuraajüle napüleerua na wawalayuukana jee eeshii süpüla woʼuraajüin namaa. Shiimainpejeʼe kapüleein woʼuraajüin suʼunnaa tia mojaakalü aaʼin. Eeshii waʼyalajüle jee isale wachiki wojuʼitirüin wanüiki. Woʼuraajüle süka süpüshuaʼa waaʼin, aneerü naaʼin sutuma tia. Anuu sünüiki Dalene: «Süntapa tü tawalayuukalüirua, tachuntuin namüin noʼuraajaiwa. Noʼuraajüinjanapa, isasü nachiki nojuʼitirüin nanüiki, shiasaʼa mapa, ojuʼita ojuʼita müsü nanüiki jee naaʼinrüin shia süka süpüshuaʼa naaʼin. Atütülaasü taaʼin sutuma teʼrüin katsüin maʼin nanoula otta aipüraliin naya wayuu».

AYATAʼAYA WAMÜLIALÜIN NAAʼIN NA WAWALAYUUKANA

17-19. ¿Jamüshii ayatüinjanakaʼaya wamülialüin naaʼin na wawalayuukana?

¹⁷ Na anaajaakana apüshi, eeshii eeka kakaliain mojuin maʼin naaʼin otta eeshii eeka sülatamaatüin noulia tü mojuukalü aaʼin. Choʼujaasüjeseʼe wakaaliinjain naya soʼu kojuya kashi, nnojoishii neʼe wakaaliinjainjanain naya maʼaka jeʼra kaʼi süchikijee nünaajaain müliashii otta yalaiwaʼaya namaa naʼaleewainyuu jee napüshi. Müsü Proverbios 17:17: «Shiimainre alin nüpüla naʼaleewain wanee wayuu, aishi nia nüpüla waneepia, müshi aka naaʼin wanee nuwala müliale nia niʼrüin». Ayatüinjanaʼaya wamülialüin naaʼin na anaajaakana apüshi waneʼereʼeya anatpa naaʼin (paashajeʼera 1 Tesalónica 3:7).

¹⁸ Eejeerü kaʼi mojuwaijeetka oʼu naaʼin nüchiirua müliashii. Eeshi süpüla sotuin naaʼin müliashii saaʼujee sülüʼülüin sükalia kasaatka oʼu naya jee shiale tü kaʼi outakalü oʼu nia. Eesü shiale sutuma wanee muusika, wanee ayaakuaa, wanee kasa naaʼinrapuʼuka müliashii jee shiale saaʼujee seejuu otta shiʼira wanee kasa. Jamüsüjaʼa sümüin wanee jiet eeka outuin suʼwayuuse, eesü süpüla mojuin saaʼin suʼunapa sümüiwaʼa sünain wanee outkajawaa miyoʼu jee sünain tü outkajawaakat eere Sotuin Waaʼin Outuin Jesuu waaʼu. Anuu nünüiki wanee wawala outaka aʼwayuuse: «Mojushaatasü maʼin taaʼin süka nnojoluitpain tamaa taʼwayuuse soʼu tü kaʼi sotowaikalü oʼu waaʼin kasaalüin waya. Nayasaʼa na wawalayuukana, oʼunushii naya tepialuʼumüin namaa na taʼaleewainyuukana süpüla nnojoluinjachin tamüiwaʼain taya soʼu tia».

¹⁹ Choʼujaasü namüliannüin aaʼin waneepia na anaajaakana apüshi, nnojotsü shiain neʼe soʼu tü kaʼi sotokolü oʼu naaʼin müliashii. Anuu sünüiki Junia: «Yalale pümaa paʼaleewainyuu süpüla natütüleʼerüin paaʼin, anashaatasü maʼin tia, jaʼitairü nnojoluin shiain tü kaʼi sotokolü oʼu paaʼin müliashii. Naashajaale jee noutkajaale pümaa soʼu wanee kaʼi, amülialaasü paaʼin natuma» (1 Juan 3:18). Müsü Gaby: «Taapüin analuʼut nümüin Jeʼwaa saaʼu nakaaliinjain taya na laülaashiikana jee natütüleʼerüin taaʼin soʼu mojushaatain taaʼin. Sutuma tia, tayaawata aaʼu alin maʼin taya nüpüla Jeʼwaa».

20. ¿Jamüsü sümülialaka waaʼin tü nümakat Jeʼwaa?

²⁰ Atütülaasü waaʼin süka niain Jeʼwaa wanee Maleiwa amüliajüi wayuu jee süka najaʼttirüinjatüin tü mojuukalü aaʼin nüsoʼireʼerapa naaʼin na outushiikana (Juan 5:28, 29). Naashin Jeʼwaa, «müiria nnojoluin eein nutuma tü outaakat. Müiria nnojoluin eein aʼyalajaa» (Isa. 25:8, TNM). Soʼu kaʼikat tia, talateena waya wanaa namaa na talatakana aaʼin, müinnia nnojoluin waʼyalajüin süka nnojoleerüin jaralüin aʼyalajüin sutuma mojuin saaʼin (Roma 12:15, TNM).