¿Mojusüche noʼuluʼu Maleiwa tü naaʼinrakat na amaʼüjiraakana akuwaʼipa naanükülüʼüpünaa?

Tü kanüliakat Centros para el Control y la Prevención de Enfermedades, chaakat Estados Unidos süsakirüin na jimaʼaliikana jee na majayünnüükana 15 ouyase jee shiale 19 süchiki tia. Wainmaleʼeya na amaʼüjiraakana akuwaʼipa naanükülüʼüpünaa.a «Yootule pia nümaa wanee jimaʼai süchiki tia, nnojotsü shia wanee kasa mojuka naashin», müsü sünüiki Sharlene Azam, ashajaka tü karaloʼutakat Oral Sex Is the New Goodnight Kiss (Sexo oral: el nuevo beso de buenas noches). Anuu sooʼomüin tü sümakat: «Naaʼinruʼu nayakana nnojotsü amaʼüjiraain akuwaʼipa tia».

• ¿Jamüsüjaʼa saaʼin pümüin tia?

• ¿Kasa aküjünaka süchiki tia?

• ¿Kasa süküjaka tü Bibliakat süchiki tia?

¿Jamüsüjaʼa saaʼin pümüin tia?

Püküja «aa» jee shiale «nnojo».

1. ¿Eesüche süpüla ipuoluin wanee wayuu sümaʼüjiraale sukuwaʼipa saanükülüʼüpünaa?

   1. Aa

   2. Nnojo

2. ¿Eesüche süpüla ayuulin wanee wayuu nümaʼüjiraale nukuwaʼipa naanükülüʼüpünaa?

   1. Aa

   2. Nnojo

3. ¿Amaʼüjiraashiche nukuwaʼipa wanee wayuu naainjale tia?

   1. Aa

   2. Nnojo

¿Kasa aküjünaka süchiki tia?

Jülüjataa paaʼin tü pümakat sümaa tü aküjünakat wünaapünaa.

1. ¿Eesüche süpüla ipuoluin wanee wayuu sümaʼüjiraale sukuwaʼipa saanükülüʼüpünaa?

   Susoutia: Nnojo. Müsüjeseʼe wainmain na wayuu jülüjakana aaʼin nnojoluin shia wanee kasa mojusü.

2. ¿Eesüche süpüla ayuulin wanee wayuu nümaʼüjiraale nukuwaʼipa naanükülüʼüpünaa?

   Susoutia: Aa. Nümaʼüjiraale nukuwaʼipa wanee wayuu naanükülüʼüpünaa eeshijaʼa ayuuire nia sutuma hepatitis A, B, verrugas genitales, gonorrea, herpes, sida jee shiale sífilis.

3. ¿Amaʼüjiraashiche nukuwaʼipa wanee wayuu naainjale tia?

   Susoutia: Aa. Süpüshuaʼa tü sünainpünaakat amülejaaka nükoroloo wanee wayuu shiaya nee amaʼüjirawaakalü akuwaʼipa, nümaʼüjiraale nukuwaʼipa naanükülüʼüpünaa jee shiale nachiiruapünaa otta amülejaaka nükoroloo wanee wayuu süka najapü.

¿Kasa süküjaka tü Bibliakat süchiki tia?

Jülüjataa paaʼin tü sümakat tü Bibliakat süchiki nümaʼüjiraale nukuwaʼipa wanee wayuu naanükülüʼüpünaa.

Tü sümakat tü Bibliakat: «Anuu tü nüchekakat Maleiwa jüpüleerua [...] nnojoliinjanain jia aʼluwajiraain jukuwaʼipa» (1 Tesalónica 4:3).

Tü aʼluwajirawaakat akuwaʼipaa, shia nüinkaale wanee toolo sümaa wanee jiet nnojotka nuʼwayuusein, nümaʼüjiraale nukuwaʼipa wanee toolo nümaa wanee toolo, wanee jiet sümaa wanee jiet. Eeshii na amaʼujiraakana akuwaʼipa naanüküluʼupünaa, nachiiruapünaa otta namülejiraale nakorolo. Na aainjakana tia mojeerü nakuwaʼipa jee amojujaajeerü nakuwaʼipa nümaa Maleiwa (1 Pedro 3:12).

Tü sümakat tü Bibliakat: «Wanee wayuu nuʼluwajiraale nukuwaʼipa, niʼyarülajüin maʼin nukuwaʼipa sükajee tia» (1 Corinto 6:18).

Nümaʼüjiraale nukuwaʼipa naanükülüʼüpünaa wanee wayuu ayuuijeechi nia, mojeerü naaʼin jee amojujaajeerü nukuwaʼipa nümaa Maleiwa. Anuu tü süküjakat tü karaloʼutakat Cómo hablar de sexo con los adolescentes para que te escuchen: «Wanee wayuu amaʼüjiraakai akuwaʼipa mojusü naaʼin saalinjee naainjain tia süka müin yarüttakai saaʼin nukuwaʼipa. Akaajasaʼa numülejiraale nükorolo, tia shia wanee kasa yarüttüsü mojeetka atuma naaʼin».

Tü sümakat tü Bibliakat: «Tayakai Jehová, taya chi Pümaleiwasekai, chi ekirajakai pia süpüla anainjatüin pukuwaʼipa» (Isaías 48:17).

¿Aneetche pukuwaʼipa paainjale tü sümakat tü Bibliakat süchiki jaralüin nüinkaainjatka neʼe amaa wanee wayuu? ¿Shiache wanee kasa nüpülajaka puulia Maleiwa? Jülüjataa paaʼin wanee karateerü eere eein señales de transito aküjaka pümüin puwateʼerüinjachire peʼejena jee shiale püshaʼwaleʼerüinjatüin shia. Jülüjale paaʼin tia, ¿mojeetche pukuwaʼipa sutuma shiataapa aneerüin shia? ¿Kaseerü alataka pümüin nnojorüle paainjain tü sümakat?

Müsia neʼe nnojorüle woonooin sümaa tü nümakat Maleiwa, mojeerü wakuwaʼipa (Galacia 6:7). «Paainjale wanee kasa mojusü nnojotkalü pansaain sümaa tü punoujakalü anain, mojeerü paaʼin», müsü tü karaloʼutakat Sex Smart (Sexo inteligente). Akatsaʼa poonoole sümaa tü nuluwataakalü anain Maleiwa jaʼyeerü saaʼu pukuwaʼipa paainjain kasa anasü. Otta wanee anaʼleeka shia wuleerüin tü suluʼukat paaʼin (1 Pedro 3:16).