«Nnojoishi süpüla alin wapüla Maleiwa», eeshii na wayuu makana sükajee pülashin maʼin nia, kaʼyatüin nia suulia wayuu jee süka mojulaain nia. Wekirajaa jooluʼu sünain tü namakat noʼutku na wayuukana:

• «Achuntüshiaajeʼe taya nümüin Maleiwa, akaisaʼa nnojolin müin tanoujakai maʼin nünain otta eesü jülüjüle taaʼin maalin wayuu nüpüla.» (Marco, Italia.)

• «Mayaapejeʼe taʼyataweein nümüin Maleiwa, isasü tachiki tia süka jülüjapuʼuin taaʼin mojulaain nia sümaa maaliin wayuu nüpüla otta shiain nüchajaain neʼe achiki süsalainjatüin wayuu saainjala nutuma.» (Rosa, Guatemala.)

• «‹Shia neʼe niʼraka Maleiwa tü waainjalakat shiiʼiree süsalain waya nutuma›, mawaisü tanüiki joʼuuiwaʼaya taya. Mapa, shia neʼe jülüjaka taaʼin nuluwataain Maleiwa saaʼu wayuu sümaa maalin shia nüpüla.» (Raimunda, Canadá.)

¿Eeshichejeʼeya süpüla alin wapüla Maleiwa? Kakaliairü maʼin sünain manoulain wayuu nünain chi Maleiwakai. Jamüsüjaʼa süchikijee tü juyakat 500 sünainmüinreʼeya 1500 soʼu wakalia, wainma na wayuu nnojoliikana oʼuraajüin nümüin Maleiwa sutuma mmoluin naya neema. «Nnojoishii süpüla wachuntajanain nümüin chi Maleiwakai süka kaainjaraliin waya, malaaka joo pülashin otta keemain maʼin nia», müsü nünüiki Will Durant wanee wayuu ashajüi süchiki tü kasa alatüitkat.

¿Jamüsü maka nanüiki na wayuukana nüchiki Maleiwa? ¿Jamüsü sünüiki tü Wiwüliakat nüchiki Maleiwa? ¿Eeshiche süpüla alin wapüla Maleiwa watüjaale saaʼu tü shiimainkat nüchiki?

TÜ SÜMAKAT WAYUU

«Matüjaaju aaʼu kasaichin nünülia Maleiwa.» (David Cunningham, suluʼu tü karalouktakat Theological Studies.)

TÜ SÜMAKAT TÜ WIWÜLIAKAT

Müshi chi Maleiwakai nüchiki niakai: «Taya chi kanüliakai Jeʼwaa» (Isaías 42:8, NM). «Chi ekeraajakai tü nümakat», maluʼulu tü nünüliakat Jeʼwaa.

Keeʼireesü naaʼin Maleiwa niʼraajünüin süka nünülia, müsüjeseʼe sümüin tü Wiwüliakat: «Juchunta nünülia Maleiwa, jiʼraajira sümüin wayuu süchiki tü nukuwaʼipakat. Jüküja süchiki yaletüin maʼin tü nünüliakat» (Isaías 12:4, NM).

Nuchuntapuʼuin Jesuu nünülia Maleiwa otta nikirajapuʼuin na nikirajüinkana süchiki tü nünüliakat. Naainjüin tia Jesuu wanaa sümaa nümüin nümüin Maleiwa: «Teʼraajirüin süchiki tü pünüliakat». ¿Jamüsü niʼraajiraka Jesuu nünülia Maleiwa? Müsü nünüiki: «Süpüla aijiraainjanain naya napüla maʼaka alin taya püpüla jee süpüla saʼaniraain takuwaʼipa namaa» (Juan 17:26, NM).

TÜ WATÜJAAKALÜ AAʼU

«Wanee wayuu nnojoikai atüjaain saaʼu nünülia Maleiwa, nnojoishi niʼraajüin nia. Nnojoishi süpüla alinjachin Maleiwa nüpüla wanee wayuu manoujüinre nia nünain», müsü nünüiki Walter Lowrie wanee wayuu ekirajaakai süchiki tü sunoujakalü anain wayuu.

«Tatüjaapa saaʼu Jeʼwaain nünülia Maleiwa, müshi teʼraajakai naaʼin wanee wayuu kakaliaitchikai taapüin achiki. Shiimain tanoujüichipain nünain Maleiwa otta aleewashi maʼin taya nümaa», müshi Victor, wanee wayuu oʼunawaipuʼuka suluʼumüin tü iküleesiakalüirua.

Arütkaashi chi Maleiwakai nanainmüin na wayuu jülüjakana aaʼin nünülia otta müshi nia namüin: «Maʼaka nukuwaʼipa wanee wayuu amülialaakai naaʼin naalii nüchon, meerü takuwaʼipa jümaa sünain amülialaajeerüin taaʼin jaalii» (Malaquías 3:16, 17, NM). Anakuwaʼipalii na wayuu achuntakana nünülia Maleiwa. Müsü tü Wiwüliakat nachiki: «Oʼtteʼenneechi chi wayuu achuntakai nünülia Jeʼwaa» (Roma 10:13, NM).

TÜ SÜMAKAT WAYUU

Müsü wanee karaloukta: «Matüjaaju aaʼu nukuwaʼipa Maleiwa sutuma niajiraain neʼe nümaa Jesuu otta chi naaʼinkai Maleiwa» (Diccionario Akal crítico de Teología). Sümaka waneʼeya: «Na katoolikokana, ortodoxokana, anglicaanokana otta na protestantekana nanouja anainrü tia» (Diccionario abreviado del cristianismo).

TÜ SÜMAKAT TÜ WIWÜLIAKAT

Nnojotsü nüküjüin Jesuu süchiki niajiraain neʼe nümaa chi nüshikai. Müshi nia: «[Oʼunajachi taya] eemüin chi Tashikai, süka laülaain nia toulia» (Juan 14:28). Müshi nia nümüin wanee nikirajüin: «Aleʼejeechi taya nümaʼanamüin chi Tashikai, chi Jüshikai wanaa tamaa, nümaʼanamüin chi Tamaleiwasekai, chi Jümaleiwasekai wanaa tamaa» (Juan 20:17).

¿Kasache wayuu chi naaʼinkai Maleiwa? Saashin tü Wiwüliakat antüshi «chi Naaʼinkai Maleiwa suluʼumüin naaʼinrua waneʼewai nakua» na anoujüshiikana namaiwa. Jee müshi Jeʼwaa: «Tajüteechi chi Taaʼinkai sünainmüin wayuu süpüshuaʼa süpüla nikerolüinjachin suluʼumüin saaʼinrua» (Aluwataaushikana 2:1-4, 17). Chi naaʼinkai Maleiwa, shia tü nütchinkat.

TÜ WATÜJAAKALÜ AAʼU

Müshi Karl Rahner otta Herbert Vorgrimler, katooliko naya: «Nnojotsü süpüla sütüjaanüin aaʼu shiimainre tü aküjünakat süchiki niajiraain neʼe Maleiwa nümaa Jesuu otta chi naaʼinkai, nnojorüle süpansaajünüin süchiki; jaʼitayaakaijeʼe süpansaajünüin achiki, mayaawatujuu aaʼu». Nnojoishi süpüla alinjachin wapüla wanee wayuu nnojoikai weʼraajüin. Makalaka nnojolin süpüla alinjachin wapüla Maleiwa sutuma tü alawaa ekirajünakat nüchiki.

Müshi Marco, chi aküjünakai achiki paala: «Müshi wattaluʼukai naaʼin Maleiwa toulia sutuma tü ekirajünakat nüchiki sünain apünüinshin sümaa waneeshin nia». Müsü tü Wiwüliakat: «Nnojotsü maaʼawain wayuu nutuma Maleiwa» (1 Corinto 14:33, La Biblia de las Américas). Nnojotsü nuunjulajüin Maleiwa tü nüchikikat, niʼraajirüin shia. Müshi Jesuu: «Waya eʼraajaka [chi Wamaleiwasekai]» (Juan 4:22).

Müshi Marco: «Sükajee tatüjaaichipain aaʼu nnojolin apünüinshin sümaa waneeshin chi Maleiwakai, aleewaichipa taya nümaa». Aijeechi wapüla Maleiwa müleka weʼraajüle maʼin nia. Saashin tü Wiwüliakat, «müleka maalinre wapüla wayuu nnojoishi süpüla weʼraajüin Maleiwa süka alin wayuu nüpüla» (1 Juan 4:8).

TÜ SÜMAKAT WAYUU

Saashin wanee karaloukta, ojutünüshii saʼaka siki na mojulaashiikana ouktapa naya (Catecismo de la Iglesia Católica). Naashin noʼutku na shikiipüʼükana tü iküleesiakalüirua, naya ojutünaka saʼaka siki na wayuu kaʼyatakana nuulia Maleiwa.

TÜ SÜMAKAT TÜ WIWÜLIAKAT

«Chi wayuu eekai kaainjalain, oukteechi.» (Ezequiel 18:4, NM.) «Na ouktüshiikana nnojotsü kasain natüjaain aaʼu.» (Eclesiastés 9:5, NM.) Sutuma nnojoluin kasain natüjaain aaʼu na ouktüshiikana otta ouktüin na wayuu kaainjalakana, nnojoishii süpüla müliainjanain naya saʼaka siki.

Tü pütchikat Seol ashajünaka suluʼu tü Wiwüliakat, nnojotsü shiain wanee siki jotusü eere müliain wayuu atumawaa. Shia süküjeeka achiki shiain süpülee tü ouktüsükalüirua. Müsüjeseʼe müin nünüiki Job wanaa sümaa müliain naaʼin sutuma tü ayuulii nünainjatkat: «Kasataalejeseʼe puunjulüin taya suluʼu tü Seolkat» (Job 14:13, NM).

TÜ WATÜJAAKALÜ AAʼU

Jülüjüle waaʼin mojulaain Maleiwa, nnojoleena waya aleewain nümaa. Müsü sünüiki Rocío, wanee wayuu chejeʼewat México: «Aküjünawaipuʼusü tamüin joʼuuiwaʼaya taya sünain müliain wayuu nutuma Maleiwa saʼaka siki. Mmotpuʼusü maʼin taya neema Maleiwa sutuma tü aküjünakat nüchiki otta niayaa taaʼinruʼu wanee Maleiwa eʼrüi wayumüin».

Sütüjaaitpa aaʼu Rocío tü shikirajakalü anain tü Wiwüliakat nüchiki Maleiwa otta sütüjaa aaʼu kasain alatüin sümüin wanee wayuu ouktapa shia. Müsü sünüiki: «Nnojoluitpa shapaain taaʼin sutuma tü alawaa ekirajünakat nüchiki Maleiwa. Tatüjaaichipa aaʼu anamiain Maleiwa sümaa kamaneein nia. Tatüjaaichipa aaʼu niain wanee Maleiwa jülüjakai aaʼin nüchonnii otta niʼreein anain nakuwaʼipa» (Isaías 41:13).

Wainma na wayuu anoujakana nünain Maleiwa sutuma mmoluin naya seema müliaa saʼaka siki. Nnojotsü keeʼireein naaʼin Maleiwa wanoujüin nünain sünainjee tia. Jülüja waaʼin tü nümakat Jesuu: «Anashi aire püpüla [Maleiwa] waneepia süka süpüshua paaʼin» (Marcos 12:29, 30). Watüjaale saaʼu lotuin nukuwaʼipa Maleiwa, nnojoleena mmoluin waya seema tü kasa naaʼinrüinjatkat mapeena namüin na wayuu mojulaakana. Meerü wanüiki maʼaka saaʼin nünüiki Elihú chi naʼaleewainkai Job: «Nnojorüleejaʼa süpüla naaʼinrüin chi Maleiwa shiimainshikai wanee kasa mojusü süka lotuin maʼin nukuwaʼipa sümüin wayuu» (Job 34:10, NM).

Wanaa sümaa chajachin Jesuu suluʼu tü aʼwaajüleekat Maleiwa chaa Jerusalén, aashajaashi nia nüchiki Maleiwa otta süchiki tü alawaa nekirajakalü anain na fariseokana (Juan 8:12-30). Tia, shiiʼiyatüin wamüin choʼujaain watüjaain saaʼu müleka pansaale tü sunoujakat maʼin anain wayuu nüchiki Maleiwa. Müshi Jesuu: «Müleka joonoole sümaa tanüiki waneepia, shiimüinshaana jiain tekirajüin. Je jiyaawateerü aaʼu tü shiimainkat süpüla jujuittüinjanain sütüma suulia achepchiaa» (Juan 8:31, 32).

Wanaa sümaa nüküjüin Jesuu tü pütchikat «müleka joonoole sümaa tanüiki waneepia», niiʼiyatüin wamüin tü waaʼinrajatkat süpüla watüjaain saaʼu pansaale wanee pütchi aküjünaka nüchiki Maleiwa. Shiweetinnüle wanee pütchi nüchiki Maleiwa, wasakira sünain tüü: ¿Pansaasüche tü aküjünakat nüchiki Maleiwa sümaa tü sümakat tü Wiwüliakat otta sümaa tü nikirajakalü anain Jesuu? Shiainjatü waaʼinraka tü naaʼinrakat na wayuu nüküjakana amüin pütchi Pablo, «naashajeʼerawalin waneepia tü karaloukta nüchikimaajatkat Maleiwa süpüla natüjaainjatüin saaʼu müleka müleʼeya tü münakat namüin» (Aluwataaushikana 17:11).

Tia, shia tü naaʼinrakat Marco, tü saaʼinrakat Rosa otta Raimunda, na waashajaakana achiki paala. Ekirajaashii naya sünain tü Wiwüliakat namaa na aküjüliikana pütchi. ¿Kasa neʼraka sünainjee tia?

Müshi Marco: «Chi ekirajakai taya sümaa taʼwayuuse sünain tü Wiwüliakat, asouktüshi nia sükajee tü Wiwüliakat shiʼipajee tü wasakirakalü anain. Sünainjee tia, aishi maʼin wapüla Jeʼwaa otta anasü maʼin wakuwaʼipa».

Müsü Rosa: «Sünüikiyaa neʼe wayuu taaʼinruʼu tü Wiwüliakat. Akatsaʼa sutuma tekirajaain sünain, tayaawata aaʼu maaʼutpünaa sünain shiimain tü shikirajakalü anain. Anoujüitpa maʼin taya nünain Maleiwa maaʼulu».

Müsü Raimunda: «Achuntüsü taya nümüin Maleiwa süpüla teʼraajüinjachin nia. Shiasaʼa maʼaka jeʼra kaʼi süchikijee tia, ekirajünüsü taya sünain tü Wiwüliakat nümaa taʼwayuuse. ¡Talatashaatasü waaʼin sutuma weʼraajüin Jeʼwaa otta sutuma watüjaain saaʼu tü nukuwaʼipakat!».

Suluʼu tü Wiwüliakat, wayaawata aaʼu tü shiimainkat nüchiki Maleiwa otta süchiki anain maʼin nukuwaʼipa. Otta suluʼu tü Wiwüliakat, wayaawata aaʼu «tü kasa anasü aapünakat wamüin» nutuma Maleiwa (1 Corinto 2:12). Pikirajaa sünain tü Wiwüliakat süpüla pütüjaain saaʼu tü kasa anasü naapüinjatkat Maleiwa wamüin mapeena. Puchunta ekirajawaa sünain tü Wiwüliakat suluʼu www.pr418.com /guc jee shiale puchuntüin nümüin wanee aküjüi pütchi nikirajai pia. Paainjüle tia, pütüjaajeerü aaʼu eein süpüla alin püpüla Maleiwa.