NATÜJAWEEKA AAʼU JIMAʼALII OTTA MAJAYÜNNÜÜ
¿Jamüsü choʼujaaka maʼin woʼuraajüin?
Chaa Estados Unidos wainma jimaʼalii jee majayünnüü oʼuraajakana nümüin Maleiwa, palitpejeʼe neʼe na oʼuraajawaikana soʼukaiwai. Anuu soʼutku tü nasakitkalü anain nayakana.¿Oʼuraajüshiche wanee wayuu süpüla anainjatüin neʼe naaʼin?, ¿eetaapa tü kasa nuʼuraajaakalü anainjee?
¿Kasa wayu tü oʼuraajaakat?
Tü oʼuraajaakat shia aashajawaa nümaa chi Maleiwa akumajakai kasakat süpüshuaʼa. Nia Jeʼwaa alanaʼaleeka sünain miyoʼuin suulia tü wayuukoluirua. Mayaapejeʼe müin nia, nnojoishi wattain woulia waneʼewai wakua (Aluwataaushikana 17:27). Anuu wanee pütchi anashaatasü sümaka tü Bibliakat: «Jee müleka jürütkaale nünainmüin Maleiwa, arütkaajeechi nia jünainmüin» (Santiago 4:8).
¿Kasa paaʼinrajatka süpüla pürütkaain nünainmüin Maleiwa?
Wanee kasa eeka süpüla pürütkaain akajee, shia puʼuraajüin nümüin.
Wanee kasa eeka süpüla paaʼinrüin, shia pikirajaain sünain tü Bibliakat süpüla paapajüin nünüiki Maleiwa.
Müleka paaʼinrüle tia, puʼuraajüle jee pikirajaale sünain tü Bibliakat, aleeweechi maʼin pia nümaa Maleiwa.
Anuu nünüiki Jeremy: «Tü aashajawaakat nümaa Jeʼwaa chi miyoʼushikai maʼin shia wanee kasa anashaatasü eeka süpüla naaʼinrüin na wayuukana».
Anuu sünüiki Miranda: «Arütkaasü maʼin taya nünainmüin Jeʼwaa taküjapa nümüin süpüshuaʼa tü suluʼukat taaʼin».
¿Naapüinche wanüiki Maleiwa?
Mayaainjeʼe eein süpüla punoujain nünain Maleiwa jee puʼuraajüin nümüin, eesüjaʼa müle nnojotkai naapajüin pünüiki saaʼin pümüin. «Pia chi aapajakai sünüiki wayuu suʼuraajapa», müsü sünüiki tü Bibliakat nüchiki Jeʼwaa (Salmo 65:2). Süka jülüjain pia naaʼin Jeʼwaa, püküja nümüin süpüshuaʼaleʼeya tü ashapataakalü atuma paaʼin (1 Pedro 5:7).
Jülüjaa paaʼin tüü: ¿Aashajaʼawaishiche pia weinshi namaa na paʼaleewainkana? Eesü süpüla müin pukuwaʼipa nümaa Maleiwa. Puʼuraajawai nümüin weinshi otta puchunta Nünülia Jeʼwaa (Salmo 86:5-7; 88:9). Süküjain pümüin tü Bibliakat anain nnojorüle puuʼulaain suulia achuntaa nümüin Maleiwa weinshi (1 Tesalónica 5:17).
Anuu nünüiki Moisés: «Wanaa sümaa taashajaain nümaa chi Tashi iipünajachikai, taküjain nümüin süpüshuaʼaleʼeya tü suluʼukat taaʼin».
Anuu sünüiki Karen: «Taküjapa nümüin Jeʼwaa süchiki tü kasa alatakat tamüin, taaʼinrüin shia maʼaka taashajaain sümaa tei jee nümaa wanee taʼaleewain».
¿Kasache eeka süpüla toʼuraajüin apüleerua?
Anuu tü sümakat tü Bibliakat: «Nnojo jüshapataain aaʼin sooʼopünaa wane kasa. Shia jaaʼinra achuntaa nümüin Maleiwa sooʼopünaa kasa süpüshua. Jüküja nümüin tü shapaakat atüma jaaʼin. Otta nnojo motüin jaaʼin aapaa analuʼut nümüin saaʼu tü anasü naaʼinrakat jümüin» (Filipos 4:6).
¿Shiache süküjeeka achiki tia anain paashajaale nümaa Maleiwa süchiki tü kasa mojusü alatakat pümüin? Eesü süpüla paaʼinrüin tia süka sümüin tü Bibliakat: «Püküja nümüin Jeʼwaa tü alatakat pümüin, jee nükaalinjeechikalaka pia» (Salmo 55:22).
Puʼuraajapa nümüin Maleiwa, nnojo paashajaain neʼe süchiki tü kasa mojusü alatakat pümüin. Anuu sünüiki wanee majayüt kanüliaka Chantelle: «Nnojotsü aleewain neʼe taya nümaa Jeʼwaa shiiʼiree tachuntüin kaalinwaa nümüin. Saaʼin tamüin shia anaka aluʼu taapüle nümüin Jeʼwaa analuʼut palajana saaʼu wainma kasa naaʼinraka tapüleerua».
Jülüja paaʼin tüü: ¿Kasa tü paapeetkalü aaʼu analuʼut? Eesü süpüla jülüjain paaʼin apünüinsü kasa eeka süpüla paapüin aaʼu analuʼut nümüin Jeʼwaa soʼukai.
Anuu sünüiki Anita: «Eesü süpüla waapüin analuʼut nümüin Jeʼwaa saaʼu weʼrüin anachoin süsii wanee wunuʼu».
Anuu nünüiki Brian. «Püsakireʼera paaʼin sünain wanee kasa nukumajaka Jeʼwaa kamalainka maʼin pümüin jee shiale wanee wetsiikulo antaka suluʼumüin paaʼin, süchikijee paapa analuʼut nümüin Jeʼwaa saaʼu».