EKIRAJAAYA 37
¿Anasüche woutiisamaatüle taya?
Püneeka maʼaka shiimainre shia jee alawaale shia:
Woutiisainjana napüshuaʼa na anoujashiikana.
□ Shiimain
□ Alawaa
Woutiisainjachi wanee wayuu suulia kaainjaleein nia.
□ Shiimain
□ Alawaa
Woutiisashi wanee wayuu süpüla nuʼttaainjachin.
□ Shiimain
□ Alawaa
Nnojorüle woutiisain taya, nnojoleerü süsalain taainjala nutuma Maleiwa.
□ Shiimain
□ Alawaa
Woutiisainnapale na taʼaleewainkana, anashia woutiisale tayaʼaya.
□ Shiimain
□ Alawaa
¿PAAʼINRÜINCHE tü sümakat tü Bibliakat?, ¿püchajaainche maʼin sukuwaʼipa süpüla aleewain pia nümaa Maleiwa?, ¿paashajaa achiki tü punoujakalü anain namaa na wayuukana? «Aa» pümüle shiʼipajee tü apünüinsükat asakiraa jülüjasüjaʼa paaʼin woutiiseein pia. Jülüjainjatpejeʼe paaʼin kettaale pia süpüla woutiisain. Piyaawateerü aaʼu kettaale pia süpüla woutiisaa maʼaka anale putuma süneekia tü pütchikat sünainka suʼttia ekirajaayakat tüü.
● Woutiisainjana napüshuaʼa na anoujashiikana.
Shiimain. Shiaʼaya nuluwataakalü anain Jesús na nikirajüinkana (Mateo 28:19, 20). Jamüshijaʼa niakaʼaya woutiisashi nia. Akaʼaya piakai, süpüla puushikajaainjatüin süchiirua nukuwaʼipa Cristo. Woutiisainjachi pia piyaawatapa saaʼu laülaain paaʼin jee müsia kettaain pia süpüla.
● Woutiisainjachi wanee wayuu suulia kaainjaleein nia.
Alawaa. Tü woutiisaka süpülajatü shiyaawatüin saaʼu wayuu paapüitpain paaʼin nümüin Jehová. Waapüin waaʼin nümüin Jehová sükajee woonoweein nümüin, nnojotsü shiain shiiʼiree nnojoluinjanain waaʼinrüin kasa mojusü eeka suchuntuin waaʼin.
● Woutiisashi wanee wayuu süpüla nuʼttaainjachin.
Shiimain. Maʼaka süküjain tü Bibliakat, woutiisainjachi wanee wayuu süpüla nuʼttaainjachin (1 Pedro 3:21). Tü woutiisaakat nnojotsü müin aka saaʼin wanee seguro piyaʼlajaka süpüla suwalaajüinjatüin tü kasa mojusü paaʼinrakat. Nnojo, woutiisashii waya süka alin wapüla Jehová jee woonoweein nümaa süka süpüshuaʼa waaʼin (Marcos 12:29, 30).
● Nnojorüle woutiisain taya, nnojorüle süsalain taainjala nutuma Maleiwa.
Alawaa. Müsü sünüiki Santiago 4:17: «Süka jütüjaain saaʼu tü kasa anakat süpüla jaaʼinrüin, müleka nnojorule jaaʼinrüin shia, kaainjaleena jia sükajee tia». Müsia neʼe nakuwaʼipa na woutiisakana jee na nnojoliikana woutiisain, makalaka jülüjeein paaʼin tüü: ¿Piyaawatüinche saaʼu tü pukuwaʼipainjatkat noʼuluʼu Maleiwa?, ¿laülaa aaʼinchiche pia püneekapa wanee kasa? Müle pukuwaʼipa, anashi maʼaka paashajaale namaa na wayuu kachooinkana pia jee nümaa wanee wawala eekai laülaain naaʼin sünain anoujaa, eeshii süpüla nakaalinjain pia süpüla piyaawatüin saaʼu tü paaʼinrüinjatkat süpüla woutiisain pia.
● Woutiisainnapale na taʼaleewainkana, anashia woutiisale tayaʼaya.
Alawaa. Woutiisainjachi pia süka paapeein paaʼin nümüin Jehová (Salmo 110:3). Paaʼinrajatü tia piyaawatapa saaʼu paapüin paaʼin nümüin Jehová süpüla piʼyataainjachin nümüin sümaa nnojoluin wainmajüin paaʼin (Eclesiastés 5:4, 5).
Woutiisapa pia jeketeerü pukuwaʼipa
Woutiisale pia eesüjaʼa süpüla pukooʼomüinrüin piʼyataain nümüin Jehová jee aneerüin pukuwaʼipa nutuma. Tü woutiisaakat nnojotsü ashaitaain. ¿Süka jamüin?, süka pikeraajüinjatüin süpüshuaʼa tü pümakat nümüin Jehová wanaa sümaa paapüin paaʼin nümüin.
¿Alüʼütsüche tü kaʼi woutiisainjachikalü oʼu pia? Talataka maʼin paaʼin. Nnojotsü eein wanee kasa alanaʼaleeka suulia aʼyatawaa nümüin Jehová jee piiʼiyatüin naalin sükajee tü paaʼinrakat soʼu kaʼiwai (Mateo 22:36, 37).
Paashajeʼera süchiki tü paaʼinrajatkat süpüla talatüinjatüin paaʼin.
PÜTCHI SULUʼUJEEJATKA TÜ BIBLIAKAT
«Anaka tosoʼirüle jaaʼin shiiʼiree juʼwaajüinjachi nia süka süpüshuaʼa jaaʼin. Saaʼu jükatannüinapain nütüma suulia jaainjala, jaapajiraa jümata jukuaippa nümüin, [Maleiwa] sünain jiʼyataain waneepia nümüin kataiwaʼaya joʼu süpüla talatüinjachin nia jümaa» (Roma 12:1).
PUUʼULAKA PAAʼINRÜIN TÜÜ:
Puchunta kaalinwaa namüin na kachooinkana pia jee shiale nümüin wanee wawala laülaakai aaʼin sünain anouja süpüla puuntuin woutiisain pia (Aluwataaushikana 16:1-3).
¿PÜTÜJAA AAʼU?
Tü woutiisaka müsü aka saaʼin sukuwaʼipa wanee jeerü süpüla puʼttaainjachin (Ezequiel 9:4-6).
¡TÜ PAAʼINRAJATKAT!
Pütchi suluʼujeejatka tü Bibliakat tayaawatüinjatkalü aaʼu süpüla woutiisain taya: ․․․․․
¿Kasache tasakireetka anain chi tashikai jee tü teikat süchiki tü woutiisaakat? ․․․․․
¿KASA JÜLÜJAKA PAAʼIN SÜCHIKI TÜÜ?
● ¿Jamüsü nnojotka ashaitaain tü woutiisaakat?
● ¿Jamüshii woutiisamaataka waneinnua jimaʼalii jee majayünnüü?
● ¿Jamüsü wainmajaka naaʼin waneinnua jimaʼalii jee majayünnüü süpüla naapüin naaʼin nümüin Maleiwa jee woutiisain naya?
[Komentaario]
«Süka woutiisaitpain taya jülüjasü taaʼin nnojoluinjatüin taya sünainpünaain kasa mojusü» (Noemí).
[Pütchi otta Ayaakuaa]
Süsakirawaika anain wayuu süchiki tü woutiisaakat
¿Jamüsü pimetinnüinjachika shiroku tü wüinkat woutiisapa pia? Pimetinnapa shiroku tü wüinkat, müsü outakai saaʼin tü pukuwaʼipakat. Ooʼulaaichipa pia suulia tü kasa mojusü suchuntaakat paaʼin, shiasaʼa pujuʼitapa shirokujee tü wüinkat, müsü jeketüitpakat saaʼin pukuwaʼipa süpüla shiainjatüin paaʼinrüin tü nüchekakat Jehová püpüleerua.
¿Jamaluʼulu paapüitpain paaʼin nümüin Jehová? Tia maluʼulu nnojoluitpain paaʼinrüin tü keeʼireekat paaʼin pümüiwaʼa süka paapüitpain paaʼin nümüin Jehová (Mateo 16:24). Müsüjeseʼe süpülapünaa tü kaʼi woutiisainjachikalü oʼu pia püküjainjatü nümüin Jehová paaʼinmaainjatüin piʼyataain nümüin jooluʼu.
¿Kasa taaʼinrajatka süpülapünaa woutiisain taya? Paaʼinrüinjatüin tü sümakat tü Bibliakat. Jee püküjainjatüin achiki tü punoujakalü anain namüin na waneinnua otta aleewainjachin pia nüma Maleiwa. Puunteerü tia pikirajaale sünain tü Bibliakat jee puʼuraajüle maʼin nümüin. Aʼyataainjachi pia nümüin Jehová süka keeʼireein shia paaʼin, nnojotsü sükajeejatüin münajalain shia pümüin.
¿Jeʼrache juya kettaaka amaa süpüla woutiisainjachin taya? Nnojotsü choʼujaain wainmainjatüin puuyase. Tü choʼujaakat shia laülaainjatüin paaʼin jee piyaawatüinjatüin saaʼu jamüin paapüinjatka paaʼin nümüin Jehová.
¿Kasache taaʼinrajatka woutiiseere taya, mayaainjeʼe «paʼatapaja paala» namüle tamüin na kachooinkana taya? Nayaawatüle saaʼu na kachooinkana pia püpansaajüinjatüin palajana tü pukuwaʼipakat sümaa tü sümakat tü Bibliakat. Anasü poonoole namaa jee püchajaale sukuwaʼipa süpüla aleewainjachin maʼin pia nümaa Jehová (1 Samuel 2:26).
[Pütchi]
¿Keeʼireesüche paaʼin woutiisain pia?
Sükajee asakiraakat tüüirua, piyaawateerü saaʼu maʼaka kettaale pia süpüla woutiisaa. Nnojo motuin paaʼin paashajeʼerüin süpüshuaʼa tü wetsiikulokalüirua süpülapünaa pusoutuin shiʼipajee.
¿Piʼitaainchejeʼeya paaʼin nünain Jehová?, ¿kasa piiʼiyataka akajee shia? (Salmo 71:5). ․․․․․
¿Piyaawatüinche tü anakat süpüla paaʼinrüin suulia kasa mojuka? Püküja süchiki joujainjatüin paaʼinrüin shia (Hebreokana 5:14). ․․․․․
¿Jeʼratua puʼuraajawalin süpüla kaʼikat? ․․․․․
¿Puchuntuinche nümüin Jehová kasain nükaaliijainjachin anain pia?, puʼuraajapa, ¿jaʼyasüche saaʼu pünüiki alin Jehová püpüla? (Salmo 17:6). ․․․․․
¿Kasa punouteʼereeka sünain sukuwaʼipa puʼuraajia? ․․․․․
¿Jeʼratua pikirajaain pümüiwaʼa sünain tü Bibliakat? (Josué 1:8). ․․․․․
¿Kasa pikirajaakalü achiki, pikirajaapa pümüiwaʼa sünain tü Bibliakat? ․․․․․
Püküja achiki tü paaʼinreekat süpüla anainjatüin putuma pikirajapa pümüiwaʼa sünain tü Bibliakat. ․․․․․
¿Anasüche sukuwaʼipa putuma tü aküjaakat pütchi? (Jamüshijaʼa pia, ¿Atüjashi pia ekiraja sünain tü pütchi mapüleekat suluʼukat tü Bibliakat? ¿Ouyantamaatüshi pia namaʼanamüin na wayuu püküjakana amüin pütchi? ¿Püchajaainche sukuwaʼipa süpüla pikirajüinjachin wanee wayuu?)
□ Aa □ Nnojo
¿Ojuʼitawaishi pia sünain aküjaa pütchi mayaainjeʼe nnojoluin nojuʼitüin na kachooinkana pia? (Aluwataaushikana 5:42).
□ Aa □ Nnojo
¿Kasa paaʼinrajatka süpüla anainjatüin süküjia pütchi putuma? (2 Timoteo 2:15). ․․․․․
¿Oʼunawaishi pia waneepia sünain tü outkajawaakat? (Hebreokana 10:25). ․․․․․
¿Ekirajaʼawaishi pia süpüla pusoutuin shiʼipajee tü asakinnakat sünain tü outkajawaakat? ․․․․․
¿Oʼunawaishiche pia sünain tü outkajawaakat mayaainjeʼe nnojoluin noʼunuin na kachooinkana pia?
□ Aa □ Nnojo
¿Talatüsüche paaʼin sünain aaʼinraa tü nüchekakat Jehová? (Salmo 40:8).
□ Aa □ Nnojo
¿Sotusü paaʼin püchecherüin paaʼin suuʼulakünüle paaʼin natuma na koleejiakana pümaa? (Roma 12:2). ․․․․․
¿Kasa paaʼinrajatka süpüla nnojoluin seemiajaain naalin Jehová püpüla? (Judas 20, 21). ․․․․․
Nooʼulaale suulia anoujaa na kachooinkana pia jee niale wanee paʼaleewain, oʼulaajeeiche pia suulia aʼyatawaa nümüin Jehová? (Mateo 10:36, 37).
□ Aa □ Nnojo
[Ayaakuaa]
Tü woutiisaakat müsü aka saaʼin kasaarüle wanee wayuu, nnojotsü ashaitaain shia