¿Jamüsü sünüiki tü Bibliakat süchiki tü asülajaakat?
Tü sümakat tü Bibliakat
Süküjain wamüin tü Bibliakat wasülajüinjanain wanee kasa süka waaʼin. Waaʼinrapa shia, aneerü naaʼin chi wayuu wasülajakai amüin jee müshia wayakana (Proverbios 11:25; Lucas 6:38). Anuu tü nümakat Jesús: «Talataleesia maʼin waaʼin wasülajüle wanee kasa suulialeʼeya süsülajünapa wamüin» (Aluwataaushikana 20:35).
¿Joujasüche anain asülajaa?
Anasü maʼin wasülajüle süka waaʼin. Anuu tü sümakat tü Bibliakat: «Anashi nüsülajüle wanee wayuu wanaapünaa sümaa tü suluʼukat naaʼin, nnojotsü naainjainjatüin tia mojusheeka jee süka münajalain shia nümüin, jama alin nüpüla Maleiwa chi wayuu talatakai aaʼin sünain asülajaa» (2 Corinto 9:7).
Tü anakat nümüin Maleiwa shia nasülajüin süka naaʼin na aʼwaajakana nia (Santiago 1:27). Wakaalinjüle na choʼujaakana amüin shia, müshi waʼyataajiraakai aaʼin nümaa Maleiwa otta müshi kojuyaalakai nia woulia saaʼujee kamaneein waya (Proverbios 19:17). Eʼreena waya kasa anasü nutuma Maleiwa saashin tü Bibliakat (Lucas 14:12-14).
¿Joujasüche nnojoluin anain asülajaa?
Waainjale shia süpüla eeinjatüin wamaʼana wanee kasa. Maʼaka saaʼin tüü:
Süpüla ponuin waya naaʼin na wayuukana (Mateo 6:2).
Süpüla keeʼirakainjatüin shia atumawaa (Lucas 14:12-14).
Süpüla woʼttaainjanain (Salmo 49:6, 7).
Süpüla saainjünüin wanee kasa nnojotka anain nümüin Maleiwa. Mojusü waapüle nneerü nümüin wanee wayuu süpüla nüshaitüinjachin saaʼu, niperüinjachin jee nükamüjüinjachin droga (1 Corinto 6:9, 10; 2 Corinto 7:1). Otta mojusü waapüle nneerü nümüin wanee wayuu nnojoikai aʼyataweein (2 Tesalónica 3:10).
Nnojorüle wekeraajüin sümaa tü aʼyatawaa naapakat wamüin Jehová. Aküjünüsü suluʼu tü Bibliakat naapüinjachi wanee wayuu tü kasa choʼujaakat sümüin nüpüshi (1 Timoteo 5:8). Nnojotsü anain nüsülajüle namüin na wayuukana sümaa nnojoluin naapüin tü choʼujaakat sümüin nüpüshi. Mojusü noʼuluʼu Jesús nukuwaʼipa chi wayuu nnojoikai aapüin tü choʼujaakat nümüin nüshi jee nii süka nüsülajüinjatüin shia nümüin Maleiwa (Marcos 7:9-13).