Akaalinjashii waya wayuu soʼunnaa atkawaa

Süka sülüʼülüin tü kaʼi sajaʼlajaainjatkalü oʼu tü kasa alatakat sainküin mma, nnojotsü ponuin waaʼin eein atkawaa jee waapüin süchiki atkawaa (Mateo 24:6). Wainma wawalayuu müliakana sutuma atkawaa, akaalinjünapejeʼe naya. Anasü waaʼin sutuma tü pütchi waapajakat sünain tü videokot Tü apünüintuakat kasa namaka na Laülaashii Jülüjakana Aaʼin na Aküjaliikana pütchi, süpüla juyakat 2022. Sünain tia videokot, aküjünüsü süchiki nakaalinjünüin na wawalayuu chakana Europa del Este müliakana sutuma tü atkawaa chakat Ucrania. ¿Kasa aainjünaka süpüla suuntunüin tia? ¿Jamüsü naaʼin na wawalayuu chakana Ucrania sutuma nakaalinjünüin?

¿Kasa aainjünaka süpüla süntinnüin tü kasa choʼujaakat namüin?

Peʼureeroʼu 24 soʼu 2022, tü kaʼi suʼttakalü oʼu tü atkawaakat, na wawalayuu aʼyataakana suluʼu Comité de Coordinadores naküjain jeʼrainjatüin tü nneerü akataajünakat süpüla nakaalinjünüin na wawalayuukana. Müsüjeseʼe shiyaʼlajüin eküülü tü Weteet chakat Ucrania süpüla shiitajünüinjatüin namüin na wawalayuukana sutuma tü 27 Comités de Socorro eekat chayaa.

Na wawalayuu chakana eere sukumajünüin tü waʼyataainkat nachajaamaatüin sukuwaʼipa süpüla sükaalinjain tü Weteet chakalü Ucrania. Na wawalayuu aʼyataakana suluʼu Comité de Coordinadores otta na aʼyataakana suluʼu Comité de Publicación, nachuntuin namüin na aʼyataakana suluʼu Departamento Mundial de Compras naʼyataainjanain namaa waneinnua wawalayuu suluʼukana tü Weteet chakat Ucrania otta Polonia süpüla nakumajüin sukuwaʼipa tü naaʼinrajatkat. Na wawalayuu aʼyataakana suluʼu Departamento de Compras, Envíos otta Asuntos Legales, nümaa wanee wawala aʼyataakai suluʼu tü Weteet chakat Ucrania, nakumajüin soʼukaiwai sukuwaʼipa tü naʼyataainjatkalü anain namaa na aʼyataakana suluʼu Departamento Mundial de Compras.

Anuu nünüiki Jay Swinney, aʼyataakai suluʼu Departamento Mundial de Compras: «Wayaawatüinjatü aaʼu palajana tü choʼujaakat namüin na wawalayuukana, maʼaka saaʼin eküülü otta tü wuleinjatkat atuma nata, tü kiʼrakalü anain naya. Nnojotpejeʼe shiain neʼe waaʼinrüinjatüin tia. Choʼujaasü wachajaainjatüin maʼin sukuwaʼipa süpüla süntamaatüinjatüin tia kasa choʼujaaka namüin chaa Ucrania».

Süpüla maatsoʼu 9 soʼu 2022, atüjaana aaʼu tü aluwataanajatkat namüin na wawalayuukana. Anaajaanüsü shia suluʼu wanee kaaja sümaa tü kasa choʼujaakat maʼin, maʼaka saaʼin asalaa jee jime suluʼuka laata, cereales, roo, kepeshuuna, jawon otta papel higiénico. Ayaawatüna aaʼulu eein süpüla sükataajünüin 65 dólares sünain tü eküülü choʼujaakat namüin na wawalayuukana waneʼewai nakua süpüla pienchi semaana. Süka wainmain na wawalayuu choʼujaakana amüin tia, na wawalayuu aʼyataakana suluʼu Comité de Coordinadores naküjain eein süpüla sükataajünüin sooʼomüin nneerü süpüla süntüin tia namüin na wawalayuukana. ¿Jamüsüche sukuwaʼipa shiitajia natuma mayaainjeʼe eein süpüla jamajüin naya?

Maatsoʼu 13, piamashii wawalayuu chejeʼewaliikana Polonia, alüʼüjashii naya kasa choʼujaaka namüin na wawalayuukana suluʼujee tü Weteet chakat Polonia suluʼumüin wanee almacén chakat Ucrania, pejesü sünain tü mmakat Leópolis. Maʼaka jeʼra kaʼi süpülapünaa tia, na wawalayuu chakana suluʼu tü Weteet chakat Ucrania otta Polonia nakaalinjain naya wawalayuukana sünain akumajaa tü karaloʼuta choʼujaakat namüin süpüla nalatajanain Ucraniamüin. Ashajünüsü sünain tü kemionkat sümaajatüin shia eküülü jee waneirua kasa choʼujaaka namüin na müliakana sutuma tü atkawaakat. Na wawalayuu chejeʼewaliikana Ucrania, nakumajüin sukuwaʼipa süpüla süntamaatüinjatüin tü kemionkat eeinjatüle shia. Süntaka tü kemionkat Leópolis, shiitajünamaataka tü nachisekat namüin na wawalayuu aʼyataakana suluʼu Comité de Socorro. Naleʼejaka nachikuaʼa na piamashiikana wawalayuu Poloniamüin sümaa anain nakuwaʼipa. Ountunüsü tia süka anain sukuwaʼipa natuma tü aainjünakat otta nakaalinjünüin nutuma Jehová.

Anasü maʼin nakuwaʼipa na wawalayuukana soʼu tü palajatkat nakua. Nnojotpejeʼe wainmain tü nalüʼüjakat namüin na wawalayuukana, wanee neʼe tonelada. Choʼujaasü shiʼikajaanüin sooʼomüin kasa namüin na wawalayuukana chakana Ucrania maʼaka saaʼin 200 toneladas. ¿Jamüinjatü sukuwaʼipa süpüla shiʼikajaanüin jee shiitajünüinjatüin shia?

«Aʼyataajeena pümüin süka naaʼin namüiwaʼa na aʼwaajakana pia»

Süchikijee naashajeʼerüin tü ojuʼitakat suluʼu jw.org süchiki tü atkawaa müliaka atuma na wawalayuukana, wainma na wayuu akaalinjeekana sainküin mmakat. Jamüshiijaʼa na kepiakana watta sünain Ucrania, asülajüshii naya süpüshi naʼanneetse süpüla nakaalinjünüin na wawalayuukana otta na kepiakana peje sünain Ucrania, akatatshii naya kaʼi jee nasülajüin waneirua kasa. Tia shia neʼe süpüshi tü aainjünakat.

Chaa Polonia wainma na wawalayuu akaalinjakana süpüla yapainjatüin natuma kaaja alüʼüjünüinjatka chaa Ucrania otta na tepichikana aainjashii dibujo süpüla naluwataainjatüin namüin na wawalayuukana. Anuu nünüiki Bartosz Kościelniak, aʼyataashi nia suluʼu Departamento de Compras suluʼu tü Weteet chakat Polonia: «Aküjünüsü suluʼu Salmo 110:3 aʼyataajeenain maʼin süka naaʼin namüiwaʼa na aʼwaajakana Jehová. Wainmatua taashajeʼerüin tia pütchikat, tayaawatapejeʼe saaʼu shiimain tia süka teʼrüin sünain nakuwaʼipa na wawalayuukana. Wanaa sümaa choʼujaain kaalinwaa antamaatüshii naya sünain akaalinjaa».

Wanee wawala eekai amaʼana compañía naʼanapirüin tü neʼejenakat jee nuwalaajüin tü kosoliinakat süpüla sülüʼüjünüinjatüin tü kasa choʼujaakat namüin na wawalayuukana. Müshi nia: «Sutuma tü taainjakat teeʼiyatüin alin maʼin tapüla na wawalayuukana otta alin maʼin tapüla Jehová. Talatüshi maʼin taya süka takaalinjain na wawalayuukana». Eesü maʼaka saaʼin 7.700 litros kosoliina akataajünaka sünain sülüʼüjünüinjatüin tü kasa choʼujaakat namüin na wawalayuukana otta na wawalayuukana amanejaajüshii naya maʼaka 48.000 kiloometüro.

Soʼu maatsoʼu 28, eʼikajaanüsü Ucraniamüin 100 toneladas eküülü, waneirua kasa choʼujaaka jee müsia medicina. Alatüsü tia piama neʼe semaana süchikijee tü palajatkat nakua otta aʼyataashii maʼin na wawalayuukana süpüla tia. Süka wainmain kasa nasülajaka na wawalayuukana, nnojotsü wainmain nneerü akataajünaka sünain tü kasa aluwataanajatkat namüin na wawalayuukana chaa Ucraniamüin. Alatüirü suulia 190 toneladas tü kasa naluwataaka na aküjaliikana pütchi nüchiki Jehová chaa Ucraniamüin. ¿Jamüsü naaʼin na wawalayuukana sutuma tü asülajünakat namüin?

Aishii maʼin napüla na wawalayuukana

Süntapa tü kaajairua Leópolis, neitajüin shia na aʼyataakana suluʼu Comité de Socorro chaka Ucrania namüin na choʼujaakana amüin shia. Eesü waneirua kaaja eʼikajaanaka suluʼumüin waneirua maa wattaka maʼin suulia Leópolis, maʼaka saaʼin 1.300 kilómetro. Mayaainjeʼe anain maʼin sukuwaʼipa natuma na wawalayuukana nnojotsü antamaatüin namaʼana na wawalayuukana.a

Anuu nünüiki Markus Reinhardt, aʼyataashi nia suluʼu tü Weteet chakat Ucrania: «Sutuma tü alatakat maaʼulu, wainma wawalayuu ayaawatakana aaʼu alin maʼin naya nüpüla Jehová jee anain nakuwaʼipa sutuma noonooin sümaa tü namakat na wawalayuu oʼunirakana sukuwaʼipa tü aʼyatawaakat, maʼaka tü aküjünakat süpülapünaa sülatüin wanee kasa. Aküjünüsü wamüinña wanaajüinjatüin eküülü wepialuʼu jee wüin süpüla maʼaka jeʼra semaana. Anuu nünüiki Anton wanee laülaashi suluʼu tü outkajaaleekat Kiev: ‹Waapüin analuʼut namüin na wawalayuukana saaʼu nakaalinjain waya süpüla wayaawatüin saaʼu tü waaʼinrajatkat sülatüle wamüin kasa eekai müin aka saaʼin tüü, anasü wakuwaʼipa süka eein wamaʼana wüin, eküülü otta müsia wanee raawia›. Anataʼaleesüjaʼa tü naaʼinrakat na wawalayuukana süka noonooin sümaa tü münakat namüin. Sutuma naainjain tia, süchajaain sukuwaʼipa Weteet süpüla saapüinjatüin namüin tü kasa choʼujaakat».

¿Jamüsü naaʼin na wawalayuu akaalinjünakana? Anuu sünüiki Míkola otta Zinaida, kepiakana Járkov: «Sütanalüin maʼin waaʼin tü naaʼinrakat na wawalayuukana wapüleerua, waapüin maʼin analuʼut saaʼu tü eküütkat jee tü medicina nantiraakat. Wayaawata aaʼulu niain Jehová oʼunirüin sukuwaʼipa tia». Anuu sünüiki Valentina kepiaka suluʼu tia mmakat: «Suʼttaiwaʼaya tü atkawaakat, miyoʼu maʼin tü koola waainjakat süpüla waʼyalajüin eküülü jee eesü nnojorüle wantüin sünain tü choʼujaakat wamüin. Niyaawatapejeʼe saaʼu Jehová tü alatakat wamüin, müsüjeseʼe nantirüin na wawalayuukana wepialuʼumüin eküülü jee tü kasa choʼujaakat maʼin wamüin. Weʼrapa kapüleein maʼin tü alatakat wamüin, weʼrüin sünain nükaalinjain waya Jehová otta anasü wakuwaʼipa nutuma. Anasü paaʼin pükaalinjünüle jee sütütüleʼennüle paaʼin wanaa sümaa choʼujaain maʼin shia pümüin».

Anuu nünüiki Evguen sümaa Irina wanaa sümaa nojuʼitüin Mariúpoljee: «Waapüin analuʼut namüin na wawalayuukana süka süpüshuaʼa waaʼin, saaʼu naaʼinmajüin waya namaa na wapüshikana jee nantirüin tü kasa choʼujaakat maʼin wamüin. Anasü maʼin tü naaʼinrakat na wawalayuukana wapüleerua. Weʼrüin sükajee tia alin maʼin waya napüla.

Jaʼyasü maʼin nükaalinjain Jehová na wawalayuukana sükajee tü nüpülainkat süpüla shiitajünüin tü kasa choʼujaakat namüin na wawalayuukana soʼunnaa atkawaa. Müsia neʼe nutuma sükajee tü jüsülajakat suluʼupünaa donate.jw.org; anayaawatsejeʼe jümüin saaʼu jüsülajüliin.

Akaalinjünamaatüshii na wawalayuukana

1. 

   Peʼureeroʼu 24 soʼu 2022: Na wawalayuu aʼyataakana suluʼu Comité de Coordinadores, naküjain sümüin tü Weteet chakalü Ucrania jeʼrainjatüin tü nneerü akataajünakat süpüla nakaalinjünüin na wawalayuukana.

2. 

   Peʼureeroʼu 24 sünainmüin maatsoʼu 8 soʼu 2022: Aʼyalajüsü tü kasa choʼujaakat namüin na wawalayuukana sutuma tü Weteet chakalü Ucrania süpüla shiitajünüin naʼakajee na wawalayuukana aʼyataakana suluʼu Comité de Socorro. Suluʼu tü Weteet chakalü Ucrania, antinnüsü eküülü chejeejatü Polonia süpüla shiitajünüin namüin na wawalayuukana.

3. 

   Maatsoʼu 9 soʼu 2022: Anasü namüin na wawalayuu aʼyataakana suluʼu Comité de Coordinadores, nakaalinjünüin na wawalayuu chakana Ucrania sünain tü kasa choʼujaakat namüin.

4. 

   Maatsoʼu 10 sünainmüin 12 soʼu 2022: Akumajünüsü sukuwaʼipa süpüla shiʼikajaanüinjatüin eküülü jee waneirua kasa Poloniajee chamüin Leópolis (Ucrania).

5. 

   Maatsoʼu 13 soʼu 2022: Oʼunusü tü palajatkat sukua shiʼikajaanüin eküülü jee waneirua kasa Poloniajee chamüin Leópolis.

6. 

   Maatsoʼu 14 sünainmüin 16 soʼu 2022: Na wawalayuu aʼyataakana suluʼu Departamento Local de Diseño y Construcción, nakumajüin sukuwaʼipa suluʼu wanee outkajaalee miyoʼu pejekat sünain tü pueulokot Poznan chaa Polonia, süpüla sukumajünüin tü kaaja kaluʼuinjatkat tü eküütkat jee waneirua kasa aluwataanajatkat.

7. 

   Maatsoʼu 17 soʼu 2022: Pienchi kaʼi süchikijee suluwataanüin tü palajatkat kasa choʼujaaka namüin na wawalayuukana, aluwataanüsü Ucraniamüin 13 toneladas sooʼomüin nakaalinjiainjatka na wawalayuukana.

8. 

   Maatsoʼu 21 sünainmüin 27 soʼu 2022: Akumajünüsü kaajairua chaa Polonia sümaajatü tü kasa aluwataanajatkat namüin na wawalayuukana chaa Ucrania. Eitajünamaatüsü shia namüin na wawalayuukana.

9. 

   Maatsoʼu 28 soʼu 2022: Süchikijee süküjünüin nakaalinjünüinjanain na wawalayuukana, eitajünüsü 100 toneladas eküülü, medicina jee waneirua kasa namüin na wawalayuu chakana Ucrania.

Maaʼutpünaa yaa, eeirü maʼaka 190 toneladas kasa naluwataaka na aküjaliikana pütchi nüchiki Jehová süpüla nakaalinjünüin na wawalayuu chakana Ucrania.