NATÜJAWEEKA AAʼU JIMAʼALII OTTA MAJAYÜNNÜÜ
¿Jamüsü aneetka wakuwaʼipa woʼunule sünain tü outkajawaakat?
Na Aküjaliikana Pütchi outkajaʼawaishii piantua süpüla semaanakat suluʼu tü Piichi Outkajaaleekat. ¿Kasa naaʼinraka chaʼayaa? ¿Kasa anasü piʼreetka puʼunule sünain tia Outkajawaakalüirua?
¿Kasa aainjünaka suluʼu tü Piichi Outkajaaleekat?
Suluʼu tü Piichi Outkajaaleekat ekirajünüshii na wayuukana sünain tü Bibliakat süpüla naaʼinrüin tü sümakat. Anuu tü pütüjeetkat puʼunule sünain tü outkajawaakat:
Ekirajaajeechi pia sünain tü shiimainkat nüchiki Maleiwa.
Piyaawateerü aaʼu süchiki tü kasa alatakat maaʼulu yaa.
Aneerü pukuwaʼipa sutuma.
Puusüteena anain wayuu anakana süpüla paʼaleewain.
¿Pütüjaa aaʼulu tüü? Suluʼu tü Piichi Noutkajaaleekat na Aküjaliikana Pütchi shia aküjünaka maʼin achiki nukuwaʼipa Maleiwa sünain aluwatawaa (Mateo 6:9, 10; 24:14; Lucas 4:43).
¿Jamüsü anaka puʼunule suluʼumüin tü Outkajaaleekat?
Sükaalinjeechi pia tü paapajakat yala. Kekiijeechi pia sutuma tü pütchi ekirajünakat suluʼujee tü Bibliakat natuma na aküjaliikana pütchi nüchiki Jeʼwaa sünain tü outkajawaakat (Proverbios 4:5). Makalaka aneerüin süneekia wanee kasa putuma süka paaʼinreerüin shia sünainjee tü sümakat tü Bibliakat. Anuu soʼutku wanee pütchiirua asoutuneetka sükajee tü Bibliakat.
¿Kasapülajana eeka waya?
¿Niache kasitka Maleiwa müliaka wayuu?
¿Ayatüsüche katüin noʼu na wayuukana süchikijee outuin naya?
Anuu soʼutku sünüliairua tü pütchi aküjünakat saawanoʼu jee rimiinkoʼu sünain tü outkajawaakat.
¿Jamüsü suʼunirajatka wakuwaʼipa tü Bibliakat?
¿Jaraiche akaalinjüinjachika waya weʼrüle müliaa?
¿Kasa saaʼinraka wapüleerua maaʼulu yaa tü Nuluwataayakat Maleiwa?
Anuu sünüiki Brenda: «Eeshi wane koleejiajiraakai tamaa oʼunakai sünain tü outkajawaakat. Nüikalaaka eejatüle taya namaa na tapüshikana, waapaka nümüin tü wakaraloʼutsekat süpüla nikirajaain sünain. Nüküjaka tamüin mapa ponuin maʼin naaʼin nasoutuin na wayuukana shiʼipajee tü asakinnakalü anain otta müsia nüküja achikirü nnojoluin nekirajaain suluʼu tü iküleesia noʼunakalü aluʼu maʼaka waaʼinrüin wayakana».
¿Pütüjaa aaʼulu tüü? Nnojotsü achekajünüin sümüin wayuu süpüla shikerotüin suluʼu tü Piichi Outkajaaleekat otta nnojotsü achuntunuin nneerü sünain.
Na wayuu piʼraajakana sünain tü outkajawaakat natütüleʼereerü paaʼin. Süküjain tü Bibliakat noutkajaainjanain na anoujashiikana süpüla natütüleʼerajiraainjanain naaʼin (Hebreokana 10:24, 25). Maaʼulu yaa, shia neʼe jülüjaka naaʼin na wayuukana nakuwaʼipa namüiwaʼa, müsüjeseʼe anain namaale waya na wayuu aʼwaajakana Maleiwa otta na kapülakana aaʼin sukuwaʼipa wayuu.
Anuu sünüiki Elisa: «Eesü mojule taaʼin jee mapüsale taya süchikijee tü kasa taaʼinrawaikat, anapejeʼe taaʼin namaa na oʼunakana suluʼumüin tü Piichi Outkajaaleekat. Taleʼejapa piichipaʼamüin süchikijee toutkajaain, talatüsü maʼin taaʼin. Anasü taaʼin süpüla tü taaʼinrajatkat waneemüin kaʼi».
¿Pütüjaa aaʼulu tüü? Sainküinpünaa tü mmakat alatüsü suulia 60.000 Piichi Outkajaalee eeka otta alatüsü suulia 120.000 neʼipapaʼa na wawalayuu outkajaakana suluʼu. Aainjünüsü maʼaka 1.500 Piichi Outkajaalee juyawai süka nakooʼomüinraain maʼin na wayuu oʼunakana sünain tü outkajawaakalüirua.a
a Pütüjaweere saaʼu jalain wanee Piichi Outkajaalee, püchajaa shia suluʼu tü paajinakat «Outkajawaa naainjaka na aküjaliikana pütchi nüchiki Jeʼwaa» otta piʼitaa clic sünain «Püchajaa eeinjachire puutkajaain».