¿Jamüsü sünüiki tü Bibliakat süchiki ojutiraa joʼuu?

Tü sümakat tü Bibliakat

Nnojotsü aküjünüin suluʼu tü Bibliakat tü pütchikat ojutiraa, wayaawatapejeʼe saaʼu jamüin naaʼin Jehová naalinjee wanee wayuu sutumajee waneirua wetsiikulo jee jaʼitakajeʼe jamüin naaʼin naalinjee wanee joʼuu nnojoiyüikai eweetüin.

Katüsü soʼu wayuu nutuma Maleiwa (Génesis 9:6; Salmo 36:9). Kojutusü nümüin Maleiwa katüin soʼu kasa süpüshuaʼa jaʼitakajeʼe wanee joʼuu süleʼeruʼuyüikai nii. Uwomuyuusü wanee wayuu sujutirüle chi süchonkai.

Anuu tü aküjünakat sünain tü Pütchi Aapünakat nümüin Moisés: «Müleka natkaajiraale piamashii wayuu otta kaliale natuma wanee jierü eekai ipuoluin, sujutirüle chi süchonkai sümaa nnojolin outuin nia jee nnojoluin outuin shiakat, achekajüneerü nutuma chi suʼwayuusekai nümüin chi kaainjalashikai otta naapüinjatü tü namakat na laülaashiikana. Akaajasaʼa outule chi süchonkai jee shiale shiakat, outajachi chi kaainjalashikai» (Éxodo 21:22, 23).a

• ¿Kasoʼulujeeshi wayuuin wanee joʼuu nümüin Maleiwa?

• ¿Moteetche naaʼin Maleiwa saainjala wanee wayuu eeka sujutirüin?

• ¿Ojutirüinjatche wanee wayuu mayeinre maʼin shia sümaa joʼuu jee niale nnojoluin anain chi süchonkai?

¿Kasoʼulujeeshi wayuuin wanee joʼuu nümüin Maleiwa?

Wayuushi nia nümüin Maleiwa soʼujeʼereeya tü kaʼi nukumajakalü oʼu süleʼeruʼu nii. Nnojotsü naatain tü nümakat Maleiwa suluʼu tü Bibliakat nüchiki wanee joʼuu nnojoiyüikai eweetüin nuulia wanee eekai niweetüichin. Wayaawatüin tia sünainjee waneirua wetsiikulo.

• Anuu tü nümakat chi aluwataaikai David nümüin Maleiwa: «Piʼratüjüiya taya takumajaaiwaʼaya süleʼeruʼu tei» (Salmo 139:16). Wayuutüjüiya David nümüin Maleiwa süleʼeruʼuiwaʼaya nia nii.

• Süpülapünaa niweetüin Jeremías yapatüjülia wanee aʼyatawaa nüpüla nutuma Maleiwa. Anuu tü nümakat nümüin: «Teʼraajatüjüiya pia süpülapünaa pukumajaain süleʼeruʼu püi, süpülapünaa piweetüin taneekatüjüiya pia süpüla piʼyataainjachin tamüin. Taneeküin pia süpüla saapajatüin wayuu tachiki sainküin mmakat» (Jeremías 1:5).

• Jamüshijaʼa Lucas, wanee tottoot napüshi na wayuu ashajakana tü Bibliakat, nuchuntuin wanee pütchi suluʼu griego süpüla naashajaainjachi nüchikuaʼa wanee joʼuu süleʼeruʼuyüikai nii otta wanee joʼuu eweetüichikai (Lucas 1:41; 2:12, 16).

¿Moteetche naaʼin Maleiwa saainjala wanee wayuu eeka sujutirüin?

Moteerü naaʼin Maleiwa saainjala kojutule sümüin katüin noʼu wanee joʼuu maʼaka kojutuin shia nümüin Maleiwa. Nnojotsü mojuinjatüin maʼin saaʼin saalinjee tü saainjakat paala. Saashin tü Bibliakat, amülialaasü naaʼin Jehová saalin wayuu, anamia nia otta «wattasü nutuma tü waainjalakat woulia, maʼaka wattain eere niweetüin chi kaʼikai suulia eere nikerotüin» (Salmos 103:8-12). bMoteerü naaʼin Jehová naainjala na ayaawajaakana suulia naainjala jaʼitakajeʼe naainjala na jieyuu ojutirakana joʼuu (Salmo 86:5).

¿Ojutirüinjatche wanee wayuu mayeinre maʼin shia sümaa joʼuu jee niale nnojoluin anain chi süchonkai?

Wayaawatüitpa aaʼu sünainjee tü sümakat tü Bibliakat nnojoluin anain sujutirüle wanee wayuu jaʼitasü mayein maʼin shia sümaa joʼuu jee niale nnojoluin anain chi süchonkai.

¿Jama sülatalaʼa sümüle wanee kasa sümüin wanee wayuu soʼunnaa saʼalijaain jee shiale nümüin chi süchonkai? Mayaainjeʼe nnojoluin sülatawalin maʼin tia, niainjachi aneekaka nüshi chi joʼuukai sümaʼaleeya tü niikat jaralüinjachin katüin oʼu, shiale nii wanee joʼuu jee niataapa chi süchonkai.