¿Kanüliashiche Maleiwa?

Susoutaka eʼipajee tü Bibliakat

Kanüliasü wayuu süpüshuaʼa. Akaʼaya chi Maleiwakai, kanüliashi nia. Süpüla aleewain maʼin waya nümaa wanee wayuu, watüjaainjatü aaʼu kasaichin nünülia. Watüjaale saaʼu kasaichin nünülia Maleiwa, aleeweena maʼin waya nümaa.

Müsü nünüiki Maleiwa suluʼu tü Bibliakat: «Taya chi kanüliakai Jehová» (Isaías 42:8). Wainma nünüliayaasü Maleiwa: «chi Maleiwa Pülashikai maʼi», «chi Laülaakai saaʼu kasa süpüshuaʼa» otta «chi akumajakai kasa süpüshua», münüshi nia. Mayaainjeʼe wainmain nünüliayaasü, wachuntajatü tü nünüliakat (Génesis 17:1; Aluwataaushikana 4:24, TNM; 1 Pedro 4:19).

Suluʼu waneirua Biblia, ashajünüsü nünülia Maleiwa suluʼu Éxodo 6:3. Müshi Maleiwa yala: «Eeʼiyataapuʼushi taya nümüin Abraham, Isaac otta Jacob, maʼaka naaʼin wanee Maleiwa pülashaatashi. Akatsaʼa nnojoluin taküjain namüin Jehováin tanülia».

Jehová müsü suchuntia nünülia Maleiwa wayuunaikiruʼu. Yavé münüshi nia natuma noʼutku na ekirajaakana süchiirua sukuwaʼipa tü Bibliakat. Eʼraajünapejeʼe suluʼu Jehováin nümünüin Maleiwa. Ashajünüsü süpüshi tü Bibliakat suluʼu hebreo, reweesü süshajia pütchi suluʼu tia anüikiikat. Tü nünüliakat Maleiwa suluʼu hebreo, ashajünüsü shia süka pienchisü leetüra יהוה. Tetragrámaton münüsü tü pienchisükat leetüra, shia tüü YHWH.