Ekeraajüsü tü sümakat tü Bibliakat süka nnojoluin paaʼinwaain na políticokana

Maaʼulu yaa nnojoishi paaʼinwaain na wayuukana natuma na políticokana. Naatawaisü tü jülüjakat naaʼin süchiki tü nuluwataayaka na políticokana sünainpünaaka nakuwaʼipa, jashichishi naya naküjapa tü mojuka namüin, na aʼyaatakana neʼipajee na laülaashiikana nnojotsü wanaawain naaʼin sünain tü kasa naneekajakat otta nnojotsü kojutuin namüin tü namaka na waneinnua. Müsüjeseʼe nnojoluin anain nakuwaʼipa na aluwataaliikana jaʼitairü naaʼinreein wanee kasa anasü.

Jülüjataa waaʼin tü alatakat suluʼu tü mmakat Estados Unidos otta Reino Unidos. Süküjatüjülia tü Bibliakat suʼwanajaʼawalin nakuwaʼipa na aluwataaliikana. Nüikaleʼerüitpa Maleiwa tü nuluwataayaka anoutereetka sukuwaʼipa tü mmapaʼakat.

Nnojoishi paaʼinwain na políticokana soʼunnaa sülüʼülüin sajaʼttüin kasa mojusü

Aküjünatüjülia suluʼu tü karaloʼutaka Daniel süchiki waneirua pütchi ekeraajaka. Anuu tü nümakat Maleiwa süchiki tü kasa alatajatka «soʼunnaa sükalia sajaʼttajatka oʼu kasa mojusü». Ashajünüsü tia pütchikat süpüla shikeraajüin mapa eere shiʼreerüin maʼin wayuu suʼwanajaain sukuwaʼipa tü kasakalüirua (Daniel 2:28).

Aʼlapüjaashi nutuma Maleiwa chi aluwataakai saaʼu Babilonia jee nüküjain nümüin süchiki tü ayaakua miyoʼuka maʼin, aainjüshika süka kachueera otta waneirua kasa. Nüküjain tia Daniel chi nünüikimaajachikai Maleiwa shiyaawase shia waneirua aluwataaya aluwataapuʼukat saaʼu wainma mma, chi ayaakua miyoʼukai shiyaawase wainma aluwataaya eejaakat otta ajaʼttinnakat soʼunnaa tü juya alatüitpakata. Shiasaʼa mmapaʼa süʼüjüchejaka tü ayaakua miyoʼuka sutuma wanee ipa tia ipa shiyaawase tü aluwatawaa nüikaleʼeraka Maleiwa (Daniel 2:36-45).

Ajaʼttinneerü naluwataaya na wayuukana sutuma sukuwaʼipa aluwatawaa nutuma Maleiwa shia tü nikirajaka anain Jesús namüin na nikirajüinkana nachuntajatüin nuluwataain Maleiwa (Mateo 6:10).

Aküjünüsü suluʼu tü Bibliakat suʼwanajaain nakuwaʼipa na políticokana. Jülüjataa paaʼin sukumajünüin nuuʼui chi ayaakua miyoʼushikai süka kachueera otta pootshi (Daniel 2:33). Nnojotsü müin saaʼin tü nüsaʼakat sünainmüin nikii süka saainjünüin süka kachueera otta waneirua kasa chechesü müsüjeseʼe eeinjatüin wanee aluwataaya naatajatka suulia tü waneirua. Anuu tü nümakat chi nünüikimaajachi Maleiwa Daniel süchiki tia:

Süküjain tü Bibliakat shiyaawase nuuʼui chi ayaakua miyoʼukai shia tü aluwataakat saaʼu wainma mma, aʼwanajaapejeʼe sukuwaʼipa süka nnojoluin kojutuin shia atumawaa otta nnojoishii paaʼinwain na wayuukana naluwataakana aaʼu.

¿Jamüsü shikeraajia maaʼulu tü nüküjatüjütkalia Daniel?

Reino Unidos sümaa Estados Unidos shiyaawase nuuʼui chi ayaakuaa miyoʼushikai ¿Jamüsü wayaawata saaʼu müin sukuwaʼipa?

Maʼaka waküjaitpain nuuʼui chi ayaakua miyoʼushikai aainjuushikat süka kachueera otta pootshi nnojotsü ichein shia (Daniel 2:42). Maaʼulu yaa Estados Unidos sümaa Reino Unidos nnojoishi paaʼinwain na wayuu naluwataakana aaʼu, sutuma eein tü kasa mojuka natuma, jamüsüjaʼa suluʼu tia mmakat atkaashii na wayuukana süpüla saainjünüin tü keeʼireeka naaʼin, aaʼinrüshi protesta sümaa kasa mojusü, na políticokana naneekajakat nnojotsü wanaawain naaʼin sümaa tü kasa nachuntaka. Süka nnojoluin paaʼinwain na wayuukana isasü nachiki na aluwataakana saaʼu tia mmakat naaʼinrüin wanee kasa naneekaka.

Wekiraja süchiki waneirua kasa süküjaka tü karaloʼutaka Daniel jamaluʼuluin shia otta tü ekeraajaka maaʼulu:

Pütchi aküjünatüjütkalia: «nnojoleenain paaʼinwain na wayuukana, eejeetpejeʼe tü kasa ichekat atuma naya» (Daniel 2:41).

Jamaluʼuluin shia: Mayaainjeʼe nnojoluin paaʼinwain na políticokana chaa Estados Unidos otta Reino Unidos, wainma maʼin nasurulaatse müsüjeseʼe ichein nakuwaʼipa maʼaka saaʼin kachueera.

Shikeraajia

Ashajünüsü suluʼu wanee karaloʼuta soʼu 2023, wainma nneerü sükataajaka Reino Unidos sümaa Estados Unidos sünain nasurulaatse suulia tü 12 mma wanaawaka amaa naya.(Stockholm International Peace Research Institute [Instituto Internacional de Estudios para la Paz de Estocolmo]).

«Sutuma paaʼinwaain Reino Unidos sümaa Estados Unidos Akaalinjiraashii süpüla naaʼinmajüin tü noumainkat. [...;]. Akaalinjiraashii waya müleka washutünule aaʼu.(Comando Estratégico, Ministerio de Defensa del Reino Unido, abril de 2024).

Pütchi aküjünatüjütkalia: «Saaʼujee sütüküüshin tü süpachirakat nuuʼui süka pootshi sümaa kachueera, eejeerü tü anakalü atuma tü aluwataayakat otta eejeerü tü mojukalü atuma shia» (Daniel 2:42).

Jamaluʼuluin shia: Mayaainjeʼe wainma susurulaatse Reino Unidos sümaa Estados Unidos, isasü nachiki naaʼinrüin tü kasa nachekaka süka nnojoluin paaʼinwaain na políticokana otta wayuu aluwataakana aaʼu.

Shikeraajia

«Naküjain waneinnua ekirajakana süchiki nakuwaʼipa na políticokana isasü süchiki Estados Unidos saaʼinrajatüin tü namakat waneirua süʼlaülashii mma süchiki eejatüin jimata aaʼin otta anainjatüin sukuwaʼipa oikawaa». (The Wall Street Journal).

«Awanajaʼalaa müsü nakuwaʼipa na políticokana chayaa Reino Unidos [...] nnojotpuʼusü majüin tia, sutuma jülüjain neʼe naaʼin kasa naata na políticokana isasü nachiki nakaaliinjüin na wayuu naluwataakana aaʼu». (Institute for Government [Instituto de Gobierno]).

Pütchi aküjünatüjütkalia: «Nnojoleenapejeʼe naya paaʼinwain maʼaka nnojoluin süchecheraain tü pootshikat sünain tü kachueerakat» (Daniel 2:43).

Jamaluʼuluin shia: Eeshi aluwataalii eka naaʼinrüin tü namakat na wayuu naluwataakana aaʼu nnojotpejeʼe naaʼin tia sümüin wayuu süpüshuaʼa.

Shikeraajia

«Maaʼulu yaa na wayuu chejeʼewaliikana Estados Unidos nnojotsü wanaawain naaʼin namaa na políticokana otta süʼlaülashiikana mma aluwataakana naaʼu» (centro de investigación Pew Research Center).

«Soʼutpünaa tü 50 juya alatüitpaka na wayuu chejeʼewaliikana Reino Unidos nnojotsü nanoujain anain tü namakat na políticokana otta na aluwataakana naaʼu». (National Centre for Social Research [Centro Nacional de Investigación Social]).

¿Jameerü shikeraajia tü nümakat Daniel?

Aküjünüsü suluʼu tü Bibliakat shieerü aluwataaka Reino Unidos sümaa Estados Unidos najaʼttirapa Maleiwa naluwataaya na wayuukana (Daniel 2:44).

Ashajünüsü wanee pütchi ashajaakat süchiki tia suluʼu tü karaloʼutaka Apocalipsis, anuu tü sümakat «noutkajeʼennüinjanain na sülaülashiikana mma sünain tü atkawaa» outkajaweena naya süpüla natkaain nümaa Jehováb soʼu Armagedón «soʼu tü nükaliakat chi Maleiwa Pülashikai maʼin» (Apocalipsis 16:14, 16; 19:19-21). Soʼu tia najaʼttireena Jehová naluwataaya na wayuukana.

Pütüjaweere sooʼomüin, paashajeʼera tü pütchikat «¿Kasa wayu Armagedón?».

Anasü wayaawatüle saaʼu tü pütchi nüküjakat Daniel

Süküjatüjülia tü Bibliakat nnojoleerüin nountuin na políticokana chakana Reino Unidos sümaa Estados Unidos süpüshuaʼa tü keeʼireeka naaʼin, wayaawatüle tia watüjaajeerü aaʼu jamüin sülataka tia suluʼu tia mmakat.

• Wayaawateerü aaʼu jamüin nüküjaka Jesús namüin na nikirajüinkana nnojoluinjanain naya sünainpünaain política (Juan 17:16). Watüjaajeerü aaʼu jamüin maʼaka nünüiki Jesús chi nüneekajalakai Maleiwa süpüla aluwatawaa wanaa sümaa nümüin «Nnojoipejeʼe taya shiʼinaajalain wayuu süpüla taluwataainjachin» (Juan 18:36).

• Wanouja anainrü shieerüin nuluwataaya Maleiwa anoutaka kasakat süpüshuaʼa otta eejee kasa anasü sutuma maʼaka nüküjatüjülia shia (Apocalipsis 21:3, 4).

• Nnojoleerüin shapaain naaʼin na wayuukana sutuma tü atkawaa ekaa sainküin mmakat (Salmo 37:11, 29).

Süküjain tü karaloʼutaka Daniel Reino Unidos sümaa Estados Unidos shiyaawase nuuʼui chi ayaakua miyoʼukai shieerü tü chiiruaajatkat sünain aluwatawaa ¿kaseerü alatakat? Shieerü tü nuluwataayaka Maleiwa aluwataajeetka saaʼu tü mmakat sirumatuʼujeʼewaikai.

Pütüjeere sooʼomüin süchiki sukuwaʼipainjatka aluwatawaa nutuma Maleiwa otta tü saaʼinrajatkat napüleerua na wayuukana pünaja tü videokot ¿Paapüirü süchiki Nuluwataainjachin Maleiwa?