¿Kasa wayu tü müliaa miyoʼusükat?

Susoutaka eʼipajee tü Bibliakat

Tü müliaa miyoʼusükat shia wanee kaʼi müliainjatka maʼin oʼu wayuu. Saashin tü Bibliakat, alatajatü «sülüʼütpa sükalia sajaʼttüinjatüin tü kasakalüirua» (2 Timoteo 3:1; Daniel 12:4). Müsü Marcos 13:19: «Soʼuweena kaʼikat tia, alanaʼaleejeeria maʼi tü müliaa shiʼreetkat wayuu suulia tü shiʼrakat wayuu paala sümaiwa süchikijee sükumajünüin tü mmakat je suulia tü shiʼrakat wayuu maaʼulu yaa. Nnojoleerü wane müliaa eekai müin aka saaʼin tia mapeena» (Daniel 12:1; Mateo 24:21, 22).

¿Kasa alateetka suʼunnaa tü müliaa miyoʼusükat?

• Ajaʼttinneerü tü iküleesia nnojotkat shiimain. Motsoʼojeerü sümaʼa sajaʼttinnüin tü iküleesia nnojotkat shiimain (Alateetkat Mapeena [Apocalipsis] 17:1, 5; 18:9, 10, 21). Saaʼinreerü tia tü Naciones Unidas münakat süka alejatüin shia nutuma Maleiwa (Alateetkat Mapeena 17:3, 15-18).a

• Ashutüneerü aaʼu tü iküleesia shiimainkat. Kojuyashii na sülaülashii mma ashuteenakana saaʼu nupueulose Maleiwa. «Gog chi chejeʼewaikai Magog» nanülia nutuma Ezequiel. Nachajaajeerü sukuwaʼipa süpüla najaʼttirüin na wayuu suluʼukana tü iküleesia shiimainkat. Nnojoleetpejeʼe nuuʼulaain Maleiwa sajaʼttinnüin tü nupueulosekat (Ezequiel 38:1, 2, 9-12, 8-23).

• Kasalajaneerü naainjala na kepiakana saaʼu tü Mmakat. Kasalajaneerü nutuma Jesús saainjala wayuu. Nükatajeena «na wayuukana maa aka nütüma wane anneetpüʼü sünain nükatajüin tü anneetkalüirua suulia tü kaaʼulakalüirua» (Mateo 25:31-33). Na wayuu akaaliinjakana na nuwalayuukana Jesús, nayeena katakana oʼu nutuma Jesús (Mateo 25:34-39, 41-46; Mateo 25:40, TNM).

• Akotchojüneena na aluwataainjanakana nümaa Jesús iipünaa. Na aneekuushiikana nutuma Maleiwa süpüla naluwataain nümaa Cristo, outeena naya sümaa susoʼiraajeerüin naaʼin süpüla chain naya iipünaa (Mateo 24:31; 1 Corinto 15:50-53; 1 Tesalónica 4:15-17).

• Anteerü Armagedón. «Tü kaʼi kasalajaneetkat oʼu saainjala wayuu sümüin» nutuma «chi Maleiwa Pülashikai maʼin» otta «nükalia Jehová», müsü tü Bibliakat süchiki Armagedón (Alateetkat Mapeena 16:14, 16; Isaías 13:9; 2 Pedro 3:12, TNM). Na süsaleenakana naainjala nutuma Cristo, outeena naya soʼu tia atkawaakat (Sofonías 1:18; 2 Tesalónica 1:6-10). Ajaʼttinneerü tü poliitika eekat sainküin tü mmakat, chi wanülüü akaratshikai ekii saashin tü Bibliakat (Alateetkat Mapeena 19:19-21).

¿Kasa alateetka süchikijee tü müliaa miyoʼusükat?

• Asürünneechi Satanás namaa na yolujaakana. Ojutüneechi Satanás namaa na yolujaakana suluʼu wanee ishi nutuma wanee aapiee pülashi maʼin (Alateetkat Mapeena 20:1-3). Meena püreesakai naaʼin suluʼu tü ishikat. Nnojoleechi isain Satanás süpüla numojujain nakuwaʼipa na wayuukana (Alateetkat Mapeena 20:7).

• Oʼtteerü tü miitkat juya. Soʼu tia, oʼtteerü tü miit juya eeinjatkalü oʼu Nuluwataaya Maleiwa. Wainmeerü kasa anasü eejeetka sutuma napüleerua na wayuukana (Alateetkat Mapeena 5:9, 10; 20:4, 6). Watteerü saalii wayuu oʼttaajeetka yaa saaʼu tü Mmakat süchikijee tü müliaa miyoʼusükat otta neʼrajeerü sukua suʼttia tü miitkat juya (Alateetkat Mapeena 7:9, 14; Salmo 37:9-11).