Tü paaʼinrajatkat süpüla anain pukuwaʼipa otta kamalain pümüin ekirajawaa sünain tü Wiwüliakat

Aashajeʼetshi Josué tü nünüikikat Maleiwa; ojuichijaasü süsepü Jericó shia neʼe apütaaka tü shipiakat Rahab; niyalerüin Josué nütüna iipünaamüin sünain achuntaa nümüin Maleiwa

NEKIIPÜʼÜSHI Josué na israeliitakana süpüla nantüin suluʼumüin tü Mma Aapünajatkat namüin. Kapüleesü tia naaʼinrakat. Nütütüleʼerapajaʼa Jeʼwaa naaʼin sünain nümüin nümüin: «Yalayala paaʼin sümaa meimmoluin pia». Süchikijee, nüküjaka Jeʼwaa nümüin Josué noonooinjachin sümaa tü Pütchi nuluwataakalü anain nia otta naashajeʼerüinjatüin shia saʼwai jee soʼukai süpüla kekiinjachin maʼin nia otta anakuwaʼipalüin tü naaʼinrakat (Jos. 1:7, 8).

Müliasü maʼin saaʼin wayuu maaʼutpünaa, akaʼaya waya, eʼrüshii wamüliala (2 Tim. 3:1). Aneetpejeʼe wakuwaʼipa müleka waaʼinrüle tü aluwataanakalü anain Josué nutuma Jeʼwaa. Waashajeʼerüinjatü tü Wiwüliakat waneepia otta waaʼinrüinjatü tü wekirajaakalü anain eejiraapa waya sümaa wanee kasa.

Nnojotsü kamalain wamüin wapüshuaʼa ekirajawaa otta eesü joo isale shia wachikiyaasaʼa. Choʼujaapejeʼe maʼin wekirajaain sünain tü Wiwüliakat wamüiwaʼa, müsüjeseʼe anain jülüjale waaʼin tü sümakat tü pütchikat «Puuʼulaka paaʼinrüin tüü». Sünain pütchikat tia, aküjünüsü tü anakat süpüla waaʼinrüin süpüla kamalain wamüin ekirajawaa jee anain wakuwaʼipa sünainjee.

Müsü niiʼirain wanee salmista: «Pikiraja taya sünain tü puluwataakalü anain süka kapülain taaʼin tia» (Sal. 119:35). Eesü süpüla kapülain paaʼin ekirajawaa sünain Nünüiki Maleiwa otta wainmeerü pütchi pütüjaweetka aaʼu ayatüle pikirajaain sünain.

Mayaapejeʼe nnojoluin shikiipüʼüin pia wanee pueulo maʼaka naaʼin Josué, eesü tü kasa eejiraakalü ama pia. Müsüjeseʼe anain pikirajaale sünain tü Nünüikikat Maleiwa otta poonooin sümaa tü sümakat. Paaʼinrüle tia, kekiijeechi maʼin pia otta anakuwaʼipaleerü tü paaʼinrakat.

PUUʼULAKA PAAʼINRÜIN TÜÜ

Puʼuraaja süpülapünaa pikirajaain. Nikiiruʼujeejatü Maleiwa tü pütchi sümakat tü Wiwüliakat otta nüshajirüin shia süpüla anainjatüin wakuwaʼipa sünainjee. Paashajeʼerüinjatpa tü Wiwüliakat, puchunta kaaliinwaa nümüin Maleiwa süpüla piyaawatüin saaʼu tü nümakat, süpüla sotuin shia paaʼin otta paaʼinrüin tü nümakat (Esd. 7:10).
Püsakireʼera paaʼin. Paashajeʼerapa tü Wiwüliakat jee shiale tü karaloʼutairua ayuʼluushikat sünainjee, püsakira paaʼin sünain tüü: «¿Kasa tatüjaka nüchiki Jeʼwaa sutuma tü taashajeʼerakat? ¿Jamüsü sünainpünaaka tia tü saashajaakat maʼin achiki tü Wiwüliakat? ¿Kasa taaʼinrajatka süpüla takaaliinjain wayuu sükajee wetsiikulokot tüüirua?».
Jülüja paaʼin tü pikirajaakalü anain. Paashajeʼerapa wanee pütchi, puuʼulaa motsomüin suulia aashajeʼeraa süpüla jülüjain paaʼin tüü: «¿Jamüsü taaʼin sutuma pütchikat tüü? ¿Jamüshiche maka taya? ¿Jamüsü sünainpünaaka shia tü alatakat tamüin sümaiwa, maaʼulu otta mapeena? ¿Kasa taaʼinrajatka süpüla teʼitaain suluʼu takuwaʼipa pütchikat tüü?» (Job 23:5; Sal. 49:3). Püsakireʼerapa paaʼin sünain tü paashajeʼerakat, jülüja paaʼin tüü: ¿Puunteetche püküjain jamüin nüpülajaka Jeʼwaa waneirua kasa suulia nupueulose otta jameerüin nukuwaʼipa chi wayuu nnojoikai oonooin nümaa? (Deut. 32:28, 29).
Maa piʼrakai saaʼin tü paashajeʼerakalü achiki. ¿Eeirü jülüjain paaʼin tü alatakat soʼu nuikünüin José natuma na nuwalayuukana namüin na ismaeliitakana? (Gén. 37:18-28). Maa chakai paaʼin chayaa, ¿kasa piʼraka? ¿Kasa paapaka? ¿Kasa paataka eejuu? Maa piakai aaʼin noʼutku na yalajanakana yala otta püsakira paaʼin sünain tüü: «¿Kasache jülüjaka naaʼin? ¿Jamüsüche naaʼin sutuma tü naaʼinrakat?». Jülüjale paaʼin tia, meerü piʼrakai saaʼin tia alatakat otta aneerü pukuwaʼipa sünainjee.
Pikirajaa süka tü kasairua shiʼitaakat nupueulose Jeʼwaa suluʼu Internet otta suluʼu karaloʼuta. Atüjeeshi pia süpüleerua achajawaa pütchi sükajee tia suluʼu pünüiki. Isale püchiki achajawaa pütchi suluʼu, puchunta kaaliinwaa nümüin eekai nütüjain süpüleerua. Wanee karaloʼuta eeka süpüla püchajaain aluʼu pütchi shia Índice de las publicaciones Watch Tower otta Nachajaayainjatü pütchi na aküjaliikana pütchi nüchiki Jeʼwaa, wainma pütchi aküjünaka achiki suluʼu tia karaloʼutakalüirua otta wainma wetsiikulo ekirajaanaka anain suluʼu. Pikirajaa süka tü poyeetokot Guia para el estudio de la Palabra de Dios (alijunaikiruʼu). Aküjünüsü yala süchiki tü mmairua saashajaakalü achiki tü Wiwüliakat, tü juya sülatakalü oʼu wanee kasa, sukuwaʼipa shimeriijia otta shipesajia wanee kasa sümaiwa, jee waneirua kasa.
Püshaja tü saashajaakalü maʼin achiki wanee pütchi pikirajaakalü anain. Paaʼinrüle tia, soteerü paaʼin tia pütchikat. Anaʼleepejeʼe maʼin paashajaale süchiki tia namaa na waneinnua. Püsakireʼera paaʼin tüü: «¿Anasüche süpüla taküjain tüü sümüin wayuu tojuʼitapa sünain aküjaa pütchi?». Paaʼinrüle tüü, soteerü paaʼin tü pikirajaakalü anain otta pükaaliinjeerü wayuu sükajee tia.