Wanee karaloʼuta jeketü wekirajakalü aka wayuu

Eneeroʼu 2021, naküjain na Laülaashii Jülüjakana Aaʼin na Aküjaliikana pütchi eeinjatü wanee karaloʼuta jeketü süpüla ekirajawaa wayuu, Anainjatka atuma pukuwaʼipa waneepiaa sünülia. ¿Jamüsüche paaʼin paapapa tia? Anuu nünüiki Mateo chejeʼewai nia Canadá: «Talatüshi maʼin taya süküjünapa süchiki tia karaloʼutakat otta tanajapa tü videokot eere süküjain jamüin sukumajünaka tia karaloʼutakat jee jamüin sukuwaʼipa süpüla anainjatüin maʼin shia. Eemaatesü tamaʼana süpüla tekirajüin wayuu süka».

Jeketüipa sukuwaʼipa ekirajawaa wayuu süka tü karaloʼutakat Anainjatka atuma pukuwaʼipa waneepia. Naata maʼin tia karaloʼutakat suulia tü waneirua karaloʼuta wekirajapuʼukalü aka wayuu. Eere shia pümaʼana suluʼu karaloʼutain, piyaawateerü aaʼu naatain maʼin sukumajia. Waashajaa süchiki jamüin maʼin sukumajia tia karaloʼutakat.

Wanee karaloʼuta anaka maʼin sukumajia

Anasü maʼin tü papel akumajünakalü aka shia. Eesü maʼaka 600 ayaakua sünain tü karaloʼutakat Anainjatka atuma pukuwaʼipa waneepia otta anasü maʼin sünoʼu. Alanaʼaleesia suulia tü eekat sünain tü karaloʼutakat Kasa süküjaka. Sünain tü karaloʼuta jeketükat nnojotsü wainmain maʼin leetüra suluʼu tü süpanakalüirua. Arülale maʼin süpana wanee karaloʼuta, eesüjaʼa süpüla jaʼyain tü ayaakua eekat sünain saʼata süpanaka. Süpüla nnojoluin müin sukuwaʼipa tü jeketükat karaloʼuta, na wawalayuu aʼyataakana suluʼu Departamento Internacional de Impresión chakat Wallkill (Nueva York, Estados Unidos), nooʼulaküin nakumajüin tü jeketükat karaloʼuta süka pienchi sukuwaʼipa papel. Nayasaʼa na wawalayuu aʼyataakana suluʼu Comité de Redacción naneeküin tü papel nnojotkat arülain maʼin. Kojutuleesia maʼin tü papel aainjünakalü aka tü karaloʼutakat Anainjatka atuma pukuwaʼipa waneepia suulia tü papel aainjünakalü aka tü waneirua karaloʼutakat. Sutuma anain sukumajia tia karaloʼutakat, eeitpa süpüla jülüjain naaʼin na wekirajüinjana tü nekirajaakalü anain süka nnojoluin jaʼyain maʼin tü ayaakua sünainkat süta süpanaka.

Naata maʼin süta tü karaloʼutakat. Naatasü süta tü karaloʼuta jeketükat suulia tü wane karaloʼutairua wakumajakat süka nnojoluin jorottuin maʼin shia. Sutuma anain maʼin sukumajia süta tü karaloʼutakat nnojotsü laülamaatüin shia sutuma saapaanüin waneepia. Süka kojutuin maʼin tü papel sütainjatkat tia karaloʼutakat, na wawalayuu aʼyataakana suluʼu waneirua Weteet nachajaain sukuwaʼipa süpüla nayaʼlajüinjatüin papel jayatka aaʼin.

¿Jamüsü kojutuka maʼin tü saainjünakalü aka tia karaloʼutakat? Anuu nünüiki süchiki tia wanee wawala aʼyataakai suluʼu Departamento Internacional de Impresión: «Tü keeʼireekat waaʼin shia anainjatüin sukuwaʼipa tia karaloʼutakat jee nnojoluinjatüin süchatajaamatüin». Anuu nünüiki Eduardo, aʼyataashi nia suluʼu tü Weteet chakat Brasil eere shiʼinprimiijünüin karaloʼuta: «Talatüshii maʼin waya süka anain maʼin sukumajia tü jeketükat karaloʼuta, nnojotsü laülaamaatüin shia jee anasü maʼin atumawaa tü nneerü asülajünakat».

Eʼinprimiijünüsü shia soʼunnaa tü ayuuliikat COVID-19

Oʼttushii waya sünain eʼinprimiijaa tü karaloʼutakat Anainjatka atuma pukuwaʼipa waneepia maatsoʼu 2021. Kapüleesü shia süka sukumajünüin soʼunnaa tü ayuuliikat COVID-19. Asürünnüsü Weteet sutuma tü ayuuliikat, müsüjeseʼe kapüleein nantüin na wawalayuukana süpüla nakaalinjain waya sünain eʼinprimiijaa jee nnojoishii ounejaanüin waneinnua wawalayuu süpüla Weteelitainjanain naya. Sutumajee tia, suluʼu kojuyasü Weteet choʼujaashii wawalayuu akaalinjüinjanaka sünain eʼinprimiijaa otta waneirua Weteet asürünnüsü sutuma tü namakat na sülaülashiikana mma.

¿Kasa aainjünaka süpüla shiʼinprimiijünüin tü karaloʼutakat? Aneekünüshii waneinnua wawalayuu aʼyataakana suluʼu Weteet süpüla nakaalinjain sünain eʼinprimiijaa. «Wountuin weʼinprimiijüin tü karaloʼutakat süka nakaalinjain maʼin waya na wawalayuukana jee tütüshii naya sünain tia aʼyatawaakat», müshi Joel aʼyataakai suluʼu Departamento Internacional de Impresión.

Mayaainjeʼe kapüleepuʼuin shia wamüin, kojuya maʼin tü karaloʼutakat Anainjatka atuma pukuwaʼipa waneepia eʼinpürimiijünaka. Wainma maʼin kasa choʼujaaka süpüla saainjünüin tia karaloʼutakat, maʼaka saaʼin planchas de impresión, tü eʼitaanakat saaʼu süta tü karaloʼutakat, papel, tinta otta müsia pegante. Soʼu tü jaʼrai kashi shiʼinprimiijünüin, alanaʼaleesia suulia 2.3 millones dolares akataajünaka sünain. Eʼinprimiijünüsü neʼe tü karaloʼuta nachuntakat na wawalayuukana suluʼu tü outkajaaleekat süpüla nnojoluinjatüin sükataajünüin wainma nneerü.

Shia wanee karaloʼuta anaka maʼin

¿Jamüsüche naaʼin na wawalayuukana jee na wayuu ekirajaakana sünain tü Bibliakat süka tia karaloʼuta jeketükat? Anuu nünüiki Paul chejeʼewaikai Australia: «Kamalainsü maʼin tamüin tekirajüin wayuu süka tü karaloʼutakat Anainjatka atuma pukuwaʼipa waneepia, anasü maʼin sukumajia otta mapüleesat ekirajaa süka. Mapüleesat tü pütchi aküjünakat suluʼu, eesü pütchi atütüleʼeraka saaʼin wayuu, video, ayaakua, gráficos otta tü eekat süpüla naaʼinrüin na ekirajaakana sünain tü Bibliakat. Sutuma anain maʼin tia karaloʼutakat, atütülaasü taaʼin süpüla anain maʼin tekirajia wayuu süka».

Anuu nünüiki wanee wayuu ekirajaakai sünain tü Bibliakat chaa Estados Unidos: «Kamalainsü maʼin tamüin tü jeketükat karaloʼuta. Sutuma mapüleein tü pütchikat, tayaawata aaʼulu tü süküjeekat maʼin achiki. Sütanalüin taaʼin tü video eekat sünain tü karaloʼutakat otta teʼitaweein suluʼu takuwaʼipa tü shikirajeekalü anain taya». Ekirajawaishi nia piantua süpüla semaana otta oʼunawaishi nia sünain tü outkajawaakat namaa na wawalayuukana.

Choʼujaayülia shiʼinprimiijünüin tia karaloʼuta jeketükat suluʼu wainma anüikii. Anasü namüin na Laülaashii Jülüjakana Aaʼin na Aküjaliikana pütchi shiʼinprimiijünüin tia karaloʼutakat suluʼu 710 anüikii. Eʼinprimiijünüsü suluʼu wainma anüikii tia karaloʼutakat suulia tü karaloʼutakat Kasa süküjaka.

¿Jalejeekuwat tü nneerü akataajünakat süpüla shiʼinprimiijünüin tia karaloʼutakat? Shia sünainjee tü nneerü asülajünakat süpüla süküjünüin pütchi sainküin mmakat, eesüjaʼa suluwataanüle suluʼupünaa donate.jw.org. Anasia müin shia jutuma jüsülajüin nneerü süpüla ayatüin saainjünüin karaloʼuta akaalinjaka wayuu süpüla natüjaain saaʼu sooʼomüin nüchiki Jehová jee katüin noʼu waneepia (Salmo 22:26).