¿Sükaalinjeechicheʼe taya tü sümakat tü Bibliakat toʼuniraweere taaʼin?

Tü sümakat tü Bibliakat

Sükaalinjeena waya tü sümakat tü Bibliakat süka nünüikin shia Maleiwa jee sümülialeerü waaʼin (2 Corinto 7:6). Mayaainjeʼe nnojoluin saashajaain nachiki na mojukana ekiiruʼu, watta naalii na wayuu nnojoliinnapakana oʼuniraweein naaʼin süka sükaalinjain naya tü sümakat. Sükaalinjeechiaʼaya pia tü sümakat tü Bibliakat.

• Pütchi akaalinjeenaka waya suluʼuka tü Bibliakat

• Ashajünüsü suluʼu tü Bibliakat nachiki wayuu oʼuniraweekana naaʼin

• Wetsiikulo akaalinjeechika pia puʼuniraweere paaʼin

• ¿Kasa waaʼinrajatka nüküjale wamüin wanee waʼaleewain outeein nia?

• ¿Jama tooʼulaküitchire toʼuniraweein taaʼin?

Pütchi akaalinjeenaka waya suluʼujee tü Bibliakat

• ● Püküja süchiki jamüin paaʼin.

  Tü sümakat tü Bibliakat: «Shiimainre alin nüpüla naʼaleewain wanee wayuu, aishi nia nüpüla waneepia, müshi aka naaʼin wanee nuwala müliale nia niʼrüin» (Proverbios 17:17).

  ¿Jamaluʼuluin shia?: Nnojorüle anain tü jülüjakat waaʼin choʼujaasü wakaalinjünüin.

  Nnojorüle püküjain süchiki jamüin paaʼin mojeerü maʼin paaʼin. Püküjale süchiki tü alatakat pümüin aneerü paaʼin otta tü jülüjakat paaʼin.

  

  Puuʼulaka paaʼinrüin tüü: Anashi paashajaale nümaa wanee püpüshi jee niale nümaa wanee paʼaleewain süchiki tü alatakat pümüin.a Püshaja suluʼu karaloʼuta süchiki jamüin paaʼin.

• ● Piʼrajeʼera nümaʼanamüin wanee tottoot.

  Tü sümakat tü Bibliakat: «Nnojotsü choʼujaain niʼrajeʼerüin wanee wayuu anale nia. Akaajasaʼa ayuuire nia, oʼunushi nümaʼanamüin wanee tottoot» (Mateo 9:12).

  ¿Jamaluʼuluin shia?: Ayuuire waya oʼunajana waya nümaʼanamüin wanee tottoot.

  Eeshijaʼa nuʼuniraweere naaʼin wanee wayuu sutuma nnojoluin anain nia nikiiruʼu jee shiale sutuma mojuin maʼin naaʼin. Jamüshiijaʼa ayuuire waya nnojoishii waya japülin sutuma tia akaataajaʼa neʼe nnojorüle anain waya wekiiruʼu nnojoliinjana waya japülin. Eesü tratamiento süpüla tia ayuuliikat.

  Puuʼulaka paaʼinrüin tüü: Piʼrajeʼera nümaʼanamüin wanee tottoot atüjakai süpüleerua tia.

• ● Soto paaʼin alin pia nüpüla Maleiwa

  Tü sümakat tü Bibliakat: «¿Aashin suikünüin jaʼraisü wüchiichein saaʼu piamasü nneerü kachueerachein neʼe? [...]. Nnojo mmoluin jia, alanaʼaleesia jaalin nüpüla suulialeʼeya tü wüchiicheinkat» (Lucas 12:6, 7).

  ¿Jamaluʼuluin shia?: Kojutushi maʼin pia nümüin Maleiwa.

  Eesüjaʼa müle nnojotkai kasajatüin sümüin wayuu tü alatakat pümüin, niapejeʼe Maleiwa atüjaain saaʼu. Kachipünaasü naaʼin pukuwaʼipa jaʼitashi outeein pia. Aküjünüsü suluʼu Salmo 51:17 «Maleiwakalee, nnojoleechi piyoutajaain amaa wanee wayuu eekai mojuin maʼin naaʼin». Aishi pia nüpüla Maleiwa nnojotsü nücheküin outuin pia.

  Puuʼulaka paaʼinrüin tüü: Paashajeʼera tü Bibliakat piyaawateetka saaʼu alin pia nüpüla Maleiwa. Aküjünüsü süpüshi tia suluʼu tü karaloʼutakat Acerquémonos a Jehová suluʼu ekirajaaya 24.

• ● Puʼuraaja nümüin Maleiwa.

  Tü sümakat tü Bibliakat: «Jüpüta najapuluʼu Maleiwa süpüshuaʼa tü kasa shapaakalü atuma jaaʼin, jama jülüjain maʼin jia naaʼin» (1 Pedro 5:7).

  ¿Jamaluʼuluin shia?: Nücheküin Maleiwa püküjain nümüin jamüin paaʼin otta tü shapaakalü atuma paaʼin.

  Jimateerü otta katchinjeerü paaʼin nutuma Maleiwa (Filipos 4:6, 7, 13). Nükaaliijain Maleiwa na arütkaakana nünainmüin (Salmo 55:22).

  

  Puuʼulaka paaʼinrüin tüü: Puʼuraaja nümüin Maleiwa, Jehová nünülia, puchuntawai shia. Püküja nümüin jamüin paaʼin (Salmo 83:18). Puchunta kaalinwaa nümüin süpüla püchecherüinjatüin paaʼin.

• ● Jülüjaa paaʼin tü kasa anasü eejeetkat mapeena.

  Tü sümakat tü Bibliakat: «Tü kasa waʼatapajakat müsü saaʼalijakai saaʼin waaʼin [...]. Shiimain shikeraajeerüin tia jee nnojoleerü aʼwüinjaain shia» (Hebreokana 6:19).

  ¿Jamaluʼuluin shia?: Eesüjaʼa müle jalapaʼakai paaʼin sutuma tü alatakat pümüin maʼaka saaʼin wanee anuwa yalejewaain makat sutuma sümüna palaa. Tü kasa waʼatapajakat müsü saaʼalijakai saaʼin waaʼin maʼaka saaʼalijünüin wanee anuwa sutuma karapin.

  Watüjaa aaʼu shikeraajeerüin tia süka niain Maleiwa ajaʼttireechin tü müliakat atuma wayuu (Apocalipsis 21:4).

  Puuʼulaka paaʼinrüin tüü: Paashajeʼera süchiki tü kasa anasü süküjakat tü Bibliakat suluʼu tü pütchikat «La esperanza real de un mañana mejor».

• ● Paaʼinra tü kasa kamalainkat pümüin.

  Tü sümakat tü Bibliakat: «Talatüle naaʼin wanee wayuu, aneechi nia» (Proverbios 17:22).

  ¿Jamaluʼuluin shia?: Aneerü waaʼin waainjale kasa kamalainka wamüin.

  

  Puuʼulaka paaʼinrüin tüü: Paainja kasa kamalainkat pümüin. Paapaja muusika aneetkat atuma paaʼin, paashajeʼera wanee kasa atütüleʼereetka paaʼin, püshaita wanee kasa aneetka atuma paaʼin otta talateerü paaʼin pükaalinjale wayuu (Aluwataaushikana 20:35).

• ● Paaʼinmajiraa suulia ayuulin pia.

  Tü sümakat tü Bibliakat: «Eesü tü kasa anakalü apüla aainjaa ejercicio» (1 Timoteo 4:8).

  ¿Jamaluʼuluin shia?: Paainja ejercicio, putunka maalü, anaa piküin suulia ayuulin pia.

  Puuʼulaka paaʼinrüin tüü: Puwaraijaa maʼaka saaʼin 15 minuuto soʼukaiwai.

• ● Nnojoleerü mojuin paaʼin waneepia.

  Tü sümakat tü Bibliakat: «Müsü jünüiki mayaainjeʼe nnojoluin jütüjaain saaʼu jameerüin jukuwaʼipa waneemüin kaʼi» (Santiago 4:14).

  ¿Jamaluʼuluin shia?: Tü kasa müliakalü atuma waaʼin jee tü kasa mepikat saaʼin wamüin, nnojoleerü shia mapa.

  Jaʼitairü müin mepikai saaʼin tü alatakat pümüin eesü süpüla sunoutaain, nnojo yüülain paaʼin (2 Corinto 4:8). Eesü süpüla sunoutaain mapa tü kasa alatakat pümüin, nnojotpejeʼe kepin puʼuniraale paaʼin.

  Puuʼulaka paaʼinrüin tüü: Paashajeʼera suluʼu tü Bibliakat nachiki wayuu oʼuniraweekana naaʼin sutuma mojuin naaʼin jee anoutaasü mapa tü kasa alatakat namüin. Wekirajaa nachiki waneinnua.

Ashajünüsü suluʼu tü Bibliakat nachiki wayuu oʼuniraweekana naaʼin

Aashajaasü tü Bibliakat nachiki waneinnua wayuu oʼuniraweekana naaʼin, nnojoipejeʼe jashichin Maleiwa namüin saaʼujee tia. Nükaalinjain naya, nükaalinjeechi piaʼaya.

Elías

• ● ¿Jaʼrai chi kanüliakai Elías? Mayaainjeʼe yalayalain maʼin naaʼin, eesü tü kaʼi mojukalü oʼu naaʼin. Süküjain Santiago 5:17: «Wanaawasü nukuwaʼipa Elías wamaa».

• ● ¿Jamüshiche oʼuteeka nia? Süka müin nümüiwaʼakai naaʼin, mmotshi nia, nnojoishi kasain anain apüla naashin. Nümakalaka nümüin Maleiwa: «Jehovákalee, puʼuta mata taaʼin» (1 Reyes 19:4).

• ● ¿Kasa akaalinjaka nia? Nüküjain Elías süpüshuaʼa tü suluʼukat naaʼin nümüin Maleiwa. ¿Kasakaʼa naaʼinrüin Jehová süpüla nütütüleʼerüin naaʼin? Nüküjain nümüin jülüjain nia naaʼin jee naaʼinrüin kasa pülasü nuʼupala süpüla nütüjaain saaʼu pülain maʼin Maleiwa. Jee müsia nüküjain kojutuin nia nümüin jee nuluwataain wanee wayuu nümüin süpüla nükaalinjainjachin nia.

• ▸ Paashajeʼera nüchiki Elías: 1 Reyes 19:2-18.

Job

• ● ¿Jaʼrai chi kanüliakai Job? Nia wanee wayuu washirü, wainma nüchonnii otta waneepiashi nia nümaa Maleiwa.

• ● ¿Jamüshiche oʼuteeka nia? Wainma kasa mojusü alataka nümüin Job. Amülouisü nuwashirüin, outushii nüchonnii jee oʼttusü nünain wanee ayuulii keemaka maʼin. Aküjünüsü alawaa nüchiki jee nüchajaalain nooʼomüin tü kasa mojusü alatakat nümüin. Mojusü maʼin naaʼin Job sutuma tü alatakat nümüin. Müshijeseʼe nümüin: «Anashi outule taya» (Job 7:16).

• ● ¿Kasa akaalinjaka nia? Oʼuraajüshi nia nümüin Jehová jee yootushi nia namaa waneinnua wayuu (Job 10:1-3). Atütülaasü naaʼin nutuma wanee naʼaleewain kanüliakai Elihú, nükaalinjain nia süpüla nnojoluin jülüjain neʼe naaʼin tü nukuwaʼipakat. Nücheka achikirü Job nükaalinjünüin nutuma Maleiwa.

• ▸ Paashajeʼera nüchiki Job: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moisés

• ● ¿Jaʼrai chi kanüliakai Moisés? Nekiipüʼü nia na israelitakana jee nünüikimaajachi nia Maleiwa.

• ● ¿Jamüshiche oʼuteeka nia? Wainma aʼyatawaa apünüin najapuluʼu Moisés, mojuwaisü sünüiki wayuu nümüin. Sutuma tia mojusü maʼin naaʼin, müshijeseʼe nümüin nümüin Maleiwa: «Anashijaʼamata puʼutule taaʼin» (Números 11:11, 15).

• ● ¿Kasa akaalinjaka nia? Nüküjain nümüin Maleiwa jamüin naaʼin otta paliʼirü niʼyataain nutuma Maleiwa suulia shapaain naaʼin.

• ▸ Paashajeʼera nüchiki Moisés: Números 11:4-6, 10-17.