¿Kasa watüjaka sünainjee tü kasa pülasü naaʼinrapuʼukat Jesús?
Wanaa sümaa süküjain tü Bibliakat süchiki tü kasa pülasü naaʼinrakat Jesús, ashajünüsü tia pütchikat sünainjee tü pütchikat griego dý·na·mis. Aashajaasü süchiki tü kasa pülasü naaʼinrakat Maleiwa (Lucas 8:46, TNM). Otta müsia eesü süshajünüle süka tü pütchikat «tü kasa anasü nütüjakat apüleerua Maleiwa nümüiwa» (Mateo 11:20; 25:15). Tü pütchikat griego dý·na·mis naashin wanee wayuu ekirajaakai süchiirua sukuwaʼipa tü Bibliakat, shia süküjeeka achiki tü kasa anasü naaʼinrakat Jesús, tü naaʼinrakat sükajee tü nüpülainkat Maleiwa.
Wanee pütchi sünainpünaaka tü kasa pülasü naaʼinrapuʼukat Jesús, shia tü pütchikat griego té·ras (Juan 4:48; Aluwataaushikana [Hechos] 2:19, TNM). Pütchikat tia shia süküjeeka achiki tü kasa ponokot maʼin saaʼin wayuu. Ponowaisü maʼin naaʼin na wayuukana jee na nikirajüinkana Jesús tü kasa pülasü naaʼinrapuʼukat (Marcos 2:12; 4:41; 6:51; Lucas 9:43).
Eetaasü joo wane pütchi sünainpünaaka tü kasa pülasü naaʼinrapuʼukat Jesús, shia pütchikat griego sē·méi·on, «ayaawasee», maluʼulu pütchikat tia. Naashin Robert Deffinbaugh, chi ekirajaaikai süchiirua sukuwaʼipa tü Bibliakat, ayaawatünüshi jaralin maʼin Jesús sünainjee tü kasa pülasü naaʼinrakat.
¿Shiimainchejeʼe naaʼinrüin Jesús kasa pülasü? ¿Nimeejataapa neʼe na wayuukana?
Tü kasa pülasü naaʼinrakat Jesús nnojotsü alawaain. Jamüsüjaʼa soʼu wanee kaʼi, niyuʼluin wanee yolujaa nüleʼeruʼujee wanee jimaʼai. Naaʼinrüin tia sükajee tü nüpülainkat Maleiwa (Lucas 9:37-43). Mapüleesat nümüin Maleiwa naaʼinrüin tia süka pülashaatain nia (Isaías 40:26).
Süküjain tü Bibliakat süchiki 35 kasa pülasü naaʼinraka Jesús. Matüjaajupejeʼe aaʼu jeʼrain maʼin shia süpüshuaʼa. Aküjünüsü suluʼu Mateo 14:14 niʼrüin Jesús watta saalii wayuu, nümüliajakalaka naya sünain niiyajüin eekai ayuulin. Nnojotsü aküjünüin yaa jeʼrashiin napüshuaʼa na wayuu niiyajakana soʼu tia.
Sükajee tü kasa pülasü naaʼinrakat Jesús atüjaana aaʼulu shiimain tü nümakat sünain niainya Nüchoin Maleiwa, chi Mesías aküjünatüjüikai achiki paala. Süküjain tü Bibliakat nuuntuin naaʼinrüin Jesús kasa pülasü sükajee tü nüpülainkat Maleiwa. Anuu nünüiki chi aluwataaushikai Pedro nüchiki Jesús: «Maa aka jütüjaain naaʼu Jesús chi Nazaretjeʼewaikai, nia wane wayuu naaʼinrakai anainjee Maleiwakai watta saalin kasa jiʼrakat, tü kasa nütüjakat apüleerua Maleiwa nümüiwa otta tü kasa niiʼiyatakat aka nüpülain. Sünainjee tia, niiʼiyatüin Maleiwakai sünain niain nünainjeejachin» (Aluwataaushikana 2:22). Naashin Pedro aneekünüsü Jesús nutuma Maleiwa «sükajee tü nüpülainkat jee naapakalaka pülaa nümüin. Suluʼujee tia waraittakalaka nia sünain aainjaa kasa anasü sümüin wayuu. Naawaleʼerüin na wayuu müliakana nutuma chi Yolujaakai, jama eein Maleiwa nümaa» (Aluwataaushikana 10:37, 38, TNM).
Sükajee tü kasa pülasü naaʼinrakat Jesús jee sutuma tü nikirajakalü anain, atüjaana aaʼuchi niain chi Mesíaskai, chi aküjünakai achiki paala. Aküjünüsü suluʼu Marcos 1:21-27 jamüin naaʼin na wayuukana sutuma sukuwaʼipa nikirajia Jesús jee sutuma tü kasa pülasü naaʼinrakat. Suluʼu wetsiikulokot 22, aashajaasü süchiki ponuin maʼin naaʼin na wayuukana jamüin sukuwaʼipa nikirajia. Jee suluʼu tü wetsiikulokot 27, ponusü maʼin naaʼin wanaa sümaa niyuʼluin wanee yolujaa nüleʼeruʼujee wanee wayuu.
Nnojotsü nüküjain neʼe Jesús niain chi Mesíaskai, atüjaana aaʼuchi niainya nia sükajee tü nümakat jee tü naaʼinrakat. Jee müsia sutuma tü kasa pülasü naaʼinrakat sükajee tü nüpülainkat Maleiwa. Soʼu wanee kaʼi, jashichishii na fariseokana nümüin Jesús saaʼu niiyajüin wayuu soʼu tü kaʼi neemeraakalü oʼu na judíokana. Nnojoishii anoujain naya sünain niain chi Nüchonkai Maleiwa. Anuukalaka nünüiki namüin sümaa meimmoluin naaʼin: «Eesü wane apansaajakat maʼi tachikiya alanaʼaleesia sünain anain suulia tü shiimüin nüküjapüʼükat Juan. Shia tü kasa anasü taaʼinrakat. Shiasaʼa sütüma tekeraajüin tü nüchekakat chi Tashikai süpüleerua taaʼinrüin, kooʼomüinsü maʼi tü anoujasükalüirua tanain» (Juan 5:36).
Tü nukuwaʼipakat Jesús sünain aaʼinraa kasa pülasü
¿Jamüsü watüjaaka saaʼu shiimain tü kasa pülasü naaʼinrakat Jesús? Wekirajaa sünain waneirua kasa wayaawataka aaʼu sünain shiimain shia.
Nnojotsü nüchajaain Jesús nuʼwaajünüinjachin sutuma wayuu sünainjee tü kasa pülasü naaʼinrakat. Nüchajaain süchiki niainjachin kojutuin Maleiwa atumawaa. Jamüsüjaʼa süpülapünaa niiyajüin wanee wayuu moʼusai, nüküjain namüin na nikirajüinkana niiyajüinjachin nia süpüla shiʼrüinjatüin wayuu wainma kasa anasü naaʼinreetka Maleiwa nükajee (Juan 9:1-3; 11:1-4).
Wanaa sümaa niiyajüin Jesús wanee wayuu ayuuishi, nnojotsü müin nukuwaʼipa maʼaka naaʼin wanee ooʼulaküi jee wanee piaachi, nnojoishi aaʼinrüin nia wainma kasa jee kamaʼanain lania. Anuu tü naaʼinrakat Jesús wanaa sümaa niiyajüin piamashii wayuu moʼusalii: «Nümüliajüin Jesús na moʼusaliikana sümaa niʼitaain najapü sünain noʼu. Koʼu müshiija na wayuukana. Je süka anaitpain noʼu, noʼunakalaka joo nümaa Jesús» (Mateo 20:29-34). Naaʼinrapa Jesús tia, nnojoishi ayonnajüin, eeʼirajüin jee nnojoishi nia aaʼinrüin waneirua kasa süpüla ponuinjatüin maʼin shia saaʼin wayuu. Naaʼinrüin shia suʼupala wainma wayuu. Naata maʼin nukuwaʼipa Jesús noulia na aaʼinrakana kasa pülasü naashin. Nnojoishi aʼwaatüin sümaa niiʼirajüin. Tü kasa pülasü naaʼinrakat Jesús, naaʼinrüin shia suʼupala wainma wayuu. Maaʼulu yaa, nnojotsü müin sukuwaʼipa natuma na aaʼinrakana kasa pülasü naashin, nnojotsü jaralüin atüjaain saaʼu (Marcos 5:24-29; Lucas 7:11-15).
Watta naalii na wayuu niiyajakana Jesús, mayaainjeʼe nnojoluin kanoulain naya napüshuaʼa. Wanaa sümaa chajachin nia suluʼu tü pueulokot Galilea chaa Capernaúm, «antinnüsü wainma wayuu kaleʼeruʼusü yolujaa nünainmüin Jesús. Nujuittirakalaka tü yolujaakalüirua süka nünüiki je niiyajüin tü ayuuisükalüirua süpüshua» (Mateo 8:16).
Aaʼinrüshi Jesús kasa pülasü süpüla anainjatüin sukuwaʼipa wayuu. Nnojotsü shiain süpüla shiʼrüinjachin neʼe nia wayuu sünain aaʼinraa kasa pülasü (Marcos 10:46-52; Lucas 23:8). Nnojoishi aaʼinrüin Jesús kasa pülasü süpüla niʼnnaajünüinjachin maʼin jee nükanajüinjachin nneerü sünainjee (Mateo 4:2-4; 10:8).
¿Shiimainchejeʼe tü ashajünakat nüchiki Jesús sünain naaʼinrüin kasa pülasü?
Sünainjee tü pienchisü karaloʼuta ashajünakat nüchiki Jesús, watüjaa aaʼu tü kasa pülasü naaʼinrakat. Tia shia Mateo, Marcos, Lucas otta Juan. Wainma tü kasa watüjakalü anainjee shiimain tü sümakat tia karaloʼutakalüirua.
Tü kasa pülasü naaʼinrakat Jesús, naaʼinrüin shia suʼupala wainma wayuu. Wanaa sümaa süshajünüin tü karaloʼutakat, Mateo, Marcos, Lucas otta Juan, nnojoishii outuin napüshuaʼa na wayuu eʼrajakana sukuwaʼipa tü kasa pülasü naaʼinrakat Jesús. Anuu tü sümakat wanee karaloʼutaka, The Miracles and the Resurrection (Tü kasa pülasü naaʼinrakat Jesús otta süsoʼireʼennüin naaʼin): «Mojusü tü namakat waneinnua wayuu nachiki na ashajakana tü karaloʼutakat Mateo, Marcos, Lucas otta Juan. Süka shiain neʼe nashajüin achiki tü kasa pülasü naaʼinrakat Jesús süpüla niʼnnaajünüin maʼin naashin. Nnojotpejeʼe müin shia, na ashajakana tia pienchisükat karaloʼuta nashajüin süpüshuaʼaleʼeya tü kasa alatakat soʼu kaʼikat tia».
Nnojotsü nounjulajüin achiki sünain naaʼinrüin Jesús kasa pülasü na wayuu manoujainkana nünain. Natüjaa aaʼu naaʼinrüin Jesús kasa pülasü, nnojotpejeʼe nanoujain sünain naaʼinrüin shia sükajee tü nüpülainkat Maleiwa (Marcos 3:22-26). Jaʼitakajeʼe na mojukana anüiki nüchiki Jesús süchikijee outuin nia, nnojotsü nounjulajüin achiki tü kasa pülasü naaʼinrakat. Jamüsüjaʼa soʼutpünaa sükalia tü juyakat 200, ayatüsia aashajaanüin achiki tü kasa pülasü naaʼinrakat Jesús. Wainma kasa watüjaka anainjee sünain shiimain tü namakat na ashajakana tü karaloʼutakat Mateo, Marcos, Lucas otta Juan süchiki tü kasa pülasü naaʼinrakat Jesús.
Amülialaasü naaʼin Jesús naalin na müliakana
Nnojotsüjeʼe weʼraajüin nukuwaʼipa Jesús, shiale neʼe wekirajaain achiki sünain shiimain tü kasa pülasü naaʼinrakat. Wanaa sümaa nashajüin na nikirajüinkana Jesús süchiki tü kasa pülasü naaʼinrakat, naküjain naaʼinrüin shia sükajee alin wayuu nüpüla, sümülialaain naaʼin saalin jee nükaalinjeein shia.
Wekirajaa sünain tü naaʼinrakat Jesús wanaa sümaa nürütkaain nünainmüin wanee wayuu mayeinshi sutuma sajaʼttüin nüta. Müshi chi ayuuishikai nümüin: «Müinka pücheküle, piiyaja taya —nümakalaka chi wayuukai. Nümüliajakalaka naaʼin Jesús chi ayuuishikai sünain niyurulain nütüna nünainmüin sünain naapaain nia: —Tacheküin süpüleerua anainjachin pia —nümakalaka. Anaichipa joo chi wayuukai» (Marcos 1:40-42). Tü watüjakat sünainjee tia, shia niyaawatüin saaʼu Jesús jamüin naaʼin na wayuukana, müsüjeseʼe nükaalinjain naya sükajee tü nüpülainkat Maleiwa.
Soʼu wanee kaʼi antüshi Jesús suluʼumüin tü pueulokot Naín. Wanaasü nümaa wopuluʼu nülüʼüjünüin amuuyuupaʼamüin süchon wanee wayuu outa aʼwayuuset. Waneeshichon nia sünain süchooin. Sümülialaakalaka naaʼin Jesús saalin tü wayuukat. Nürütkaaka sünainmüin jee nümaka sümüin: «Nnojo piʼyalajüin, maachee». Nüsoʼireʼerakalaka Jesús naaʼin chi süchonkai (Lucas 7:11-15).
Amülialaasü waaʼin waashajeʼerapa süchiki jamüin naaʼinraka Jesús tü kasa pülasükat. Naaʼinrüin shia süka sümülialaain naaʼin naalin na eʼrakana namüliala jee nükaalinjain naya. Tü kasa pülasü naaʼinrapuʼukat Jesús naaʼinreerü shia mapeena. «Jesucristo, chi wanoujakai anain, matüjainsai aʼwanajawaa. Je tü nukuaippakat paala, müsia aka tü nukuaippakat maaʼulu yaa. Meeria ayatüin shia süpüla kaʼikat süpüshua», müsü tü Bibliakat nüchiki suluʼu Hebreokana 13:8. Aikaleʼennüichipa Jesús sünain aluwatawaa chayaa sirumatuʼu nutuma Maleiwa. Jee naapüin Maleiwa tü nüpülainkat nümüin süpüla naaʼinrajatüin kasa pülasü suulialeʼeya tü kasa naaʼinrapuʼukat wanaa sümaa yaajachin nia saaʼu tü Mmakat. Alüʼütsü sükalia süpüla naaʼinrajatüin kasa pülasü napüleerua na wayuu oonookana nümaa Maleiwa. Nakaalinjeechi pia na aküjaliikana pütchi nüchiki Jehová süpüla pütüjain sooʼomüin süchiki tü kasa anasü naaʼinreetkat Jesús mapeena.
[Ayaakuaa]
Süpüshuaʼa tü kasa pülasü naaʼinrakat Jesús, naaʼinrüin shia sükajee tü nüpülainkat Maleiwa.
[Ayaakuaa]
Amülialaasü naaʼin Jesús naalin na wayuukana süka alin naya nüpüla.